Hechos 2
2
Sjulbꞌal Naj Santo Espíritu
1Jaꞌ yet jix eyol scꞌual kꞌin Pentecostés#2:1 Snan xol kꞌin Pascua yetoj kꞌin Pentecostés ey 50 cꞌu. Jaꞌ yet scꞌual kꞌin Pentecostés chi yakꞌ saꞌbꞌeal ebꞌ tet Dios yu wan bꞌabꞌel sat awo. junne jix syambꞌa sbꞌa ebꞌ creyente masanil. 2Eyman jix yabꞌ yel yaw jun tzetyetal ebꞌ bꞌey satcan, jaxca junoj kaꞌeꞌ caw jow yeqꞌui. Jix noel yul jun na bꞌey yaman ecꞌ ebꞌ tuꞌ yu jun jaxca kaꞌeꞌ tuꞌ. 3Ey wan tzetyetal jix yil ebꞌ jaxca xaj kꞌakꞌ jix pujtoj xol ebꞌ masanil. Catuꞌ jix eyqꞌuey yibꞌan junjun ebꞌ. 4Jix jul Santo Espíritu tuꞌ yin ebꞌ, jix kꞌanabꞌ ebꞌ yin wan txꞌoj tiꞌeal, jatacꞌalaꞌ tzet jix akꞌle yal ebꞌ yu Santo Espíritu tuꞌ.
5Jaꞌ yet jun tiempoal tuꞌ, ey ebꞌ Israel eyecꞌ bꞌey Jerusalén tuꞌ, txꞌoj txꞌoj cꞌal lugaril bꞌey jix tit ebꞌ yul yibꞌankꞌinal tiꞌ. Jaꞌton tet Dios chi yiꞌey sbꞌa ebꞌ. 6Yet jix abꞌle tzet jix yun tuꞌ, ecꞌal ánima jix yamcha oc bꞌey jun na tuꞌ. Caw jix qꞌueya scꞌul ebꞌ, yutol jix yabꞌle a ebꞌ tzet chi yal yin stiꞌ. Jaꞌ ebꞌ creyente tuꞌ, jix kꞌanabꞌ a ebꞌ yin stiꞌ junjun conobꞌal. 7Caw jix qꞌueya scꞌul ebꞌ. Jix oc tꞌanan ebꞌ, catuꞌ jix yalon ebꞌ jaxca tiꞌ:
—Jaꞌ ebꞌ chi kꞌanabꞌ tiꞌ, a Galilea ebꞌ masanil. 8¿Tzet yuxan chi kabꞌ pax tzet chi yal ebꞌ? Tol txꞌoj txꞌoj yel pax cu tiꞌ junjun jon. 9Jaꞌ cu xol tiꞌ, ey ebꞌ a Partia eyecꞌoj. Ey ebꞌ a Media, ey ebꞌ a Elam, ey ebꞌ a Mesopotamia, ey ebꞌ a Judea, ey ebꞌ a Capadocia, ey ebꞌ a Ponto, cꞌal ebꞌ a Asia, 10ey ebꞌ a Frigia, cꞌal ebꞌ a Panfilia, cꞌal ebꞌ a Egipto. Ey pax ebꞌ a yul-laj yet Libia, bꞌey scawilal Cirene. Ey pax wan ebꞌ a Roma titiꞌ. Ey ebꞌ ket Israelal, catuꞌ ey pax ebꞌ man Israeloj, ocnaj xa pax ebꞌ yin cu cuybꞌanil. 11Ey mac xin, a Creta, yetoj ebꞌ a Arabia. Cu masanil cꞌal chi kabꞌ yalon wan ánima tiꞌ cu tiꞌ yin junjun conobꞌal. Chi yaltej ebꞌ masanil tzet jix el yunen Dios yetoj yipal, ẍi ebꞌ.
12Tucꞌal jix qꞌueya scꞌul masanil ebꞌ. Jix somcha el scꞌul ebꞌ, jix yalon ebꞌ jaxca tiꞌ:
—¿Tzet la ye wan tiꞌ? ẍi ebꞌ.
13Ey pax wanxa ebꞌ xin, tol chi bꞌuchwa ebꞌ, catuꞌ jix yalon ebꞌ jaxca tiꞌ:
—Jaꞌ wan ebꞌ tiꞌ, uqꞌuem an ebꞌ, ẍi ebꞌ.
Jix Yalel Skꞌane Dios Naj Pedro
14Yuxan, jix a linan naj Pedro yetoj ebꞌ juslucꞌwan yet chejabꞌwomal. Jix kꞌanabꞌ snan xol ebꞌ conobꞌ yin ip jaxca tiꞌ:
—Jaex ket Israel, cꞌal jantaj jex ey jex ecꞌ bꞌey conobꞌ Jerusalén tiꞌ, tol chi wakꞌ je yotajne el tzet yeoc jun tiꞌ. Chi cam wal je yabꞌeni tzet oj wal ey jex an. 15¿Tumi che naꞌ tol uqꞌuem jon an jon? Cꞌamaj. Ilaꞌ, tol to chi aol cꞌu. 16Jaꞌ naj Joel, jun ẍejabꞌ Dios yet peyxa, yin eyojto jix yalon can skꞌaneal jun tzet chi kun tiꞌ yul An Juun Tzꞌibꞌebꞌilcanoj, yet chi yal jaxca tiꞌ:
17Jix yalon Dios jaxca tiꞌ: Jaꞌ yet oj jul slawubꞌal tiempoal, oj waoc Wespíritu yin masanil ánima.
Catuꞌ oj yalon el ebꞌ cꞌaale cꞌal ebꞌ cutzꞌine jin kꞌane. Catuꞌ oj jin txꞌox wan tzetyetal tet ebꞌ achꞌe, jaxca tol oj sweyichne ebꞌ.
Catuꞌ oj jin kꞌanabꞌ yin weyicheal tet ebꞌ icham winaj.
18Jaꞌ yet jun tiempoal tuꞌ, oj waoc Wespíritu yin masanil ebꞌ chin akꞌon servil, yin ebꞌ winaj, cꞌal yin ebꞌ ix.
Catuꞌ oj yalon el jin kꞌane ebꞌ.
19Oj jin txꞌox wan tzetyetal bꞌey satcan, oj qꞌueya scꞌul ánima yiloni.
Yetoj pax bꞌey yul yibꞌankꞌinal tiꞌ, oj jin txꞌox pax wanxa tzet chi txꞌoxon el wipal an.
Jaꞌ wan tuꞌ, chicꞌ yetoj kꞌakꞌ, cꞌal jun miman mucꞌ jaxca asun.
20Oj oc kꞌejkꞌinal yin sat cꞌu.
Jaxa xꞌaaw, cajin xacꞌal oj yun el jaxca chicꞌ.
Tol oj yun wan tiꞌ xin, yet cꞌamto chi jul scꞌual jin julbꞌal, jain je Yaawil jin tiꞌ an.
Jaꞌ yet jun cꞌual tuꞌ caw miman yeloc apnoj, oj qꞌueya scꞌul ánima yet tuꞌ.
21Jal ebꞌ chi awten jin bꞌi, jain je Yaawil jin tiꞌ an, oj colcha el ebꞌ masanil wu an, ẍi Dios yul An Juun tuꞌ.#Joel 2:28-32.
22Jex wet Israelal, awej oc je txiquin yin wanxa oj wal ey jex tiꞌ an. Jix xꞌoxon el yopiso Jesucristo ey jex yu Dios, yet jix el yunen wan milagro,* wan tzetyetal cꞌam bꞌey chi kilaꞌ, yetoj wanxa tzet chi txꞌoxon el yipal. Jaꞌton wan tiꞌ, jix el yunen Dios yetoj Jesucristo. Je yotaj xacꞌal ton wan tiꞌ. 23Jal pax Jesús tuꞌ xin, jix ale oc yul je kꞌabꞌ, yutol jaxca tuꞌ jix el yin scꞌul Dios. Yotaj xa Dios yet tax peyxa, tzet oj jul yibꞌan Jesús tuꞌ. Jaex tiꞌ, jix je maane skꞌabꞌ ebꞌ penawom, yet jix je yakꞌon michꞌchaoj, catuꞌ jix je locbꞌan a yin culus. Queytuꞌ jix je yute je yakꞌon camoj. 24Jix akꞌle pax pitzcꞌu a yu Dios. Jix yakꞌ ganar Jesús tuꞌ spitzcꞌu aoj yutol cꞌam yalon yet camich tuꞌ yin. 25Yutol jaꞌ naj David, yalnaj can skꞌaneal Jesús, tol oj pitzcꞌu cꞌaltaꞌ aoj. Chi yal can jaxca tiꞌ:
Tobꞌalkꞌinal wotaj an, tol eyoc naj Waawil wetoj an.
Ey cꞌal ecꞌ Naj jin cꞌatan an, yet watxꞌ cꞌam chi somcha el jin naꞌbꞌal an.
26Yuxan, caw chi tzala jin cꞌul an. Chin kꞌanabꞌ yin tzalacꞌulal an.
Caxcꞌal oj cam jin mimanil tiꞌ an, oj jaach wa cꞌal oc yipoj jin cꞌul an.
27Yutol ma ja bꞌejcan jin pixan xol ebꞌ camnaj.
Man oj ja chaꞌ kꞌaꞌtoj jin mimanil an, jain sicꞌbꞌil jin el ja wu, jaach tiꞌ an.
28Jix ja wakꞌ wotajne el bꞌeybꞌale chi cu iꞌontoj bꞌey kꞌinale tol ey cꞌal yin tobꞌalkꞌinal.
Caw chin ja wakꞌ tzalabꞌoj yutol chin ecꞌ ja wetoj an, ẍi naj David yul An Juun Tzꞌibꞌebꞌilcan tuꞌ.#Salmos 16:8-11.
29Jex wet conobꞌ, caw miman txequel, tzet elnaj apnoj yu kichmam David tuꞌ. Kotaj tol camnaj, catuꞌ mujinaj pax oj. Jaꞌ smujbꞌanil bꞌey mujan tuꞌ txequel tocꞌal ye tinaniꞌ. 30Jal naj David tuꞌ, akꞌbꞌil yopiso yalon yin eyojto tzettaj yetal oj juloj. Yotaj, tol caw yel, tol yakꞌnaj can stiꞌ Dios tet, tzet utbꞌil tol jaꞌ Cristo tꞌinan oj elcan yicꞌaal oj, catuꞌ chi oc can reyal, sqꞌuexeloj David tuꞌ.#Salmos 132:11. 31Yin eyojto jix yotajnen el David tuꞌ, tzet oj eloc apnoj Cristo. Yuxan, yalnaj canoj tol tꞌinan oj pitzcꞌu a Cristo tuꞌ. Yalnaj pax canoj tzet utbꞌil tol man oj bꞌejlecan spixan yu Dios xol ebꞌ camnaj. Catuꞌ man oj chaꞌle kꞌaꞌtoj smimanil pax oj.#Salmos 16:10. 32Jaꞌ Jesús tuꞌ, jaꞌ Dios jix pitzcꞌunen aoj. Cu masanil, chi kakꞌ cu bꞌa testigoal yin jun tiꞌ, yutol jix kilaꞌ. 33Yetoj pax oj, jix iꞌle paxa bꞌey satcan yu yipal Dios. Jix yakꞌ Santo Espíritu cu Mam Dios ey jon, jaxca taꞌ jix yun yakꞌon can stiꞌ. Jaꞌ Jesús jix aontej jun che yil tiꞌ, cꞌal jun che yabꞌ tiꞌ. 34Jaꞌ naj David, ma toj naj satcan yetoj smimanil yuxan jix yal jaxca tiꞌ:
Jix yal Dios Kaawil tet naj Waawil jaxca tiꞌ:
“Eyan chotan bꞌey jin watxꞌ kꞌabꞌ an,#2:34 Jaꞌ mac chi ey chotan bꞌey swatxꞌ kꞌabꞌ junoj mactxequel chi xꞌox eloj tol miman yeloc apnoj yul sat.
35masantaꞌcꞌal oj can ebꞌ chi jowi oc ja win sbꞌatxlubꞌoj ja wajan,” ẍi Dios, ẍi naj David tuꞌ.#Salmos 110:1.
36Jaꞌ Jesús tiꞌ, jix je yakꞌ locbꞌale a yin culus. Caw chi woche che yotajne el sicꞌlebꞌil je masanil jex wet Israelal, tol jix oc Kaawil oj yu Dios, jaꞌ jix akꞌle yopiso yin Cristoal,* ẍi Pedro tuꞌ.
37Jaꞌ yet jix yabꞌen ebꞌ Israel jun tiꞌ, caw jix oc pitzꞌan syaꞌil yin scꞌul ebꞌ, jix yalon ebꞌ tet Pedro yetoj tet wanxa ebꞌ ẍejabꞌ Jesucristo jaxca tiꞌ:
—Jex ket conobꞌ, ¿tzet watxꞌ chi kun tinaniꞌ? ẍi ebꞌ tet ebꞌ.
38Yuxan jix yal naj Pedro tet ebꞌ jaxca tiꞌ:
—Naꞌwej je bꞌa, catuꞌ che yakꞌon bautizar je bꞌa junjun jex yin sbꞌi Jesucristo, yet watxꞌ chi iꞌle can el je penail. Catuꞌ oj yaon can oc Santo Espíritu je yin junjun jex. 39Yutol queytuꞌ jix yute yakꞌon can stiꞌ ey jex cꞌal ey jon, cꞌal tet ebꞌ je yuninal, yetoj masanil tet jantaj ebꞌ ey naatlaj. Yutol jaꞌ Naj Kaawil, cu Diosal, chi yakꞌ Yespíritu tet masanil mac chi yawte oc Naj yetoj, ẍi naj Pedro tuꞌ.
40Ecꞌal tocꞌal tzetyetal jix yal tet ebꞌ, catuꞌ jix yakꞌon snaꞌ sbꞌa scꞌul ebꞌ.
—Colwej je bꞌa tet jun syaꞌilal oj jul yibꞌan ebꞌ penawom tiꞌ, ẍi naj Pedro tuꞌ.
41Yuxan, ey ebꞌ jix yaoc yin scꞌul tzet jix yal naj Pedro tuꞌ. Yuxan jix yakꞌ bautizar sbꞌa ebꞌ. Jaꞌ ebꞌ jix oc creyenteal yet jun cꞌual tuꞌ, ey mi junoj 3,000 ebꞌ. 42Caw jix yaoc scꞌul ebꞌ yin wan cuybꞌanile jix yal ebꞌ ẍejabꞌ Jesús. Junxane jix yute snaꞌbꞌal ebꞌ masanil. Chi syambꞌa cꞌal sbꞌa ebꞌ. Chi sloꞌon ixim pan ebꞌ, ixim snaꞌbꞌaniltej Naj Kaawil, catuꞌ chi txali cꞌal ebꞌ.
Sbꞌeybꞌal Ebꞌ Bꞌabꞌel Creyente
43Jaꞌ ebꞌ ẍejabꞌ Jesús, ecꞌal milagro* jix el xꞌoxon ebꞌ, yu xꞌoxon el yipal Dios ebꞌ. Yuxan jix xiwa masanil ebꞌ ánima. 44Masanil ebꞌ jix yaoc scꞌul yin Cristo,* junxane jix yun can ebꞌ. Junxane pax jix yute stzettaj yetal ebꞌ. 45Ey ebꞌ chi xonel xꞌotxꞌ, cꞌal wanojxa tzetyetal ey tet ebꞌ. Catuꞌ chi spoꞌon ecꞌ stool tuꞌ ebꞌ xol-laj ebꞌ, jatacꞌalaꞌ tzet sowalil bꞌey junjun ebꞌ. 46Junjun cꞌal cꞌu chi syambꞌa sbꞌa ebꞌ yul stemplo Dios. Chi syambꞌa pax sbꞌa ebꞌ bꞌey yul-laj na, catuꞌ chi spoꞌon ecꞌ pan ebꞌ xol-laj. Junxane chi yun slow ebꞌ yin tzalacꞌulal. Caw eyoc watxꞌcꞌulal yin ebꞌ. 47Catuꞌ chi yalon watxꞌ kꞌane ebꞌ tet Dios. Caw chi tzala masanil ánima yetoj ebꞌ. Jaxca cꞌal tiꞌ, jix yun yakꞌle chꞌibꞌ sbꞌisil ebꞌ yu Naj Kaawil junjun cꞌu yu ebꞌ tꞌinan xa taꞌ chi colchai.
Currently Selected:
Hechos 2: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.