Yakomba 1
1
1Mukanda wakutunda kuli yange Yakomba, ngamba ya Njambi na Mwene Yesu Kilistu.
Viindu kuli vanu voshe va Njambi vaje vanashandokela mu kaye mwoshe.
Kukulaela na mana
2Vasamba vange, liyongoleni yeni vavenya ngweni mwavezika omo vyeseko vyavingi vilinakwija kuli yeni, 3omwo munazivuka ngweni kweseka kwakukulaela kweni kulingisa lukakateya. 4Co lukakateya lweni lumyetese na ku shongo kujeneka kwonwa, ngeci mupwe vakujela vamutunu, nakujeneka cuma cimo. 5Oloni nga kuli umo weni najeneka mana, alombe kuli Njambi, uje akamwanawo, omwo Njambi akana kuli vanu voshe nakushemutuka na kutetela. 6Oloni nga ulombela, unapande kukulaela kesi ushame-shame embwe. Omwo woshe uje ashama-shama napu ngwe linkimba lya mu mema a kalunga lije lipekumukila kwoshe kuje kuliya lihunzi. 7Omwo munu wa cifwa cangacije kesi ayongole ngwendi akatambula cuma cimo kuli Mwene. 8Munu wa vimbunge vivali akapelyangela mu vingila vyendi vyoshe.
Vuutu na vufuko
9Vaka-Yesu vaje vanapu tuutu vanapande kuvwaelela omo Njambi avajundula, 10co vaka-Yesu vaje vanafuku vanapande kuvwaelela omo Njambi avakeesa. Omwo vaka-kufuka vakapekumuka ngwe vishani vya muti. 11Omo litangwa lituuka na misha yalyo ya ntwima nakujujwamesa mwila, co vishani vyakwo vitotomoka na vuvwa vwavyo vunyonga. Ngecivene, mu cifwa cimo vene muka-kufuka akanyonga omwo acitwalelelao mu vilinga vyendi.
Vyeseko vinena vivezikiso
12Vanavezika vanu vaje valongwa a simbu ya vyeseko, omwo nga vahyana na kukakateya mu ceseko eci, co vakatambula mwonyo kupwa cikandelela cavo uje wanakulaesa Njambi kuli vaje vaazema. 13Nga munu vamweseka na vyeseko vyangacije, co kapandele kwendeka ngwendi, “Vyeseko evi vilinakutunda kuli Njambi.” Omwo Njambi kucitava kumweseka na vuvi, co ikeye vavenya kesi kweseka munu naumo wai. 14Oloni munu na munu amona vyeseko omo mashungu endi ikeye vavenya alinakumukoka nakumukwata. 15Asinoni mashungu omo emita, co akita vuvi, co vuvi omo vunakolo, co vukita kutsa.
16Kesi vamikwise, vasamba vange vanjazema! 17Cashu coshe cacivwa na vwana vwoshe vwavuvwa vyatunda mwilu, vyatunda kuli Njambi, Ishamatanga wa vyeke vya mwilu, uje kesi kutenguluka nambe kunena lisusulungu akutenguluka. 18Ku cizango cendi natutanga yetu a lijwi lya vushunga, ngeci tupwe mushoke wakulivanga akati ka vyoshe vije vyatangele.
Kuziva nakulinga
19Anukeni eci, vasamba vange! Munu woshe napande kuzambula kuziva, oloni eshwale kukumbulula nakwishwala kuluvala. 20Omwo vukalu vwa munu kuvwesi kuvwaesa vutumbe vwa vushunga vwa Njambi embwe. 21Ngecivene, umbileni kuti vyuma vyoshe vije vinapu vya mazilo na vilinga vyavivi. Likeeseni kuli Njambi nakutambula lijwi lije akuna mu vimbunge vyeni, lije lyasa kumyovola.
22Kesi mulikwise yeni vavenya mukupwa vaka-kuziva lijwi lyendi lika, oloni pweni vaka-kulipangesa. 23Omwo nga mutolilila ku lijwi oloni kumulipangesa munapu ngwe vanu vaje valikengela a kalikengelo, co valimona muje muvafwa vakevo vavenya. 24Valikengelao, co vaya, co vwasi-vwasi vevala muje muvafwa. 25Oloni woshe uje akengesesa a mashiko akujela aje akapatula vanu, co uje kawatolilila lika asinoni awevala, oloni awapangesa, munu uje Njambi akamuvezikisa mu vyoshe vije alinga.
26Nga munu umo ayongola ngwendi ikeye muka-kulemesa, co kononwesa ndaka yendi, kulemesa kwendi kunapu kwangoco, co alinakulikwisa ikeye vavenya. 27Kulemesa kwakuvwa kuje kwanayongola Njambi Tate kukekwo oku, kulela visiwa na vifwile mu tuyando twavo nakulinyunga ikeye vavenya kutunda ku vyuma vya mazilo vya mu kaye.
Currently Selected:
Yakomba 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006