1 Kolinte 1
1
1Mukanda wakutunda kuli Paulu, uje ivasanene ku cizango ca Njambi kupwa muluwa wa Kilistu Yesu, na ndolome yetu Sosetenese.
2 #
Vil 18:1
Ku cikungulukilo ca Njambi cije cili mu Kolinte, kuli vaje voshe vavanasana ngeci vapwe vanu va Njambi vakujela, vaje vanakundama kuli ikeye amo na Kilistu Yesu, amolika na vanu voshe kwoshe-ikwoshe vaje vakalemesa Mwene yetu Yesu Kilistu, Mwene yavo na Mwene yetu.
3Njambi Tatetu na Mwene Yesu Kilistu vamyane kutetela na kwoloka.
Vivezikiso muli Kilistu
4Simbu yoshe njikakandelela kuli Njambi omwo yeni, omwo kutetela kuje kwanamyana Njambi ali Kilistu Yesu. 5Omwo muli Kilistu vanamipwisa vaka-kufuka mu vyuma vyoshe, kuwezelelako na endekesi yoshe na mana oshe. 6Lijwi lya Kilistu vanalikolesa nakulitakamesa muli yeni 7ngecivene, kumwonwene kutambula civezikiso cimo, omo mulinakuvandamena kusholoka kwa Mwene yetu Yesu Kilistu. 8Ikeye lalo akamikolesa mbe na ku shongo, ngeci kesi vakamiwane na mulonga a Litangwa lya Mwene yetu Yesu Kilistu. 9Njambi vanapande kumukulaela, Njambi uje wamisanene ngeci mukale mu kulitombola amo na Munendi Yesu Kilistu Mwene yetu.
Kulyangunuka mu cikungulukilo
10Njimilambelela vavusamba vange, na moko ya Mwene yetu Yesu Kilistu ngwange, lizivasaneni mu vyoshe vimwendeka, ngeci kesi kukakale kulyangunuka akati keni. Oloni litomboleni mwamuvwa, na viyongola vimo na cizango cimo. 11Omwo vanu vamo va ku naanga ya Koloe vananjileka ngwavo akati keni vavusamba vange ali vimata. 12#Vil 18:24 Njilinakulumbununa ngwange, akati keni munu na munu alinakwendeka vyuma vyakulyangunuka. Umo endeka ngwendi, “Yange nji muka-Paulu”, mukwavo ngwendi, “Yange nji muka-Apolo”, weka ngwendi, “Yange nji muka-Petulu”, co weka ngwendi, “Yange nji muka-Kilistu.” 13Kuma Kilistu vanamwangununa ndi#1:13 KILISTU VANAMWANGUNUNA: Kunungulula kumo ngwavo, Kilistu kuvasa kumwangununa. mu mitambela! Kuma Paulu ikeye wamitsililile a cilindakano ndi? Kuma vamimbwitikile mu lizina lya Paulu ndi?
14 #
Vil 18:8; 19:29; Lom 16:23 Njikandelela Njambi omwo kunjambwitikile umo wa ali yeni kuvanga lika Kilisipase na Ngayase. 15Ngecivene, naumo wai endeka ngwendi vamimbwitikile kupwa vandongisi vange. 16#1 Koli 16:15 (Eyo, kuma njambwitikile lalo Setefanase na naanga yendi, oloni kunjasa kwanuka nga njambwitikile weka lalo.) 17Omo Kilistu kanjitumine mukumbwitika. Oloni wanjitumine mukwambulula Vin̄anda Vyavivwa, nakuvyambulula kujeneka kupangesa endekesi ya mana a vanu, kutewa cilindakano ca Kilistu cipwa cangoco.
Kilistu ikeye nzili na mana a Njambi
18Omwo lijwi lya kutsa kwa Kilistu a cilindakano linapu lyangoco kuli vaka-kuzimbala, oloni kuli yetu vaka-kwovoka linapu nzili ya Njambi. 19#Isa 29:14 Omwo visoneka vyendeka ngwavyo,
“Njikanyongesa mana a vaka-kunyanyama,
nakuzimangana mana a vaka-kulilongesa.”
20 #
Yom 12:17; Isa 19:12; 33:18; 44:25 Ngecivene, muka-mana ali kuli? Nambe vaka-kulilongesa? Nambe muka-vimata wa mutongwe wa ano a kaye? Njambi namwesa ngeci mana a ano a kaye anapu a vulema!
21Omwo Njambi mu mana endi nalingisa vanu ngeci kesi vamuzivuke mu mana avo. Oloni mu ngila eyi ya muzimbu vatumbula ngwavo wa “vulema” tulinakwambulula, Njambi wayongwele kwamena vaje vakulaela. 22Omwo vaYunda vashakezeka vizivukiso kupwa vukaleo, co vaje kesi va Yunda vashakezeka mana. 23Oloni yetu, tulinakwambulula Kilistu wakushukika a cilindakano, muzimbu uje unapu citanukiso kuli vaYunda na vulema kuli vaje kesi vaYunda, 24oloni kuli vaje vaanasana Njambi, vaYunda na vaje kesi vaYunda, muzimbu ou ukewo Kilistu, ikeye napu nzili ya Njambi na mana a Njambi. 25Omwo vije visholoka ngwe vulema vwa Njambi vili na mana manene kutuvakana mana a vanu, co vije visholoka ngwe kuzeya kwa Njambi vinapu vya nzili manene kutuvakana nzili ya vanu.
26Omwo ololo vavusamba vange, anukeni mumwafwile laja, omo Njambi wamisanene. Kweseka na viyongola vya vanu, vavandondo lika akati keni vapwile vaka-mana, nambe vaka-nzili, nambe vaka-vulemu. 27Oloni Njambi mu cizango cendi waangwile vije vivayongwele vaka-kaye ngwavo vyangoco ngeci azivise shwamwa vaka-mana, co lalo waangwile vije vivayongwele vaka-kaye ngwavo vyakuzeya ngeci azivise shwamwa vaka-nzili. 28Ikeye waangwile vije vivashawile vaka-kaye nakuviyeluwisa nakuviyongola ngeci vinapu vyangoco, ngeci anyongese vije vivayongola vaka-kaye ngwavo vinapu vya vulemu. 29Ngecivene, naumo wai asa kulishasha ku mesho a Njambi. 30Oloni Njambi namyaka amo muli Kilistu Yesu, co Njambi napwisa Kilistu mana etu. Ali ikeye tunapu vaka-vushunga ku mesho a Njambi, tunapu vana va Njambi vakujela, co vanatupatula. 31#Njele 9:24 Ngecivene, ngwe muvyendeka visoneka ngwavyo, “Woshe uje ashaka kulishasha napande kulishashela a vije vyanalingi Mwene.”
Currently Selected:
1 Kolinte 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006