Levítico 8
8
Yet Jix Sicꞌle El Ebꞌ Yakꞌomal Xaambꞌal
(Éxodo 29:1-37)
1Jix yalon Jehová tet naj Moisés jaxca tiꞌ:
2Al tet naj Aarón yetoj tet ebꞌ scꞌaal, catuꞌ cha wiꞌontej spichil ebꞌ chi yaoc yin yopiso yin yakꞌomal xaambꞌal ey jin an, yetoj pax aceite olivo chi kꞌanbꞌalne yet chi sicꞌle oc junoj ebꞌ yin yopiso, catuꞌ chi yiꞌontej junoj achꞌe wacax ebꞌ yetoj cacꞌonoj noꞌ meꞌ oj akꞌle yin xaambꞌalil yu stooloj spenail ebꞌ, cꞌal yetoj junoj yaliẍ xuc ixim pan tol cꞌam yich eyocoj. 3Catuꞌ cha yambꞌan oc masanil ebꞌ ja wet conobꞌ Israel bꞌey stiꞌ jun kꞌap na bꞌey chin chaꞌle jin bꞌa je yetoj, ẍi Dios tet naj Moisés.
4Jix sjije naj Moisés jaxca jix yun yalon Dios, catuꞌ jix syambꞌa oc masanil ebꞌ ánima bꞌey stiꞌ jun kꞌap na bꞌey chi ẍaꞌle sbꞌa ebꞌ yetoj Dios. 5Jix yalon naj Moisés tet masanil ebꞌ ánima jaxca tiꞌ: Jaꞌton wan ẍejbꞌanil Dios tiꞌ tol oj cu jije.
6Jix lawi tuꞌ, jix yalon naj Moisés tet Aarón yetoj cꞌal tet ebꞌ scꞌaal tol chi tit ebꞌ scꞌatan, catuꞌ jix akꞌle aẍnoj ebꞌ yu naj. 7Jix lawi tuꞌ, jix ale oc spichil naj Aarón tuꞌ yu, cꞌal scꞌalil snan. Jix yaon cꞌal pax oc an jojan pichile; catuꞌ jix yaon pax oc an camiẍe chaleco, catuꞌ jix skꞌalon oc an yetoj scꞌalil, an tol tzꞌisbꞌil oc yelawil. 8Jaxa yin an tuꞌ jix yaon pax oc jun an yet smajil xaamscꞌul, jaꞌ yul an tuꞌ jix yaoctoj jun chꞌen Urim cꞌal jun chꞌen Tumim. 9Jix lawi tuꞌ, jix sbꞌacꞌon oc skꞌoxil sjolom naj, jaxa bꞌey snan spalan jix ale oc jun placa chꞌen tol oro cꞌal eloj, jaꞌton chi txꞌoxoni tol sicꞌbꞌil oc naj yin yopiso, jaxca wal jix yun yalon Dios.
10Jix lawi tuꞌ, catuꞌ jix iꞌle a wan aceite olivo chi kꞌanbꞌalnele yet chi sicꞌle oc junoj mactxequel yin yopiso yu naj Moisés, ma junoj tzetyetal tol yet Dios chi yun yakꞌlei, catuꞌ jix xion oc yin jun na yet Dios, cꞌal yin masanil wan mitxꞌkꞌabꞌe eyoctoj yul. 11Jacꞌalaꞌ jun aceite olivo tuꞌ, jujel jix xiey naj yibꞌan jun yet xaambꞌal tuꞌ, cꞌal yibꞌan masanil smitxꞌkꞌabꞌil, yetoj cꞌal yibꞌan jun miman palangana chꞌen, yetoj cꞌal sbꞌatxlubꞌ yet yalan yet chi oc can yetoj Dios.
12Jix lawi tuꞌ, jix yaon pax atoj jun aceite olivo tuꞌ naj Moisés yibꞌan sjolom naj Aarón, yu yoc can naj yin yopiso yin yet Dios. 13Catuꞌ jix awteletej ebꞌ scꞌaal Aarón yu naj Moisés, jix ale oc an jojan pichile yin ebꞌ, cꞌal scꞌalil ebꞌ, yetoj an skꞌoxil sjolom ebꞌ, jaxca wal jix yun yalon Dios.
14Jix lawi tuꞌ, catuꞌ jix akꞌle to tit noꞌ achꞌe wacax oj oc yin xaambꞌalil yu yakꞌle stooloj spenail yu naj Moisés. Jaxa naj Aarón yetoj cꞌal ebꞌ scꞌaal jix yaoc skꞌabꞌ ebꞌ yibꞌan sjolom noꞌ wacax tuꞌ. 15Jaxca tuꞌ chi yun yoc can yetoj Dios. Jal jantaj to ẍiqꞌuil noꞌ jix cani, jix sec can ey naj bꞌey yajantaj jun yet xaambꞌal tuꞌ; yet chi oc can yopiso yin yoc mimancꞌulal yin spenail.
16Jix lawi tuꞌ, jix iꞌle a masanil ẍepuꞌal noꞌ eyoc yin yul scꞌul noꞌ yu naj Moisés, yetoj cꞌal wan eyoc yin skꞌej noꞌ, yetoj yubꞌal noꞌ scaabꞌil, yetoj cꞌal ẍepuꞌal eyoc yin. Jaꞌ masanil wan tuꞌ jix yakꞌ tzꞌaꞌ naj yibꞌan yet xaambꞌal tuꞌ. 17Jaxa niꞌojxa noꞌ chiꞌbꞌe tuꞌ yetoj stzꞌuumal noꞌ cꞌal stzaꞌ noꞌ, jatuꞌ jix akꞌle can tzꞌaꞌ stiꞌeltoj bꞌey bꞌulan ecꞌ ebꞌ tuꞌ, jaxca jix yun yalon Dios.
18Catuꞌ jix akꞌle Moisés too tit noꞌ meꞌ chi akꞌle tzꞌaꞌ yin xaambꞌal. Jaxa naj Aarón yetoj ebꞌ scꞌaal jix yaoc skꞌabꞌ ebꞌ yibꞌan sjolom noꞌ meꞌ tuꞌ. 19Jix lawi tuꞌ, jix smakꞌon cam noꞌ meꞌ naj Moisés, catuꞌ jix yiꞌontoj ẍiqꞌuil noꞌ naj, jix sbꞌonon oc yinlaj jun yet xaambꞌal tuꞌ. 20Kocꞌ tzokꞌ jix yutetoj noꞌ meꞌ tuꞌ naj Moisés, catuꞌ jix yakꞌon tzꞌaꞌ sjolom yetoj cꞌal ẍepuꞌal noꞌ. 21Jix lawi tuꞌ, jix txꞌale el noꞌ yul scꞌul yetoj cꞌal noꞌ yajan yu naj, catuꞌ jix yakꞌon tzꞌaꞌ masanil yin xaambꞌal. Jaꞌ jun saꞌbꞌeal tuꞌ caw watxꞌ yoc sabꞌ jix yabꞌ Dios, jaxca wal chi ẍaꞌ scꞌul Dios.
22Jix lawi tuꞌ, jix yakꞌon too tit junxa noꞌ meꞌ naj Moisés, yu skꞌanbꞌalnele yu sicꞌle can oc ebꞌ yin yopiso. Jaxa naj Aarón yetoj ebꞌ scꞌaal jix yaoc skꞌabꞌ ebꞌ yibꞌan sjolom noꞌ meꞌ tuꞌ. 23Jix lawi tuꞌ, catuꞌ jix smakꞌon cam noꞌ meꞌ naj Moisés, jix yiꞌontoj niꞌoj ẍiqꞌuil noꞌ naj, catuꞌ jix sbꞌonon oc yetoj yiximal skꞌabꞌ yin xiquin Aarón bꞌey swatxꞌ kꞌabꞌ, cꞌal yin xutxal yiximal skꞌabꞌ yetoj yajan bꞌey swatxꞌ kꞌabꞌ. 24Jix lawi tuꞌ, jix yalon Moisés tol chi sjitztej sbꞌa ebꞌ scꞌaal naj Aarón tuꞌ scꞌatan, jix yiꞌontej niꞌoj ẍiqꞌuil noꞌ meꞌ naj, catuꞌ jix sbꞌonon oc naj yetoj yiximal skꞌabꞌ yin xiquin ebꞌ bꞌey swatxꞌ kꞌabꞌ ebꞌ, cꞌal yin xutxal yiximal skꞌabꞌ ebꞌ yetoj yajan ebꞌ bꞌey swatxꞌ kꞌabꞌ. Jix lawi tuꞌ, jantaj to ẍiqꞌuil noꞌ jix cani jix sec can ey naj yinlaj jun yet xaambꞌal tuꞌ.
25Jix lawi tuꞌ, jix yiꞌon a sne noꞌ meꞌ naj Moisés tuꞌ, yetoj masanil ẍepuꞌal eyoc yin noꞌ yul scꞌul, yetoj ẍepuꞌal eyoc yin noꞌ skꞌej yetoj yubꞌal noꞌ scaabꞌil yetoj ẍepuꞌal, cꞌal yetoj xubꞌ noꞌ bꞌey swatxꞌ. 26Catuꞌ jix yiꞌon atej jun pan naj Moisés eey yul jun yaliẍ xuc eey bꞌey yet xaambꞌal tuꞌ, ixim cꞌam yich eeyoj, yetoj junxa ixim calbꞌil yetoj aceite olivo, cꞌal yetoj jun ixim wocꞌox pan, catuꞌ jix yaon atoj naj yibꞌan noꞌ ẍepuꞌ tuꞌ, cꞌal yibꞌan xubꞌ noꞌ bꞌey swatxꞌ. 27Jix lawi tuꞌ, jix yakꞌon wan tuꞌ naj Moisés yul skꞌabꞌ naj Aarón, yetoj cꞌal yul skꞌabꞌ ebꞌ scꞌaal naj, yet chi sbꞌatxbꞌan ey ebꞌ sattaj Dios. 28Jix lawi tuꞌ, jix ẍaꞌon ecꞌ masanil wan tuꞌ naj Moisés yul skꞌabꞌ ebꞌ, catuꞌ jix yakꞌon tzꞌaꞌ masanil naj bꞌey yibꞌan jun yet xaambꞌal tuꞌ, yetoj cꞌal noꞌ xaambꞌal jix akꞌle tzꞌaꞌ sattaj Dios, yu sicꞌle can oc ebꞌ yin yopiso. Caw watxꞌ yoc sabꞌ jix yabꞌ Dios.
29Jix yiꞌon pax a noꞌ xaamscꞌul meꞌ tuꞌ naj Moisés, noꞌ jix akꞌle yu sicꞌle can oc ebꞌ yin yopiso tuꞌ. Catuꞌ jix yaon ey naj sattaj Dios, jaxca jix yun yalon Dios tet.
30Jix lawi tuꞌ, jix yiꞌon a aceite olivo naj Moisés, yetoj cꞌal chicꞌ eey yibꞌan jun yet xaambꞌal tuꞌ, catuꞌ jix xiontoj yibꞌan naj Aarón, cꞌal yin spichil. Catuꞌ jix xiontoj yibꞌan ebꞌ scꞌaal, yetoj cꞌal yin spichil ebꞌ. Jaxca tuꞌ jix yun yoc can naj Aarón yin yopiso yetoj ebꞌ scꞌaal, cꞌal yetoj spichil ebꞌ masanil.
31Jix yalon naj Moisés tet naj Aarón, yetoj cꞌal tet ebꞌ scꞌaal jaxca tiꞌ: Akꞌwej ta noꞌ chiꞌbꞌe bꞌey sattaj jun kꞌap na bꞌey chi cu chaꞌle cu bꞌa yetoj Dios, jaꞌ tituꞌ che chiꞌ noꞌ, catuꞌ che loꞌon pax ixim pan eeytoj yul jun xuc, jaꞌton ixim jix akꞌle yu je yoc can yin je yopiso, jaxca jix yun walon ey jex: Jaꞌ Aarón yetoj ebꞌ scꞌaal oj sloꞌ ebꞌ jun loꞌbꞌe tiꞌ, jin chi yet jix walon canoj. 32Masanil noꞌ chiꞌbꞌe yetoj ixim pan cꞌam chi lawi je yu, che nuswej can tzꞌaꞌoj. 33Jaꞌ sattaj jun na bꞌey chi cu chaꞌle cu bꞌa yetoj Dios, jacꞌal tuꞌ chex can yin jujebꞌ cꞌual, cꞌam cꞌal chex eltej tituꞌ, masantaꞌcꞌal yet chi tzꞌajna scꞌual yu je yoc can yin je yopiso tuꞌ.
34Jaꞌ tinaniꞌ tuxa jix cu jije cu waꞌnen jaxca jix yun yalon Dios ey jon, yet chi tancan el je penail je yibꞌan. 35Yu tuꞌ xin, jaꞌ bꞌey sattaj jun Kꞌap Na bꞌey chi cu chaꞌle cu bꞌa yetoj Dios, jaꞌ tituꞌ chex cancan yin jujebꞌ cꞌual cꞌal jujebꞌ akꞌbꞌal, catuꞌ che jijen masanil wan chejbꞌanile tiꞌ, yet watxꞌ cꞌam chex cami; yutol jaxca tuꞌ jix yun yalon Dios ey jin, ẍi naj Moisés tet ebꞌ.
36Queytuꞌ jix yun sjijen naj Aarón yetoj ebꞌ scꞌaal masanil wan tzet jix yal Dios tet naj Moisés.
Currently Selected:
Levítico 8: knj
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
