Njwele 1
1
1Awa akewo majwi a Shukulu Kalunga kuli Njwele muna Petwele.
Vanu valinyenga akuviya kwa vimbuto
2Tolilileni, yeni vakulunu,
munu woshe ali mu Yunda, atolilile.
Kuma cuma cimo cakufwa ngwe
eci calingiwile a simbu yeni
nambe a simbu ya vakukulwila veni ndi?
3Lekeniko vana veni cuma eci,
na vakevo vakalekeko lalo vana vavo,
co vana vavo lalo vakalekeko cisemwa
cije cikaija kulutwe.
4Vinjame na vinjame vya vimbimba vyalile vimbuto,
co vimbuto vije viyasezele njame imo,
njame ikwavo yavinyongesele.
5Indukeni mulile,
yeni vaka-kupenda,
lileni, yeni vaka-kunwa vinyu,
mikolovozi ya vushuka vwa vinyu
vuje mukalingi vinyu vyaviha vanainyongesa.
6 #
Kuj 9:8
Vungi vwa vimbimba mikumbi
vanaviisa lifuti lyetu,
vapwile vaka-nzili manene,
co lalo vapwile vavangi,
vaje naumo wai wasele kuvalava,
mayo avo apwile akuvambuka ngwe a ndumba.
7Vananyongesa mikolovozi yetu ya vushuka vwa vinyu,
nakulenda miti yetu ya mikuyu yoshe njwa.
Yoshe vanaikovonona vyula,
nakuseza minango mwangoco too.
8Lileni, yeni vanu, ngwe mumbanda
alila kutsa kwa munalume
uje nashakele kumwambata.
9Kukwesi vimbuto nambe vinyu
vyakulambula mu Njuvo ya Shukulu Kalunga,
vaka-kukombelela valinakulila
omwo kukwesi vin̄ombelo vyakukombelela
kuli Shukulu Kalunga.
10Mahya anaviya, lifuti lilinyenga,
omwo vimbuto vinanyongo,
na mikolovozi ya vushuka vwa vinyu
inomu yoshe cau,
na miti ya olive yajujwama.
11Linyengeni, yeni vandimi,
lileni mbimbi-mitwe,
yeni vaka-kunyunga vitungu
vya mikolovozi ya vushuka vwa vinyu,
omwo tiliku na mbale ya maumwa
na vimbuto vyoshe vinanyongo.
12Mikolovozi ya vushuka vwa vinyu
na miti ya mikuyu yajujwama,
miti yoshe ya vushuka yajujwama, co inatsi.
Kujolela kunahu muli vanu.
13Yeni vaka-kukombelela mukapanga ku mutula,
zaleni vikeleya,
linyengeni nakulila mbimbi-mitwe!
Yeni mu Njuvo ya Shukulu Kalunga nakulila
vutsiki vwoshe,
omwo kukwesi vimbuto nambe vinyu
vyakukombelela kuli Njambi yeni.
14Shikeni lishiko lyakulikela kulya,
co saneni mbunga yoshe ya vanu!
Kungulwileni vantwama
na vanu voshe va mu Yunda
mu Njuvo ya Shukulu Kalunga
Njambi yeni nakulilila kuli ikeye!
15 #
Isa 13:6
Litangwa lya Shukulu Kalunga lili muyehi,
litangwa lije omo Muka-nzili yoshe akanena kunyonga.
Litangwa lije likapwa lyakujujwisa!
16Tulinakukengelela kwakujeneka cinyangavili
omwo vimbuto vyetu vilinakunyonga.
Kukwesi lalo kujolela
mu Njuvo ya Shukulu Kalunga Njambi yetu.
17Vimbuto vyoshe vinatsila mu livu lyakuma.
Kukwesi vimbuto vyakutulika vyai,
ngecivene, vishete vinapu vyamupulungwa.
18Vingombe vakumbuka manene
omwo kukwesi noku kuvalila mwila wauvwa,
co lalo matanga a vimanga alinakuyanda.
19Njitambeka kuli yove Shukulu Kalunga,
omwo mwila na miti yoshe vinomu cau,
ngwe vije vivanenyeka na tuhya.
20Nameme tusitu valinakutambeka kuli yove,
omwo vindonga vyoshe vinomu cau.
Currently Selected:
Njwele 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006