Levítico 10
10
Scamichal Nadab Yetoj Cꞌal Naj Abiú
1Jaꞌ naj Nadab yetoj cꞌal Abihú, ebꞌ scꞌaal naj Aarón, jix yiꞌtej chꞌen txayibꞌ ebꞌ, chꞌen iꞌbꞌal a stzakꞌakꞌ, catuꞌ jix yaon oc skꞌakꞌal ebꞌ. Jix yaon eytoj teꞌ incienso ebꞌ yibꞌan, catuꞌ jix yakꞌon ebꞌ sattaj Dios, yul cꞌal yet ebꞌ, yutol manaj Dios jix alon tet ebꞌ. 2Jaꞌ yet jun txolan tuꞌ jix eltej kꞌakꞌ sattaj ebꞌ yu Dios, jix oc jun kꞌakꞌ tuꞌ yin ebꞌ, catuꞌ jix cam ebꞌ scawanil. 3Jix lawi tuꞌ, jix yalon naj Moisés tet naj Aarón jaxca tiꞌ:
—Jaꞌton jun tiꞌ chi yal yeloc apnoj tzet chi yal skꞌane Dios, bꞌey chi yal jaxca tiꞌ:
Jaꞌ mactxequel chi jul jin cawilal yet chi yakꞌon servil, sowalil ey ojabꞌ weloc apnoj yul sat, oj jin txꞌox jin bꞌa tet ebꞌ, yutol miman weloc apnoj yibꞌan masanil jin conobꞌ, ẍi Dios, ẍi naj Moisés. Cꞌamxa cꞌal tzet jix yal naj Aarón.
4Jix lawi tuꞌ, jix awtele, naj Misael cꞌal Elsafán, ebꞌ scꞌaal Uziel yican naj Aarón, yu naj Moisés, catuꞌ jix yalon tet ebꞌ jaxca tiꞌ:
—Titanwej jaex tiꞌ bꞌey yul jun Kꞌap Na tiꞌ, bꞌey eyecꞌ smimanil ebꞌ je yican, iꞌwej eltoj bꞌey stiꞌel bꞌey bꞌulan jex ey tuꞌ, ẍi naj tet ebꞌ.
5Jix octoj ebꞌ tituꞌ, catuꞌ jix yiꞌon eltoj ebꞌ bꞌey stiꞌel bꞌey bꞌulan ecꞌ ebꞌ tuꞌ, jaxca jix yun yalon naj Moisés tet ebꞌ. Eyto cꞌal oc spichil ebꞌ camnaj tuꞌ, jaꞌton an jix scꞌan ebꞌ yin yopiso.
Jaꞌ Tzetyetal Sowalil Chi Yun Ebꞌ Yakꞌomal Xaambꞌal
6Jix lawi tuꞌ, jix yalon naj Moisés tet naj Aarón, tet naj Eleazar cꞌal tet Itamar, jaꞌton ebꞌ scꞌaal naj Aarón iquisto ecꞌ tuꞌ:
—Manche je yiꞌel skꞌoxil je jolom, cꞌam ojabꞌ pax che tziltoj je pichil yu je txꞌoxon el je cuscꞌulal, jaxa tala che yunne, chex cam yu sjowal scꞌul Dios, catuꞌ chi tit yibꞌan masanil conobꞌ Israel. Jal masanil ebꞌ ket conobꞌ Israel tiꞌ chi skeꞌ scus scꞌul ebꞌ yin junoj mactxequel chi yakꞌ lawoj Dios yetoj kꞌakꞌ. 7Manche jex el pax sattaj jun Kꞌap Na bꞌey chi cu chaꞌle cu bꞌa yetoj Dios, yet watxꞌ cꞌam chex cami, yutol jaex tiꞌ sicꞌbꞌil jex eloj, abꞌil atoj aceite olivo yet Dios yibꞌan je jolom, ẍi naj Moisés tet ebꞌ naj. Jaxca cꞌal jix yun yalon naj Moisés, queytuꞌ jix yun sjijen ebꞌ.
8Jix yalon pax Dios tet naj Aarón jaxca tiꞌ:
9Jaꞌ yet oj jaach octoj jaach tiꞌ, yetoj ebꞌ naj ja cꞌaal yul jun Kꞌap Na bꞌey chin chaꞌle jin bꞌa je yetoj, manche je yucꞌ yal uva yetoj cꞌal an, jaxa tala chi yunne chex cami. Jaꞌ jun tiꞌ chejbꞌanile chi yun can je xol. 10Manche je yun wan tuꞌ, yutol sowalil chi naꞌcha el je yu tzetyetal tol wet, cꞌal tzetyetal comon cꞌal yeocoj, cꞌal snaꞌcha el je yu tzetyetal watxꞌ, cꞌal tzetyetal man watxꞌoj jaxca yalon jin chejbꞌanil. 11Sowalil che cuy cꞌal pax ebꞌ je yet conobꞌ yin wan jin chejbꞌanil tiꞌ, wan jix jin chej yal naj Moisés ey jex, ẍi Dios.
12Jix lawi tuꞌ, jix yalon pax naj Moisés tet naj Aarón, yetoj cꞌal tet naj Eleazar cꞌal tet naj Itamar, jaꞌton ebꞌ cawan scꞌaal naj Aarón iquisto ecꞌoj, jix yaloni:
—Iꞌwejtej ixim jarina jix too cancan yin saꞌbꞌeal jix tzꞌaꞌ sattaj Dios, che waꞌne ixim pan cꞌam yich bꞌey sattaj jun yet xaambꞌal tuꞌ, yutol jaꞌ jun saꞌbꞌeal tuꞌ, yet Dios yeocoj. 13Jaꞌ yet che chiꞌon noꞌ chiꞌbꞌe tuꞌ, jaꞌton bꞌey junoj lugar tol sajbꞌanebꞌil, yutol ja wet cꞌal chi yun can oc noꞌ yetoj ebꞌ naj ja cꞌaal, jaꞌton wan tiꞌ jix yal Dios ey jin an. 14Jaxa pax xaamscꞌul noꞌ chi bꞌatxbꞌale ey sattaj Dios, yu saꞌbꞌeal tet Dios yet chi oc yopiso yin watxꞌcꞌulalil, yetoj noꞌ xubꞌ, jaꞌ noꞌ tuꞌ je yet cꞌal chi yun can oc noꞌ, chi skeꞌ ja chiꞌon noꞌ yetoj ebꞌ naj ja cꞌaal cꞌal ebꞌ ix ja cutzꞌin bꞌey junoj lugar tol sajbꞌanebꞌil, 15yutol jaꞌ noꞌ xubꞌ chi iꞌle el tuꞌ, cꞌal noꞌ xamcꞌule chi bꞌatxle ecꞌ sattaj Dios tuꞌ, junne chi yun yakꞌle tzꞌaꞌ noꞌ yetoj ẍepuꞌ tuꞌ. Jaꞌ caabꞌ tujan noꞌ tuꞌ, ja wet yetoj ebꞌ ja wuninal jaxca jix yun yalon Dios ey jin, ẍi Moisés tet naj.
16Catuꞌ jix skꞌanlen pax naj Moisés yu noꞌ chiw jix akꞌle yin xaambꞌal yu stooloj spenail. Jaxa jix yun jix yalon ebꞌ tol xax akꞌle tzꞌaꞌ noꞌ. Yu jun tuꞌ, caw jix tit sjowal naj Moisés yin naj Eleazar, cꞌal yin naj Itamar, jaꞌton cawan scꞌaal naj Aarón iquisto ecꞌ tuꞌ, jix yalon tet ebꞌ jaxca tiꞌ:
17¿Tzet yuxan ma je chiꞌ noꞌ xaambꞌal bꞌey yul snail bꞌey chi cu chaꞌlewej cu bꞌa yetoj Dios? Jaꞌ jun tujan noꞌ xaambꞌal tuꞌ, yet Dios yeocoj, yuxan tol jix yakꞌ Naj ey jex, yu je chiꞌon noꞌ, yet chi tancan el spenail ebꞌ conobꞌ sattaj Dios. 18Yutol jaꞌ ẍiqꞌuil noꞌ xaambꞌal tuꞌ, ma iꞌletoj bꞌey yul Snail Scalubꞌal Jehová, yuxan sowalil tol che chiꞌ noꞌ bꞌey eyecꞌ noꞌ tuꞌ, jaxca wal jix yun walon can ey jex, ẍi naj Moisés.
19Jix yalon naj Aarón jaxca tiꞌ:
—Jaꞌ tinaniꞌ jix yakꞌ xaambꞌal ebꞌ yu yoc mimancꞌulal yin spenail, cꞌal noꞌ xaambꞌal tol chi tzꞌaꞌ masanil, caxcꞌal mi jaxca tuꞌ, ilaꞌ wal pax tzet chi jul wibꞌan an. Ta jix jin chiꞌ noꞌ xaambꞌal yet chi akꞌle tan spenail tuꞌ tinaniꞌ, ¿tumi taꞌ watxꞌ sattaj Dios? ẍi naj Aarón.
20Jaꞌ yet jix yabꞌen naj Moisés jaxca tuꞌ, cꞌamxa tzet jix yalaꞌ, yutol jix ẍaꞌ scꞌul naj.
Currently Selected:
Levítico 10: knj
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
