1 Tesalonicenses 5

Yoꞌon cua̱nko ut aj-ajak ku saꞌ li kapa̱ba̱l

1Ut chirix lix kꞌehil ut lix cutanquil xcꞌulunic li Ka̱cuaꞌ Jesucristo, ma̱cꞌaꞌ rajbal tintzꞌi̱bak e̱riqꞌuin xban nak ac nequenau chic lix ya̱lal. 2La̱ex nequenau chi us nak lix cutanquil lix cꞌulunic li Ka̱cuaꞌ Jesucristo, ta̱cha̱lk chi ma̱ ani nanaꞌoc re jokꞌe, joꞌ nak nachal laj e̱lkꞌ chi ma̱cꞌaꞌ saꞌ kachꞌo̱l. 3Nak eb li tenamit yo̱keb chixyebal, “Cuanco saꞌ tuktu̱quil usilal ut ma̱cꞌaꞌ cꞌoxlac”, tojoꞌnak ta̱cha̱lk rosoꞌjiqueb saꞌ junpa̱t chi ma̱cꞌaꞌak saꞌ xchꞌo̱leb joꞌ nak nachal xraylal li yaj aj ixk chi ma̱cꞌaꞌ saꞌ xchꞌo̱l. Ut eb aꞌan incꞌaꞌ teꞌcolekꞌ chiru li raylal ta̱cha̱lk saꞌ xbe̱neb. 4Aꞌut la̱ex herma̱n, moco saꞌ kꞌojyi̱n ta chic cuanquex. Ac nequenau chic lix ya̱lal. Li Jesucristo incꞌaꞌ ta̱cha̱lk chi ma̱cꞌaꞌak saꞌ e̱chꞌo̱l joꞌ nak nachal laj e̱lkꞌ. 5La̱o aj pa̱banel moco cuanco ta chic saꞌ kꞌojyi̱n. Cuanco ban chikajunilo saꞌ cutan saken ut nakanau chic lix ya̱lal xban nak reho chic li Cristo. 6Junelic yoꞌon taxak cua̱nko ut yo̱ko taxak chiroybeninquil lix cꞌulunic li Jesucristo. Incꞌaꞌ takaba̱nu joꞌ nequeꞌxba̱nu li jun chꞌol chic. Aj-ajak ban ku saꞌ li kapa̱ba̱l. 7Eb li nequeꞌcuar, chi kꞌek nequeꞌcuar ut eb li nequeꞌcala, chi kꞌek nequeꞌcala. 8Aꞌut la̱o, li ac nakanau chic xya̱lal, yoꞌon taxak cua̱nko. Li rahoc ut li kapa̱ba̱l, aꞌan taxak ta̱cꞌanjelak ke re kacolbal joꞌ nak li soldado naxcol rib riqꞌuin li chꞌi̱chꞌ li naxqꞌue chire xchꞌo̱l. Ut li kacolbal li yo̱co chiroybeninquil, aꞌan ta̱cꞌanjelak ke joꞌ nak nacꞌanjelac li punit chꞌi̱chꞌ chiru li soldado re xcolbal rib. 9Li Dios incꞌaꞌ quixsicꞌ ku re nak toxqꞌue chixtojbal rix li kama̱c. Quixsicꞌ ban ku re tocolekꞌ saꞌ xcꞌabaꞌ li Ka̱cuaꞌ Jesucristo. 10Aꞌan quicam saꞌ kacꞌabaꞌ re nak usta yoꞌyo̱co usta ac camenako chic nak ta̱cꞌulu̱nk, ta̱cua̱nk kayuꞌam chi junelic kochben aꞌan. 11Joꞌcan ut nak checꞌojob e̱chꞌo̱l che̱ribil e̱rib ut cheqꞌuehak xcacuil e̱chꞌo̱l che̱ribil e̱rib joꞌ li ac yo̱quex chixba̱nunquil.

Laj Pablo naxqꞌue xnaꞌlebeb laj pa̱banel

12Ex herma̱n, nakatzꞌa̱ma che̱ru nak oxlokꞌ cherileb li ani nequeꞌcꞌanjelac chiru li Ka̱cuaꞌ Jesucristo saꞌ e̱ya̱nk. Eb aꞌan nequeꞌcꞌamoc be che̱ru ut aꞌan nequeꞌqꞌuehoc e̱naꞌleb. 13Che-oxlokꞌiheb ut cherahakeb chi anchal e̱chꞌo̱l xban nak nequeꞌxqꞌue xchꞌo̱l chi cꞌanjelac saꞌ e̱ya̱nk. Chexcua̱nk saꞌ usilal che̱ribil e̱rib. 14Nakatzꞌa̱ma che̱ru, ex herma̱n, chekꞌuseb li yal subuc cutan nequeꞌxba̱nu. Cheqꞌuehak xcacuil xchꞌo̱leb li nequeꞌchꞌinan xchꞌo̱leb ut chetenkꞌa ajcuiꞌ li toj kꞌuneb xchꞌo̱l saꞌ xpa̱ba̱leb. Ut chicua̱nk e̱cuyum riqꞌuineb chixjunileb. 15Cheqꞌuehak retal nak ma̱ ani junak saꞌ e̱ya̱nk chixqꞌue re̱kaj li ma̱usilal qui-ux re riqꞌuin ma̱usilal. Cheba̱nuhak ban chi junelic li cꞌaꞌru us che̱ribil e̱rib ut riqꞌuin chixjunileb. 16Junelic chisahokꞌ saꞌ e̱chꞌo̱l. 17Junelic chextijok. 18Chextioxi̱nk riqꞌuin chixjunil li cꞌaꞌru nequecꞌul xban nak joꞌcan naraj li Dios e̱riqꞌuin la̱ex xban nak junajex chic riqꞌuin li Jesucristo. 19Me̱risi xcuanquil li Santil Musikꞌej e̱riqꞌuin. Cheqꞌuehak ban chi cꞌanjelac e̱riqꞌuin, joꞌ naraj aꞌan. 20Me̱tzꞌekta̱na li esil li nequeꞌxye li profeta. 21Cheqꞌuehak ban retal chixjunil ut checꞌu̱lahak saꞌ e̱chꞌo̱l li cꞌaꞌru us. 22Ut chetzꞌekta̱na chixjunil li ma̱usilal. 23Aꞌ taxak li Dios li naqꞌuehoc tuktu̱quil usilal chisantobresi̱nk e̱re chi tzꞌakal ut aꞌan taxak chi-osobtesi̱nk re le̱ ra̱m, le̱ cꞌaꞌux ut le̱ rok e̱rukꞌ re nak texcua̱nk chi tzꞌakal e̱re e̱ru chi ma̱cꞌaꞌak e̱kꞌusbal saꞌ xcꞌulunic li Ka̱cuaꞌ Jesucristo. 24Li Dios, li quisicꞌoc e̱ru, aꞌan ti̱c xchꞌo̱l chixba̱nunquil li cꞌaꞌru naxye ut aꞌan ta̱santobresi̱nk e̱re.

Laj Pablo naxchakꞌrabiheb

25Ex herma̱n, chextijok chikix la̱o. 26Ut cheqꞌuehak xsahileb xchꞌo̱l chixjunileb li herma̱n riqꞌuin santil utzꞌuc u.#Saꞌ li versículo 5:26 najter kꞌe cutan eb li herma̱n cꞌaynakeb chixqꞌuebal xsahileb xchꞌo̱l riqꞌuin li utzꞌuc u. Aꞌan li santil utzꞌuc u nayeman re xban nak saꞌ xcꞌabaꞌ li Jesucristo queꞌxba̱nu aꞌan. 27Chi anchal inchꞌo̱l nintzꞌa̱ma che̱ru saꞌ xcꞌabaꞌ li Jesucristo nak chi-ilekꞌ xsaꞌ li hu aꞌin chiruheb chixjunileb li herma̱n. 28Aꞌ taxak li usilal li naxqꞌue ke li Ka̱cuaꞌ Jesucristo, chicua̱nk e̱riqꞌuin. Joꞌcan taxak.

Currently Selected:

1 Tesalonicenses 5: kek

Highlight

Copy

Compare