Hebreos 13
13
1Manche cu bꞌej cu camcꞌulnen cu bꞌa, yutol kuẍtaj cu bꞌa, kanabꞌ cu bꞌa yin Cristo. 2Cu naꞌwejtej tol chi ojabꞌ kakꞌ sposada ebꞌ chi ecꞌ cu cꞌatan. Yutol ey ebꞌ ánima yet jix yun jaxca tiꞌ jix ẍaꞌ ángel, ma pax yotajne el ebꞌ ta tol ángel ebꞌ chi ẍaꞌ ebꞌ tuꞌ. 3Cu naꞌwejtej ebꞌ eyoc preso, jaxca tol ey jon oc preso yetoj ebꞌ. Cu naꞌwejtej ebꞌ chi ilon syaꞌilal, jaxca tol jaon jun lalan kabꞌen syaꞌil yetoj ebꞌ. 4Jaꞌ yet chi kiꞌlen cu bꞌa yetoj ketbꞌi junjun jon, watxꞌ yul sat Dios. Tol asanne ojabꞌ cꞌal yin ketbꞌi junjun jon chi kaoc cu naꞌbꞌal. Yutol jaꞌ mac chi yaoc smul yul skꞌabꞌ yetbꞌi oj akꞌle cuenta ebꞌ yu Dios. Jacꞌalaꞌ ebꞌ tol cꞌamto yetbꞌi. 5Man ojabꞌ jaꞌ oj cꞌal yin chꞌen tumin chi kaoc cu naꞌbꞌal cu seyoni. Kakꞌwej tzala cu cꞌul yetoj tzetyetal ey, ey jon. Yutol jix yal Dios jaxca tiꞌ: “Man oj jex jin bꞌejcan an, man oj jex jin bꞌejcan je txꞌojli an,” ẍi cu Mam Dios.#Deuteronomio 31:6. 6Yuxan, cꞌam chi cu xiw kalon jaxca tiꞌ:
Chi colwa Naj Kaawil win an. Cꞌam chin xiw yu junoj tzetyetal chin utele yu junoj ánima an.#Salmos 118:6, 7.
7Naꞌwejtej ebꞌ je yilomal, ebꞌ yalomal el skꞌane Dios ecꞌnaj je xol tuꞌ. Naꞌwejtej tzet jix yun yeloc ebꞌ. Jaxca jix yute yaon oc scꞌul ebꞌ yin Dios, quey ojabꞌ tuꞌ che yute pax je bꞌa. 8Jaꞌ Jesucristo, jacꞌalaꞌ snaꞌbꞌal, jaxca yet peyxa, quey cꞌal tuꞌ tinaniꞌ, cꞌal yin tobꞌalkꞌinal. 9Manche je yakꞌ etnele je bꞌa yu wanojxa txꞌoj cuybꞌanile chi al-lei. Caw watxꞌ ta chi akꞌle stecꞌanil cu naꞌbꞌal yu swatxꞌcꞌulal Dios chi xꞌox ey jon. Manaj yu wan chejbꞌanile chi alon yu tzet chi cu loꞌ xin, manaj yu wan tuꞌ, yuxan chi jichlo el cu naꞌbꞌal, yutol jaꞌ wan chejbꞌanile tuꞌ, cꞌam niꞌoj yopiso yin swaꞌnen oc snaꞌbꞌal ebꞌ chi bꞌeybꞌalnen tuꞌ. 10Jaon tiꞌ, txꞌoj yel jun cu xaambꞌal tiꞌ. Cꞌam chi skeꞌ ẍiꞌon wan yakꞌomal xaambꞌal bꞌey jun icham stemplo cu Mam Dios. 11Yutol jaꞌ naj yaaw yakꞌomal xaambꞌal tet Dios, jaꞌ naj chi iꞌon octoj ẍiqꞌuil noꞌ noꞌ bꞌey jun lugar Asan Dios Ey Yet Xꞌojli yin xaambꞌalil yet chi yiꞌon el spenail. Jaxa xaamlaj conobꞌ jaꞌ taꞌ tuꞌ chi bꞌet tzꞌaꞌtoj smimanil noꞌ noꞌ tuꞌ. 12Queyton tuꞌ jix yun yabꞌen syaꞌilal camich Naj Jesús xaamlaj conobꞌ, yet watxꞌ jaꞌ ẍiqꞌuil Naj chi iꞌon el spenail ebꞌ ánima. 13Yuxan eloj jonwejtoj bꞌey eyecꞌ Jesús, bꞌey xaamlaj conobꞌ. Chi yal yeloc apnoj jun laan ojabꞌ kintajnele el yetoj Jesús. 14Yutol manaj yul yibꞌankꞌinal tiꞌ ey junoj cu conobꞌ yin junelne. Yutol ey jun cu conobꞌ tol to oj juloj. Jaꞌton jun tuꞌ lalan kechbꞌaneni. 15Yuxan kalwej watxꞌ kꞌane tet Dios yin Jesucristo yin tobꞌalkꞌinal. Jaꞌ watxꞌ kꞌane chi kal tet Dios yetoj cu tiꞌ, jaꞌton wan tuꞌ cu saꞌbꞌeal tet Dios. 16Manche to qꞌueycꞌulal ku kunen watxꞌilal, cꞌal cu colwa yin ebꞌ ket animail. Yutol jaꞌ wan tiꞌ, cu saꞌbꞌeal pax tet Dios, caw chi tzala Dios yetoj wan tiꞌ. 17Jijewej tzet chi yal ebꞌ chex ijbꞌani. Awej oc je bꞌa yul skꞌabꞌ ebꞌ. Yutol jaꞌ ebꞌ lalan steynen je pixan. Yotaj ebꞌ tol oj yal ebꞌ tet Dios tzet utbꞌil jix yun yeloc smulnail ebꞌ tuꞌ. Watxꞌ ojabꞌ che yute je bꞌa, yet watxꞌ chi tzala ebꞌ yin smulnail, ta cꞌamaj chi cusa scꞌul ebꞌ. Ta chi cusa scꞌul ebꞌ je yu, man watxꞌoj je yet. 18Txalanwej ku, chi cu naꞌ tol watxꞌ chi kute cu naꞌbꞌal, chi koche tol caw watxꞌ cꞌal chi kute cu bꞌeybꞌal yin tobꞌalkꞌinal. 19Chin kꞌan je colwal tol caw chex txali wu, yet watxꞌ chi skeꞌ wapni je cꞌatan junelxa yin eymanil. 20Jaꞌ cu Mam Dios, yakꞌomal watxꞌcꞌulal, jaꞌ akꞌnen pitzcꞌu a Naj Kaawil Jesucristo xol ebꞌ camnajxa. Jaꞌ Jesucristo tuꞌ, Kilomal ye jaxca junoj ilom meꞌ. Miman yeloc apnoj Naj. Yu ẍiqꞌuil Naj yuxan jix waꞌxi jun swa kꞌane Dios, jun ey cꞌal yin tobꞌalkꞌinal. 21Chi woche chi waꞌxi oc je naꞌbꞌal yin masanil tzetyetal watxꞌ yu che yun tzet chi yoche Dios ketoj yin Naj Jesucristo. Catuꞌ jaꞌ chi unen pax kin tzetyetal chi tzala yetoj. Miman ojabꞌ yeloc apnoj Cristo yin tobꞌalkꞌinal. Amén. 22Jex wuẍtaj, jex wanabꞌ, miman che yute je cꞌul yu wan kꞌane chi waltoj ey jex tiꞌ an. Niꞌan chꞌan tzet chi waltoj ey jex tiꞌ yul jun jin carta tiꞌ an. 23Chi waltoj je yabꞌ an, tol jix jajcha naj kuẍtaj Timoteo. Ta oj jul naj titiꞌ yin eymanil, catuꞌ oj wiꞌontoj naj wetoj an, yet oj jin toj jex wilon an. 24Chi watoj scawil scꞌul junjun ebꞌ chex ijbꞌan bꞌey tituꞌ. Catuꞌ chi waon pax toj scawil je cꞌul je masanil an, mac jex yet jex xa Dios wetoj an. Yetoj ebꞌ a Italia chi ya pax toj scawil je cꞌul ebꞌ. 25Chi woche chi yakꞌ swatxꞌcꞌulal Dios je yibꞌan je masanil bꞌey tituꞌ.
Currently Selected:
Hebreos 13: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.