1 Timoteo 2
2
Tento nak totijok chirixeb li kas ki̱tzꞌin joꞌ ajcuiꞌ chirixeb li cuanqueb saꞌ xcuanquil
1Anakcuan aꞌan aꞌin li tinye e̱re: cheqꞌuehak e̱chꞌo̱l chi tijoc chirixeb chixjunileb le̱ ras e̱ri̱tzꞌin. Chextzꞌa̱ma̱nk ut chexbantioxi̱nk chiru li Ka̱cuaꞌ nak textijok. 2Chextijok chirixeb li rey ut chixjunileb li cuanqueb saꞌ xcuanquil re nak cua̱nko saꞌ xya̱lal ut tuktu̱k kachꞌo̱l. Ut ma̱cꞌaꞌ taxak ta̱chꞌiꞌchꞌiꞌi̱nk ke saꞌ li kapa̱ba̱l ut ti̱cak taxak li kachꞌo̱l. 3Chextijok chirixeb chixjunileb xban nak aꞌan li us xba̱nunquil ut aꞌan li nacuulac chiru li Dios laj Colol ke. 4Li Dios naraj nak chixjunileb teꞌcolekꞌ ut teꞌxtau ru chi tzꞌakal cꞌaꞌru li ya̱l. 5Ut li ya̱l, aꞌan aꞌin: nak jun ajcuiꞌ li Dios cuan ut jun ajcuiꞌ li na-oquen ut naa̱tinac chikix chiru li Dios. Aꞌan li Ka̱cuaꞌ Jesucristo li quitzꞌejcualoꞌ nak quicꞌulun saꞌ ruchichꞌochꞌ. 6Ut aꞌan ajcuiꞌ li quixqꞌue rib chi ca̱mc saꞌ kacꞌabaꞌ la̱o re nak ta̱ru̱k tocolekꞌ chikajunilo. Ut nak quicuulac xkꞌehil, li Cristo quixcꞌutbesi chiku lix ya̱lal aꞌin nak quicam chiru li cruz. 7Ut la̱in li taklanbilin xban li Dios chixyebal resil lix ya̱lal aꞌin chiruheb li ma̱cuaꞌeb aj judío. Taklanbilin chixyebal resil re nak teꞌxnau cꞌaꞌru li ya̱l ut teꞌpa̱ba̱nk. Moco ticꞌtiꞌ ta li yo̱quin chixyebal. Tzꞌakal ya̱l nak xakabanbilin chixyebal li resilal reheb.
Cheꞌcua̱nk saꞌ xya̱lal eb laj pa̱banel nak chꞌutchꞌu̱keb chixlokꞌoninquil li Dios
8Yalak bar chꞌutchꞌu̱quex chixlokꞌoninquil li Dios, nacuaj nak eb li cui̱nk teꞌcꞌamok be chi tijoc. Abanan, tento nak ti̱cak xchꞌo̱leb li cui̱nk aꞌin ut ma̱cꞌaꞌak xjoskꞌil chi moco teꞌcuechꞌi̱nk. 9Ut nacuaj ajcuiꞌ nak eb li ixk cheꞌxtikibak rib chi cha̱bil joꞌ xcꞌulub junak aj pa̱banel ut incꞌaꞌ teꞌxnimobresi rib riqꞌuin lix tikibanquil chi moco teꞌxtikib rib yal re nak teꞌrahekꞌ ru. Joꞌ ajcuiꞌ riqꞌuin xyi̱banquil li rismal xjolom. Joꞌ li cꞌaꞌ re ru teꞌxqꞌue cuiꞌ xsahob ru joꞌ li oro ut li terto̱quil pec. Incꞌaꞌ teꞌxqꞌue xcuanquil li nequeꞌxqꞌue chokꞌ xsahob ruheb. 10Li ixk li napa̱ban re li Dios, moco riqꞌuin ta xtikibanquil rib cuan xchꞌinaꞌusal. Riqꞌuin ban lix ti̱quilal xchꞌo̱l. 11Nak te̱chꞌutub e̱rib, eb li ixk incꞌaꞌ teꞌserakꞌik. Teꞌxqꞌue ban xchꞌo̱l chi tzoloc ut cheꞌpa̱ba̱nk chiruheb li cuanqueb xcuanquil. 12La̱in incꞌaꞌ ninqꞌueheb li ixk chixchꞌolobanquil xya̱lal chiruheb li che̱quel cui̱nk, chi moco ninqꞌueheb xcuanquil saꞌ xbe̱neb li cui̱nk. Eb li ixk incꞌaꞌ teꞌa̱tinak saꞌ li chꞌutubaj ib. 13Ninye aꞌin xban nak laj Adán quiyoꞌobtesi̱c xbe̱n cua xban li Dios ut chirix aꞌan quiyoꞌobtesi̱c lix Eva. 14Ut ma̱cuaꞌ laj Adán li quibalakꞌi̱c. Aꞌ lix Eva, aꞌan li quibalakꞌi̱c toj retal nak quima̱cob nak quixkꞌet ra̱tin li Dios. 15Li Dios quixye nak li ixk riqꞌuin raylal ta̱qꞌuiresi̱nk. Abanan, cua̱nkeb xyuꞌam chi junelic cui cauhakeb xchꞌo̱l saꞌ lix pa̱ba̱leb ut cui nequeꞌrahoc ut cui cuanqueb saꞌ ti̱quilal ut saꞌ tuktu̱quilal.
Currently Selected:
1 Timoteo 2: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.