Romanos 1
1
Chi Stzꞌibꞌetoj Scarta Naj Pablo Tet Ebꞌ Creyente Bꞌey Roma
1Jaꞌ jain, Pablo jin tiꞌ, ẍejabꞌwom jin Naj Jesucristo an. Jix jin yawte Naj an, catuꞌ jix jin yaon oc yin ẍejabꞌoj an. Sicꞌbꞌil jin el yu Dios an, yu walon el watxꞌ kꞌane yet colbꞌanile an. 2Jaꞌ yet caw peyxa, yakꞌnaj can stiꞌ Dios yu jun watxꞌ kꞌane tiꞌ. Jaꞌ ebꞌ ẍejabꞌ Dios, jaꞌton ebꞌ profeta,* jix tzꞌibꞌencan jun watxꞌ kꞌane tiꞌ yul An Juun yet Dios. 3Jaꞌ jun watxꞌ kꞌane tiꞌ, chi yal yu Naj Kaawil Jesucristo, Scꞌaal Dios. Jaꞌ yet jix eyecꞌ Naj titiꞌ jaxca ánima, tol icꞌaale yeoc Naj yu naj rey David.#1:3 Jaꞌ yul An Antiguo Testamento chi yalaꞌ, tol jaꞌ jun Cristo oj oc yicꞌaal oj naj rey David. Ezequiel 34:23, 24; 37:24, 25; Oseas 3:5. Jaꞌ yet chi yal yin Jesús tol yicꞌaal naj rey David lalan yalon eloj, tol Cristo, ma Mesías naj. 4Yutol jaꞌ Espíritu eyoc yin Naj. Jaꞌ jix txꞌoxon el Naj tol Scꞌaal Dios Naj. Tol caw ey yipal Naj, yutol jix pitzcꞌu a xol ebꞌ camnaj. 5Jix xꞌoxon el swatxꞌcꞌulal Dios ey jin yin Naj Jesucristo an. Jix jin chejletoj bꞌey masanil yul-laj yibꞌankꞌinal tiꞌ yu, yu yaon oc scꞌul ebꞌ cꞌal sjijen ebꞌ tzet chi yalaꞌ. 6Jaex tiꞌ, jix jex oc yetbꞌi oj ebꞌ, yutol awtebꞌil jex el yu Dios yu je yoc yetoj Jesucristo. 7Chin tzꞌibꞌetoj jun jin carta tiꞌ ey jex an, masanil jaex a Roma* jex. Camcꞌulnebꞌil jex yu Dios, cꞌal awtebꞌil jex yu je yunen tzet chi yoche Jesús. Chi yoche jin cꞌul chi xꞌox swatxꞌcꞌulal cu Mam Dios ey jex yetoj Naj Kaawil Jesucristo, catuꞌ ey ojabꞌ watxꞌcꞌulal snan je xol cꞌal yetoj Dios.
Chi Yoche Naj Pablo Chi Too Yil Ebꞌ A Roma
8Yin sbꞌabꞌelal, yin Jesucristo, chi wal yu diosalil tet Dios je yu, yutol chi al-le el yul-laj yibꞌankꞌinal tol caw che yaoc je cꞌul yin Cristo.* 9Jain tiꞌ, chi wakꞌ servil Dios yin masanil jin cꞌul yin walon el Skꞌaneal Naj Scꞌaal Dios an. Yotaj Dios tol junjuntaj el chin txali, chin txali cꞌal je yu an. 10Chin kꞌanon pax tet Dios an, ta chi el yin scꞌul chex too wil an. 11Ey xacꞌal cꞌoli jin naꞌon an tol chex too wil an. Yutol chi woche chin colwa niꞌoj je yin an yin yet Dios, yet watxꞌ chi wakꞌ yipoj je cꞌul an. 12Chi woche tol jaꞌ yet oj jin apnoj ey jex tuꞌ, chi kiptzele cu bꞌa junjun jon, yutol jun laan cꞌal chi kute kaon oc Cristo yin cu cꞌul. 13Jex wuẍtaj, jex wanabꞌ, chi woche che yotajne eloj tol ecꞌal el xacꞌal chi woche chin too ey jex tuꞌ an, cꞌam tocꞌal chi skeꞌ jin too an. Chi woche chin apni ey jex tuꞌ an, yet watxꞌ ey ebꞌ chi yaoc scꞌul yin Cristo wu an bꞌey ey jex ecꞌ tuꞌ. Jaxca jix yun yoc ebꞌ yul-laj wanxa conobꞌ wu an. 14Yutol masanil ánima, caxcꞌal cuywinaj, ma man cuywinaj oj, jin cuenta yeoc ebꞌ an. Cꞌal ebꞌ jelan snaꞌbꞌal, cꞌal ebꞌ man jelan oj, jin cuenta cꞌal yeoc ebꞌ an. 15Yuxan bꞌejan jin cꞌul jin too walon el skꞌaneal colbꞌanile je xol jaex a Roma jex tuꞌ.
Yipalil Watxꞌ Kꞌane
16Cꞌam chin qꞌuixwi yu jun watxꞌ kꞌane yet colbꞌanile, yutol yipalil Dios yeocoj, yu scolcha el masanil ebꞌ chi yaoc scꞌul yin jun watxꞌ kꞌane tiꞌ. Yuxan, ey yalon yet ebꞌ wet Israelal yin sbꞌabꞌelal yin jun colbꞌanile tiꞌ, catuꞌ ey pax yalon yet ebꞌ man Israeloj yin. 17Jaꞌ jun kꞌane yet colbꞌanile tiꞌ, jaꞌ chi akꞌon kotajne eloj, tol watxꞌ jon yul sat Dios, asanne yu cꞌal chi kaoc cu cꞌul yin. Jaxca chi yal yul An Juun: “Jaꞌ ebꞌ chi yaoc scꞌul yin Dios, watxꞌ ebꞌ yul sat Dios. Yuxan ey skꞌinal ebꞌ tol ey cꞌal yin tobꞌalkꞌinal,” ẍi yul An Juun Tzꞌibꞌebꞌilcanoj.*#Habacuc 2:4.
Wan Spenail Ebꞌ Ánima Tet Dios
18Kotaj, tol chi yaeytej sjowal scꞌul Dios bꞌey satcan yibꞌan masanil ebꞌ cꞌam chi yaoc scꞌul yin Dios. Jaꞌton ebꞌ cꞌam swatxꞌil tzet chi el yuneni. Yu cꞌam swatxꞌil ebꞌ tuꞌ, yuxan ey ebꞌ cꞌam chi skeꞌ yabꞌ jun cuybꞌanile caw yel. 19Chi yaeytej sjowal scꞌul Dios yibꞌan ebꞌ, yutol yotaj xa ebꞌ sicꞌlebꞌil jantaj tzetyetal chi skeꞌ kotajnen el yin Dios. Yutol jaꞌ Dios jix txꞌoxon yil ebꞌ. 20Caxcꞌal cꞌam chi skeꞌ yil-le oc yin Dios tuꞌ, jaꞌ yet chi il-le oc yin tzetyetal waꞌnebꞌil yu Dios, jaxca tol jaꞌ Dios chi il-le oc yin yu ebꞌ. Yutol jaꞌ yet jix swaꞌnen jun yul yibꞌankꞌinal tiꞌ, jix txeclo eloj, tol Dios toni. Ey cꞌal yipalil yin tobꞌalkꞌinal. Snaꞌbꞌal xa ebꞌ chi ẍaꞌontej sjowal scꞌul Dios ebꞌ yibꞌan. 21Yutol caxcꞌal yotaj ebꞌ tol ey Dios, cꞌam pax chi yaloc ebꞌ sDiosaloj. Cꞌam yeloc apnoj Dios yul sat ebꞌ. Cꞌam chi yal yu diosalil ebꞌ tet Dios. Jaꞌ tiꞌ yet ebꞌ, tol pena cꞌal chi snaꞌ ebꞌ, cꞌam yeloc apnoj niꞌoj snaꞌbꞌal ebꞌ tuꞌ. Caw cꞌam snaꞌbꞌal ebꞌ yutol jaxca tol xol kꞌejkꞌinal chi ecꞌ spixan ebꞌ. 22Caxcꞌal chi yal sbꞌa ebꞌ jelanil, cꞌam cꞌal pax niꞌoj snaꞌbꞌal ebꞌ. 23Jaꞌ Dios miman yeloc apnoj, miman swatxꞌilal chi xꞌoxoꞌ, cꞌam bꞌakꞌin chi cami, cꞌam pax chi ey kaan ebꞌ sattaj. Jaꞌ sattaj yechel ánima cambꞌeal yei, jatuꞌ chi ey kaan ebꞌ, ma sattaj yechel noꞌ noꞌ, ta tzꞌiquin, ma labꞌa, ma wanojxa noꞌ, jaꞌ chi yaloc ebꞌ sdiosaloj. 24Yuxan jix bꞌejlecan ebꞌ xꞌojli yu Dios, catuꞌ chi too can ebꞌ yin wan man watxꞌoj chi yoche oc ebꞌ tuꞌ. Yuxan jaꞌ wan caw qꞌuixwiltaj chi el yunen ebꞌ yetoj smimanil. 25Yutol ma yaoc scꞌul ebꞌ yin Skꞌane Dios caw yel. Jal tinaniꞌ xin, jaꞌ lekꞌtiꞌal chi yaoc ebꞌ yin scꞌul. Jaꞌ tet tzet waꞌnebꞌil yu Dios chi yal sbꞌa ebꞌ, catuꞌ jatuꞌ chi yiꞌey sbꞌa ebꞌ. Jal tet Dios cꞌam chi yiꞌey sbꞌa ebꞌ. Smoo chi kal watxꞌ kꞌane tet Dios yin tobꞌalkꞌinal. Amén.
26Yu sbꞌeybꞌal ebꞌ tuꞌ, yuxan jix bꞌejlecan ebꞌ yu Dios. Catuꞌ chi yunen xacꞌal ebꞌ wan tzetyetal caw qꞌuixwiltaj chi yoche oc ebꞌ tuꞌ. Ey ebꞌ ix chi bꞌejon can winaj. Jaxa yetoj yet ixal chi yetnele sbꞌa ebꞌ. Caw man smoo oj queytuꞌ chi yute sbꞌa ebꞌ. 27Quey pax tuꞌ xol ebꞌ winaj, ey ebꞌ chi sbꞌejcan ix, jaxa yetoj yet winajil chi yetnele sbꞌa. Yutol caw chi yoche ebꞌ chi yun jaxca tuꞌ. Ebꞌ winaj yetoj yet winajil chi smitxꞌle oc sbꞌa ebꞌ, yin yunen tzetyetal caw qꞌuixwiltaj, yutol chi yoche ebꞌ wan jaxca tuꞌ, yuxan jacꞌal smimanil ebꞌ chi chaꞌon spaj wan tzetyetal man smoo oj yunen ebꞌ tuꞌ. 28Yu cꞌam yeloc apnoj Dios yin snaꞌbꞌal ebꞌ, yuxan chi bꞌejlecan ebꞌ yu Dios. Yet watxꞌ chi cꞌal etex el snaꞌbꞌal ebꞌ, catuꞌ chi too can ebꞌ yin tzetyetal man watxꞌoj tuꞌ. 29Qꞌueynaj ebꞌ yetoj masanil pena naꞌbꞌale tuꞌ, cꞌal yetoj amulal. Yuxan, jacꞌalaꞌ snaꞌon ebꞌ yin tzet man watxꞌoj. Chi yoche oc sbꞌeomal ebꞌ. Caw pena ebꞌ. Chi yoche oc stzetyetal junojxa mactxequel ebꞌ. Makꞌom pax cam ánima ebꞌ. Akꞌom jowal ebꞌ. Etnem ánima ebꞌ. Jantaj tzetyetal watxꞌ chi yil ebꞌ chi sqꞌuextoj ebꞌ yin spenail. Alom kꞌumale ebꞌ. 30Chi yal pena yin yet animail. Chi jowi oc scꞌul ebꞌ yin Dios. Bꞌuchwawom ebꞌ. Chi yecꞌbꞌane sbꞌa ebꞌ. Chi smimanbꞌane sbꞌa ebꞌ. Caw jelan ebꞌ snaꞌon a junoj spenail. Man jijemoj ebꞌ tet smam, xutx. 31Suc cꞌal chi yute sbꞌa ebꞌ. Cꞌam chi yun tzet chi yal tet junojxa. Cꞌam chi yakꞌ mimancꞌulal ebꞌ yin junojxa mactxequel. Cꞌam chi okꞌ scꞌul ebꞌ yin junojxa. 32Yotaj ebꞌ tol Dios chi aloni, tol jaꞌ ebꞌ chi unen wan jix jin txoltej tiꞌ smoo chi too can ebꞌ bꞌey camich yin junelne, jacꞌalaꞌ yunen pax ebꞌ. Man asanne oj ebꞌ chi unen wan tuꞌ, tol chi tzala pax ebꞌ yetoj ebꞌ ánima chi unen wan spenailal tuꞌ.
Currently Selected:
Romanos 1: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.