Mateo 7

Cꞌam Chi Skeꞌ Cu Naꞌon Oc Yin Wanojxa Mactxequel

(Lucas 6:37-38, 41-42)

1Manche je naꞌoc yin wanojxa mactxequel, yet watxꞌ cꞌam chi snaꞌoc Dios je yin. 2Yutol ta che naꞌoc yin junojxa mactxequel, jaxca che yute je naꞌon oc yin tuꞌ, queytuꞌ oj yun snaꞌon oc Dios je yin. Yuxan jaꞌ je yechbꞌal che yakꞌbꞌalne, jaꞌ oj akꞌbꞌalnele pax ey jex. 3Kꞌinaloj ta junoj ja wet animail chi too scꞌail teꞌ yul sat. Cha woche cha wiꞌeltej jun scꞌail teꞌ tuꞌ, asan xin, kꞌinaloj ey pax junoj patzabꞌ eyoctoj yul ja sat.#7:3 Jaꞌ jun scꞌail teꞌ, cꞌal junoj patzabꞌ chi yal ebꞌ Israel yu junoj mule ma spenail. Ta scꞌail teꞌ, txenne cu penail. Ta junoj patzabꞌ, miman cu penail. Ta cꞌam cha wiltej tol ey teꞌ eyoctoj yul ja sat, ¿tumi jaꞌ jun scꞌail teꞌ eyoctoj yul sat ja wet animail tuꞌ oj skeꞌ ja wiꞌon eltej? 4Ta ey junoj teꞌ patzabꞌ eyoctoj yul ja sat xin, toj oj skeꞌ ja walon tet ja wet animail jaxca tiꞌ: “Kilto wal, kiꞌeltej jun scꞌail teꞌ eyoctoj yul ja sat tuꞌ,” toj ja chi. 5Ta tol queytuꞌ cha wute ja waloni, caabꞌ sat jaach. Iꞌ can eltej jun teꞌ patzabꞌ eyoctoj yul ja sat tuꞌ bꞌabꞌel, Jaꞌ yet tuꞌ bꞌian, oj skeꞌ ja wiloni, catuꞌ oj ja wiꞌon eltej jun scꞌail teꞌ yul sat ja wet animail tuꞌ. 6Jaꞌ wan cuybꞌanile yet Dios, laan jaxca jun tujan chꞌen, perla sbꞌi.#7:6 Perla, jun chꞌen sajin, catuꞌ chi tzejeji pax oj. Caw miman stool. Asan ebꞌ bꞌeom chi kꞌanbꞌalneni. Chi el yin jun noꞌ noꞌ chi yij ostra, ey yul jaꞌ mar. Caw ey stool. Yuxan ma skeꞌ kakꞌon tet ebꞌ tol cꞌam niꞌoj yeloc apnoj Dios yul sat, yutol laan ebꞌ jaxca noꞌ txꞌiꞌ txꞌojwal sjowal tol tꞌinan cꞌal stit kin. Ey ebꞌ xin, laan jaxca noꞌ txitam, tol tucꞌal chi stecꞌtoj wan tzetyetal xaan tuꞌ ta chi akꞌle tet. Yutol asan yin tzet chi sloꞌ tuꞌ ey yeloc apnoj yul sat noꞌ:

Kꞌanwej, Seywej, Awanwej Octoj Stiꞌ Puerta

(Lucas 11:9-13; 6:31)

7Kꞌanwej, oj yakꞌ Dios ey jex. Seywej, catuꞌ oj ilcha je yu. Awanwej octoj stiꞌ puerta, catuꞌ oj jajle ey jex. 8Yutol yal cꞌal mactxequel chi kꞌanoni, chi ẍaꞌ. Jaꞌ mac chi seyon ecꞌoj, chi ilcha yu. Jaꞌ mac chi awi octoj stiꞌ puerta, chi jajle tet. 9Jaꞌ jaex mame jex tiꞌ, ta chi skꞌan je cꞌaal junoj loꞌbꞌe ey jex, ¿tumi jaꞌ junoj chꞌen che yakꞌ tet? 10Ma xin, ta jaꞌ junoj pescado chi skꞌan ey jex, ¿tumi jaꞌ junoj labꞌa che yakꞌ tet? 11Jal jex jaex tiꞌ, caxcꞌal cꞌam je watxꞌil, caw je yotaj che yakꞌ tzetyetal watxꞌ tet ebꞌ je yuninal. Yel cꞌal chi yakꞌ pax cu Mam eyecꞌ bꞌey satcan. Oj yakꞌ tzetyetal watxꞌ tet ebꞌ chi kꞌanon tet. 12Che yoche tol watxꞌ chi yute sbꞌa ebꞌ je yet animail ey jex, yuxan, watxꞌ ojabꞌ che yute pax je bꞌa tet ebꞌ. Yutol queytuꞌ jix yun chejle kunen yu sley Moisés tzꞌibꞌebꞌilcanoj, cꞌal tzet tzꞌibꞌebꞌilcan yu ebꞌ ẍejabꞌ Dios* yet peyxa tuꞌ.

Jun Yaliẍ Puerta

(Lucas 13:24)

13Jaꞌ yul jun yaliẍ sat puerta chex oqui. Yutol ey junxa puerta miman sat, catuꞌ miman pax sat sbꞌeal, asan xin, jaꞌ bꞌey syaꞌtajilal chi apni jun bꞌe tuꞌ, catuꞌ ecꞌal ebꞌ ánima chi too yul. 14Jal pax jun yaliẍ sat puerta tuꞌ xin, txenne pax sat sbꞌeal, catuꞌ cꞌam txꞌial ánima chi too yul, asan xin, jaꞌ jun bꞌe tuꞌ chi apni bꞌey kꞌinale.

Jaꞌ Cu Bꞌeybꞌal, Laan Jaxca Sat Teꞌ

(Lucas 6:43-44)

15Che yil cꞌal je bꞌa tet ebꞌ chi yaloc sbꞌa ẍejabꞌoj Dios, yutol jaꞌ yet oj jul ebꞌ je cꞌatan, yeynajil xacꞌal oj yute sbꞌa ebꞌ jaxca noꞌ meꞌ, asan xin, tol pena tzet chi snaꞌoc ebꞌ je yin, jaxca junoj noꞌ ooj caw txꞌitaj. 16Oj je yotajne el ebꞌ sicꞌlebꞌil yu tzetyetal chi el yunen ebꞌ, jaxca kotajnen el junoj teꞌ teꞌ yu sat. Kꞌinaloj junoj teꞌ qꞌuix tinaniꞌ, man mansan oj sat chi yakꞌa. Kꞌinaloj pax junoj steꞌal tulus tinaniꞌ, man tzoyol oj sat chi yakꞌa.#7:16 Jix akꞌle bꞌinatej an uva cꞌal higo yu Jesús yin jun skꞌaneal tiꞌ, yutol man otajbꞌiloj wan sat teꞌ tuꞌ ku, yuxan jix kaoc sbꞌi wan sat teꞌ otajbꞌil ku. 17Masanil teꞌ teꞌ watxꞌ, watxꞌ cꞌal sat teꞌ chi yakꞌa. Jaꞌ masanil teꞌ teꞌ pena, pena cꞌal sat teꞌ chi yakꞌa. 18Jaꞌ teꞌ teꞌ watxꞌ, ma skeꞌ tol pena sat teꞌ chi yakꞌa. Jacꞌalaꞌ teꞌ teꞌ pena, ma skeꞌ tol watxꞌ sat teꞌ chi yakꞌa. 19-20Yuxan, jaꞌ ebꞌ chi yaloc sbꞌa ẍejabꞌoj Dios tuꞌ, oj je yotajne el ebꞌ sicꞌlebꞌil yu sbꞌeybꞌal ebꞌ tuꞌ, cꞌal yu tzettaj yetal chi el yunen ebꞌ. Masanil teꞌ teꞌ tol man watxꞌoj sat chi yakꞌa, chi kꞌajle a teꞌ catuꞌ chi kꞌojletoj teꞌ xol kꞌakꞌ yu chi tzꞌaꞌtoj, queyton tuꞌ oj utele ebꞌ man watxꞌoj sbꞌeybꞌal. 21Man masaniloj ebꞌ chi yal ey jin jaxca tiꞌ: “Mamin, Waawil jaach an,” ẍi ebꞌ ey jin an, oj oc yul skꞌabꞌ Naj Yaaw a satcan. Asanne ebꞌ chi jijen yochwan cu Mam eyecꞌ satcan, asanne ebꞌ tuꞌ oj ocoj. 22Jaꞌ yet oj jul jun cꞌual tuꞌ, ecꞌal ebꞌ oj alon ey jin jaxca tiꞌ: “Mamin, Waawil jaach an, caw jix cu ecꞌ kalon el ja kꞌane, yetoj ja wip jix kiꞌon el pena espíritu yin ebꞌ ánima. Yetoj pax ja wip, ecꞌal milagro* jix el kuneni,” oj yalon ebꞌ ey jin an. 23Jaxa oj yun jin takꞌwoj tet ebꞌ jaxca tiꞌ: “Cꞌam cꞌal bꞌey jix jex wotajne el juneloj an. Elanwej cꞌal jin cꞌatan an, yutol asanne cꞌal spenail jix el je yuneni,” jin chi, oj jin takꞌwoj tet ebꞌ.

Sowalil Chi Cu Jije Tzet Chi Yal Jesús

(Lucas 6:47-49; Marcos 1:22)

24Yal cꞌal mactxequel chi abꞌen jin kꞌane, catuꞌ chi sjijeni, laan ebꞌ jaxca jun winaj jelan. Jaꞌ jun winaj tuꞌ, jaꞌ yibꞌan chꞌen chi swaꞌne sna. 25Chi jul miman yaax nabꞌ, catuꞌ jix ecꞌ elom jaꞌ yinlaj sna, catuꞌ jix jul pax jun miman kaꞌeꞌ, catuꞌ jix low yin jun na tuꞌ. Caxcꞌal caw jow ma telcꞌotoj yutol caw watxꞌ ye ey xeꞌ yibꞌan chꞌen tuꞌ. 26Jal ebꞌ chi abꞌen jin kꞌane, ta cꞌam chi sjije pax ebꞌ, laan ebꞌ jaxca jun winaj suc snaꞌbꞌal. Jaꞌ jun winaj tuꞌ, jaꞌ yibꞌan cꞌuun txꞌotxꞌ chi swaꞌne sna. 27Chi jul miman yaax nabꞌ, catuꞌ jix ecꞌ elom jaꞌ yinlaj na, catuꞌ jix jul pax jun miman kaꞌeꞌ, catuꞌ jix low yin jun na tuꞌ, chi telcꞌotoj teꞌ, jix etex xacꞌaltoj, ẍi Jesús tet ebꞌ. 28Jaꞌ yet jix lawi skꞌanabꞌ Naj Jesús tet ebꞌ ánima tuꞌ xin, tuxa cꞌal chi qꞌueycan a scꞌul ebꞌ yu wan cuybꞌanile tiꞌ. 29Yutol jaꞌ yet lalan skꞌanabꞌ naj xol ebꞌ tuꞌ, jix txeclo eloj tol ey ton yopiso naj yu Dios. Man laan oj scuybꞌanil naj jaxca ebꞌ cuywam yin sley Moisés.*

Currently Selected:

Mateo 7: knj

Highlight

Compare

Copy