Santiago 5
5
Tzet Utbꞌil Oj Yun Can El Ebꞌ Bꞌeom
1Abꞌwej jex bꞌeom. El ojabꞌ wekꞌekꞌoj je yaw je yokꞌ tinaniꞌ, yutol ey mimej syaꞌilal chi jul je sattaj. 2Lalanxa skꞌaꞌtoj je bꞌeomal. Jaꞌ je pichil bꞌulan ecꞌoj, jolquiẍtaj xacꞌal yu noꞌ noꞌ. 3Quey pax tuꞌ je tumin, caxcꞌal mi oro chꞌen, ma plata chꞌen, kꞌuxtaj xa ecꞌ chꞌen. Jaꞌ skꞌuxtajil chꞌen tuꞌ chi txꞌoxon el je camcꞌulal yin chꞌen. Jaxca chi yun stzꞌaꞌ junoj tzetyetal yu kꞌakꞌ, queytuꞌ oj yun can el je mimanil yu. Tuxa chi jul slawubꞌal yul yibꞌankꞌinal tiꞌ, jal pax je bꞌeomal tuꞌ caw eyoc yin je cꞌul je yambꞌani. 4Tucꞌal chi jul saꞌ scꞌu ebꞌ je maan ey jex, toj che toolane scꞌu ebꞌ, tucꞌal che yetne ebꞌ. Chi a yaw ebꞌ tet Dios tinaniꞌ, catuꞌ chi yalon a je penail ebꞌ. Jix abꞌle tzet jix yal ebꞌ yu Naj Yaaw eyecꞌ satcan. 5Watxꞌ jix ecꞌ yul yibꞌankꞌinal tiꞌ je yu, jaex tiꞌ, nonaj yul je na yu masanil tzetyetal ey, ey jex. Tucꞌal chi etex el je yu. Laan jex jaxca junoj noꞌ wacax chi bꞌakꞌechbꞌi. Janicꞌxane tiempoal chi yakꞌ je naꞌbꞌaloj, catuꞌ chi akꞌle camoj. 6Jaex jix je yacantoj yibꞌan ebꞌ tol watxꞌ snaꞌbꞌal, ey ebꞌ jix je yakꞌ camoj. Ma cꞌal pax spajtze sbꞌa ebꞌ ey jex.
Majwal Yin Mimancꞌulal, Cꞌal Txa
7Jex wuẍtaj, jex wanabꞌ, miman che yute je cꞌul, echbꞌanewej masantaꞌcꞌal oj jul Naj Kaawil. Ilaꞌ ebꞌ mulnawom tinaniꞌ, chi smaj ebꞌ yelol yawo, jaꞌton sat awo tuꞌ ey tzet chi oc yu ebꞌ. Chi jul bꞌabꞌel nabꞌ, masantaꞌcꞌal chi lawi ecꞌ nabꞌilkꞌinal, chi yakꞌ cꞌal mimancꞌulal ebꞌ, catuꞌ chi yechbꞌanen ebꞌ yelol yawo. 8Jaxca ojabꞌ chi yute sbꞌa ebꞌ mulnawom tuꞌ, quey ojabꞌ tuꞌ che yute je yechbꞌanen sjul Naj Kaawil. Tecꞌan che yute je bꞌa, yutol tuxa chi juli. 9Jex wuẍtaj, jex wanabꞌ, cꞌam ojabꞌ che yal-le je kꞌumal yet watxꞌ man oj naꞌle oc je yin yu Dios, yutol tuxa oj jul mac oj naꞌon oc kin. 10Jex wuẍtaj jex wanabꞌ, jaꞌ ebꞌ ẍejabꞌ Dios yet peyxa, jaꞌ Dios jix aloni, yuxan jix kꞌanabꞌ el ebꞌ, jix techa yu ebꞌ yijlen syaꞌtajilal, catuꞌ jix yakꞌon mimancꞌulal ebꞌ. Yuxan, techa ojabꞌ je yu jaxca ebꞌ tuꞌ. 11Kotaj, tol jaꞌ ebꞌ jix techa yu tuꞌ, tzalacꞌulal ey ebꞌ tinaniꞌ. Ey bꞌey jix je yabꞌ skꞌaneal naj Job, tol tecꞌan jix yute sbꞌa naj yet jix yabꞌen syaꞌil naj. Je yotaj pax oj, tzet utbꞌil jix yun yeloc naj yin xa slawubꞌal yu Naj Kaawil. Jix okꞌ scꞌul Naj Kaawil tuꞌ yin, catuꞌ jix yilon oc scꞌul naj yin naj.#Job 1:21, 22; 2:10. 12Jal jex wuẍtaj, jex wanabꞌ, ey junxa tzet caw sowalil oj wal ey jex an. Man comonoj che loctej sbꞌi Dios a satcan, ma sbꞌi junojxa mactxequel, ma junojxa tzetyetal bꞌey yul yibꞌankꞌinal tiꞌ. Quey ojabꞌ tiꞌ chi yun je kꞌanabꞌ jaxca tiꞌ xin: Ta yel, “yel,” je chi. Ta man yeloj, “man yeloj,” je chi. Quey ojabꞌ cꞌal tuꞌ che yute kꞌanabꞌ je bꞌa, yet watxꞌ cꞌam tzet chi tit je yibꞌan, yet chi snaꞌon oc Dios je yin. 13Ta jaex lalan je yabꞌen syaꞌil tinaniꞌ, txalanwej. Ta ey jex pax ey jex oc yin tzalacꞌulal xin, bꞌitnewej junoj je watxꞌ kꞌane tet Dios. 14Ta ey jex yaꞌ jex ey, awtewej ebꞌ yancianoal iglesia. Jaꞌ jex anciano jex tiꞌ, txalanwej yu ebꞌ. Che yaon can oc aceite olivo yin ebꞌ yin sbꞌi Naj Kaawil, yutol queytuꞌ yalon Naj Kaawil. 15Ta tol che yaoc yin je cꞌul, yet lalan je txali yu ebꞌ tuꞌ, oj ton colcha can el ebꞌ xol syaꞌilal. Jaꞌ Naj Kaawil oj akꞌon can waꞌxoj scꞌul ebꞌ. Ta ey junoj spenail jix el yunen ebꞌ, oj joꞌole qꞌuey yibꞌan ebꞌ yu Dios. 16Yuxan, alwej atej je penail ey jex junjun jex. Catuꞌ txalanwej je yu junjun jex, yet watxꞌ oj waꞌxoj je cꞌul. Jaꞌ ebꞌ watxꞌ sbꞌeybꞌal, caw ey tzetyetal chi waꞌxi can el yu xa ebꞌ tuꞌ. 17Jaꞌ yet jix ecꞌ naj Elías yet peyxa, comon ánima jaxca jon cꞌal tiꞌ. Yin masanil scꞌul jix txali, yet watxꞌ cꞌamxa chi yakꞌ nabꞌ. Nan scan abꞌil ma xa yakꞌ nabꞌ bꞌey jun lugar tuꞌ.#1a Reyes 17:1—18:1. 18Jato cꞌal yet jix skꞌanon nabꞌ yin txa junelxa, catuꞌ jix jul pax nabꞌ. Jato yet tuꞌ jix yaaxbꞌi pax a jun lugar tuꞌ junelxa. 19Jex wuẍtaj, jex wanabꞌ, ta ey junoj mactxequel je nan je xol chi yiꞌcan el sbꞌa yin skꞌane Dios tol yel, ta ey junoj jex che yaoc snaꞌbꞌal ebꞌ, yet chi oc pax ebꞌ junelxa. 20Otajnewej el jun tiꞌ, ta ey ebꞌ chi yetnetoj sbꞌeybꞌal, catuꞌ che yaon oc snaꞌbꞌal ebꞌ yu swaꞌxi oc sbꞌeybꞌal ebꞌ tuꞌ, lalan je colon el spixan ebꞌ yul skꞌabꞌ camich. Yu watxꞌ tzet che yun tuꞌ, oj akꞌle qꞌuey jantaj spenail.
Currently Selected:
Santiago 5: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.