1 Corintios 10

Eb laj Israel queꞌxtzꞌek xma̱taneb

1Ex inherma̱n, la̱in nacuaj nak texcꞌoxlak caꞌchꞌinak chirix li cꞌaꞌru queꞌxcꞌul li kaxeꞌto̱nil yucuaꞌ nak queꞌel saꞌ li tenamit Egipto. Li Dios quixtakla li chok chi cꞌamoc be chiruheb ut chixjunileb queꞌnumeꞌ jun pacꞌal li Caki Palau nak quixjach rib re teꞌnumekꞌ. 2Chanchan nak queꞌcube xhaꞌeb saꞌ li chok ut saꞌ li Caki Palau ut riqꞌuin aꞌan queꞌxcꞌul xchꞌo̱leb nak laj Moisés ta̱cꞌamok be chiruheb. 3Ut chixjunileb queꞌxcuaꞌ li maná li choxahil cua li quixtakla chak li Dios. 4Chixjunileb queꞌrucꞌ li haꞌ li quiqꞌueheꞌ reheb xban li Dios. Li haꞌ aꞌan qui-el chak saꞌ li sako̱nac. Ut li sako̱nac aꞌan, aꞌan retalil li Cristo li qui-ochbenin reheb nak yo̱queb chi numecꞌ saꞌ li chaki chꞌochꞌ. 5Abanan moco chixjunileb ta queꞌxba̱nu joꞌ naraj li Dios. Lix qꞌuialeb queꞌxkꞌet ra̱tin li Dios ut xban nak incꞌaꞌ queꞌxba̱nu joꞌ naraj li Dios, joꞌcan nak queꞌcam saꞌ li chaki chꞌochꞌ ut incꞌaꞌ queꞌoc saꞌ li tenamit Canaán. 6Chixjunil aꞌan nacꞌutuc chiku nak incꞌaꞌ takarahi ru li incꞌaꞌ us joꞌ queꞌxba̱nu eb aꞌan. 7Aꞌan naxcꞌut chiku nak incꞌaꞌ takalokꞌoni li yi̱banbil dios joꞌ queꞌxba̱nu eb aꞌan. Joꞌcaꞌin tzꞌi̱banbil saꞌ li Santil Hu chirixeb:

Eb li tenamit queꞌcuaꞌac ut queꞌucꞌac ut queꞌxajoc re xlokꞌoninquil li cuacax oro. (Ex. 32:6)

8Ut naxcꞌut ajcuiꞌ chiku nak incꞌaꞌ us li coꞌbe̱tac yumbe̱tac joꞌ queꞌxba̱nu eb aꞌan ut chiru jun cutan quilajeꞌcam oxib xcaꞌcꞌa̱l mil (23,000) chi tenamit xban li ma̱usilal queꞌxba̱nu. 9Mikaqꞌue xjoskꞌil li Ka̱cuaꞌ Dios joꞌ queꞌxba̱nu eb aꞌan nak queꞌxba̱nu li ma̱usilal ut queꞌtiꞌeꞌ xbaneb li cꞌantiꞌ li quixtakla li Ka̱cuaꞌ Dios ut queꞌcam. 10Chi moco tocuechꞌok, joꞌ queꞌxba̱nu eb aꞌan. Ut xbaneb lix ma̱usilal queꞌcamsi̱c xban li ángel li quixtakla chak li Dios. 11Li cꞌaꞌru queꞌxcꞌul li kaxeꞌto̱nil yucuaꞌ aꞌan tzꞌi̱banbil retalil saꞌ li Santil Hu re nak la̱o takaqꞌue retal ut incꞌaꞌ takaba̱nu joꞌ queꞌxba̱nu eb aꞌan xban nak cuulac re li rosoꞌjic li cutan. 12Joꞌcan nak li ani narecꞌa nak cau xchꞌo̱l saꞌ lix pa̱ba̱l chixqꞌuehak retal lix yuꞌam re nak incꞌaꞌ ta̱oc chi ma̱cobc. 13Moco jalan ta chic li a̱le̱c nequecꞌul la̱ex chiru li nequeꞌxcꞌul chixjunileb. Abanan li Dios ti̱c xchꞌo̱l. Aꞌan incꞌaꞌ nocoxcanab chi a̱le̱c cui incꞌaꞌ takacuy xnumsinquil. Aꞌan ban natenkꞌan ke chixcuybal xnumsinquil. 14Joꞌcan ut ex inherma̱n, raro̱quex inban, me̱lokꞌoni chic li jalanil dios. 15La̱in ninchꞌolob xya̱lal che̱ru xban nak cuan e̱naꞌleb. Ut la̱ex naru te̱ye ma us li ninye malaj incꞌaꞌ. 16Nak nakaba̱nu li lokꞌoni̱nc re xjulticanquil lix camic li Cristo, nocotioxin chiru li Dios. Nak nakucꞌ li xyaꞌal li uva, ¿ma incꞌaꞌ ta biꞌ junajo riqꞌuin li Cristo xban nak quihoyeꞌ xquiqꞌuel chiru li cruz saꞌ kacꞌabaꞌ? Ut nak nakatzaca li caxlan cua li najachiman, ¿ma incꞌaꞌ ta biꞌ junajo riqꞌuin li Cristo xban nak quicam chiru li cruz saꞌ kacꞌabaꞌ? 17Usta nabalo, jun ajcuiꞌ li caxlan cua najachiman ut nakacuotzi. Aꞌan retalil nak la̱o junajo chic riqꞌuin li Cristo. 18Cheqꞌue retal laj Israel. Eb aꞌan queꞌxtzaca li tib li queꞌxmayeja chiru li Dios. Aꞌan retalil nak cuanqueb chi sum a̱tin riqꞌuin li Dios. 19¿Cꞌaꞌru xya̱lal li yo̱quin chixyebal? ¿Ma yoꞌyo ta biꞌ li yi̱banbil dios? Incꞌaꞌ. Ut, ¿ma cuan ta biꞌ xcuanquil li tib li namayeja̱c chiruheb? Ma̱cꞌaꞌ xban nak ma̱cꞌaꞌ xcuanquil li yi̱banbil dios. 20La̱in incꞌaꞌ ninye nak cuan xcuanquil li yi̱banbil dios, chi moco ninye nak li mayejanbil tib cuan xcuanquil. Li yo̱quin chixyebal, aꞌan aꞌin: eb li incꞌaꞌ nequeꞌxpa̱b li tzꞌakal Dios nequeꞌmayejac, aban ma̱cuaꞌ chiru li Dios nequeꞌmayejac. Chiru ban li ma̱us aj musikꞌej. Ut la̱in incꞌaꞌ nacuaj nak yo̱kex chi oque̱nc saꞌ lix naꞌlebeb li ma̱us aj musikꞌej. 21Incꞌaꞌ naru te̱rucꞌ xsaꞌ li secꞌ re xjulticanquil xcamic li Ka̱cuaꞌ Jesús, ut te̱rucꞌ ajcuiꞌ xsaꞌ li secꞌ re xqꞌuebal xlokꞌal li ma̱us aj musikꞌej. Chi moco naru te̱cuaꞌ li caxlan cua re xjulticanquil xcamic li Ka̱cuaꞌ Jesucristo ut te̱cuaꞌ ajcuiꞌ li cua mayejanbil chiruheb li ma̱us aj musikꞌej. 22Incꞌaꞌ us cui takaqꞌue xjoskꞌil li Ka̱cuaꞌ riqꞌuin xlokꞌoninquil li yi̱banbil dios. ¿Ma la̱o ta biꞌ nim kacuanquil chiru li Ka̱cuaꞌ? Ma̱ jokꞌe xban nak la̱o ma̱cꞌaꞌ kacuanquil.

Chixjunil li cꞌaꞌak re ru takaba̱nu rehak xlokꞌoninquil li Dios

23Cuan li nequeꞌyehoc re nak naru nakaba̱nu chixjunil li nakaj. Ya̱l nak naru nakaba̱nu, abanan moco chixjunil ta us xba̱nunquil. Ya̱l nak naru xba̱nunquil chixjunil, abanan moco chixjunil ta li cꞌaꞌru nakaba̱nu nocoxtenkꞌa chi qꞌui̱c saꞌ li kapa̱ba̱l. 24Me̱sicꞌ li us caꞌaj cuiꞌ chokꞌ e̱re la̱ex. Chesicꞌ aj ban cuiꞌ li us chokꞌ reheb le̱ ras e̱ri̱tzꞌin. 25Naru te̱tzaca chixjunil li tib nacꞌayiman saꞌ li cꞌayiba̱l, ut me̱patzꞌ ma mayejanbil chiru li yi̱banbil dios re nak ma̱cꞌaꞌak e̱cꞌaꞌux nak te̱tzaca. 26Naru te̱tzaca xban nak li Ka̱cuaꞌ Dios aꞌan laj e̱chal re li ruchichꞌochꞌ ut aꞌan ajcuiꞌ laj e̱chal re chixjunil li cuan saꞌ ruchichꞌochꞌ. 27Cui junak ma̱cuaꞌ aj pa̱banel tatxbok chi cuaꞌac riqꞌuin ut cui naxcꞌul a̱chꞌo̱l xic riqꞌuin, li cꞌaꞌru tixqꞌue chatzaca, chacꞌul. Abanan incꞌaꞌ ta̱patzꞌ ma mayejanbil li tzacae̱mk aꞌan re nak ma̱cꞌaꞌak a̱cꞌaꞌux nak ta̱tzaca. 28Aꞌut cui junak naxye a̱cue nak li tzacae̱mk aꞌan mayejanbil chiru li yi̱banbil dios, incꞌaꞌ ta̱tzaca aꞌan re nak incꞌaꞌ ta̱chꞌina̱k xchꞌo̱l li xyehoc a̱cue nak mayejanbil tzacae̱mk ut re ajcuiꞌ nak incꞌaꞌ ta̱oc xcꞌaꞌux. 29Incꞌaꞌ yo̱quin chixyebal aꞌin chirix la̱ cꞌaꞌux la̱at. Yo̱quin chi a̱tinac re nak incꞌaꞌ ta̱chꞌina̱nk xchꞌo̱l li jun chic a̱ban la̱at. Ma̱re junak e̱re ta̱chakꞌok ut tixye cue, ¿cꞌaꞌut nak incꞌaꞌ tinba̱nu li naru tinba̱nu yal xban nak jalan chic naxye nak incꞌaꞌ us xba̱nunquil? 30Ut cui la̱in nintioxin chirix li cꞌaꞌru nintzaca, ¿cꞌaꞌut nak ta̱cuechꞌi̱k rix li cꞌaꞌru tintzaca? chaꞌak. 31La̱in tinye e̱re lix ya̱lal. Chixjunil li cꞌaꞌru te̱tzaca ut chixjunil li cꞌaꞌru te̱ba̱nu, cheba̱nuhak re xqꞌuebal xlokꞌal li Ka̱cuaꞌ Dios. 32Me̱ba̱nu li cꞌaꞌak re ru napoꞌoc xchꞌo̱leb le̱ ras e̱ri̱tzꞌin usta aj judío, usta ma̱cuaꞌeb aj judío. Chi moco te̱ba̱nu li cꞌaꞌru ta̱poꞌok xchꞌo̱l le̱ rech aj pa̱banelil. 33Joꞌcan nak la̱in ninyal inkꞌe chixba̱nunquil li us re xtenkꞌanquil chixjunileb. La̱in incꞌaꞌ yo̱quin chixsicꞌbal li us chokꞌ cue la̱in injunes. Yo̱quin ban chixsicꞌbal li us chokꞌ reheb chixjunileb re nak ta̱ru̱k teꞌcolekꞌ.

Currently Selected:

1 Corintios 10: kek

Highlight

Copy

Compare