Tito 3
3
Wan Tzetyetal Sowalil Chi Yun Ebꞌ Creyente
1Cha jej snaꞌ ebꞌ creyente tituꞌ, tol jijem chi yute sbꞌa ebꞌ tet masanil ebꞌ yaaw, cꞌal ebꞌ ey yopiso yin yiloni. Sowalil chi sjije ebꞌ tzet chi yal ebꞌ tuꞌ. Listo ojabꞌxa yeoc ebꞌ yu yunen yal cꞌal tzet mulnail tol watxꞌ. 2Man ojabꞌ chi yal pena kꞌane yin yet animail. Man ojabꞌ comonoj chi yakꞌle jowal ebꞌ yetoj junoj mactxequel. Watxꞌ ojabꞌ chi yute scꞌul ebꞌ. Yin ojabꞌ camcꞌulal chi chaꞌle masanil ebꞌ ánima. 3Yutol jaꞌ yet yalantoj, cꞌam pax cu naꞌbꞌal jaon tiꞌ. Man jijemoj jon tet Dios. Qꞌueynaj jon toj yet tuꞌ. Jix kakꞌ servil yal cꞌal tzet spenail jix koche ocoj. Caw pena cu bꞌeybꞌal yet tuꞌ. Bꞌuchwawom jon yin ket animail. Pena kili yul sat ebꞌ ket animail, catuꞌ pena pax yili ebꞌ yul cu sat. 4Jaꞌ yet tuꞌ, jix xꞌoxa swatxꞌcꞌulal cꞌal scamcꞌulal cu Colomal Dios tet masanil ánima. 5Yuxan jix cu colcha el yu. Man yu oj junoj tzet watxꞌ jix el kuneni, yuxan jix cu scoloꞌ, asan cꞌal yu jix okꞌ scꞌul Dios kin. Jaꞌ yet jix txꞌale el cu penail kin, jaxca tol jix cu ali yin yet scaelal. Jaꞌ Naj Santo Espíritu jix qꞌuexon cu naꞌbꞌal. 6Yu Naj cu Colomal Jesucristo, yuxan jix aletej Naj Santo Espíritu ey jon yu Dios yin masanil scꞌul. 7Yuxan watxꞌ jon yul sat yu cꞌal swatxꞌcꞌulal. Yu jun tuꞌ, yuxan oj yakꞌ pax cu kꞌinal tol ey cꞌal yin tobꞌalkꞌinal, jun ey cꞌal oc yipoj cu cꞌul tiꞌ. 8Jaꞌ wan chi wal tiꞌ, yel. Yuxan chi woche tol caw cha wakꞌ ja wip ja cuyun wan cuybꞌanile tiꞌ, yet watxꞌ jaꞌ ebꞌ chi yaoc scꞌul yin Dios, chi yaoc yin scꞌul ebꞌ yunen wan tzetyetal watxꞌ. Caw watxꞌ wan cuybꞌanile tiꞌ. Caw chi oc yopiso ku cu masanil. 9Manche ja waoc ja bꞌa yetoj ebꞌ comon cꞌal chi steele sbꞌa yin tzet naꞌbꞌacꞌal, cꞌal xol ebꞌ asan skꞌaneal yichmam ebꞌ chi yaltej. Manche ja wa pax oc ja bꞌa yetoj ebꞌ comon cꞌal chi yakꞌle jowal, cꞌal yetoj ebꞌ chi steele sbꞌa yin sley Moisés. Cꞌam tzet chi yiꞌ ebꞌ yin wan teelebꞌail tuꞌ. Naꞌbꞌacꞌal chi yetne sbꞌa ebꞌ. 10Ta ey ebꞌ chi yoche chi poꞌocha ebꞌ creyente, cha tenchane ebꞌ junel, caeloj. Ta cꞌam chi sjije yet tuꞌ, che yiꞌel ebꞌ je xol. 11Jaꞌ ebꞌ queytuꞌ chi yute, otajnewej eloj tol etexnaj xa el ebꞌ. Jaꞌ yu spenail ebꞌ chi txeclo eloj tol man watxꞌoj tzet chi yun ebꞌ.
Ẍejbꞌanil Naj Tito Yu Naj Pablo
12Oj jin chejtoj naj kuẍtaj Artemas ey jaach, ma xin, jaꞌ kuẍtaj Tíquico oj toj. Jaꞌ yet chi apni, cha wakꞌ ja wip ja too bꞌey conobꞌ Nicópolis. Jata tituꞌ, oj cu kꞌanabꞌoj, yutol chi woche tol jaꞌ tituꞌ ey jin ecꞌoj yet chi ecꞌ nabꞌilkꞌinal. 13Jaꞌ yet chi too naj kuẍtaj licenciado Zenas yin sviaje yetoj kuẍtaj Apolo, colwaan yin yet smimanil ebꞌ. Jantaj cꞌal tzet sowalil yu ebꞌ yul-laj bꞌe, akꞌ tet ebꞌ. 14Cha cuy ebꞌ ket creyenteal tituꞌ, tol chi yun ebꞌ tzet watxꞌ, catuꞌ chi colwa ebꞌ yin ebꞌ ey tzettaj yetal sowalil chi oc yu ebꞌ, yet watxꞌ ey yopiso ebꞌ yul sat Dios, catuꞌ manaj ojabꞌ naꞌbꞌacꞌal chi eqꞌui.
Chi Too Scawil Scꞌul Ebꞌ Creyente
15Chi yatoj scawil ja cꞌul masanil ebꞌ eyecꞌ wetoj titiꞌ. Cha wakꞌ scawil scꞌul masanil ebꞌ creyente chi cu camcꞌulnen tituꞌ. Chi woche tol chi xꞌox swatxꞌcꞌulal Dios ey jex je masanil tituꞌ.
Currently Selected:
Tito 3: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.