Levítico 19
19
Sleyalil Swatxꞌilal, Yetoj Sjichanilal
1Jix yalon pax Jehová tet naj Moisés jaxca tiꞌ:
2Al tet masanil ebꞌ ja wet Israelal, tol jain chi wal wan chejbꞌanile tiꞌ tet ebꞌ:
Watxꞌ cꞌal che yute je bꞌa, yutol jain Jehová jin tiꞌ, watxꞌ jin cꞌal.
3Jijem ojabꞌ che yute je bꞌa tet je mam cꞌal tet je txutx.
Che jije scꞌual xewilal. Jain ton Jehová je Diosal jin chi walaꞌ.
4Cꞌam ojabꞌ chex oc yin eyilal tet wan echele, cꞌam ojabꞌ che waꞌne ey chꞌen chꞌen je diosaloj. Jain sDiosal ebꞌ Israel chi walaꞌ.
5Jaꞌ yet che yakꞌon junoj je xaambꞌal yu je penail ey jin an, che jije jaxca jix yun walon can ey jex, yet watxꞌ oj jin chaꞌ jun je xaambꞌal tuꞌ. 6Jaꞌ noꞌ chiꞌbꞌe che yakꞌ yin xaambꞌal tuꞌ, sowalil che chiꞌeytoj noꞌ yet jun cꞌual tuꞌ, ta tol cꞌam chi lawi noꞌ je chiꞌoni, chi skeꞌ je chiꞌon noꞌ yet junxa cꞌu; ta eyto noꞌ chi can yin scaabꞌial xin, che yakꞌwej can tzꞌaꞌ noꞌ. 7Ta tol chi to je chiꞌ noꞌ yin scaabꞌial tuꞌ, caw pena xa yul jin sat, cꞌamxa chin chaꞌ jun xaambꞌal tuꞌ ey jex. 8Jaꞌ mactxequel chi chiꞌon noꞌ yet scaabꞌial tuꞌ, cꞌam chi tan spenail ebꞌ yibꞌan, yutol comon cꞌal chi ẍiꞌ ebꞌ wan tzetyetal tol wet yeocoj. Jaꞌ jun mactxequel tuꞌ, chi qꞌueyle el je xol.
9Jaꞌ yet che yambꞌa a sat je yawo bꞌey sat je txꞌotxꞌ, man siqꞌuiqꞌui oj xacꞌal che yute a sat je yawo chi el sat je txꞌotxꞌ tuꞌ, catuꞌ cꞌam ojabꞌ xacꞌal chex ecꞌ xacꞌal tꞌananoj je sicꞌon a ixim sjolom tiriw chi cancan je yu. 10Jain Jehová jin chi walaꞌ. Jaꞌ yet che yambꞌa a an uva, manche je yiꞌel an eyoc xaamlaj eltoj skꞌabꞌ, catuꞌ manche je sicꞌa an chi pujcan ey yich. Jaꞌ wan tuꞌ can ojabꞌi, yet xa ebꞌ mebꞌa cꞌal ebꞌ txꞌoj conobꞌal chi yun canoj.
11Cꞌam ojabꞌ chex elkꞌanwi, manche je yal lekꞌtiꞌal kꞌane, catuꞌ manche je yetnele je bꞌa yin junoj tzetyetal.
12Man comonoj che loctej jin bꞌi xol je kꞌane che yalaꞌ. Ta jaxca tuꞌ che yunne jaxca tol cꞌamxa cꞌal weloc apnoj yul je sat. Jain ton Jehová jin chi walaꞌ.
13Man comonoj che yetne je yet animail, catuꞌ cꞌam che yiꞌecꞌ stzetyetal ebꞌ.
Cꞌam ojabꞌ che yalaꞌ, tol jato yet yecal che yakꞌ stool scꞌu ebꞌ chi mulna yin je mulnail tinaniꞌ.
14Cꞌam ojabꞌ che yal pena kꞌane yin ebꞌ ánima tol chacan. Cꞌam ojabꞌ che yaey junoj tzetyetal yul sbꞌe ebꞌ ánima tol cꞌam chi skeꞌ yilwani. Yet che txꞌoxon eloj tol miman ojabꞌ weloc apnoj yul je sat.
15Ta ey junoj jowal che waꞌne yeoc sattaj ley, watxꞌ ojabꞌ chi yun je waꞌnen yeoc jun kꞌane tuꞌ. Cꞌam ojabꞌ che yaoc je bꞌa yetoj ebꞌ mebꞌa, tam wal ebꞌ miman yeloc apnoj. Bꞌey cꞌal ian ojabꞌ chi yun je waꞌnen yeoc junoj kꞌane xol ebꞌ.
16Cꞌam ojabꞌ che yal skꞌumal ebꞌ je yet animail.
Jain Jehová jin chi walaꞌ. Man comonoj che yaltoj junoj je kꞌane yet chi makꞌle cam junoj je yet animail.
17Man ojabꞌ comonoj chi chichon oc je cꞌul yin je yet animail, jaꞌ je yet tol che tenchane ebꞌ, catuꞌ che yaon oc snaꞌbꞌal ebꞌ, yet watxꞌ man locanoj jex yin jun spenail ebꞌ tuꞌ.
18Jain Jehová jin chi walaꞌ. Cꞌam ojabꞌ che yaecꞌ spaj tet je yet animail, tam wal chi skeꞌ ẍichon oc je cꞌul yin ebꞌ. Jaꞌ je yet tol che camcꞌulne ebꞌ, jaxca wal che yute je camcꞌulnen je bꞌa.
19Jijewej wan jin chejbꞌanil tiꞌ.
Cꞌam ojabꞌ che chaꞌ akꞌle sajcho noꞌ je jobꞌbꞌeal noꞌ yu junojxa noꞌ txꞌoj noꞌal.
Cꞌam ojabꞌ che caltoj je yinat che yaw sat je txꞌotxꞌ.
Cꞌam ojabꞌ che yaoc an pichile tol calbꞌil xꞌalil yetoj junojxa tujan txꞌal.
20Ta ey junoj winaj chi yun amulal yetoj junoj ix ix eyoc yin yakꞌomaloj servil junoj mactxequel, catuꞌ eyxa pax swa kꞌane ix yetoj junojxa winaj, asan ta tol cꞌamto chi mancha el ix yu naj bꞌey eyxa swa kꞌane ix tuꞌ, ta jaxca tuꞌ, tucꞌal chi akꞌle sowalil tet ebꞌ scawanil. Cꞌam chi makꞌle cam ebꞌ, yutol man to yetoj sbꞌa ebꞌ scawanil. 21Jaꞌ naj tuꞌ, sowalil chi yakꞌ junoj noꞌ icham meꞌ yin xaambꞌaloj jin sattaj, bꞌey sattaj jun na bꞌey chin chaꞌle jin bꞌa je yetoj. 22Jaꞌ junoj ebꞌ yakꞌomal xaambꞌal chi makꞌon cam noꞌ yin xaambꞌaloj, yu spenail jun naj chi oc smul tuꞌ. Queytuꞌ chi yun stancan el spenail jix yun jun mactxequel tuꞌ.
23Jaꞌ yet oj jex apnoj bꞌey txꞌotxꞌ Canaán, oj je yawon masanil teꞌ awbꞌeal teꞌ chi yakꞌ sat, cꞌam cꞌal che mitxꞌ junoj sat teꞌ teꞌ tuꞌ, cꞌal je loꞌoni yin oxebꞌ abꞌil, yutol ey sowalil wu. 24Jaxa yet chi yakꞌon sat teꞌ teꞌ yet scan abꞌil xin, masanil sat teꞌ awbꞌeal teꞌ tuꞌ, che yakꞌ teꞌ yin ofrendail yu je yalon yu diosalil ey jin jain Jehová jin tiꞌ, yutol wet yeoc sat teꞌ teꞌ tuꞌ. 25Jal pax yet joebꞌ abꞌil xin, je yet xa chi yun can oc sat teꞌ teꞌ tuꞌ, yet che loꞌoni. Ta oj je jije wan tuꞌ, yel xa miman sat teꞌ oj yakꞌa. Jain ton Jehová je Diosal jin chi walaꞌ.
26Cꞌam ojabꞌ che chiꞌ noꞌ chiꞌbꞌe tol cꞌam chi el ẍiqꞌuil.
Cꞌam ojabꞌ che cuy je bꞌa yin je naꞌon el kꞌane tam wal je yoc yin atxumal.
27Man ojabꞌ setannoj ye chi yun stzujle el xil je jolom,#19:27 Jaxca tuꞌ sbꞌeybꞌal wanxa nación yet chi oc ebꞌ yin eyilal tet sdiosal. cꞌam ojabꞌ che jooxel xil je tiꞌ.
28Cꞌam che makꞌ yasoj je bꞌa yu cuscꞌulal,#19:28 Queytuꞌ sbꞌeybꞌal ebꞌ a Canaán yet chi xꞌoxon el scuscꞌulal ebꞌ. yu junoj camom, catuꞌ cꞌam ojabꞌ che yaoc yechel junoj tzetyetal yin stzꞌuumal je mimanil. Jain ton Jehová je Diosal jin chi walaꞌ.
29Cꞌam ojabꞌ che yiꞌel sqꞌuixwil je cutzꞌin, catuꞌ che yaon oc ebꞌ yin amul ixal sattaj wan comon dios, yet watxꞌ cꞌam chi etex el sbꞌeybꞌal ebꞌ conobꞌ, cꞌal yetex el je conobꞌ yin amulal tuꞌ.
30Sowalil che jije scꞌual xewilal jix wal can ey jex. Ey ojabꞌ yeloc apnoj snail jin calubꞌal yul je sat. Jain Jehová je Diosal jin chi walaꞌ.
31Cꞌam ojabꞌ chi too je kꞌanle je bꞌa tet ebꞌ chi kꞌanabꞌ yetoj spixan camom, cꞌal tet ebꞌ txumlom, yet watxꞌ cꞌam che yetnetoj je bꞌa jin sattaj. Jain Jehová je Diosal jin chi walaꞌ.
32Jaꞌ yet chex apni oc sattaj ebꞌ icham ánima, chex oc linan sattaj ebꞌ, miman ojabꞌ yeloc apnoj ebꞌ yul je sat. Ey ojabꞌ pax weloc apnoj yul je sat. Jain Jehová je Diosal jin chi walaꞌ.
33Cꞌam ojabꞌ che yetne junoj ebꞌ txꞌoj conobꞌal caan ecꞌ je xol. 34Ey ojabꞌ yeloc apnoj ebꞌ yul je sat, che camcꞌulne ebꞌ jaxca che yute je camcꞌulnen je bꞌa. Che naꞌwejtej tol jaex tiꞌ naatil ecꞌnaj jex caan yin txꞌoj conobꞌal bꞌey txꞌotxꞌ Egipto.
35Cꞌam ojabꞌ che yetne ebꞌ ánima yin tzet che txonoꞌ, tzꞌajan ojabꞌ je yechbꞌal che yakꞌbꞌalne, jaxca xꞌanil je mulnail yet che yechen je txꞌotxꞌ, ma junojxa echbꞌal che kꞌanaꞌ. 36Tzꞌajan ojabꞌ je libra cꞌal je yalmu che kꞌanbꞌalne yet che yechen junoj tzetyetal che txonoꞌ. Jain Jehová je Diosal jin, jain jix jex wiꞌeltej bꞌey conobꞌ Egipto, jain chi walaꞌ.
37Yu jun tuꞌ xin, sowalil che jije jin ley cꞌal masanil jin chejbꞌanil. Jain ton Jehová jin chi walaꞌ, ẍi Dios.
Currently Selected:
Levítico 19: knj
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
