Juan 5
5
Jun Winaj Sicbꞌinaj Eloj, Jix Waꞌxi Can Scꞌul Yu Jesús
1Jix lawi tuꞌ xin, catuꞌ jix too Jesús bꞌey Jerusalén tuꞌ, jix too yilon jun skꞌin ebꞌ Israel. 2Jaꞌ bꞌey Jerusalén tuꞌ, ey jun jaꞌ lean ey yul jun miman tanque, Betzatá sbꞌi yin Hebreo. Scawilal spuertail chi yij sbꞌi Yet Noꞌ Meꞌ, jaꞌ tituꞌ ey jun jaꞌ tuꞌ. Jaꞌ bꞌey jun jaꞌ tuꞌ, ey joebꞌ pat cꞌam yichlaj. 3Ecꞌal ebꞌ yaꞌey telan octoj yul-laj wan pat tuꞌ. Ey ebꞌ cꞌam chi skeꞌ yilwi. Ey ebꞌ cꞌam chi skeꞌ sbꞌeyi. Ey pax ebꞌ sicbꞌinaj el smimanil. /Eyecꞌ ebꞌ yechbꞌanen sbꞌilwi sat jun jaꞌ tuꞌ, 4yutol ey tiempo chi jul eytej jun ángel bꞌey jun jaꞌ tuꞌ, catuꞌ chi jul yakꞌon bꞌilwoj jaꞌ tuꞌ. Asan mac bꞌabꞌel chi eytoj xol jaꞌ yet chi xew sbꞌilwi jaꞌ tuꞌ, asan jun tuꞌ chi waꞌxi can scꞌul, chi waꞌxi yin yal cꞌal tzet yaꞌbꞌilal./ 5Ey jun winaj, 38 abꞌil xa syaꞌbꞌi eyoj, eyecꞌ tituꞌ. 6Jix yilon Jesús tol telan ey sat txꞌotxꞌ. Catuꞌ jix yotajnen eloj tol naatilxa tiempo queytuꞌ yeoc naj. Yuxan jix skꞌanle tet naj jaxca tiꞌ:
—¿Chim ja woche chi waꞌxi can ja cꞌul? ẍi Jesús tet naj. 7Catuꞌ jix takꞌwi naj tuꞌ jaxca tiꞌ:
—Chi woche, Mamin, tol jaꞌ yet chi bꞌilwi sat jaꞌ jaꞌ tiꞌ, cꞌam pax mac chi okꞌ scꞌul win an, catuꞌ chin yaon eytoj xol jaꞌ. Junjun el, jaꞌ yet chi wakꞌlen jin too xol jaꞌ, txꞌoj cꞌal mac chi bꞌabꞌi eytoj jin sattaj, ẍi naj tet Jesús tuꞌ. 8Yuxan jix yal Jesús tet naj jaxca tiꞌ:
—Aan waanoj, iꞌa ja weyubꞌ. Bꞌeyan, ẍi Jesús tet naj. 9Eyman jix waꞌxi scꞌul jun winaj tuꞌ. Jix yiꞌon a sweyubꞌ naj, jix cꞌoli sbꞌeyi. Asan tol scꞌual xewilal ebꞌ Israel yet tuꞌ. 10Yuxan ey jaywan ebꞌ yaawil yeoc bꞌey Judea tuꞌ jix alon tet naj jix waꞌxi can scꞌul tuꞌ jaxca tiꞌ:
—Jaꞌ tinaniꞌ, scꞌual xewilal. Caw cꞌam sleyal ja wijon a ja weyubꞌ tiꞌ, ẍi ebꞌ tet naj.
11—Jaꞌ jun jix akꞌon waꞌxoj jin cꞌul, jaꞌ jix alon ey jin jaxca tiꞌ: “Iꞌa ja weyubꞌ, bꞌeyan,” ẍi ey jin an, ẍi naj tet ebꞌ. 12Yuxan jix skꞌanlen ebꞌ tet naj jaxca tiꞌ:
—¿Mactxequel jun jix alon ey jaach tol cha wiꞌa ja weyubꞌ tuꞌ, catuꞌ chach bꞌeyi? ẍi ebꞌ tet naj. 13Man pax yotaj oj naj tzet sbꞌi jun jix akꞌon waꞌxoj scꞌul tuꞌ, yutol caw ey ánima eyecꞌ tituꞌ. Yuxan ma il-le yin Jesús yu naj, yutol jix calchatoj xol ebꞌ ánima. 14Jato yet junelxa jix yil-len el sbꞌa Jesús yetoj naj yul stemplo Dios, catuꞌ jix yalon tet naj jaxca tiꞌ:
—Ilaꞌbꞌi. Jaꞌ tinaniꞌ watxꞌ xa ja cꞌul. Manxa cha wun spenail, yet watxꞌ cꞌamxa chi jul junoj yel miman syaꞌilal ja wibꞌan, ẍi Jesús tet naj. 15Catuꞌ jix too naj yalon tet ebꞌ yaawil yeoc bꞌey Judea tuꞌ, tzet utbꞌil tol jaꞌ Jesús jix akꞌon waꞌxoj scꞌul naj. 16Yuxan, caw jix tit sjowal scꞌul ebꞌ yin Jesús tuꞌ. /Jix yakꞌle ebꞌ seyon tzet utbꞌil chi yute yakꞌon cam Naj ebꞌ,/ yutol yet scꞌual xewilal jix yunen wan tuꞌ. 17Jix yalon pax Jesús tet ebꞌ yaaw yeoc bꞌey Judea tuꞌ jaxca tiꞌ:
—Jaꞌ Naj jin Mam, cꞌam bꞌey chi oc tucan smulnail. Yuxan jacꞌalaꞌ chin mulna pax jain tiꞌ an, ẍi Naj tet ebꞌ. 18Jaꞌ yet jix yalon Jesús jaxca tuꞌ, tol jix yoche xacꞌal ebꞌ chi yakꞌ camoj, man asanne oj yu ma sjije scꞌual xewilal, yu cꞌal pax jix slaanbꞌane sbꞌa yetoj Dios, yet jix yalon oc Dios tuꞌ sMamoj.
Jaꞌ Yopiso Naj Scꞌaal Dios
19Jix yalon pax Jesús tet ebꞌ jaxca tiꞌ:
—Caw yel chi wal ey jex an, jain tiꞌ Scꞌaal jin Dios an, cꞌam tzet chi skeꞌ wunen jin txꞌojli. Asan tzet chi wil swaꞌnen jin Mam, asan chi wun an. Masanil tzet chi yun jin Mam tuꞌ, chi wun pax jain tiꞌ an. 20Jaꞌ jin Mam tuꞌ, chin scamcꞌulne, jain Cꞌaale jin tiꞌ. Masanil tzet chi el yuneni, chi xꞌox ey jin an. Eyto wanxa tzet oj xꞌox ey jin tol oj qꞌueya je cꞌul yet oj je yiloni. 21Yutol jaꞌ jin Mam tuꞌ, chi skeꞌ yakꞌon pitzcꞌu a ebꞌ camnaj, catuꞌ chi yakꞌon skꞌinal ebꞌ. Quey jin pax tuꞌ, jain Cꞌaale jin tiꞌ. Ta ey ebꞌ chi woche chi wakꞌ skꞌinal, chi wakꞌ an. 22Cꞌam junoj ánima chi naꞌle oc yin yu jin Mam. Jal jin jain Cꞌaale jin tiꞌ, jain jix akꞌle can wopiso jin naꞌon oc yin ebꞌ masanil. 23Jix yakꞌ can wopiso jin Mam tuꞌ jain Cꞌaale jin tiꞌ an, yet watxꞌ laan weloc apnoj yetoj jin Mam tuꞌ yul sat masanil ánima. Ta ey mac cꞌam weloc apnoj yul sat, cꞌam pax yeloc apnoj jin Mam yul sat, yutol jaꞌ jix jin chejontej. 24Caw yel chi wal ey jex, jaꞌ mac chi abꞌen jin kꞌane, catuꞌ chi yaon oc scꞌul yin jun mac jix jin chejontej, jaꞌton ebꞌ chi yiꞌcan skꞌinal tol ey cꞌal yin tobꞌalkꞌinal. Manxa oj toj ebꞌ bꞌey syaꞌilal, yutol jix colcha can el ebꞌ yul skꞌabꞌ camich, catuꞌ jix ẍaꞌon can skꞌinal ebꞌ tol ey cꞌal yin tobꞌalkꞌinal. 25Caw yel chi wal ey jex an, jaꞌ tinaniꞌ, jix jul stiempoal yabꞌen ebꞌ camnaj ya waw, jain Scꞌaal jin Dios tiꞌ an. Jaꞌ ebꞌ chi jijeni, jaꞌton ebꞌ oj ẍaꞌ skꞌinal tol ey cꞌal yin tobꞌalkꞌinal. 26Yutol jaꞌ jin Mam ey yopiso yakꞌon skꞌinal ánima. Jix yakꞌ pax can jun yopiso tuꞌ ey jin jain Cꞌaale jin tiꞌ. Yuxan, jain tiꞌ, chi skeꞌ pax wakꞌon skꞌinal ebꞌ. 27Jix yakꞌ pax can wopiso jin naꞌon oc yin masanil ánima, yutol jain tol Akꞌbꞌil Wopiso xol ebꞌ ket animail yu Dios. 28Manche qꞌueya je cꞌul yu wan tzet chi wal ey jex tiꞌ an. Yutol ey jun tiempoal yet yatoj tuꞌ, oj yabꞌ ebꞌ mujan xa ya waw an. 29Catuꞌ oj a waan ebꞌ camnaj tuꞌ. Jaꞌ ebꞌ watxꞌ tzet jix el yunen yul yibꞌankꞌinal tiꞌ, oj pitzcꞌu a ebꞌ, catuꞌ oj ẍaꞌon skꞌinal ebꞌ tol ey cꞌal yin tobꞌalkꞌinal. Jal ebꞌ cꞌam swatxꞌil jix el yuten sbꞌa xin, oj pitzcꞌu pax a ebꞌ, oj tojcan pax ebꞌ bꞌey syaꞌtajilal yin junelne.
Jix Yaltej Jesucristo Tzet Yopiso
30Jain tiꞌ, cꞌam junoj tzetyetal chi skeꞌ wunen yul wet jin txꞌojli an. Jaxca chi yute yalon jin Mam ey jin an, queytuꞌ chi yun jin naꞌon oc yin. Bꞌey cꞌal ian chi yun jin naꞌon oc yin, yutol manaj tzet chi ẍaꞌ jin cꞌul chin sey an, tol jaꞌ tzet chi ẍaꞌ scꞌul mac jix jin chejontej, jaꞌton jin Mam. Jaꞌ tzet chi yoche jin Mam, jaꞌton chi wun an. 31Ta jain cꞌal chi wakꞌ testigoal jin bꞌa, yet chi walon tol ey wopiso, cꞌam yeloc apnoj tzet chi wal tuꞌ. 32Ey pax junxa chi yakꞌ sbꞌa testigoal yin wopiso. Jaꞌ jun tuꞌ wotaj an, tol caw yel chi yalaꞌ. 33Jaex tiꞌ, jix bꞌet je yakꞌ kꞌanle el tet naj Juan tzet wopiso. Jaꞌ tzet jix yal wu tuꞌ an, yel cꞌal eloj. 34Jain tiꞌ, cꞌam chi waoc yipoj jin cꞌul tzet chi yal ánima win an. Tucꞌal chin jej je naꞌ tzet jix yal naj Juan ey jex, yet watxꞌ chex colchai. 35Jaꞌ naj Juan tuꞌ, laan jaxca junoj tzejtebꞌal jow ẍaw yajan, yutol jix xꞌox can el tzet yeoc Dios. Yuxan, jix jex tzala a jayebꞌ cꞌu yetoj. 36Ey pax junxa ecꞌbꞌan yeloc apnoj yintaj naj Juan tuꞌ. Jaꞌ tzet chi el wunen an, jaꞌ jin Mam jix akꞌon ey jin an. Jaꞌton wan tuꞌ chi akꞌon testigoal win an, tol jaꞌ jin Mam tuꞌ jix jin chejontej. 37Yetoj pax jin Mam, naj jix jin chejontej tuꞌ, chi yakꞌ sbꞌa testigoal win an. Jaex tiꞌ, cꞌam juneloj jix je yabꞌ yul snukꞌ skꞌanabꞌi. Cꞌam bꞌey jix je yil yin Dios juneloj. 38Cꞌam che yaoc skꞌane yin je cꞌul, yutol cꞌam che yaoc je cꞌul win an, jain chejbꞌil jintej yu tiꞌ. 39Yelcꞌulal ton che cuy An Juun Tzꞌibꞌebꞌilcanoj, yutol jaꞌ je naꞌoni, tol jaꞌ yin An oj ilcha je kꞌinal tol ey cꞌal yin tobꞌalkꞌinal ta che jije. Jal yul An Juun tuꞌ chi yaltej jin kꞌaneal. 40Caxcꞌal chi yal jin kꞌaneal cꞌam cꞌal chi yal je cꞌul chex jul pax ey jin an yet che chaꞌ je kꞌinal tuꞌ. 41Cꞌam yeloc apnoj yul jin sat swatxꞌilal chi yal ebꞌ ánima win an. 42Jaex tiꞌ, wotaj je naꞌbꞌal an, cꞌam che camcꞌulne Dios. 43Jain tiꞌ, jaꞌ jin Mam jix jin chejontej, cꞌam cꞌal pax chin je chaꞌ. Ta ey junojxa mactxequel chi jul yul yet, jaꞌ jun tuꞌ bꞌian, oj je chaꞌ. 44Ta jaex cꞌal oc che mimanne je bꞌa junjun jex, catuꞌ cꞌam che yoche chex mimanbꞌinele yu Dios jaꞌcaw yel, ¿toj oj skeꞌ je yaon oc yin je cꞌul? 45Manche je naꞌ tol jain oj wal a je penail tet jin Mam. Ey junxa oj alon a je penail tet, jaꞌton naj Moisés, naj che tzꞌaj je yaoc yipoj je cꞌul. 46Kꞌinaloj ta che yaoc yin je cꞌul tzet tzꞌibꞌebꞌilcan yu naj Moisés tuꞌ, chim je yaoc je cꞌul win an, yutol jix stzꞌibꞌe can jin kꞌaneal. 47Ta cꞌam che yaoc yin je cꞌul tzet tzꞌibꞌebꞌilcan yu naj tuꞌ, ¿tzet utbꞌil oj je yute je yaon oc yin je cꞌul tzet chi wal ey jex an? ẍi Jesús tet ebꞌ yaawil yeoc bꞌey Judea tuꞌ.
Currently Selected:
Juan 5: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.