Génesis 6
6
Spenail Ebꞌ Ánima
1Jaꞌ yet jix chꞌibꞌ sbꞌisil ebꞌ ánima bꞌey sat txꞌotxꞌ txꞌotxꞌ tiꞌ, ey cꞌal scutzꞌin ebꞌ jix ali. 2Jaꞌ ebꞌ naj yuninal Jehová,#6:2 Man wal kotajoj mac ebꞌ chi yij yuninal Jehová. Ey ebꞌ chi aloni tol jaꞌ ebꞌ ángel eyqꞌueynaj yin amulal. Ey ebꞌ chi aloni tol jaꞌ ebꞌ yuninal naj Set. Ey pax ebꞌ chi aloni tol jaꞌ ebꞌ yuninal ebꞌ eyoc yin yaawil. Ta tol yuninal Set ebꞌ chi yij yuninal Jehová, jal ebꞌ chi oc yistiloj ebꞌ ánima, jaꞌton ebꞌ yicꞌaal naj Caín. jix yiloc scꞌul ebꞌ yin scutzꞌin ebꞌ ánima tol caw watxꞌ yili oc ebꞌ ix, catuꞌ jix cꞌoli sicꞌlen el yistil ebꞌ naj xol ebꞌ ix. 3Yuxan jix yalon Jehová: Manxa oj jin tenchane ebꞌ ánima tiꞌ yin spenail, yutol cambꞌeal ánima yeoc ebꞌ, yuxan asanxane 120 abꞌil oj ecꞌ ebꞌ ánima bꞌey yul yibꞌankꞌinal tiꞌ.
4Jaꞌ yet jun tiempoal tuꞌ, jix yiꞌle sbꞌa ebꞌ naj yuninal Jehová yetoj ebꞌ ix scutzꞌin ebꞌ ánima tuꞌ, jaꞌ yuninal ebꞌ jix ali, jaꞌton ebꞌ chi yij Nefilim.#6:4 Man kotajoj tzet chi yal yeloc apnoj Nefilim. Jaꞌ yin Español, cael tzꞌibꞌebꞌil eyoj, “gigante” chi yal yeloc apnoj ánima tol caw mimej steel. Jaꞌ ebꞌ tuꞌ caw ey yip ebꞌ, caw wal bꞌinabꞌil ebꞌ yet peyxa tuꞌ.
5Jix yilon Jehová tol yelcꞌulal wal chi too ebꞌ ánima yin spenail bꞌey sat txꞌotxꞌ tiꞌ, caw asanne yin spenail eyoc snaꞌbꞌal ebꞌ. 6Caw jix cus scꞌul Jehová, catuꞌ jix yalon jaxca tiꞌ: Majtaꞌ wal jin waꞌne wan ánima tiꞌ. Caw yaꞌ chi wabꞌ yu ebꞌ. 7Jix yaloni: Oj jin qꞌueyel wan ánima jix jin waꞌne sat txꞌotxꞌ txꞌotxꞌ tiꞌ, yetoj cꞌal noꞌ jobꞌbꞌeal noꞌ, noꞌ xol-laj teꞌal noꞌ, cꞌal noꞌ chi sjutx sbꞌa sat txꞌotxꞌ, yetoj cꞌal noꞌ tzꞌiquin. Caw chi tac jin cꞌul yu jix jin waꞌne ebꞌ an, ẍi Jehová.
8Asanne naj Noé watxꞌ naj yul sat Jehová.
Jix Swaꞌne Jun Miman Barco Naj Noé
9Jaꞌton skꞌaneal naj Noé tiꞌ:
Jaꞌ naj Noé tuꞌ, caw watxꞌ cꞌal jix yute sbꞌeybꞌal sattaj Jehová, asanne naj watxꞌ snaꞌbꞌal xol ebꞌ ánima yet jun tiempoal tuꞌ. Jix sbꞌeybꞌalne naj jaxca chi yoche scꞌul Jehová. 10Ey oxwan scꞌaal naj jix ali yetoj yistil, jaꞌton naj Sem, naj Cam cꞌal naj Jafet.
11Pena xacꞌal yili yul yibꞌankꞌinal tiꞌ jix yil Jehová, comon xacꞌal chi meltzo oc ebꞌ ánima yin yet animail. 12Jix yilon Jehová xin, tol masanil ánima jix etex el snaꞌbꞌal, jacꞌal spenail chi yun ebꞌ. 13Jix yalon Jehová tet naj Noé jaxca tiꞌ: Jaꞌ tinaniꞌ tol oj jin qꞌueyel masanil ánima sat txꞌotxꞌ txꞌotxꞌ tiꞌ. Yutol yaxkꞌainaj xacꞌal chi yute sbꞌa ebꞌ, yuxan oj jin qꞌueyel masanil tzetyetal bꞌey yul yibꞌankꞌinal tiꞌ. 14Jaꞌ tinaniꞌ xin, waꞌne junoj teꞌ miman barco. Jaꞌ teꞌ teꞌ ey skꞌolal cha waoc yin. Cuartolaj cha wute yul, caw watxꞌ chi yun ja waꞌneni, cha waoc kꞌol bꞌey chi snubꞌle sbꞌa teꞌ. Cha waon oc yin, cꞌal yul, yet watxꞌ cꞌam chi octoj jaꞌ jaꞌ yul. 15Jaꞌ spacꞌul ey 137 metro cha wute, jal yul xiquin, 22 metro yetoj nanxa cha wute, catuꞌ 13 metro yetoj nanxa cha wute a steel. 16Oxebꞌ piso cha wute aoj. Jaꞌ bꞌey yibꞌan tuꞌ chi can junoj wentana, nan metro cha wute yetoj junoj smajil bꞌey jun pacꞌoj. 17Yutol oj watej junoj miman yaax nabꞌ sat txꞌotxꞌ txꞌotxꞌ tiꞌ, oj noel sat txꞌotxꞌ tiꞌ yu jaꞌ, yu sqꞌueyle el masanil jantaj tzet iquis bꞌey yul yibꞌankꞌinal tiꞌ. 18Asanne ja wetoj chin waꞌne yeoc jun jin kꞌane tiꞌ. Jaꞌ yul teꞌ barco tuꞌ oj jaach octoj yetoj ix ja wistil, yetoj ebꞌ naj ja cꞌaal, cꞌal yetoj yistil junjun ebꞌ naj. 19Catuꞌ oj ja waon octoj noꞌ noꞌ ja wetoj yul teꞌ barco tuꞌ, junjun moan noꞌ yin junjun tujan noꞌ ey yul yibꞌankꞌinal tiꞌ, yet watxꞌ chi iquisbꞌi ecꞌ noꞌ jaxca jex tiꞌ. 20Catajcꞌon chi yun ja waon octoj junjun tujan noꞌ: Noꞌ tzꞌiquin, noꞌ jobꞌbꞌeal noꞌ, noꞌ xol-laj teꞌal noꞌ, cꞌal noꞌ chi sjutx sbꞌa sat txꞌotxꞌ, yet watxꞌ cꞌam chi qꞌueyel yinatil noꞌ. 21Catuꞌ cha yambꞌa can octoj jantaj ja loꞌbꞌe, yet watxꞌ ey tzet cha loꞌ, cꞌal tzet chi sloꞌ noꞌ noꞌ tuꞌ, ẍi Jehová. 22Jaꞌ Noé jix sjije masanil tzetyetal jix al-le tet yu Jehová.
Currently Selected:
Génesis 6: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.