Juan 15
15
Skꞌaneal Jun Xutxal Uva Cꞌal Yakꞌil
1Jix yalon Jesús tet ebꞌ scuywom jaxca tiꞌ:
—Jaꞌ jun xutxal uva chin txꞌox tiꞌ, tol quey jin pax tuꞌ. Jaꞌ jun winaj chi ilwi uva tuꞌ, jaꞌ chi txꞌoxon el yechel jin Mam.#15:1 Jaꞌ yul Antiguo Testamento, jaxca bꞌey Isaías 5 chi yaltej ebꞌ Israel jaxca jun yakꞌil uva yet Dios, pena pax sat chi yakꞌa. Jaꞌ yin jun skꞌaneal tiꞌ chi yal Jesús ta ey jon oc yin chi kun yochwan Dios. 2Ta ey junoj an akꞌile cꞌam chi satni, jaꞌ chi iꞌon eloj. Ta ey an akꞌile watxꞌ chi satni, chi yiꞌon el stajinal yakꞌil an yet watxꞌ chi cꞌal satni. Jaxca chi yute swaꞌnen el an naj tuꞌ, queytuꞌ chi yun swaꞌnele el ebꞌ eyoc win yu jin Mam. 3Jaex tiꞌ, xax waꞌxi oc je naꞌbꞌal yu wan cuybꞌanile albꞌilcan ey jex wu tiꞌ an. 4Eyanwej cꞌal ecꞌ win an. Jain xa oj jin eecꞌ je yin. Jaxca junoj yakꞌil an chi el yin xutxal, cꞌamxa chi skeꞌ satni, quey pax tuꞌ che yunne, ta cꞌam chex ey cꞌal ecꞌ win an. 5Jain tiꞌ, jaxca xutxal uva, quey jin tuꞌ. Jaex jaxca yakꞌil uva jex. Jaꞌ mac ey cꞌal oc win an, ey jin pax oc yin. Jaꞌ jun tuꞌ miman sat chi yakꞌa, jaxca junoj teꞌ miman sat chi yakꞌa. Ta cꞌam jin oc je yin, cꞌam niꞌoj tzet chi skeꞌ je yu je txꞌojli. 6Jal ebꞌ cꞌam chi ey cꞌal ecꞌ win an xin, laan oj yun yeloc ebꞌ jaxca jun yakꞌil uva chi iꞌle el yin xutxal, catuꞌ chi tajeloj, chi lawi tuꞌ, chi yambꞌale aoj, catuꞌ chi tzꞌaꞌi. 7Ta chex ey cꞌal ecꞌ win an, catuꞌ ey cꞌal oc je cꞌul yin jin kꞌane, kꞌanwej tzet chi yoche je cꞌul, oj akꞌle ey jex. 8Ta miman je sat che yakꞌa, queyton tuꞌ oj je yute je txꞌoxon eloj, tol miman yeloc apnoj jin Mam. Quey pax tuꞌ oj je yute je txꞌoxon eloj, tol jin cuywom jex an. 9Jaxca chin yute scamcꞌulnen cu Mam Dios, queytuꞌ chex wute jin camcꞌulnen pax oj. Yu jun tuꞌ, yuxan eyanwej cꞌal ecꞌ yin jin camcꞌulal tiꞌ. 10Ta che jije jin chejbꞌanil an, oj jex ey cꞌal ecꞌ yin jin camcꞌulalil. Yutol queytuꞌ wakꞌon yetoj jin Mam, chin jije ẍejbꞌanil. Yu jun tuꞌ, yuxan ey jin cꞌal ecꞌ yin scamcꞌulal Naj. 11Chi wal can wan tiꞌ ey jex an, yet watxꞌ jaxca ojabꞌ jin tzala an, quey ojabꞌ tuꞌ je tzala pax oj, catuꞌ chi tzꞌajna xacꞌal el je tzalacꞌulal. 12Jaꞌ tinaniꞌ, ey jun jin chejbꞌanil oj wakꞌcan ey jex, tol che camcꞌulne je bꞌa junjun jex, jaxca chex wute jin camcꞌulnen an. 13Ta ey junoj mac chi yakꞌ sbꞌa cam yu junoj yamigo, cꞌam junojxa mac ecꞌbꞌan scamcꞌulal yintaj jun mactxequel tuꞌ. 14Ta che jije jin chejbꞌanil tuꞌ, jaex tiꞌ, wamigo jex toni. 15Jaꞌ tinaniꞌ, chi wal ey jex, manxa yakꞌomaloj servil je yeoc ey jin an. Yutol jaꞌ junoj yakꞌomaloj servil man yotaj oj tzet chi yun spatrón. Jal tinaniꞌ, wamigo jex, yutol masanil cꞌal tzet jix yal jin Mam ey jin, jix cꞌal walel ey jex an. 16Manaj jex jix jin je sicꞌ eloj, tol jain jix jex jin sicꞌ eloj. Jix waon oc je yopiso jex jin chejon satnoj. Jaꞌ je sat tuꞌ, oj eecꞌ cꞌal yin tobꞌalkꞌinal. Yu jun tuꞌ, yuxan jantaj cꞌal tzet oj je kꞌan tet cu Mam Dios oj yakꞌ ey jex yutol wet jex an. 17Jaꞌton jun chejbꞌanil tiꞌ chi wakꞌcan ey jex, tol che camcꞌulne je bꞌa junjun jex.
Jaꞌ Ẍichoncꞌulal Ebꞌ A Yul Yibꞌankꞌinal Yin Jesús Cꞌal Yin ebꞌ Yuninal
18Ta ey ebꞌ yet yul yibꞌankꞌinal tiꞌ chi chichon oc scꞌul je yin, otajnewej eloj, tol jaꞌ win jix bꞌabꞌi chichon oc scꞌul ebꞌ. 19Kꞌinaloj ta yet jex yul yibꞌankꞌinal tiꞌ yetoj ebꞌ, tejan chex scamcꞌulne ebꞌ, yutol je yetbꞌi je bꞌa yetoj ebꞌ. Manxa pax yetoj jex yul yibꞌankꞌinal tiꞌ, yutol xax jex jin sicꞌ el xol ebꞌ. Yu jun tuꞌ, yuxan chi chichon oc scꞌul ebꞌ je yin, yutol manxa je yetbꞌi oj je bꞌa yetoj ebꞌ. 20Caw che naꞌtej jun kꞌane jix wal ey jex tiꞌ: “Cꞌam junoj mooso ecꞌbꞌan yintaj spatrón,” jin chi ey jex. Jaxca jix yun yoc ebꞌ acꞌulal win, queytuꞌ oj yun pax yoc ebꞌ acꞌulal je yin. Ta jix sjije ebꞌ tzet jix wal jain tiꞌ an, oj sjije pax ebꞌ tzet oj je yalaꞌ. 21Jin yaꞌiloj, catuꞌ oj je yabꞌen syaꞌil masanil wan tiꞌ yu ebꞌ, yutol man yotaj oj ebꞌ jun jix jin chejontej. 22Kꞌinaloj ta ma jin jul wal tet ebꞌ, cꞌam mi spenail ebꞌ. Jal tinaniꞌ, cꞌamxa bꞌey watxꞌ chi scol sbꞌa ebꞌ yu spenail. 23Yutol jaꞌ mac chi chichon oc scꞌul win, chi chichon pax oc scꞌul yin jin Mam. 24Jaꞌ wan milagro xin txꞌoxel xol ebꞌ, cꞌam junojxa chi skeꞌ yunen jaxca tuꞌ. Kꞌinaloj ta cꞌam milagro tuꞌ jix jin txꞌoxoꞌ, cꞌam mi spenail ebꞌ. Jal tinaniꞌ xin, caxcꞌal mi jix yil wan tuꞌ ebꞌ, jacꞌalaꞌ cꞌal ẍichon oc scꞌul ebꞌ win, catuꞌ chi chichon pax oc scꞌul ebꞌ yin jin Mam. 25Jacꞌalaꞌ oj el yunen wan tiꞌ ebꞌ, yet watxꞌ chi yun tzet tzꞌibꞌebꞌilcan yul an ley bꞌey chi tzꞌaj yaoc scꞌul ebꞌ, bꞌey chi yal jaxca tiꞌ: “Cꞌam jin penail tet ebꞌ, jix chichon pax oc scꞌul ebꞌ win,” ẍi yul An Juun Tzꞌibꞌebꞌilcan tuꞌ.#Salmos 35:19; 69:4. 26Ey pax jun oj tit bꞌey cu Mam Dios, jaꞌton Naj Espíritu caw yel. Oj juloj, catuꞌ oj colwa je yetoj. Jain oj toj jin chejtej. Jaꞌ jun tuꞌ oj yakꞌ testigoal sbꞌa win an. 27Jacꞌalaꞌ jex pax oj, oj je yakꞌ pax je bꞌa testigoal win, yutol junne cꞌal jex wetoj yet tax cꞌal jix el yich jin mulnail tiꞌ.
Currently Selected:
Juan 15: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.