Hageo 1
1
Iptzebꞌal Yu Swaꞌxubꞌal Templo
1Jaꞌ yet scaabꞌ abꞌil yoc naj Darío yin reyal, yet sbꞌabꞌel cꞌual yet swaj xꞌaaw, jaꞌ yet tuꞌ jix yalon Jehová tet naj Hageo, jaꞌton jun ẍejabꞌ, yet chi yalon tet naj eyoc yin gobernadoral bꞌey conobꞌ Judá, jaꞌton Zorobabel, scꞌaal Salatiel, yetoj tet Josué, naj sat yakꞌomal xaambꞌal, scꞌaal Josadac.
2-3Jaꞌ Jehová Naj Yaaw yibꞌan Masanil, jaꞌ chi alon jaxca tiꞌ: Jaex tiꞌ che yalaꞌ tol eyto yapni oc scꞌual yet chi caꞌ waꞌnele a jin templo. 4Jal pax jaex tiꞌ xin, ¿tumi jix apni scꞌual je caey bꞌey yul-laj na tol txꞌojxa swatxꞌil scawxi, yajbꞌan jaꞌ jin templo, uchchanaj eyoj? 5Jain caw Jehová, yaaw jin chi walaꞌ, tol chi cam je naꞌon tzet che yunne. 6Jaex tiꞌ, caw miman tzet che yawaꞌ, txenne pax sat je yawo che yambꞌa ocoj. Chex lowi, cꞌam chi ecꞌ je wail. Che yucꞌ jaꞌ, cꞌam chi ecꞌ je tajin tiꞌal. Che yaoc je pichil, cꞌam chex kꞌaxna a yul. Jaꞌ mac chi ẍaꞌ stool scꞌu yin mulnail, jaxca tol jaꞌ yul jolan txꞌuye chi yaeytoj stool scꞌu ebꞌ. 7Jain caw Jehová, yaaw jin chi wal ey jex, tol chi cam snaꞌon sbꞌa je cꞌul yin tzet che yunne. 8Asiꞌwej bꞌey xol-laj teꞌ, catuꞌ che yiꞌontej teꞌ teꞌ, yet che caꞌ waꞌnen a jin templo. Queytuꞌ oj yun weecꞌ yin tzalacꞌulal tituꞌ, catuꞌ oj jin txꞌoxon wipalil ey jex. 9Che naꞌ tol miman tzet oj je yiꞌ yin sat je yawo; tol txenne pax tzet che yiꞌ. Jain caw Jehová jin chi walaꞌ, tol jaꞌ niꞌoj che cꞌubꞌa oc bꞌey je na, jain chin xuꞌ sajlemtoj ey jex. ¿Tzet yu? Yutol jaꞌ jin templo, caw uchquiltaj yeocoj, yajbꞌan jaex tiꞌ, asan yin je waꞌnen a je na eyoc je naꞌbꞌal. 10Jaꞌton yu wan tuꞌ, yuxan cꞌam chi eyqꞌuey nabꞌ bꞌey ey jex tiꞌ, cꞌam tzet chi yakꞌ txꞌotxꞌ txꞌotxꞌ tiꞌ ey jex. 11Jain jix jin mitxꞌoc tucan yeyqꞌuey nabꞌ yibꞌan je yawo, cꞌal bꞌey sjolomlaj wonan, yuxan chi tajtoj ixim tiriw, yetoj an uva, cꞌal yetoj teꞌ olivo, yetoj cꞌal masanil sat awo chi yambꞌale aoj. Cꞌamxa cꞌal pax nabꞌ chi ey je yibꞌan, tam wal yibꞌan je jobꞌbꞌeal noꞌ, tam wal yibꞌan masanil je mulnail, ẍi Jehová, ẍi naj Hageo tuꞌ.
12Jaꞌ yet jix yabꞌen naj Zorobabel, cꞌal Josué, jaꞌton naj sat yakꞌomal xaambꞌal, cꞌal yetoj masanil ánima jantaj wan skꞌane Jehová Dios jix yal naj Hageo tuꞌ, caw jix xiwa ebꞌ tet Jehová, yuxan jix sjije ebꞌ. 13Yu jun tuꞌ xin, jix yalon naj Hageo, jaꞌton naj ẍejabꞌ Jehová: Chi yal Jehová jaxca tiꞌ: Ey jin cꞌal ecꞌ je yetoj, ẍi Dios, ẍi naj Hageo tuꞌ.
14-15Queytuꞌ jix yun yiptzele naj Zorobabel yu Jehová, jaꞌton naj eyoc yin gobernadoral bꞌey Judá, yetoj Josué, naj sat yakꞌomal xaambꞌal, cꞌal masanil ebꞌ ánima. Jaꞌ yet 24 yoc yet swaj xꞌaaw, jaꞌton yet scaabꞌ abꞌil xa yoc naj Darío yin reyal, jaꞌ yet tuꞌ jix ẍaꞌon el yich scaꞌ waꞌnen a stemplo sDiosal ebꞌ, jaꞌton Jehová Naj Yaaw yibꞌan masanil.
Currently Selected:
Hageo 1: knj
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
