Levítico 13
13
Chejbꞌanile Yin Jun Yaꞌbꞌil Chi Yij Lepra
1Jix lawi tuꞌ xin, jix yalon Jehová tet naj Moisés cꞌal tet Aarón jaxca tiꞌ:
2Ta ey junoj mactxequel chi mala smimanil, ma chi a wotxan yinlaj, ma caj sulinaj yili smimanil, tala cꞌuxan lepra,#13:2 Jaꞌ jun lepra chi bꞌina tiꞌ, ecꞌal tujan jun yaꞌbꞌil chi ecꞌ yin stzꞌuumal ebꞌ ánima tuꞌ, man junne oj tujan, jaxca jun lepra yet cu tiempoal tiꞌ. jun syaꞌilal tuꞌ, yuxan sowalil chi iꞌletej sattaj naj Aarón, ma sattaj junojxa ebꞌ yakꞌomal xaambꞌal, jaꞌton ebꞌ yicꞌaal naj Aarón tuꞌ. 3Jaxa jun yakꞌomal xaambꞌal tuꞌ, chi seyon il jun syaꞌilal eyoc yin smimanil jun ánima tuꞌ. Ta tol sajin yili xil jun ánima bꞌey eeltej jun yaꞌbꞌil tuꞌ, catuꞌ miman txequel tol man asanne oj yin stzꞌuumal eyocoj, ta naat xa yich, jaꞌ jun yaꞌbꞌil tuꞌ lepra chi yal tuꞌ. Jaꞌ yet chi xew yil-le junoj ánima yu junoj yakꞌomal xaambꞌal tuꞌ, jaxa chi aloni tol cꞌamxa chi skeꞌ yeecꞌ jun yaꞌey tuꞌ xol yet animail.
4Ta sajin yili oc stzꞌuumal bꞌey eeltej jun yaꞌbꞌil tuꞌ, jaxca wal tol asan yin stzꞌuumal eyocoj, man pax sajin oj xil bꞌey eeltej tuꞌ, sowalil chi maji oc jun ánima tuꞌ yin jujebꞌoj cꞌual yu jun yakꞌomal xaambꞌal tuꞌ. 5Jaxa yet chi lawi jujebꞌ cꞌual tuꞌ, catuꞌ chi seyle pax il jun ánima tuꞌ junelxa. Ta jacꞌalaꞌ yili, ta cꞌam cꞌal chi bꞌeyecꞌoj, jaꞌ yet chi lawi yil-le tuꞌ, chi majchele pax oc jujebꞌojxa cꞌual. 6Jaxa yet chi lawi jujebꞌxa cꞌual tuꞌ, catuꞌ chi il-le jun ánima tuꞌ yu naj yakꞌomal xaambꞌal tuꞌ junelxa. Ta lalanxa sqꞌueya jun yaꞌbꞌil tuꞌ, ta cꞌamxa tzet chi bꞌey cꞌaltoj yin stzꞌuumal jun ánima tuꞌ, catuꞌ chi yalon jun yakꞌomal xaambꞌal tuꞌ tol man lepra oj eyoc yin, comon syaꞌilal cꞌal eyoc yin, chi lawi tuꞌ, chi xꞌaon el spichil jun yaꞌey tuꞌ, jaxca tuꞌ chi yun scan jun mactxequel tuꞌ yin watxꞌ.
7Ta tol jaꞌ jun yaꞌbꞌil tuꞌ chi xꞌoxa sbꞌa junelxa, caxcꞌal mi xax yal naj yakꞌomal xaambꞌal tol man lepra oj, sowalil chi tit pax junelxa sattaj jun yakꞌomal xaambꞌal tuꞌ yet chi il-le pax junelxa. 8Ta jaxa yilon naj tol chi bꞌeyecꞌ jun yaꞌbꞌil tuꞌ, chi skeꞌ yalon naj tol lepra eyoc yin jun mactxequel tuꞌ.
9Ta ey junoj ánima eyoc lepra yin, sowalil chi iꞌletej sattaj ebꞌ yakꞌomal xaambꞌal. 10Yet watxꞌ jaꞌ junoj ebꞌ yakꞌomal xaambꞌal chi iloni ta tol lalan smalaoj, ta sajin yili stzꞌuumal, catuꞌ lalanxa pax sajbꞌi el xil bꞌey eeltej tuꞌ, cajin xacꞌal yili sat jun yaꞌbꞌil tuꞌ. 11Ta jaxca tuꞌ, jaꞌton jun tuꞌ chi yij lepra. Jaxa naj yakꞌomal xaambꞌal tuꞌ chi aloni tol cꞌamxa chi skeꞌ yeecꞌ xol yet animail, catuꞌ cꞌamxa chi skeꞌ smaji oc yul junoj na, yutol manxa watxꞌoj smimanil jun ánima tuꞌ.
12Ta eyman chi bꞌeytoj jun yaꞌbꞌil tuꞌ yin, catuꞌ chi noel masanil smimanil yu, jatacꞌalaꞌ chi yun yilon oc junoj yakꞌomal xaambꞌal tuꞌ, 13ta tol tuxa chi taj yili sat jun yaꞌbꞌil tuꞌ, ta xax majcha el yinlaj smimanil tuꞌ, jatacꞌalaꞌ tzet chi yun yilon oc jun yakꞌomal xaambꞌal tuꞌ, chi skeꞌ yalon naj tol watxꞌ xa scꞌul jun mactxequel tuꞌ, chi skeꞌ xa yoc xol yet animail. 14Ta ey junoj cꞌual chi txeclo a ẍiꞌbꞌeal xol jun yaꞌbꞌil tuꞌ xin, cꞌamxa chi skeꞌ yeecꞌ jun ánima tuꞌ xol yet animail. 15Jaxa junoj ebꞌ yakꞌomal xaambꞌal tuꞌ chi ilon jun yaꞌbꞌil tuꞌ, ta tol chi txeclo a ẍiꞌbꞌeal chi yilaꞌ, jaxa yaloni tol lepra chi ioni, cꞌamxa chi skeꞌ yeecꞌ xol yet animail.
16Ta cꞌuancꞌulal cꞌal chi sajbꞌi el ẍiꞌbꞌeal jun yaꞌey tuꞌ xin, sowalil chi tit bꞌey junoj ebꞌ yakꞌomal xaambꞌal, 17catuꞌ chi seyon pax naj yilaꞌ; ta tol sajin yili sat jun yaꞌbꞌil tuꞌ, jaxa naj chi aloni tol cꞌamxa smey jun syaꞌilal tuꞌ, chi xa skeꞌ yoc xol yet animail.
18Ta ey mactxequel chi elol junoj malilal yaꞌbꞌil yin smimanil, catuꞌ chi taj pax eyoj, 19ta jaxa bꞌey sat jun malilal tuꞌ, sajin yili, ma caj sulinaj yili, jaꞌ jun tuꞌ sowalil chi tit sattaj junoj ebꞌ yakꞌomal xaambꞌal tuꞌ. 20Jaxa jun yakꞌomal xaambꞌal tuꞌ chi iloni, ta man asanne oj yin stzꞌuumal eyoc jun yaꞌbꞌil tuꞌ, ta sajin yili xil bꞌey eyoc jun yaꞌbꞌil tuꞌ, jaxa chi aloni tol lepra jun chi xꞌoxa sbꞌa yin jun ánima tuꞌ, yuxan cꞌamxa chi skeꞌ yeecꞌ xol yet animail. 21Ta jaꞌ yet chi yilon oc tuꞌ, tol jaꞌ bꞌey eyoc sat jun yaꞌbꞌil tuꞌ cꞌam chi sajbꞌi el xil, tol asan yin stzꞌuumal eyocoj, ta lalanxa stajeyoj, jaꞌ jun ánima tuꞌ sowalil chi maji oc jujebꞌoj cꞌual. 22Jaꞌ yet chi lawi jujebꞌ cꞌual tuꞌ, ta tol yelcꞌulal cꞌal chi bꞌeytoj jun yaꞌbꞌil tuꞌ yin stzꞌuumal jun ánima tuꞌ, chi yalon jun yakꞌomal xaambꞌal tuꞌ tol lepra chi ioni, cꞌamxa chi skeꞌ yeecꞌ xol yet animail. 23Ta tol cꞌam chi bꞌeytoj jun yaꞌbꞌil tuꞌ yin smimanil, chi yal yeloc apnoj tol asan yechel jun yaꞌbꞌil tuꞌ ey can ocoj, jaxa yalon jun yakꞌomal xaambꞌal tuꞌ tol cꞌamxa jun syaꞌilal tuꞌ yin jun mactxequel tuꞌ.
24Ta ey junoj mactxequel ey junoj tzꞌaꞌil yin smimanil, ta jaꞌ bꞌey tzꞌaꞌil tuꞌ chi txeclo ẍiꞌbꞌeal, jaxa yin ẍiꞌbꞌeal tuꞌ chi txeclo pax a junoj sutan sajin ma cajin yili. 25Jaꞌ naj yakꞌomal xaambꞌal tuꞌ chi iloni, ta tol chi sajbꞌi el xil ma lalanxa stoo yich jun bꞌey eyoc sat tuꞌ, ta jaxca tuꞌ, tol lepra jun lalan xꞌoxon a sbꞌa bꞌey stzꞌaꞌil tuꞌ, jaꞌ naj yakꞌomal xaambꞌal tuꞌ chi aloni tol cꞌamxa chi skeꞌ yeecꞌ xol yet animail. 26Ta jaꞌ yet chi yilon jun yakꞌomal xaambꞌal tol cꞌam junoj xil lalan sajbꞌi eloj, ta man lalan oj stoo yich jun tzꞌaꞌil tuꞌ, ta lalan stajeyoj, sowalil chi maji oc jun ánima tuꞌ yin jujebꞌoj cꞌual. 27Jaꞌ yet chi lawi jujebꞌ cꞌual tuꞌ, catuꞌ chi il-le pax yu jun yakꞌomal xaambꞌal tuꞌ, ta lalan sbꞌeytoj yin ẍiꞌbꞌeal jun ánima tuꞌ, catuꞌ chi yaloni tol yaꞌey jun mactxequel tuꞌ yu lepra, cꞌamxa chi skeꞌ yeecꞌ xol yet animail. 28Ta jaꞌ bꞌey tzꞌaꞌil tuꞌ, tol lalan sqꞌueyaoj, asan tucꞌal chi mala yu tzꞌaꞌil tuꞌ, jaxa yalon jun yakꞌomal xaambꞌal tuꞌ tol jaꞌ jun syaꞌilal tuꞌ cꞌam smey, asan yechel jun tzꞌaꞌil tuꞌ chi cani.
29Ta ey junoj winaj ma junoj ix ix chi a junoj yaax yaꞌbꞌil yin sjolom, ma yalan stiꞌ, 30jaꞌ junoj yakꞌomal xaambꞌal tuꞌ, sowalil chi ilon jun tuꞌ. Ta jaꞌ jun yaꞌbꞌil tuꞌ tol lalanxa stoo yich, ma tol lalanxa skꞌanbꞌi el xil, jaxa jun yakꞌomal xaambꞌal tuꞌ chi aloni tol lepra eyoc yin sjolom ma yalan stiꞌ jun ánima tuꞌ. 31Yuxan jaꞌ yet chi yilon jun yakꞌomal xaambꞌal tuꞌ tol jaꞌ jun yaꞌbꞌil tuꞌ, cꞌam chi too yich, catuꞌ cꞌamto chi kꞌejbꞌi el xil bꞌey eyoc jun yaꞌbꞌil tuꞌ, jaꞌ jun ánima tuꞌ sowalil chi maji oc yin jujebꞌoj cꞌual. 32Jaxa yet chi lawi jujebꞌ cꞌual tuꞌ xin, catuꞌ chi yilon pax jun yakꞌomal xaambꞌal tuꞌ, tol cꞌam chi bꞌeyecꞌ jun yaꞌbꞌil tuꞌ, cꞌam yich, ta cꞌam pax xil chi kꞌanbꞌi eloj, 33jaxa yalon naj tuꞌ, tol chi tzujle el xil yinlaj sat jun yaꞌbꞌil tuꞌ, catuꞌ chi maji oc yin jujebꞌojxa cꞌual. 34Jaxa yet chi ecꞌtoj jujebꞌxa cꞌual xin, catuꞌ chi yilon pax jun yakꞌomal xaambꞌal tuꞌ junelxa. Ta cꞌam chi bꞌeyecꞌoj, ta cꞌam chi too yich jun yaꞌbꞌil tuꞌ, chi yaloni tol cꞌam smey jun yaꞌbꞌil tuꞌ, asan tol chi xꞌael spichil jun ánima tuꞌ, watxꞌ xa chi yun can eloj. 35Asan xin, ta jaxa chi yunne jaꞌ yet xax al-le eloj tol watxꞌ xa scꞌul jun mactxequel tuꞌ, catuꞌ chi bꞌey pax toj jun yaꞌbꞌil tuꞌ yin junelxa, 36sowalil chi il-le pax jun yaꞌey tuꞌ yu junoj ebꞌ yakꞌomal xaambꞌal junelxa. Ta tol jaꞌ jun yaꞌbꞌil tuꞌ lalan sbꞌeytoj yin stzꞌuumal smimanil, man sowaliloj tol kꞌan yili xil, tol lepra chi ion jun mactxequel tuꞌ. 37Ta tol lalanxa stit skꞌejinal xil, jaxa yet chi yilon jun yakꞌomal xaambꞌal tuꞌ chi yaloni tol watxꞌ xa scꞌul jun ánima tuꞌ.
38Ta ey junoj winaj ma junoj ix tol eyoc lebꞌquiẍtaj sajin yin stzꞌuumal, 39jaꞌ junoj ebꞌ yakꞌomal xaambꞌal tuꞌ chi ilon stzꞌuumal tuꞌ, ta sajin xa wal yili, ta cꞌam chi kopopi, comon yaꞌbꞌil chi iꞌon jun ánima tuꞌ, cꞌam smey jun yaꞌbꞌil tuꞌ.
40Ta ey junoj winaj chi pujel xil sjolom, cꞌamxa xil sjolom tuꞌ chi cani, jaꞌ jun tuꞌ cꞌam smey. 41Ta asan bꞌey sattaj chi pujel xil sjolom, cꞌamxa xil chi cani, man yaꞌbꞌil oj jun tuꞌ. 42Ta chi elol junoj yaax yaꞌbꞌil bꞌey cꞌamxa xil sjolom tuꞌ, sajin ma cajin yili bꞌey cꞌam xil tuꞌ, jaꞌ jun tuꞌ lalan ya lepra yin. 43Sowalil chi il-le yu junoj ebꞌ yakꞌomal xaambꞌal. Ta jaꞌ bꞌey cꞌam xil sjolom tuꞌ chi a junoj yaꞌbꞌil, sajin ma cajin yili, 44jaꞌ jun ánima tuꞌ lepra chi ioni. Chi yalon jun yakꞌomal xaambꞌal tuꞌ, tol cꞌamxa chi skeꞌ yeecꞌ xol yet animail.
45Jaꞌ mactxequel yaꞌey yu lepra, sowalil jolquiẍtaj pichile chi yaocoj, chi yiꞌel skꞌoxil sjolom, catuꞌ chi smajche el nanoj sat. Ta chi too xol ánima, sowalil chi el yaw, catuꞌ chi yalon jaxca tiꞌ: ¡Elanwej, tol yaꞌ jin ey, yaꞌ jin ey! cꞌam chex tit jin cꞌatan, ẍi ojabꞌi. 46Jaꞌ yet eyoc jun yaꞌbꞌil tuꞌ yin, caw ey smey, sowalil chi iꞌle eltoj xꞌojli bꞌey stiꞌeltoj bꞌey bꞌulan ecꞌ ebꞌ tuꞌ.
47Jaꞌ yet kꞌuxtaj yili junoj pichile tol lana ma lino, 48yal cꞌal tzet kꞌapil, tol chembꞌil ma tol patxꞌonebꞌil, ma junoj tzꞌuum tol mitxꞌkꞌabꞌe yeocoj, 49ta yaxin yili, ma cajin yili wan skꞌuxtajil tuꞌ, jaꞌton jun tuꞌ sowalil chi txꞌoxle yil junoj ebꞌ yakꞌomal xaambꞌal, 50jaꞌ yet chi yilon oc jun yakꞌomal xaambꞌal tuꞌ tol kꞌuxtaj yili, chi maji ey jujebꞌoj cꞌual jun tzetyetal tuꞌ. 51Jaxa yet chi lawi jujebꞌ cꞌual tuꞌ xin, catuꞌ jix seyon yil jun yakꞌomal xaambꞌal tuꞌ, tzet utbꞌil yili wan kꞌuxtaj yoc tuꞌ, ta xax bꞌeyecꞌ lebꞌebꞌoj yin jun pichile tuꞌ, ma yin junoj tzꞌuum tol chi kꞌanle tuꞌ, jaꞌ wan tuꞌ ey smey. 52Yal cꞌal tzet mitxꞌkꞌabꞌeal tol eyxa oc jun tuꞌ yin, sowalil chi nusle tzꞌaꞌ masanil; yutol jaꞌ jun tuꞌ miman tzetyetal chi yetne can eloj. 53Ta jaꞌ yet chi yilon jun yakꞌomal xaambꞌal tol cꞌam chi bꞌeyecꞌ wan kꞌuxtaj tuꞌ yin, 54catuꞌ chi yaloni tol chi txꞌale el jun mitxꞌkꞌabꞌe tuꞌ, catuꞌ chi maji ey jujebꞌoj cꞌual.
55Jaꞌ yet xax txꞌale el jun mitxꞌkꞌabꞌe tuꞌ, catuꞌ chi yilon pax jun yakꞌomal xaambꞌal tuꞌ. Ta tol cꞌam chi qꞌueya jun skꞌuxtajil tuꞌ yin, caxcꞌal cꞌam chi el lebꞌebꞌoj, sowalil chi nusle tzꞌaꞌoj, caxcꞌal mi jaꞌ jun kꞌuxtaj tuꞌ eyoc yul ma yinlaj, yutol yel xacꞌal ey smey jun tuꞌ. 56Ta jaꞌ yet chi yilon jun yakꞌomal xaambꞌal yet xax txꞌale el jun tuꞌ, lalanxa sqꞌueya jun skꞌuxtajil tuꞌ, chi lotꞌle el bꞌey eyoc yin tuꞌ. 57Ta tol chi txeclo pax a jun skꞌuxtajil tuꞌ yin junelxa, sowalil chi nusle tzꞌaꞌoj. 58Jal pax wan tzetyetal bꞌey chi qꞌueya wan skꞌuxtajil tuꞌ xin, yet chi txꞌale eloj sowalil chi txꞌale pax el junelxa, jaxca tuꞌ chi yun swaꞌxi can eloj.
59Jaꞌton wan chejbꞌanile tiꞌ yin junoj tzꞌiltaj pichile chembꞌil ma tol patxꞌonebꞌil, lana ma lino, ma junoj tzꞌuum, queytuꞌ chi yun xeclo eloj ta watxꞌ ma tol man watxꞌoj yili, ẍi Dios tet naj Moisés cꞌal tet Aarón.
Currently Selected:
Levítico 13: knj
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
