Hechos 22

1—Jex wet conobꞌ, cꞌal jex mamin ichamtaj winaj, abꞌwej tzet chi wute walon jin bꞌa an, ẍi eltej naj.

2Jaꞌ yet jix yabꞌen ebꞌ tol yin stiꞌ Hebreo chi yalaꞌ, jix tzꞌini xacꞌal ey ebꞌ, catuꞌ jix yalon tet ebꞌ jaxca tiꞌ:

3—Jain tiꞌ, Israel jin pax je yetoj. Jatuꞌ alinaj jin bꞌey conobꞌ Tarso, yul yet Cilicia. Tol jaꞌ pax bꞌey Jerusalén tiꞌ jix jin chꞌibꞌi. Jaꞌ naj Gamaliel jin cuywam.#22:3 Jaꞌ naj Gamaliel, cuywawom tol miman bꞌinabꞌil naj xol ebꞌ Israel yet jun tiempoal tuꞌ. Jix jin scuy naj yin sley ebꞌ kichmam sicꞌlebꞌil. Caw chi wakꞌ servil Dios yin masanil jin cꞌul an, jaxca ton che yute je bꞌa je masanil tiꞌ tinaniꞌ. 4Jaꞌ yet yalantoj, jix wetne ebꞌ chi yaoc scꞌul yin Jesucristo. Ey bꞌey jix jin mitxꞌtej ebꞌ, chi watoj masanil ebꞌ preso. Ey pax bꞌey jix wakꞌ cam ebꞌ an. 5Jaꞌ naj yaawil yakꞌomal xaambꞌal tet Dios, yetoj ebꞌ yaaw masanil, chi skeꞌ yalon ebꞌ tzet utbꞌil tol yel chi wal an. Yutol jaꞌ ebꞌ jix akꞌon carta ey jin an, catuꞌ jix jin to wiꞌon ebꞌ ket Israelal bꞌey conobꞌ Damasco. Jix jin to Damasco tuꞌ, yu too jin seyon ecꞌ ebꞌ creyente. Jix woche jix jin bꞌet jin cꞌaltej ebꞌ, catuꞌ chi wiꞌontej ebꞌ bꞌey Jerusalén tiꞌ, catuꞌ chi ale oc syaꞌilal yibꞌan ebꞌ.

Chi Yaltej Naj Pablo Tzet Jix Yun Yoc Naj Creyenteal

(Hechos 9:1-19; 26:12-18)

6Yajbꞌan lalan too wiꞌontej ebꞌ tuꞌ an, jaꞌ yet lalan wapni xacꞌal scawilal conobꞌ Damasco tuꞌ an, tejan chuman mi cꞌu, ey jun sajkꞌinal jix tit kopna satcan catuꞌ jix eyol kopna wibꞌan, caw jow ẍaw yajan, caw wal jix jul kopna sajil winlaj an. 7Jix jin eyqꞌuey telna sat txꞌotxꞌ yu an. Jix wabꞌen yoc jayebꞌ kꞌane jix al-le ey jin an: “Saulo, Saulo, ¿tzet yuxan chin ja wetne an?” ẍi ey jin an. 8“¿Mac jaach txequel, Mamin?” jin chi tet. “Jain Jesús, a Nazaret jin an. Lalan jin ja wetnen an,” ẍi ey jin an. 9Jaꞌ ebꞌ jix too wetoj an, jix yil ebꞌ jun miman sajkꞌinal tuꞌ, catuꞌ caw jix xiwa ebꞌ sicꞌlebꞌil. Ma cꞌal yabꞌ ebꞌ yoc jayebꞌ kꞌane jix al-le ey jin tuꞌ an. 10Catuꞌ jix walon tet jaxca tiꞌ: “¿Tzet chi yoche ja cꞌul chi wun xin, Mamin?” jin chi tet an. “Aan linanoj, catuꞌ chach too bꞌey Damasco. Jatuꞌ oj al-le ey jaach, tzet sowalil oj ja wunne,” ẍi Naj Kaawil tuꞌ ey jin an. 11Cꞌam cꞌal niꞌoj chi skeꞌ wilon yu sjowal yajan sajkꞌinal tuꞌ. Jaꞌ ebꞌ wetbꞌi tuꞌ jix jin quetzontoj bꞌey Damasco tuꞌ an.

12Ey jun winaj bꞌey Damasco tuꞌ chi yij Ananías. Caw yelcꞌulal jijem naj tet sley Moisés. Caw watxꞌ sbꞌeybꞌal yul sat masanil ebꞌ ket Israelal bꞌey Damasco tuꞌ. 13Jix jul naj jin cꞌatan an, catuꞌ jix yalon jaxca tiꞌ: “Wuẍtaj Saulo, jajcha ojabꞌ can ja sat tiꞌ,” ẍi ey jin an. Eyman jix jajcha can jin sat tiꞌ, catuꞌ jix wilon oc yin. 14Catuꞌ jix yalon ey jin jaxca tiꞌ an: “Jaꞌ cu Diosal, jacꞌal oc sDiosal ebꞌ kichmam, jaꞌ naj jix jaach sicꞌon eloj, yet watxꞌ cha wotajne eloj tzet chi yoche naj ja win. Yu pax tol chi yoche naj tol cha wil yin Jesús, naj jichan sbꞌeybꞌal. Catuꞌ cha wabꞌeni, tzet chi yal naj ey jaach. 15Jaꞌ tinaniꞌ, oj ja wal skꞌaneal Jesús yabꞌ masanil ánima. Oj ja wal tzet jix ja wilaꞌ, catuꞌ oj ja walon tzet jix ja wabꞌe. 16¿Tzet yuxan cha wechbꞌane tinaniꞌ xin? Aan linanoj. Akꞌ bautizar ja bꞌa. Iꞌey ja bꞌa tet Jesucristo, yet watxꞌ chi tancan el ja penail ja wibꞌan,” ẍi Ananías tuꞌ ey jin an.

Chi Yaltej Pablo Tzet Jix Yun Ẍejletoj Bꞌey Ebꞌ Man Israel Oj

17Jaꞌ yet jix jin jul bꞌey Jerusalén tiꞌ, catuꞌ jix jin to txaloj bꞌey stemplo Dios. Jaꞌ yet lalan jin txali tuꞌ, jaxca tol jix jin weyichli. 18Jix wil yin Naj Kaawil catuꞌ jix yalon Naj jaxca tiꞌ ey jin an: “Caw cha wakꞌ ja wip ja wela bꞌey Jerusalén tiꞌ, yutol man oj ẍaꞌ ebꞌ yabꞌ jin kꞌane yet oj ja walon tet ebꞌ,” ẍi ey jin an. 19Jix walon tet naj jaxca tiꞌ: “Mamin, yotaj xa ebꞌ, tol jix jin ecꞌ yul-laj junjun snail sculto ebꞌ wet Israelal yu ecꞌ jin seyon eltej ebꞌ jix yaoc scꞌul ja win. Jix jin mitxꞌ cꞌal masanil ebꞌ, catuꞌ jix waon oc ebꞌ preso, catuꞌ jix jin makꞌon pax ebꞌ an. 20Jaꞌ yet jix kꞌojchꞌennele jun yalomal el ja kꞌane chi yij Esteban, ey jin ecꞌoj, jain chin teyne spichil ebꞌ yet lalan skꞌojchꞌenen ebꞌ tuꞌ,” jin chi tet Naj Kaawil tuꞌ. 21Jix yalon pax ey jin jaxca tiꞌ: “Asiꞌ, yutol naat oj jaach jin chejtoj, jaꞌ taꞌ bꞌey xol ebꞌ man Israeloj, jaꞌ taꞌ tuꞌ oj jaach toj,” ẍi Naj Kaawil tuꞌ ey jin an, ẍi Pablo tuꞌ tet ebꞌ.

Jaꞌ Yet Eyoc Pablo Yul Skꞌabꞌ Naj Coronel

22Jaꞌ ebꞌ ánima jix chaꞌon abꞌen tzet jix yal naj Pablo tuꞌ, jal yet jix yalon tol jix chejletoj naj bꞌey ebꞌ man Israeloj yu Naj Kaawil, ma xa ẍaꞌ ebꞌ yabꞌe. Jix ẍaꞌon el yich ya yaw ebꞌ yin ipal jaxca tiꞌ:

—Cam ojabꞌ naj. ¿Tzet wal gana iquis naj? ẍi ebꞌ.

23Caw jix a uchna ebꞌ stit sjowal. Jix sicoꞌtane spichil ebꞌ. Jix swotza pojoj ebꞌ catuꞌ jix stiẍon a ebꞌ naat, yutol caw jix tit sjowal ebꞌ yin Pablo tuꞌ. 24Jaꞌ yet jix yilon naj coronel jaxca tuꞌ, catuꞌ jix yakꞌon orden naj tol chi makꞌle yu tzꞌuum, yet watxꞌ chi yalaꞌ tzet spenail yuxan chi a wejna ebꞌ ánima tuꞌ catuꞌ chi tit sjowal ebꞌ yin naj. 25Jaꞌ yet jix kꞌal-le ey Pablo tuꞌ yu ebꞌ oj makꞌon tuꞌ xin, catuꞌ jix yalon tet jun naj capitán eyecꞌ tituꞌ jaxca tiꞌ:

—¿Tumi ey sleyal comon cꞌal chin je makꞌ xin? Tol ey pax wuunal yul yet Roma tiꞌ. Yetoj pax oj, cꞌam niꞌoj jin penail chi txeclo eloj, ẍi naj tet ebꞌ.

26Jaꞌ yet jix yabꞌen naj capitán tzet jix yal tuꞌ, catuꞌ jix bꞌet yalon naj tet naj coronel jaxca tiꞌ:

—Caw ey smey jun chi el ja wunen tiꞌ. Ey yuunal naj Pablo tuꞌ yul yet Roma, yalaꞌ, ẍi naj tet naj.

27Eyman jix too skꞌanle naj coronel tet Pablo tuꞌ jaxca tiꞌ:

—¿Tumi yel ey ja wuunal yul yet Roma, jaach tiꞌ? ẍi naj.

—Yel toni, ey wuunal yul yet Roma an, ẍi naj Pablo tet naj.

28Quey jin pax tuꞌ an. Caw miman pax tumin jix wakꞌa yet jix jin manon eltej wuunal bꞌey Roma, ẍi naj tet.

—Jal jin jain tiꞌ an xin, Romano jin yin tax cꞌaltaꞌ walubꞌal,#22:28 Ey sleyal tol cꞌam chi yij tzꞌuum junoj naj ey yuunal yul yet Roma ta cꞌamto chi txeclo el spenail naj. ẍi Pablo tuꞌ tet naj.

29Jaꞌ ebꞌ soldado ian jix makꞌon naj tuꞌ jix bꞌejlecan naj yet jix yabꞌen ebꞌ jun tuꞌ. Jaꞌ yet jix yabꞌen naj coronel tuꞌ tol ey yuunal naj yul yet Roma, caw jix xiwa naj, yutol comon cꞌal jix yakꞌ kꞌal-leoj.

Jaꞌ Yet Jix Apni Pablo Sattaj Ebꞌ Sat Yaawil Israel

30Jaꞌ yet junxa cꞌual xin, catuꞌ jix yochen naj coronel tuꞌ jix yabꞌe tzet yuxan jix akꞌle queja Pablo tuꞌ yu ebꞌ Israel. Yuxan jix iꞌle el chꞌen cadena eyoc yin naj, catuꞌ jix yakꞌon naj yambꞌale oc ebꞌ yaawil yakꞌomal xaambꞌal ebꞌ Israel tet Dios, cꞌal masanil ebꞌ sat yaaw xol ebꞌ Israel tuꞌ. Catuꞌ jix iꞌle eltej Pablo yu naj yul cuartel, catuꞌ jix iꞌletoj naj sattaj ebꞌ.

Currently Selected:

Hechos 22: knj

Highlight

Copy