Números 30
30
Sleyal Tzet Chi Yun Kakꞌon Eloc Yin Bꞌey Chi Kakꞌ Can Cu Tiꞌ
1Jix yalon naj Moisés tet ebꞌ yaaw yeoc yin junjun tujan icꞌaaleal xol ebꞌ Israel jaxca tiꞌ: 2Ta ey junoj mactxequel chi yakꞌ stiꞌ yakꞌon junoj tzetyetal tet Jehová, ma junoj bꞌey chi yakꞌ stiꞌ yakꞌon junoj tzetyetal, ma chi yakꞌ stiꞌ yin tol cꞌam chi yun junoj tzetyetal, sowalil chi yakꞌ eloc jun skꞌane chi yal can tuꞌ. Cꞌam chi skeꞌ smakꞌon tan jun tzet yinal bꞌey chi yakꞌ can stiꞌ tuꞌ.
3Ta ey junoj ix kꞌopo ix, tol eyto ecꞌ yetoj smam, catuꞌ chi yakꞌon can stiꞌ ix yakꞌon junoj tzetyetal tet Dios, ma chi yakꞌ stiꞌ yin tol cꞌam chi yun junoj tzetyetal, 4ta cꞌam tzet chi yal naj smam ix tuꞌ, yu bꞌey yakꞌnaj can stiꞌ ix tuꞌ, sowalil chi sjije ix yunen yin tzet bꞌey jix yakꞌ can stiꞌ tuꞌ. 5Asan ta jaꞌ naj mame tuꞌ chi yakꞌ sowalil tet yet chi yabꞌen oc naj, tol ey bꞌey yakꞌnaj can stiꞌ ix, ta jaxca tuꞌ, cꞌamxa sowalil chi yun ix bꞌey yakꞌnaj can stiꞌ tuꞌ. Jaꞌ Jehová oj yakꞌ mimancꞌulal yibꞌan ix, yutol jaꞌ naj mame chi bꞌuton tan jun kꞌane tuꞌ.
6Ta ey junoj ix ix cꞌamto yichamil, ta ey bꞌey chi yakꞌ stiꞌ ix yunen junoj tzetyetal, catuꞌ ma wal cam snaꞌoni catuꞌ chi nupi xacꞌal pax ix yin eymanil, 7ta jaꞌ naj yichamil ix tuꞌ bꞌejan scꞌul naj yunen ix jaxca bꞌey jix yakꞌ can stiꞌ tuꞌ, ta jaxca tuꞌ, sowalil chi sjije ix yunen bꞌey jix yakꞌ can stiꞌ tuꞌ. 8Asan xin, ta jaꞌ naj yichamil ix tuꞌ man bꞌejan oj scꞌul naj tol chi yun ix bꞌey yakꞌnaj can stiꞌ ix tuꞌ, ta jaxca tuꞌ, cꞌamxa sowalil chi yun ix bꞌey jix yakꞌ can stiꞌ tuꞌ, jaxa Jehová oj yakꞌ mimancꞌulal yibꞌan ix.
9Ta ey junoj ix ix yakꞌnaj can stiꞌ yakꞌon junoj tzetyetal tet Jehová, junoj ix ix camnajxa yichamil ma tol spoꞌolenaj sbꞌa ix yetoj yichamil, sowalil chi sjije el yunen bꞌey yakꞌnaj can stiꞌ ix tuꞌ.
10Jaꞌ junoj ix ix ey yichamil, catuꞌ chi yakꞌon stiꞌ yin yunen junoj tzetyetal yet eyecꞌ ix bꞌey sna yichamil tuꞌ, 11ta jaꞌ yet chi yabꞌen naj yichamil ix tuꞌ, tol chi ẍaꞌ scꞌul, sowalil chi sjije el ix yunen bꞌey yakꞌnaj can stiꞌ tuꞌ. 12Asan ta jaꞌ naj yichamil ix tuꞌ chi yakꞌ sowalil yet chi yabꞌen oc naj tol ey bꞌey yakꞌnaj can stiꞌ ix, ta jaxca tuꞌ, cꞌamxa sowalil chi yun ix bꞌey yakꞌnaj can stiꞌ tuꞌ. Jaꞌ Dios oj yakꞌ mimancꞌulal yibꞌan ix.
13Yuxan jaꞌ naj yichamil ix tuꞌ, sowalil jaꞌ naj chi aloni ta chi skeꞌ yunen ix bꞌey yakꞌnaj can stiꞌ yakꞌon ix junoj tzetyetal tet Jehová, chi skeꞌ ma cꞌamaj. 14Ta jaꞌ naj yichamil ix tuꞌ, yotaj xa naj tol ey bꞌey yakꞌnaj can stiꞌ ix yakꞌon junoj tzetyetal, sowalil chi yun ix bꞌey yakꞌnaj can stiꞌ tuꞌ. 15Ta jaꞌ naj yichamil ix tuꞌ tol bꞌejan scꞌul yunen ix, jaxa yet chi ecꞌ el jayebꞌoj cꞌu, catuꞌ chi yakꞌon sowalil naj tet ix, ta jaxca tuꞌ, jaxa yibꞌan naj ichamile tuꞌ chi cancan jun kꞌane tuꞌ.
16Jaꞌton wan chejbꞌanile tiꞌ, jix yal Jehová tet naj Moisés tzet sowalil chi yun naj ichamile yetoj yistil, yetoj cꞌal pax naj mame yetoj scutzꞌin, yet eyto ecꞌ ix kꞌopo yetoj smam.
Currently Selected:
Números 30: knj
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
