Juan 16
16
1Chi wal can wan tiꞌ ey jex an, yet watxꞌ cꞌam chi somcha el je cꞌul. 2Yutol oj jex yujte eltej ebꞌ ket Israelal yul snail sculto ebꞌ. Tol tax ey jun tiempoal yel xacꞌal oj jex akꞌon camoj, catuꞌ jaꞌ oj yute snaꞌon ebꞌ, tol jaꞌ Dios lalan yakꞌon servil ebꞌ. 3Oj yun ebꞌ jaxca tuꞌ, yutol man yotaj oj jin Mam ebꞌ, catuꞌ man jin yotaj oj pax ebꞌ. 4Chi wal can wan tiꞌ ey jex, yet watxꞌ jaꞌ yet oj jul wan tiempoal tuꞌ, oj je naꞌtej, tol albꞌilcan ey jex wu an.
Smulnail Naj Santo Espíritu
Ma wal wan tiꞌ ey jex yet yalantoj, yutol ey jin ecꞌ je yetoj yet tuꞌ. 5Jal tinaniꞌ xin, oj jin paxa scꞌatan mac jix jin chejontej. Cꞌam cꞌal junoj jex che kꞌanle el ey jin, bꞌey oj jin toj. 6Jaꞌ tiꞌ je yet, tol chex cusa yu wan chi wal tiꞌ an. 7Caw yel chi wal ey jex an, jaꞌ yu oj jin toj, yuxan caw watxꞌ je yet. Ta cꞌam chin too an, cꞌam chi jul jun tꞌinan scolwa je yetoj tuꞌ. Jal yet oj jin toj, oj jin chejtej jun tuꞌ ey jex. 8Jaꞌ yet oj juloj, oj akꞌle yotajne el ebꞌ yet yul yibꞌankꞌinal tiꞌ, tol penawom ebꞌ. Oj akꞌle yotajne el ebꞌ, tol jichan cꞌal jix wute jin bꞌa, catuꞌ oj yakꞌon pax yotajne el ebꞌ, tol oj naꞌle oc yin ebꞌ yu Dios. 9Oj akꞌle yotajne el ebꞌ tol penawom ebꞌ, jaꞌton yu cꞌam chin yaoc ebꞌ yin scꞌul. 10Oj akꞌle yotajne el ebꞌ, tol watxꞌ cꞌal jix wute jin bꞌa, yutol jain tiꞌ, oj jin pax bꞌey eyecꞌ cu Mam Dios. Cꞌamxa bꞌey oj je yil win titiꞌ. 11Oj akꞌle pax yotajne el ebꞌ, tol oj naꞌle oc yin ebꞌ yu Dios, yutol xax naꞌle oc yin jun yaaw yul yibꞌankꞌinal tiꞌ. 12Eyto cꞌal tzetyetal chi yoche jin cꞌul chi wal ey jex an, ma to pax oj naꞌcha el je yu tinaniꞌ. 13Jato yet oj jul Yespíritu Dios tol yel chi yalaꞌ, jaꞌ yet tuꞌ oj naꞌcha el je yu, yutol man oj yal yul yet. Jaꞌ masanil tzet oj al-le tet, jaꞌ oj yalaꞌ. Oj yal pax je yabꞌ tzet tol to oj juloj. 14Jaꞌ oj txꞌoxon eloj, tol miman weloc apnoj. Masanil cꞌal tzet oj wal tet, oj yal ey jex. 15Wet cꞌal yeoc masanil tzet ey bꞌey cu Mam Dios. Yu jun tuꞌ, chi wal ey jex, masanil cꞌal tzet oj wal tet, oj yal ey jex.
Jix Yal Jesús Tet Ebꞌ Scuywom, Tol Oj Jul Stzalacꞌulal Ebꞌ
16Junxane txolan che yiloc win an, jaꞌ yet junxa txolan ma xa je yil win. Oj jin je yil cꞌaltaꞌ yet caabꞌe oxe, yutol oj jin paxa bꞌey eyecꞌ cu Mam Dios, ẍi Jesús tet ebꞌ. 17Jix lawi yalon jaxca tuꞌ xin, jix cꞌoli yalon jaywan ebꞌ scuywom jaxca tiꞌ:
—¿Tzet la chi yal yeloc apnoj wan chi yal ey jon tiꞌ? Ilaꞌ tol jix yalaꞌ: “Junxane txolan che yiloc win tinaniꞌ. Jaꞌ yet junxa txolan ma xa je yil win, jato yet caabꞌe oxe oj jin je yilaꞌ,” Ilaꞌ ẍi. Chi yalon pax oj: “Yutol oj jin paxa scꞌatan cu Mam Dios,” ẍi ey jon. 18Jaꞌ jun chi yal tiꞌ, “junxane txolan” ¿tzet la wal chi yal yeloc apnoj wan tiꞌ? Caw cꞌam chi naꞌcha el ku, tzet chi yalaꞌ, ẍi ebꞌ. 19Jaꞌ Jesús xin, jix yotajne eloj, tol chi yoche ebꞌ chi skꞌanle tet, tzet chi yal yeloc apnoj tzet jix yal tuꞌ. Yu jun tuꞌ, yuxan jix yal tet ebꞌ jaxca tiꞌ:
—Jix wal ey jex: “Junxane txolan che yiloc win tinaniꞌ. Jal yet junxa txolan, ma xa je yil win. Jal yet caabꞌe oxe oj jin je yilaꞌ,” jin chi ey jex. ¿Tumi jato cꞌal wan jix wal ey jex tuꞌ che yaloꞌtane je xol? 20Caw yel chi wal ey jex, oj jex cusoj, oj jex okꞌoj. Jal ebꞌ yet yul yibꞌankꞌinal tiꞌ xin, oj tzala ebꞌ. Oj jex ton cusoj, jal pax jun je cuscꞌulal tuꞌ, tzalacꞌulal xa oj yute a sbꞌa. 21Kꞌinaloj junoj ix ix tinaniꞌ, lalan yali yuneꞌ. Yaꞌ ton chi yabꞌe, yutol lalan yecꞌ yaꞌ. Jal pax yet xax jul yuneꞌ tuꞌ, toj naꞌan to syaꞌilal tuꞌ yu, jaꞌ tiꞌ yet, tol caw chi tzalai, yutol xax jul jun unin yu yul yibꞌankꞌinal tiꞌ. 22Jaxca ton junoj ix ix tuꞌ, queytuꞌ oj je yunne. Chex ton cus tinaniꞌ. Jal pax yet oj jin je yilon yet junelxa tuꞌ, caw oj jex tzala a junelxa. Jaꞌ jun je tzalacꞌulal tuꞌ, cꞌam mac oj skeꞌ yiꞌon ecꞌ ey jex. 23Jaꞌ yet jun cꞌual tuꞌ, cꞌamxa tzet oj je kꞌanle el ey jin an. Caw yel chi wal ey jex, masanil cꞌal tzet oj je kꞌan tet cu Mam Dios, oj yakꞌ ey jex yutol wet jex an. 24Jaꞌ tinaniꞌ, cꞌamto tzet che kꞌan tet Dios yin jin bꞌi. Kꞌanwej, oj je chaꞌ. Oj akꞌle ey jex, yet watxꞌ oj tzꞌajna el je tzalacꞌulal.
Cannajxa Ebꞌ A Yul Yibꞌankꞌinal Tiꞌ Yalan Yu Jesús
25Yin yechel kꞌane jix yun walon wan cuybꞌanile tiꞌ ey jex. Ey pax jun tiempoal oj juloj, tol manxa quey oj tuꞌ oj wute walon jaxca tuꞌ, yutol tool xa oj wute walon skꞌaneal cu Mam Dios ey jex. 26Jato yet oj jul jun cꞌual tuꞌ, oj je kꞌan tzet che yoche yin jin bꞌi. Man lalan oj walon ey jex, ta jain oj jin kꞌan tzettaj yetal tet cu Mam Dios je yu. 27Ilaꞌ, tol jaꞌcaw Naj chi camel scꞌul je yin, yutol chin je camcꞌulne. Catuꞌ che yaon oc yin je cꞌul tol jatuꞌ titnaj jin. 28Yel, jaꞌ scꞌatan cu Mam Dios titnaj jin, catuꞌ jix jin jul bꞌey yul yibꞌankꞌinal tiꞌ, yuxan jaꞌ tinaniꞌ xin, oj jin bꞌejcan yul yibꞌankꞌinal tiꞌ, catuꞌ oj jin paxa bꞌey eyecꞌ cu Mam Dios tuꞌ, ẍi Jesús tet ebꞌ. 29Catuꞌ jix yalon ebꞌ scuywom tuꞌ tet Naj jaxca tiꞌ:
—Jaꞌ tinaniꞌ, watxꞌ xa jix ja wute ja walon ey jon. Manxa yechel kꞌane oj jix ja wute ja walon ey jon jaxca yet junel. 30Jaꞌ tinaniꞌ, kotaj tol ja wotaj masanil tzetyetal. Man sowalil oj chi cu kꞌanle el ey jaach, catuꞌ oj ja walon ey jon. Yu jun tuꞌ, yuxan chi kaoc yin cu cꞌul tol jaꞌ scꞌatan Dios titnaj jaach, ẍi ebꞌ tet Jesús. 31Yuxan jix yal Naj tet ebꞌ jaxca tiꞌ:
—¿Chim je yaoc je cꞌul win tinaniꞌ? 32Tol lalanxa sjul stiempoal je sajlem cantoj. Txꞌoj txꞌoj xacꞌal bꞌey oj jex tojcanoj junjun jex. Jal jin, oj jin je bꞌej jin can jin txꞌojli. Man pax jin txꞌojli oj, yutol eyecꞌ cu Mam Dios wetoj an. 33Jix wal masanil wan tiꞌ ey jex, yet watxꞌ ey watxꞌcꞌulal snan je xol yutol ey jin oc je yin. Jaꞌ bꞌey yul yibꞌankꞌinal tiꞌ, oj ton je yil syaꞌil. Tecꞌbꞌawej cꞌal je bꞌa, yutol jaꞌ ebꞌ a yul yibꞌankꞌinal tiꞌ, xax can ebꞌ yalan wu an, ẍi Jesús tet ebꞌ.
Currently Selected:
Juan 16: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.