Números 1
1
Jix Iꞌle A Sbꞌisil Ebꞌ Israel Bꞌey Sinaí
1Jaꞌ yet sbꞌabꞌel cꞌual, yet scaabꞌ xꞌaaw yet scaabꞌ abꞌil yet jix el ebꞌ Israel bꞌey Egipto, jix kꞌanabꞌ Jehová tet naj Moisés bꞌey txꞌotxꞌ cusiltaj txꞌotxꞌ chi yij Sinaí, jaꞌton bꞌey jun Kꞌap Na bꞌey scalubꞌal Jehová, bꞌey chi ẍaꞌle sbꞌa ebꞌ yetoj Dios. Jix yalon jaxca tiꞌ:
2Iꞌa sbꞌisil masanil ebꞌ winaj xol ebꞌ ja wet conobꞌ Israel, junjun tujan jatacꞌalaꞌ jantaj yeoc sbꞌisil masanil ebꞌ tol yican to sbꞌa, yet watxꞌ chi il-le jaywan ebꞌ, cꞌal tzet sbꞌi junjun ebꞌ. 3Chi el yich sbꞌisle ebꞌ eyoc yin 20 abꞌil skꞌinal, catuꞌ chi bꞌey cꞌaltoj, jaꞌton ebꞌ smoo stoo yin jowal; junjun bꞌulan chi yun yale oc ebꞌ yin xolilal. Colwa ojabꞌ naj Aarón ja wetoj, 4yetoj pax junjun ebꞌ syaawil junjun icꞌaale. 5Jaꞌton sbꞌi wan ebꞌ yaaw sowalil chi colwa ja wetoj tiꞌ:
Jaꞌ xol ebꞌ yicꞌaal naj Rubén: Jaꞌton Elisur scꞌaal Sedeúr.
6Ebꞌ yicꞌaal Simeón: Jaꞌton Selumiel scꞌaal Surisadai.
7Ebꞌ yicꞌaal Judá: Jaꞌton Nahasón scꞌaal Aminadab.
8Ebꞌ yicꞌaal Isacar: Jaꞌton Natanael scꞌaal Suar.
9Ebꞌ yicꞌaal Zabulón: Jaꞌton Eliab scꞌaal Helón.
10Jal pax ebꞌ yicꞌaal José xin, ebꞌ yet Efraín, jaꞌton Elisamá scꞌaal Amihud; jaxa yin yet Manasés, jaꞌton Gamaliel scꞌaal Pedasur.
11Ebꞌ yicꞌaal Benjamín: Jaꞌton Abidán scꞌaal Gedeoní.
12Ebꞌ yicꞌaal Dan: Jaꞌton Ahiézer scꞌaal Amisadai.
13Ebꞌ yicꞌaal Aser: Jaꞌton Paguiel scꞌaal Ocrán.
14Ebꞌ yicꞌaal Gad: Jaꞌton Eliasaf scꞌaal Reuel.
15Ebꞌ yicꞌaal Neftalí: Jaꞌton Ahirá scꞌaal Enán, ẍi Jehová, tet naj Moisés.
16Jaꞌton wan ebꞌ yaaw tiꞌ chi sicꞌle el xol masanil ebꞌ yicꞌaal conobꞌ Israel. 17Jaꞌ yet sbꞌabꞌel cꞌual yet scaabꞌ xꞌaaw yet jun abꞌil tuꞌ, jix syambꞌa oc naj Moisés yetoj naj Aarón wan winaj tuꞌ, tol jaꞌcaw Dios jix sicꞌon el ebꞌ; jix yambꞌale cꞌal pax oc masanil ebꞌ conobꞌ tuꞌ yu ebꞌ. 18Queytuꞌ jix yun yiꞌle a sbꞌisil ebꞌ conobꞌ Israel. Yin xolilal jix yun stzꞌibꞌele sbꞌi ebꞌ, ebꞌ eyoc yin 20 abꞌil skꞌinal, catuꞌ chi bꞌey cꞌaltoj, jatacꞌalaꞌ junjun tujan yin junjun icꞌaaleal, 19jaxca jix yun yalon Jehová tet naj Moisés. Jaꞌ bꞌey txꞌotxꞌ cusiltaj txꞌotxꞌ bꞌey Sinaí, jaꞌ tituꞌ jix iꞌle a sbꞌisil ebꞌ.
20-21Jaꞌ yin junjun icꞌaaleal yin junjun bꞌulan, jix yun yiꞌle a sbꞌisil ebꞌ. Jix tzꞌibꞌele sbꞌi ebꞌ, cꞌal sbꞌisil ebꞌ winaj tol tzꞌajan xa yin 20 abꞌil skꞌinal, yuxan jix eloc sbꞌisil ebꞌ masanil jaxca tiꞌ:
Jaꞌ xol ebꞌ yicꞌaal Rubén, jaꞌton sbꞌabꞌel scꞌaal naj Israel, ey 46,500 ebꞌ winaj tiempoal stoo yin jowal.
22-23Jaꞌ xol ebꞌ yicꞌaal naj Simeón, ey 59,300.
24-25Jaꞌ xol ebꞌ yicꞌaal Gad, ey 45,650.
26-27Jaꞌ xol ebꞌ yicꞌaal Judá, ey 74,600.
28-29Jaꞌ xol ebꞌ yicꞌaal Isacar, ey 54,400.
30-31Jaꞌ xol ebꞌ yicꞌaal Zabulón, ey 57,400.
32-35Jaxa xol ebꞌ yicꞌaal naj José; ey 40,500 ebꞌ yin yicꞌaal naj Efraín, ey cꞌal pax 32,200 ebꞌ yin yicꞌaal Manasés.
36-37Jaꞌ xol ebꞌ yicꞌaal naj Benjamín, ey 35,400.
38-39Jaꞌ xol ebꞌ yicꞌaal Dan, ey 62,700.
40-41Jaꞌ xol ebꞌ yicꞌaal Aser ey 41,500.
42-43Jaꞌ xol ebꞌ yicꞌaal Neftalí, ey 53,400.
44Jaxca tiꞌ jix yun yeloc apnoj jun sbꞌisbꞌal jix yiꞌa naj Moisés yetoj Naj Aarón, cꞌal yetoj lacawan ebꞌ yaaw yeoc xol ebꞌ Israel, ebꞌ titnaj yin junjun icꞌaaleal. 45Jix iꞌle a jun sbꞌisbꞌal tuꞌ yin junjun icꞌaaleal xol junjun bꞌulan. Jaꞌ ebꞌ Israel, ebꞌ eyoc yin 20 abꞌil skꞌinal catuꞌ chi bꞌey cꞌaltoj, jaꞌton ebꞌ caw smoo stoo yin jowal. 46Yin masanil ebꞌ ey, 603,550.
Jix Ale Oc Yopiso Ebꞌ Levita
47Jaꞌ ebꞌ yicꞌaal naj Leví, ma ale oc ebꞌ sbꞌisiloj ebꞌ jix iꞌle a sbꞌisil tuꞌ, 48yutol jix yal Jehová tet naj Moisés jaxca tiꞌ: 49Jaꞌ yet oj ja wiꞌon a sbꞌisil ebꞌ conobꞌ Israel tuꞌ, man oj ja waoc ebꞌ yicꞌaal naj Leví stzꞌajiloj ebꞌ. 50Yutol jaꞌ ebꞌ Levita tuꞌ, oj oc ebꞌ yakꞌomaloj servil bꞌey snail jin calubꞌal bꞌey eyecꞌ jun Scaẍail Jin Wa Kꞌane, yetoj masanil mitxꞌkꞌabꞌe chi kꞌanbꞌalnelei. Jaꞌton ebꞌ oj iꞌon bꞌey snail jin calubꞌal, yetoj cꞌal masanil mitxꞌkꞌabꞌe. Sowalil tol oj caey cꞌal ecꞌ ebꞌ bꞌey yinlaj snail jin calubꞌal tuꞌ. 51Ta ey bꞌey chi iꞌletoj teꞌ Scaẍail Jin Wa Kꞌane, jaꞌ ebꞌ chi uchon aoj, catuꞌ chi swaꞌnen pax a ebꞌ bꞌey chi apni ocoj. Yal cꞌal mactxequel chi octoj bꞌey scawilal snail jin calubꞌal tuꞌ, ta man Levita oj tol tꞌinan cꞌal scami. 52Jal masanil wanxa ebꞌ yicꞌaal Israel oj caey ecꞌ ebꞌ yin xolilal, junjun cꞌal oj caey ecꞌ yalan sbandera bꞌey bꞌulan jex ecꞌ tuꞌ. 53Jal pax ebꞌ Levita xin, jaꞌ yinlaj snail jin calubꞌal tuꞌ oj caey ecꞌ ebꞌ; jaꞌ ebꞌ oj teynenoj, yet watxꞌ cꞌam chi tit jin jowal yin jin conobꞌ Israel, ẍi Dios.
54Jix sjije ebꞌ Israel yunen jaxca jix yun yalon Jehová tet naj Moisés.
Currently Selected:
Números 1: knj
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
