Génesis Introducción
Introducción
Génesis sbꞌi jun libro tiꞌ. Chi yal yeloc apnoj, “yichbꞌanil.” Jaꞌton jun bꞌabꞌel libro yul An Biblia. Jix tzꞌibꞌelecan yet abꞌil 1445-1405 a.C. Jaꞌ naj Moisés jix tzꞌibꞌen jun libro tiꞌ bꞌey Oriente Medio. Jaꞌ chi alon tzet jix yun yel yich masanil tzetyetal ey bꞌey yul yibꞌankꞌinal tiꞌ. Chi yaltej skꞌaneal yu ebꞌ bꞌabꞌel ánima, cꞌal yu masanil conobꞌlaj yetoj cꞌal tzet jix yun yel yich conobꞌ Israel, jaꞌton jun conobꞌ sicꞌbꞌil el yu Dios. Jaꞌ yet jix tzꞌibꞌele jun libro tiꞌ, caw ecꞌalxa ebꞌ ánima jix yaoc scꞌul yin wan comon dios yetoj tzet waꞌnebꞌil yu ebꞌ.
Jaꞌ an libro Génesis tiꞌ, chi yaltej tol asanne jun Dios ey, ey cꞌal ecꞌ yin tobꞌalkꞌinal, jaꞌ jix waꞌnen masanil tzetyetal. Chi yaltej ey jon tol jaꞌ yet jun tiempoal tuꞌ watxꞌ yakꞌon ebꞌ ánima yetoj Dios. Jaꞌ ebꞌ ánima tuꞌ yaaw yeoc ebꞌ yin jantaj tzetyetal ey bꞌey yul yibꞌankꞌinal tiꞌ. Caw tzalacꞌulal yet ebꞌ ánima tuꞌ, ta tol chi sjije ebꞌ tzet chi yal ẍejbꞌanil Dios. Chi yalon pax tej an tzet jix yun yel yich spenail, cꞌal syaꞌilal chi cu iꞌon tinaniꞌ, yutol jaꞌ naj Adán yetoj ix Eva, jaꞌ tzet chi yoche scꞌul ebꞌ jix yunne, ma sjije ebꞌ tzet jix yal Dios.
Chi yalon pax tej an tzet jix yun scol-le ebꞌ ánima xol spenail. Ey caabꞌ tujan yeoc jun libro tiꞌ: Bꞌabꞌel tujan chi yal capítulo 1 masantaꞌcꞌal capítulo 11, jaꞌ titiꞌ chi yalaꞌ tzet jix yun yel yich yul yibꞌankꞌinal tiꞌ yetoj jaon ánima jon tiꞌ, chi yalaꞌ tzet jix yun yel yich spenail cꞌal syaꞌilal. Chi yalontej yu jun miman yaax nabꞌ yetoj jun miman torre chi yij Babel. Chi yal cꞌaltej skꞌaneal masanil conobꞌlaj.
Jal junxa yet scaabꞌ tujan xin, jaꞌton capítulo 12 masantaꞌcꞌal chi apni bꞌey capítulo 50, chi yaltej tzet jix yun yel yich conobꞌ Israel. Chi ẍaꞌel yich yin Abraham, Isaac, Jacob yetoj cꞌal ebꞌ yuninal Jacob, jaꞌton: José yetoj ebꞌ yuẍtaj. Chi yalon pax tej tzet jix yun stoo naj Jacob yetoj ebꞌ yuninal bꞌey txꞌotxꞌ Egipto. Jaꞌton tituꞌ jix oc ebꞌ Israel yin miman conobꞌal.
Chi yaltej jun libro tiꞌ tol jaꞌ Dios caw miman yeloc apnoj. Jaꞌ chi naꞌon oc yin ebꞌ ánima, chi yaon oc syaꞌilal yibꞌan ebꞌ cꞌam chi jijen tzet chi yalaꞌ. Jaꞌ ebꞌ chi jijen tzet chi yalaꞌ, chi col-le el ebꞌ yu, chi ijbꞌale cꞌal jantaj ebꞌ chi camcꞌulneni. Jaꞌton jaxca tiꞌ chi yun yel yich an libro Génesis tiꞌ, chi yaloni tol jaꞌ Dios jix waꞌnen masanil jantaj tzetyetal, chi yalon pax oj tol jaꞌ Dios chi teynen ebꞌ sconobꞌ.
Currently Selected:
Génesis Introducción: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.