Juan 10
10
Skꞌaneal Jun Colal Noꞌ Meꞌ
1Kꞌinaloj ey junoj colal noꞌ meꞌ bꞌey chi octoj junoj winaj tinaniꞌ. Ta manaj bꞌey stiꞌ jun colal tuꞌ chi octoj, ta txꞌoj pax bꞌey chi octoj, caw yel chi wal ey jex, elkꞌom ton jun chi unen jaxca tuꞌ. 2Jaꞌ pax mac jaꞌ yul stiꞌ colal chi octoj xin, jaꞌton naj yilomal noꞌ tuꞌ. 3Jaꞌ naj weynem colal,#10:3 Jaꞌ sbꞌeybꞌal ebꞌ ey smeꞌ bꞌey Israel tuꞌ, tol junne mac chi weynen noꞌ yul colal yet akꞌbꞌalil catuꞌ txꞌoj jun naj ilom meꞌ chi teynen noꞌ yet cꞌualil. jaꞌ naj chi jajon stiꞌ colal tet naj ilom meꞌ tuꞌ. Yotaj yilomal noꞌ meꞌ tuꞌ. Yotaj sbꞌi junjun smeꞌ naj ilom meꞌ tuꞌ. Jaꞌ naj chi iꞌon eltej noꞌ. 4Chi lawi yiꞌon eltej noꞌ smeꞌ naj, catuꞌ chi bꞌabꞌi naj sattaj noꞌ. Chi oc tzajan noꞌ yintaj naj, yutol qꞌueynajxa noꞌ yetoj naj. 5Kꞌinaloj ey junojxa winaj man qꞌueynaj oj noꞌ yetoj, man comonoj chi oc tzajan noꞌ yintaj. Ta man qꞌueynaj oj noꞌ yetoj, chi el noꞌ tet, ẍi Jesús. 6Jix yaltej jun skꞌaneal tiꞌ Jesús tet ebꞌ, ma pax naꞌcha el yu ebꞌ tzet chi yal yeloc apnoj.
Laan Jesús Jaxca Junoj Watxꞌ Ilom Meꞌ
7Catuꞌ jix yalon Jesús tet ebꞌ jaxca tiꞌ:
—Caw yel chi wal ey jex an, jaxca stiꞌ colal bꞌey chi octoj noꞌ meꞌ, quey jin tuꞌ an. 8Ey ebꞌ bꞌabꞌel julnaj jin sattaj, jix tzꞌaj yalon oc sbꞌa ebꞌ colwawomal. Jaxca junoj elkꞌom chi oc yul colal queytuꞌ masanil ebꞌ. Jal ebꞌ yet xa Dios, ma yaoc scꞌul ebꞌ yin ebꞌ. 9Jain tiꞌ, laan jin jaxca junoj stiꞌ colal tuꞌ an. Jaꞌ ebꞌ chi octoj yul stiꞌ colal tuꞌ, oj colcha ebꞌ. Jaxca junoj meꞌ chi octoj, chi eltej yul scolal seyon low sbꞌa, queytuꞌ oj yun ebꞌ. 10Ey ebꞌ jaxca junoj elkꞌom chi juli, chi yelkꞌanentoj, catuꞌ chi yakꞌon camoj. Jal jin jain tiꞌ, jix jin jul yu wakꞌon skꞌinal ebꞌ tol ey cꞌal yin tobꞌalkꞌinal, yet watxꞌ caw miman swatxꞌcꞌulal Dios oj ẍaꞌ ebꞌ. 11Jain tiꞌ, laan jin jaxca junoj ilom meꞌ caw watxꞌ, bꞌejan scꞌul scam sqꞌuexeloj noꞌ, quey jin pax tuꞌ, jain tiꞌ, bꞌejan jin cꞌul jin cam sqꞌuexeloj ebꞌ wet. 12Ey bꞌey tucꞌal chi maanele junoj mactxequel chi ilon noꞌ meꞌ, man pax jaꞌcaw ilom meꞌ oj. Jaꞌ yet chi yilon sjul noꞌ ooj, eyman chi sbꞌejcan bꞌulan noꞌ meꞌ tuꞌ xꞌojli, catuꞌ chi eli, yutol man yet oj noꞌ. Chi lawi tuꞌ, catuꞌ chi michꞌcha can oc noꞌ meꞌ tuꞌ yu noꞌ ooj tuꞌ, catuꞌ chi yuchon can sajlemoj. 13Jaꞌ naj ilom meꞌ tuꞌ, chi el naj, yutol asan yu stool scꞌu naj yuxan chi ilwi meꞌ, man yu oj tol ey yeloc apnoj noꞌ yul sat naj. 14-15Jain tiꞌ, laan jin jaxca junoj ilom meꞌ caw watxꞌ. Jaꞌ ebꞌ wet an, jaxca tol jin meꞌ ebꞌ an. Otajbꞌil jin yu jin Mam. Jacꞌalaꞌ jin, wotaj jin Mam tuꞌ. Jaxca wotajnen jin bꞌa yetoj jin Mam tuꞌ, queytuꞌ wotajnen jin bꞌa yetoj ebꞌ wet xa yei. Oj wakꞌ cam jin bꞌa sqꞌuexeloj ebꞌ wet tuꞌ an. 16Ey wanxa ebꞌ tol to oj yaoc scꞌul win an, asan tol man ket conobꞌ oj ebꞌ. Sowalil oj jin yambꞌa oc ebꞌ. Oj sjijen ebꞌ ey jin an. Junxane bꞌulan oj yun ebꞌ wet tuꞌ masanil, yutol junne mac oj ilon ebꞌ. 17Chi camel scꞌul jin Mam win an, yutol oj wakꞌ jin bꞌa camoj, catuꞌ oj jin pitzcꞌu pax a junelxa. 18Jain tiꞌ, chi el yin jin cꞌul wakꞌon cam jin bꞌa. Cꞌam mac chi skeꞌ jin yakꞌon camoj ta cꞌam chi yal jin cꞌul. Ey wopiso wakꞌon cam jin bꞌa. Ey pax wopiso wiquisbꞌi a junelxa. Yutol queytuꞌ jix yute yakꞌon can jun chejbꞌanile tiꞌ jin Mam ey jin an, ẍi Jesús tet ebꞌ. 19Jaꞌ yet jix yalon wan tiꞌ, jix steelen can a sbꞌa ebꞌ yaawil yeoc bꞌey Judea tuꞌ yu. Caabꞌ tujan jix yute can toj sbꞌa ebꞌ junelxa.
20Ey ebꞌ jix alon jaxca tiꞌ:
—¿Tzet yuxan che yabꞌ tzet chi yal jun winaj tiꞌ? Ilaꞌ, tol eyoc pena espíritu yin Naj. Chabꞌil joybꞌinaj sat yu, ẍi ebꞌ. 21Ey pax wanxa ebꞌ chi alon jaxca tiꞌ:
—Ta jaꞌ pena espíritu eyoc yin, ¿tumi taꞌ chi skeꞌ yalon jaxca tiꞌ: Tumi chi skeꞌ sjajle sat junoj mac cꞌam chi skeꞌ yilwi yu pena espíritu? ẍi wanxa ebꞌ tuꞌ.
Cꞌam Chi Chaꞌle Jesús Yu Ebꞌ Yaawil Yeoc Bꞌey Judea
22Jaꞌ yet stiempoal xa nabꞌilkꞌinal, jix chaꞌle skꞌinal stemplo Dios bꞌey Jerusalén.#10:22 Jaꞌ jun yaaw chi yij Antioco Epifanes, jaꞌ naj jix akꞌon jun ley tol chi tan sculto ebꞌ Israel. Jaꞌ yet jix akꞌle permiso yoc sculto ebꞌ junelxa, jix ẍaꞌel yich jun skꞌinal templo tuꞌ. 23Lalan yecꞌabꞌ Jesús bꞌey templo tuꞌ, bꞌey jun yamakꞌil chi yij yet Salomón. 24Catuꞌ jix oc joyan ebꞌ yaawil yeoc bꞌey Judea eyecꞌ tituꞌ yin Naj Jesús. Jix yalon ebꞌ jaxca tiꞌ:
—¿Bꞌakꞌin cꞌal oj ja bꞌejcan jun caabꞌcꞌulal tuꞌ? Ta Cristo jaach, al ey jon tinaniꞌ, ẍi ebꞌ tet Naj. 25Catuꞌ jix takꞌwi Jesús tet ebꞌ jaxca tiꞌ:
—Xax wal ey jex an, cꞌam pax che yaoc yin je cꞌul. Jaꞌ wan milagro chin txꞌoxoꞌ, asan yu yopiso jin Mam yuxan chi skeꞌ wu jin txꞌoxoni. Catuꞌ jaꞌton wan tuꞌ chi txꞌoxon eloj mac jin txequel. 26Jal jex jaex tiꞌ, caw cꞌam che yaoc yin je cꞌul, yutol man wetoj je yei, jaxca taꞌ jix wal ey jex junel an. 27Jaꞌ ebꞌ wet an, chi yaoc xiquin ebꞌ yin tzet chi wal an. Catuꞌ wotaj ebꞌ an. Jaxca noꞌ meꞌ chi oc tzajan yintaj yilomal, queytuꞌ chi yun yoc tzajan ebꞌ wintaj an. 28Jain, chi wakꞌ skꞌinal ebꞌ tol ey cꞌal yin tobꞌalkꞌinal. Yuxan, cꞌam bꞌakꞌin oj qꞌueyel ebꞌ. Cꞌam junoj mactxequel chi skeꞌ yiꞌon ecꞌ ebꞌ yul jin kꞌabꞌ. 29Jaꞌ jin Mam, ecꞌbꞌan yeloc apnoj yintaj masanil, jaꞌ jix akꞌon ey jin an. Cꞌam junoj mactxequel chi skeꞌ yiꞌon ecꞌ ebꞌ yul skꞌabꞌ jin Mam tuꞌ. 30Jain tiꞌ, laan jin yetoj cu Mam Dios, yutol junne animail weoc yetoj, ẍi Jesús tet ebꞌ yaawil yeoc bꞌey Judea tuꞌ. 31Yu jix yal jun tuꞌ, yuxan jix sicꞌa chꞌen ebꞌ, catuꞌ chi yoche ebꞌ jix skꞌojchꞌenen cam Naj. 32Jix yalon pax Jesús tet ebꞌ jaxca tiꞌ:
—Caw ey tzetyetal watxꞌ jix el wunen yu yipal jin Mam je nan je xol. ¿Bꞌeytet junoj wan tuꞌ, yuxan che yoche chin je kꞌojchꞌenne camoj? ẍi Jesús tet ebꞌ.
33—Man yu oj junoj watxꞌ jix el ja wunen tuꞌ, yuxan chi koche chach cu kꞌoj cam jon, asan yu cha bꞌuch Dios. Jaach tiꞌ, comon ánima jaach, ilaꞌ cha wal pax oc ja bꞌa Diosal, ẍi ebꞌ tet Naj. 34Yuxan jix yal Jesús tet ebꞌ jaxca tiꞌ:
—Jaꞌ yul an ley eecꞌ ey jon, queytuꞌ tzꞌibꞌebꞌilcan ey jaxca tiꞌ: “Jain chi wal an, tol dios jex junjun jex,” ẍi can Dios yul An Juun.#Salmos 82:6. 35Kotaj, jaꞌ tzet tzꞌibꞌebꞌilcan yul An Juun tuꞌ, ma skeꞌ tucꞌal oj cu tennaꞌ. Jaꞌ Dios jix alon can tet ebꞌ chaꞌnen can jun kꞌane tuꞌ, tol dios ebꞌ. 36Jain tiꞌ, Dios jix jin sicꞌon eloj, jaꞌ jix jin chejontej yul yibꞌankꞌinal tiꞌ. Yu jun tuꞌ yuxan, ¿tzet yuxan che yalaꞌ, tol chin bꞌuchwa yin Dios, yet chi waloni tol Scꞌaal jin Dios? 37Ta manaj tzet chi yun jin Mam tuꞌ chi wun an, manche je yaoc je cꞌul win an. 38Jal jin, jain tiꞌ, lalan wunen tzet chi yun jin Mam tuꞌ. Yuxan, caxcꞌal mi cꞌam che yaoc je cꞌul yin tzet chi wal an, awej oc je cꞌul win yu wan tzetyetal chi wun tuꞌ. Catuꞌ oj naꞌcha el je yu, catuꞌ oj je yaon oc yin je cꞌul tol eyoc cu Mam Dios win, catuꞌ ey jin pax oc yin, ẍi Jesús tet ebꞌ. 39Yu jun tuꞌ yuxan jix to yakꞌle ebꞌ smitxꞌon Naj junelxa, jix scol pax sbꞌa Naj yul skꞌabꞌ ebꞌ. 40Jix lawi tuꞌ xin, jix kꞌaxbꞌon ecꞌtoj Naj yul jaꞌ miman Jordán. Catuꞌ jix ecꞌ Naj bꞌey yakꞌnaj bautizar ebꞌ ánima naj Juan. 41Ecꞌal ebꞌ ánima jix apni ilon Naj. Catuꞌ jix yalon ebꞌ jaxca tiꞌ:
—Jaꞌ naj Juan, cꞌam bꞌey jix xꞌox junoj milagro, jal masanil tzet jix yal yu Jesús tiꞌ, yel cꞌal ton masanil, ẍi ebꞌ. 42Ecꞌal mactxequel jix yaoc scꞌul yin Jesús bꞌey jun lugar tuꞌ.
Currently Selected:
Juan 10: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.