Mateo 21

Jix Apni Jesús Bꞌey Jerusalén

(Marcos 11:1-11; Lucas 19:28-40; Juan 12:12-19)

1Jaꞌ yet lalanxa yapni Jesús yetoj ebꞌ scuywom bꞌey scawilal conobꞌ Jerusalén, jix apni ebꞌ bꞌey conobꞌ Betfagé, yin scꞌul wonan Olivo. Catuꞌ jix ẍejon bꞌabꞌoj cawan ebꞌ scuywom Jesús. 2Jix yalon Naj tet ebꞌ jaxca tiꞌ:

—Bꞌabꞌanwejtoj bꞌey jun aldea cu sattajtoj tiꞌ. Jaꞌ tituꞌ oj je yil jun noꞌ txutxe bꞌuru, txuan oc noꞌ yetoj junxa noꞌ achꞌe xa. Che tiel noꞌ catuꞌ che yiꞌontej noꞌ titiꞌ. 3Ta ey mactxequel chi alon ey jex, che yal tet ebꞌ jaxca tiꞌ: “Ey tzet oj oc noꞌ yu Naj Kaawil,” je chi tet. Catuꞌ oj jajletej noꞌ ey jex yin eymanil, ẍi Jesús tet ebꞌ. 4Queyton tuꞌ jix yun xin, yet watxꞌ chi yun tzet tzꞌibꞌebꞌilcan yu naj ẍejabꞌ Dios yet peyxa,* yet jix yalon can jaxca tiꞌ:

5Je chi tet ebꞌ a conobꞌ Sión jaxca tiꞌ: “Ilaꞌ sjul je Reyal je xol. Chi jul yin yeynajil yibꞌan noꞌ bꞌuru. Eya yibꞌan noꞌ achꞌe bꞌuru,” je chi, ẍi yul An Juun Tzꞌibꞌebꞌilcan tuꞌ.#Zacarías 9:9.

6Catuꞌ jix too ebꞌ cawan cuywom tuꞌ. Jix sjijen ebꞌ tzet jix yal Jesús. 7Jix yiꞌontej noꞌ txutxe bꞌuru tuꞌ ebꞌ yetoj noꞌ achꞌe xa tuꞌ tet Jesús. Jix yaon oc wan spichil ebꞌ cuywom tuꞌ yibꞌan sꞌaamoj yichin noꞌ. Catuꞌ jix a Jesús yibꞌan noꞌ. 8Jaꞌ yet lalan sbꞌey ebꞌ tuꞌ, ecꞌal ebꞌ ánima chi slitxꞌbꞌa ey spichil yul bꞌe. Ey mactxequel xin, skꞌabꞌ teꞌ chi bꞌet stzokꞌtej, catuꞌ chi yaon ey yul sbꞌe Naj tuꞌ.#21:8 Chi yaey spichil cꞌal xaj teꞌ ebꞌ ánima yul bꞌe yu xꞌoxon eloj, tol chi tzala ebꞌ yet chi jul junoj rey, ma junoj mactxequel miman yeloc apnoj. 9Jaꞌ jantaj ebꞌ bꞌabꞌel sattaj, cꞌal jantaj ebꞌ tzajan yintaj jix ẍaꞌon el yich ebꞌ yel yaw jaxca tiꞌ:

—Tit ojabꞌ swatxꞌcꞌulal Dios yibꞌan jun yicꞌaal naj David tiꞌ.* Kalwej watxꞌ kꞌane tet jun chejbꞌiltej yu Naj Kaawil tiꞌ.#Salmos 118:26. Kalwej yu diosal tet Naj a Satcan, ẍi ebꞌ. 10Jaꞌ yet jix apni Jesús bꞌey conobꞌ Jerusalén, jix a somna masanil ebꞌ ánima, jix skꞌanlen ebꞌ jaxca tiꞌ:

—¿Mactxequel jun chi jul tiꞌ? ẍi ebꞌ. 11Ey ebꞌ jix alon jaxca tiꞌ:

—Jaꞌton ẍejabꞌ Dios, Jesús a Nazaret yul yet Galilea, ẍi ebꞌ.

Ebꞌ Ujtebꞌil Eltej Yu Jesús Yul Templo

(Marcos 11:15-19; Lucas 19:45-48; Juan 2:13-22)

12Jix lawi jun tuꞌ xin, jix octoj Jesús yul stemplo Dios. Jix yujten eltej ebꞌ chi txonwi, cꞌal ebꞌ chi manwi tituꞌ. Jix stenon a pacꞌlabꞌoj smeẍa ebꞌ qꞌuexom tumin, cꞌal ẍila ebꞌ txonom uch.#21:12 Jaꞌ wan noꞌ noꞌ chi txonle yul templo tuꞌ, jaꞌton wan chi yakꞌ ebꞌ yin xaambꞌalil. Chi sqꞌuex tumin ebꞌ tituꞌ yutol asan stumin yet templo tuꞌ chi ẍaꞌ ebꞌ yin ofrenda, ma saꞌbꞌeal yul templo tuꞌ. Ecꞌal mac chi yetne ebꞌ yin wan tiꞌ. 13Jix yalon tet ebꞌ jaxca tiꞌ:

—Albꞌilcan yu Dios yul An Juun Tzꞌibꞌebꞌilcan jaxca tiꞌ: “Jaꞌ jin na an, Snail Txa oj yijaꞌ,” ẍi An Juun tuꞌ.#Isaías 56:7. Jal jex jaex tiꞌ, jaxca cꞌal junoj nachꞌen bꞌey chi scꞌubꞌa el sbꞌa ebꞌ elkꞌom, queytuꞌ che yute, ẍi Jesús tet ebꞌ.#Jeremías 7:11. 14Jaꞌ yet eyecꞌ Naj yul templo tuꞌ, ey ebꞌ cꞌam chi skeꞌ yilwi jix apni scꞌatan Naj, yetoj ebꞌ cꞌam chi skeꞌ sbꞌeyi. Jix waꞌxi can ebꞌ yu Jesús. 15Jaꞌ yet jix yilon wan milagro* tuꞌ ebꞌ yaawil ebꞌ yakꞌomal xaambꞌal tet Dios, yetoj ebꞌ cuywam yin sley Moisés, catuꞌ jix yabꞌen ebꞌ yel yaw wan achꞌe cꞌal wan kꞌopo tol chi yal jaxca tiꞌ: “Tit ojabꞌ swatxꞌcꞌulal Dios yibꞌan jun yicꞌaal naj David tiꞌ,” ẍi ebꞌ. Jix tit sjowal ebꞌ sicꞌlebꞌil. 16Jix yalon ebꞌ tet Jesús jaxca tiꞌ:

—¿Chim ja wabꞌ tzet chi yal wan achꞌe cꞌal wan kꞌopo tiꞌ? ẍi ebꞌ tet Jesús.

—Chi ton wabꞌ an. ¿Tumi cꞌamto che yil yul An Juun Tzꞌibꞌebꞌilcan bꞌey chi yal wan chi yal ebꞌ tiꞌ?

Jaꞌ ebꞌ unin, ebꞌ watxꞌ xa, cꞌal ebꞌ chi too txutxwi, jaꞌ ebꞌ jix ja wakꞌ kꞌanabꞌ yalon watxꞌ kꞌane ey jaach.

Queytuꞌ yalon can yul An Juun Tzꞌibꞌebꞌilcan tuꞌ, ẍi Jesús tet ebꞌ.#Salmos 8:2. 17Jix lawi tuꞌ xin, jix bꞌejlecan ebꞌ yu Naj, catuꞌ jix too Naj. Jix el bꞌey Jerusalén tuꞌ catuꞌ jix apni bꞌey Betania. Jatuꞌ jix ecꞌ akꞌbꞌal yu Naj tituꞌ.

Jix Tajel Teꞌ Higo Yu Jesús

(Marcos 11:12-14, 20-26)

18Jaꞌ yet junxa skꞌinibꞌalil, yet lalan spaxtoj Jesús bꞌey Jerusalén, catuꞌ jix tit swail. 19Jix yiloni tol ey jun teꞌ higo stiꞌ bꞌe. Jix too naj scꞌatan teꞌ, caw cꞌam junoj sat teꞌ jix ilcha yu Naj. Asan xaj teꞌ ey. Yuxan jix yal naj tet teꞌ jaxca tiꞌ:

—Cꞌamxa bꞌakꞌin oj ja wakꞌ ja sat, ẍi Jesús tet teꞌ higo tuꞌ. Catuꞌ jaꞌ yet jun txolan tuꞌ jix taj xacꞌal el teꞌ.#21:19 Ey bꞌey chi bꞌinale teꞌ higo yin yecheloj ebꞌ conobꞌ Israel. 20Jaꞌ yet jix yilon ebꞌ scuywom jun tuꞌ, caw jix qꞌueya scꞌul ebꞌ:

—¿Tzet jix yun stajel jun teꞌ tiꞌ yin junoj txolan? ẍi ebꞌ jix skꞌanlen ebꞌ tet Jesús.

21—Caw yel chi wal ey jex, ta tol che yaoc Dios yin je cꞌul, catuꞌ cꞌam niꞌoj che yakꞌ caabꞌcꞌulal, yal cꞌal tzet oj skeꞌ je yu. Man asanne oj jaxca tzet jix wute jun teꞌ tiꞌ, oj skeꞌ je yu. Ta che yal tet jun wonan tiꞌ: “Elan titiꞌ, kꞌojeytoj ja bꞌa xol jaꞌ mar,” ta je chi tet, oj skeꞌ je yu. 22Catuꞌ yal cꞌal tzet oj je kꞌan yet oj jex txaloj, oj akꞌle ey jex, ta tol che yaoc yin je cꞌul, ẍi Jesús tet ebꞌ.

Ey Ebꞌ Jix Skꞌanle Bꞌey Jix Tit Yopiso Naj Jesús

(Marcos 11:27-33; Lucas 20:1-8)

23Catuꞌ jix oc Jesús yul stemplo Dios. Jix cuywa tet ebꞌ ánima yul tuꞌ. Jix apni ebꞌ yaawil yakꞌomal xaambꞌal ebꞌ Israel yetoj ebꞌ icham winaj yeoc yul conobꞌ Israel tuꞌ scꞌatan Naj, catuꞌ jix skꞌanlen ebꞌ tet Naj jaxca tiꞌ:

—¿Tzet ja wopiso yuxan jix ja wun wan tuꞌ yet ewi? ¿Mactxequel jix akꞌon ja wopiso tuꞌ? ẍi ebꞌ tet Jesús tuꞌ. 24Catuꞌ jix yalon Jesús tet ebꞌ jaxca tiꞌ:

—Ey pax jun tzet oj jin kꞌanle el ey jex. Ta oj je yal ey jin an, catuꞌ oj walon ey jex mac jix akꞌon wopiso tiꞌ yuxan chi wun wan tiꞌ. 25Alwej ey jin an, ¿mac jix akꞌon yopiso naj Juan yin yakꞌon bautizar ánima? ¿Dios mi jix akꞌon tet ma jaꞌ ánima? ẍi Jesús tet ebꞌ.

Catuꞌ jix cꞌoli yaloꞌten ebꞌ xol tuꞌ yu jun tzet jix skꞌanle tuꞌ, jix cꞌoli yalon ebꞌ jaxca tiꞌ:

—¿Tzet chi kute cu pajtzen tet? Yutol ta chi kalaꞌ, tol jaꞌ Dios jix akꞌon yopiso naj Juan tuꞌ, “¿tzet yuxan ma je yaoc yin je cꞌul xin?” ẍi mi ey jon. 26Ta chi kal pax tet tol ánima jix akꞌon yopiso tuꞌ, caw ey smey yu ebꞌ ánima, yutol jaꞌ naj Juan tuꞌ caw ẍejabꞌ Dios snaꞌon ánima masanil, ẍi ebꞌ. 27Yuxan jix yalon ebꞌ jaxca tiꞌ:

—Man kotajoj, ẍi ebꞌ tet Jesús.

—Ta queytuꞌ xin, man pax oj wal ey jex mac jix akꞌon wopiso, yuxan chi wun wan tzetyetal tiꞌ, ẍi Jesús tet ebꞌ.

Skꞌaneal Cawan Cꞌaale

28Catuꞌ jix yalon Jesús tet ebꞌ jaxca tiꞌ:

—¿Tzet ẍi je cꞌul yu jun kꞌaneal oj waltej tiꞌ? ẍi Jesús tet ebꞌ.

Ey jun winaj ey cawan scꞌaal. Jix yalon tet naj bꞌabꞌel winaj jaxca tiꞌ: “Jaach jin Cꞌaal, asiꞌ, mulna bꞌey cu mulnail tinaniꞌ,” ẍi naj mame tuꞌ tet scꞌaal. 29“Cꞌamaj, cꞌam chin too jain tiꞌ,” ẍi naj cꞌaale tuꞌ tet smam tuꞌ. Junebꞌxa wal tuꞌ xin, jix snaꞌon sbꞌa scꞌul catuꞌ jix toi. 30Jix lawi jun tuꞌ xin, catuꞌ jix yalon naj tet naj tzunan unin jaxca cꞌal jix yute yalon tet naj bꞌabꞌel. “Ye xin Mamin, oj jin toj,” ẍi naj cꞌaale tuꞌ. Ma pax toj naj. 31Tinaniꞌ xin, chin kꞌanle ey jex, ¿mac junoj ebꞌ naj cꞌaale tuꞌ jix jijen tzet jix yal smam tuꞌ? ẍi Jesús tet ebꞌ.

—Jaꞌ naj bꞌabꞌel unin jix sjije tzet jix yal smam tuꞌ, ẍi ebꞌ.

Catuꞌ jix yalon Jesús tet ebꞌ jaxca tiꞌ:

—Caw yel chi wal ey jex, ta oj oc Naj a Satcan je Yaawiloj, bꞌabꞌel oj oc ebꞌ tejom el toolabꞌal* cꞌal ebꞌ ix amul ix je sattaj. 32Yutol jaꞌ naj Juan Bautista tuꞌ, jix yal ey jex tzet watxꞌ che yute je waꞌnen je bꞌeybꞌal, ma pax je yaoc yin je cꞌul tzet jix yalaꞌ. Ilaꞌ pax la, jaꞌ ebꞌ tejom el toolabꞌal cꞌal ebꞌ ix amul ix jix yaoc ebꞌ yin scꞌul tzet jix yalaꞌ. Caxcꞌal jix je yil tzet jix yute snaꞌon sbꞌa ebꞌ yet jix snaꞌ sbꞌa scꞌul ebꞌ yin spenail, ma pax je naꞌ je bꞌa yetoj ebꞌ. Ma je yaoc yin je cꞌul tzet jix yal naj Juan tuꞌ.

Skꞌaneal Ebꞌ Mulnawom Pena Snaꞌbꞌal

(Marcos 12:1-12; Lucas 20:9-19)

33Abꞌwej junxa skꞌaneal oj waltej tiꞌ an xin: Ey jun winaj jix yaw uva#21:33 Ey bꞌey chi bꞌinale yakꞌil teꞌ uva yecheloj ebꞌ conobꞌ Israel. Il Isaías 5:1-7. bꞌey sat jun xꞌotxꞌ, catuꞌ jix oc colal yinlaj. Jix swaꞌnen jun jolan bꞌey oj stecꞌ el yal yuva tuꞌ. Jix stzaꞌjon pax a jun ilbꞌal uva xol tuꞌ. Jix lawi tuꞌ xin, jix yaon cantoj jun xꞌotxꞌ tuꞌ yetoj cꞌal yawo maanil tet wan ebꞌ mulnawom winaj. Catuꞌ jix too ecꞌabꞌ bꞌey junxa lugar naat. 34Jaꞌ yet jix aapnoj stiempoal syambꞌale a an, jix ẍejontoj wan ẍejabꞌ naj yu stoo ẍaꞌon ebꞌ jantaj yet naj tꞌinan yiꞌon tet ebꞌ naj jix maanen can tuꞌ. 35Jaꞌ yet jix apni ebꞌ xin, jix mitxꞌle ey ebꞌ chejabꞌ yu ebꞌ mulnawom tuꞌ. Ey jun jix makꞌle yu ebꞌ. Ey junxa xin, jix cam xacꞌal yu ebꞌ. Jal junxa xin, tol jix kꞌojchꞌennele yu ebꞌ. 36Jix ẍejontoj wanxa ebꞌ ẍejabꞌ naj a txꞌotxꞌ tuꞌ. Ecꞌbꞌan sbꞌisil ebꞌ yintaj ebꞌ bꞌabꞌel tuꞌ, jacꞌalaꞌ pax jix utele ebꞌ. 37Catuꞌ jaxa naj cꞌaale jix chejletoj. “Oj xiw ebꞌ tet jun jin cꞌaal tiꞌ an,” ẍi naj. 38Jaꞌ yet jix yilon ebꞌ naj mulnawom tuꞌ, tol jaꞌ naj cꞌaale tuꞌ chi apni, jix slatiꞌne el sbꞌa ebꞌ, catuꞌ jix yalon ebꞌ jaxca tiꞌ: “Jaꞌ yet oj cam naj smam naj tiꞌ, jaꞌ oj iꞌon can jun txꞌotxꞌ tiꞌ sattaj oj. Cu makꞌwej camoj, yet watxꞌ jaon xa chi kiꞌcan oc jun txꞌotxꞌ tiꞌ,” ẍi ebꞌ. 39Yuxan asanne cꞌal jix apni naj scꞌatan ebꞌ, catuꞌ jix sacꞌontej ebꞌ, jix sjutxon el naj ebꞌ stiꞌel txꞌotxꞌ tuꞌ, catuꞌ jaꞌ tituꞌ jix makꞌle cam naj yu ebꞌ. 40¿Tzet oj utele ebꞌ mulnawom tuꞌ yu naj a txꞌotxꞌ tuꞌ yet oj jul naj che naꞌ? ẍi Jesús tet ebꞌ Fariseo tuꞌ.

41—Oj akꞌle cam masanil wan ánima pena tuꞌ yu naj yet oj juloj. Catuꞌ oj yaon cantoj xꞌotxꞌ tuꞌ maanil junelxa tet wanojxa mulnawom tol yel oj yakꞌ jantaj yet naj tꞌinan chi yiꞌ yin cꞌal stiempoal, ẍi ebꞌ. 42Yuxan, jix yal pax Jesús tet ebꞌ jaxca tiꞌ:

—¿Tumi cꞌamto bꞌey che yil yul An Juun Tzꞌibꞌebꞌilcanoj tzet oj jin utele eloj bꞌey chi yal jaxca tiꞌ?

Ey jun chꞌen jix yintajne el ebꞌ waꞌnem na. Jaꞌton jun tuꞌ yel jix oc yopiso. Jaꞌ Naj Kaawil jix unen jun tuꞌ, yuxan, jaꞌ yet chi kiloni, caw chi qꞌueya cu cꞌul yu, ẍi yul An Juun Tzꞌibꞌebꞌilcan tuꞌ.#Salmos 118:22, 23.

43Yuxan, chi wal ey jex, tol cꞌamxa je yalon je yet yoc Naj a Satcan je Yaawiloj. Txꞌojxa animail oj oc je qꞌuexeloj. Jaꞌton ebꞌ tuꞌ laan jaxca ebꞌ oj akꞌon yucꞌaꞌ txꞌotxꞌ txꞌotxꞌ tet naj a txꞌotxꞌ tuꞌ. 44Yal cꞌal mac chi smakꞌey sbꞌa yibꞌan jun chꞌen tuꞌ, kocꞌ xacꞌal chi yun skꞌatoj. Queytuꞌ oj yun yeloc ebꞌ chin intajnen eloj. Jal mac oj jin naꞌoc yin, jaxca junoj mactxequel chi eyqꞌuey jun chꞌen tuꞌ yibꞌan, kocꞌ xacꞌal chi yuntoj, ẍi Jesús tet ebꞌ. 45Jaꞌ yet jix yabꞌen wan skꞌaneal tiꞌ ebꞌ yaawil yakꞌomal xaambꞌal ebꞌ Israel tet Dios, yetoj ebꞌ Fariseo tuꞌ, jix naꞌcha el yu ebꞌ tol jaꞌ ebꞌ chi al-lei. 46Yuxan jix yoche ebꞌ jix michꞌcha Jesús. Caw chi xiw pax ebꞌ tet ebꞌ ánima. Yutol jaꞌ Jesús tuꞌ, ẍejabꞌ ton Dios yul sat ánima tuꞌ.

Currently Selected:

Mateo 21: knj

Highlight

Compare

Copy