Lute 1
1
Elimeleke na nanga yendi vaya ku Mowavi
1Laja a matangwa aje omo vaIsalele te kanda vakale na mwene, kwakele njala ya lyangengela mu lifuti lya Yunda. Co munalume umo lizina lyendi Elimeleke, wa ku cikota ca Efaleta watundile ku Mbetelehema mu Yunda, waile amolika na munakazi wendi na vana vavo va vanalume vavali kukakala kasimbu lika mu lifuti lya Mowavi. 2Lizina lya munakazi wendi lyapwile Naumi, co mazina a vana vavo vavali apwile Mahelone na Kilyone. 3Omo vakele kuje, Elimeleke watsile, co Naumi wasalele endi lika na vana vendi vavali. 4Vana vendi vambatele vambanda va vaMowavi, mazina avo, Olepa na Lute. Omo myaka likumi yetile, 5Mahelone na Kilyone vatsile lalo, co Naumi wasalele endi lika wajenekele munalume wendi nameme vana vendi.
Naumi na Lute veluka ku Mbetelehema
6A simbu imo, omo Naumi wazivile ngeci Shukulu Kalunga navezikisa vanu vendi nakuvana vimbuto vyavivwa, walivwaeselele kutunda mu lifuti lya Mowavi amo na vainamweno. 7Vakatukile amo mukwiluka ku Yunda. Oloni a ngila, 8Naumi wendekele kuli vainamweno ngwendi, “Ilukeni ku membo eni mukakale na vanyokweni. Shukulu Kalunga alinge neni mwamuvwa, ngwe muje mumwalingile kuli yange na kuli vaje vanatsi. 9Shukulu Kalunga amikwase ngeci mukashomboke nakukakala lalo na vinjuvo vyeni.”
Ngecivene, Naumi wavatsembele, oloni vakevo vashangumukile kulila manene, 10asinoni vendekele kuli ikeye ngwavo, “Embwe! Yetu tuya amo nove ku vanu vove.”
11Naumi wavakumbulwile ngwendi, “Munapande kwiluka, vana vange. Omwo vikajo mushaka kuya nange? Kuma mwayongola ngweni yange njasa kukita lalo vana va vanalume ngeci vamyambate ndi? 12Ilukeni ku membo eni, omwo yange njakuluvala laja mukushomboka lalo. Nameme nga kucili cinyangavili cakushomboka ku vutsiki vuno nakukita vana va vanalume, 13kuma mukasa kuvavandamena noo vanakolo ndi? Kuma eci casa kumivindika kushomboka ku vanalume veka ndi? Embwe, vana vange, mwazivuka ngeci eci cacikalu. Shukulu Kalunga nanjikengesa nima, co yange njili na vusiwa vwakama ali yeni.”
14Co vashangumukile lalo kulila. Asinoni Olepa watsembele vainamweno, wavasalesele, co welukile kwimbo lyavo, oloni Lute kelukile. 15Ngecivene, Naumi wendekele kuli ikeye ngwendi, “Munange, munyanyoko neluka kuli vavushoko vwendi, na kuli vinjambi vendi. Co nove lalo iluka kwimbo lyeni.”
16Oloni Lute wamukumbulwile ngwendi, “Kesi unjisindiye kwiluka kwimbo ngeci njikuseze embwe! Njitave njiye amo nove. Kwoshe kuukaya, nange kunjikaya, kwoshe kuje kuukakala, nange kunjikakala. Na vanu vove vakapwa vanu vange, co Njambi yove akapwa Njambi yange. 17Kwoshe kuje kuukatsila, nange kunjikatsila, kuje vene kukekwo kuvakanjitsinda. Shukulu Kalunga anjisinge nga njitava cuma cimo cakunjangununa kuli yove, kuvanga kutsa!”
18Omo Naumi wamwene ngeci Lute namukakateya kuya amo nendi, co kendekele lalo cuma cimo.
19Vaile, noo vetele ku Mbetelehema. Omo vetele, nganda yoshe valisimokele, co vanakazi va muje vakasamene ngwavo, “Ha! Ou mwa vushunga ikeye Naumi ndi?”
20Naumi wavakumbulwile ngwendi, “Kesi munjitumbule lalo Naumi embwe. Njitumbuleni ngweni Mala,#1:20 NAUMI...MALA: Mu ciHevelu nkumbu ya Naumi inapu, kuvwaelela, co kulumbunuka kwa Mala kunapu kakungunyewe. omwo Njambi Muka-nzili yoshe nalingisa mwonyo wange kuvinjoka. 21Omo njatundile kuno, njakele na vyavingi, oloni Shukulu Kalunga nanjiilwisa mavoko-voko. Vikajo munjitumbula ngweni Naumi omwo Shukulu Kalunga Muka-nzili yoshe nanjimwesa tuyando?”
22Ngecivene, omu mukemwo mwatundilile Naumi ku Mowavi amo na Lute, vainamweno va ku muyati wa Mowavi. Vakevo vetele mu Mbetelehema a simbu yakushangumuka kuteja mbale ya maumwa.#1:22 MBALE YA MAUMWA: Mbale ya maumwa yalifwa na masha akuvenga.
Currently Selected:
Lute 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006