Filipenses 2
2
Yin Yeynajil Jix Jul Yute Sbꞌa Naj Cristo
1Chi cu yiptze Cristo. Chi yakꞌ cu mimancꞌulal, yu scamcꞌulal kin. Junxane keoc yetoj Naj Yespíritu tinaniꞌ. Jaꞌ Naj chi akꞌon cu camcꞌulal, yet watxꞌ chi okꞌ cu cꞌul yin ebꞌ ket animail. 2Yu wan tuꞌ, yuxan caw junxane ojabꞌ che yute je naꞌbꞌal yin Naj. Jun laan ojabꞌ che yute je camcꞌulnen je bꞌa. Jun laan ojabꞌ che yute je naꞌon masanil tzettaj yetal. Junne ojabꞌ naꞌbꞌale je yei. Ta che bꞌeybꞌalne jaxca tuꞌ, oj jul jin tzalacꞌulal je yu titiꞌ. 3Cꞌam chi skeꞌ kiꞌon a can cu bꞌa, catuꞌ chi cu meynen cu bꞌa, tol ojabꞌ yin yeynajil chi kute cu bꞌa. Quey ojabꞌ tuꞌ chi kute cu naꞌbꞌal junjun jon, tol yel ojabꞌ miman yeloc apnoj ebꞌ ket animail ey jon. 4Man ojabꞌ asanne oj jon yel xacꞌal chi cu naꞌ cu bꞌa cu txꞌojli, tol sowalil ojabꞌ chi cu naꞌ pax tzet yeoc ebꞌ ket animail masanil. 5Laan ojabꞌ chi kute cu naꞌbꞌal jaxca yutenaj snaꞌbꞌal Jesucristo. 6Jaꞌ Cristo tuꞌ, junne cꞌal yeoc yetoj Dios yet peyxa. Caxcꞌal junne yeoc yetoj, tol jix el yin scꞌul, catuꞌ jix sbꞌejoncan jun bꞌey ey yalon yet yetoj Dios tuꞌ. Cꞌam niꞌoj tzet jix snaꞌ yet jix sbꞌejon canoj. 7Yuxan jix sbꞌejcan masanil yet tuꞌ, catuꞌ jix tita, jix jul yuten sbꞌa chejabꞌwomal. Jix jul yakꞌ sbꞌa aloj yin animail. 8Jaꞌ yet eyecꞌ yin animail tuꞌ, caw yeynajil jix yute cꞌal sbꞌa, masantaꞌcꞌal jix cami. Jix yakꞌ techa yet jix akꞌle cam yin teꞌ culus. Caw qꞌuixwiltaj jix yun scami. 9Yuxan, caw miman yeloc apnoj yu Dios tinaniꞌ. Jaꞌ jix akꞌon jun sbꞌi Naj. Jaꞌ jun sbꞌi tuꞌ, yel ecꞌbꞌan yeloc apnoj yintaj masanil wanxa bꞌie. 10Queytuꞌ yutenaj Dios jaxca tuꞌ, yet watxꞌ, masanil ebꞌ ey bꞌey satcan, cꞌal masanil ebꞌ ey sat txꞌotxꞌ tiꞌ, cꞌal ebꞌ ey yul txꞌotxꞌ, jaꞌ yet oj yabꞌen sbꞌi Jesús ebꞌ, oj ey kaan ebꞌ masanil tet. 11Catuꞌ oj yalon masanil ebꞌ jaxca tiꞌ: “Jaꞌ Jesucristo, Kaawil,” ẍi ebꞌ. Jaxca tuꞌ oj yun xeclo eloj, tzet utbꞌil tol caw miman yeloc apnoj cu Mam Dios.
Jaxca Tzejtebꞌal Yeoc Ebꞌ Creyente Yul Yibꞌankꞌinal Tiꞌ
12Yuxan, jex jin camcꞌulnebꞌil, jijem ojabꞌ cꞌal che yute je bꞌa, jaxca cꞌaltaꞌ je bꞌeybꞌal. Akꞌwej je yip, yin yeynajil che yute je bꞌa, yin xiwcꞌulal, yet watxꞌ chi tzꞌajna je colbꞌanil. Man ojabꞌ asanne oj yet ey jin ecꞌ je yetoj tituꞌ, catuꞌ che yuneni, aanwej can yin je jijen wan tiꞌ, yet cꞌam jin ey jin ecꞌ je yetoj. 13Yutol jaꞌ Dios eyoc ketoj. Jaꞌ chi akꞌon cu naꞌ kunen swatxꞌilal, catuꞌ jaꞌ chi akꞌon pax kunne. Chi yute jaxca tuꞌ, yutol queytuꞌ chi yoche chi yunne. 14Jaꞌ yet chi akꞌle je yun junoj tzetyetal, man ojabꞌ yin oj chichoncꞌulal che yunne. Man ojabꞌ yin pena kꞌane che kꞌanle tzet yuxan chi akꞌle je yunne. 15Manche je yun jaxca tuꞌ, yet watxꞌ cꞌam mactxequel oj alon oj, tol ey je mul ma je penail. Caxcꞌal chex ecꞌ snan xol ánima cꞌam swatxꞌil, ma snan xol ebꞌ pena snaꞌbꞌal, jaꞌ jaex yuninal jex xa Dios tiꞌ, cꞌamxa tzet man watxꞌoj eyoc je yin jaxca ebꞌ tuꞌ. Yutol jaxca weycan chi koplabꞌi xol kꞌejkꞌinal, jaxca tuꞌ jex snan xol ebꞌ. 16Yutol che yalel skꞌane Dios snan xol ebꞌ, jun kꞌane chi alontej yu cu kꞌinal tol ey cꞌal yin tobꞌalkꞌinal. Yu jun tuꞌ, caw oj jin tzala a je yu yet oj jul Cristo, yutol wotaj, tol man naꞌbꞌacꞌal oj jix wakꞌ wip jin mulna je nan je xol. 17Lalan je yaon oc je cꞌul yin Cristo tinaniꞌ. Jix je yakꞌ je bꞌa tet, jaxca junoj xaambꞌal chi akꞌle tet Dios. Jain tiꞌ, chi wakꞌ pax jin bꞌa tet Cristo je yetoj. Yu jun tuꞌ, yuxan caxcꞌal oj jin akꞌle cam jaxca junoj xaambꞌal tinaniꞌ, oj jin tzala pax cꞌaltaꞌa. Jun laan xa oj wute wakꞌon tzala jin cꞌul je yetoj. 18Tzalaanwej jaex tiꞌ xin, yet watxꞌ jun laan che yute je yakꞌon tzala je cꞌul wetoj an.
Jaꞌ Tzet Jix Yaltej Naj Pablo Yin Naj Timoteo Yetoj Naj Epafrodito
19Chi woche tol tuxa chin chejtoj naj Timoteo tiꞌ ey jex tuꞌ, ta jaxca tuꞌ chi el yin scꞌul Naj Kaawil Jesús. Yutol chi woche chi wabꞌe, tzet utbꞌil je yeoc tituꞌ, catuꞌ oj tzalabꞌoj a jin cꞌul je yu an. 20Yutol cꞌam junojxa mactxequel laan snaꞌon wetoj titiꞌ. Cꞌam wanojxa ebꞌ chex naꞌontej ketoj jon. 21Yutol junjun cꞌal mactxequel, asan yet ebꞌ chi snaꞌ. Cꞌam niꞌoj chi snaꞌ ebꞌ yin smulnail Cristo Jesús. 22Caw je yotaj xa, jaꞌ naj Timoteo tiꞌ, caw otajbꞌil xa sbꞌeybꞌal, jaxca junoj cꞌaale yetoj smam, jaxca tuꞌ yakꞌon Timoteo tiꞌ wetoj an. Caw chi yakꞌ servil Naj Kaawil wetoj an, yin yalon el skꞌaneal yet colbꞌanile. 23Yuxan, jato yet oj wilon an tzet oj yun weloc titiꞌ, chi woche chin chejtoj naj Timoteo tiꞌ ey jex tuꞌ an. 24Yetoj pax oj, chi waoc Naj Kaawil yipoj jin cꞌul an, tzet utbꞌil tol jain tiꞌ, tuxa oj jex toj wil an. 25Chin naꞌ pax oj, tejan sowalil oj jin chej pax toj kuẍtaj Epafrodito. Naj kuẍtaj chejbꞌiltej je yu, yu jul jin yakꞌon servil. Caw tecꞌan chi yute sbꞌa smulna wetoj yin yet Naj Kaawil. 26Caw chi yoche chex too yil canoj. Caw chex snaꞌtej, yutol jix je yabꞌe, tol caw yaꞌey naj titiꞌ. 27Yel, niꞌanxane ton ma cam naj titiꞌ. Jix to pax okꞌ scꞌul Dios yin naj. Yuxan jix waꞌxi scꞌul naj. Man asanne oj yin Epafrodito tiꞌ jix okꞌ scꞌul Dios, jix okꞌ pax scꞌul win an, yu jix waꞌxi scꞌul naj tuꞌ, yuxan cꞌam chin wakꞌ miman cuscꞌulal titiꞌ an. 28Yuxan, chi woche chin chejtoj naj ey jex tuꞌ, yet watxꞌ chex tzala aoj, yet che yilon yapni naj ey jex tuꞌ junelxa. Ta jaxca tuꞌ xin, cꞌamxa miman jin bꞌiscꞌulal titiꞌ an. 29Chaꞌwej apnoj naj yin tzalacꞌulal je nan je xol, yutol je yuẍtaj pax je bꞌa yetoj naj yin Naj Kaawil. Masanil cꞌal ebꞌ laan snaꞌbꞌal jaxca naj Epafrodito tiꞌ, ey ojabꞌ yeloc apnoj ebꞌ yul je sat. 30Jaꞌ jun kuẍtaj tiꞌ, tutun caw niꞌanxane ma camoj, yu cꞌal tol lalan yakꞌon servil Cristo. Caxcꞌal ian jix cami, yutol lalan jin yakꞌon servil titiꞌ, cꞌam cꞌal niꞌoj tzet chi snaꞌ, caxcꞌal chi cami. Jaex tiꞌ, ma skeꞌ jin jul je yakꞌon servil. Yuxan, jaꞌ naj jix tita yu jin jul yakꞌon servil je qꞌuexeloj.
Currently Selected:
Filipenses 2: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.