1a Corintios 2
2
Asan Skꞌaneal Naj Cristo Jix Ecꞌ Yalel Naj Pablo
1Yuxan, jex wuẍtaj, jex wanabꞌ, jaꞌ yet jix jin ecꞌ walon el skꞌane Dios je nan je xol tuꞌ, man jelan oj jix wute jin bꞌa ey jex. Manaj wan mimej kꞌane chi yakꞌbꞌalne ebꞌ jelan jix ecꞌ wal ey jex. 2Jaꞌ yet jix jin ecꞌ ey jex tuꞌ, jix woche an, tol jaxca junoj mactxequel asan jun tiꞌ yotaj, jaxca tuꞌ jix woche, tol asan skꞌaneal Jesucristo jix ecꞌ walel ey jex, tzet utbꞌil tol jix cam yin culus. 3Jaꞌ yet jix jin ecꞌ ey jex tuꞌ, cꞌam weloc apnoj niꞌoj yul sat junoj ánima, tol chin bꞌilwi yu xiwcꞌulal. 4Jaꞌ yet jix jin cuywa je xol tuꞌ manaj yetoj mimej kꞌane cꞌal jelanil jix jex jin cuyuꞌ. Jaꞌ Naj Yespíritu Dios jix jex cuyon yetoj yipal. 5Jix wun jaxca tuꞌ, yet watxꞌ man yu oj sjelanil ánima, yuxan che yaoc je cꞌul yin Dios tinaniꞌ, tol asan yu yipal Dios.
Jaꞌ Naj Santo Espíritu Chi Akꞌon Kotajne Eloj Tzet Utbꞌil Yeoc Dios
6Jaꞌ tet ebꞌ creyente tecꞌan xa yei, ey jun jelanil chi kal xol ebꞌ. Jal pax jun jelanil chi kal tiꞌ, man sjelanil oj yul yibꞌankꞌinal tiꞌ. Man pax sjelanil oj ebꞌ yaaw, yutol jaꞌ ebꞌ yaaw tuꞌ tuxa oj qꞌueyel ebꞌ. 7Jal pax jun jelanil chi kal tiꞌ, jaꞌton sjelanil Dios. Jaꞌ jun jelanil tiꞌ, cꞌam chi naꞌcha el tzet utbꞌil yeoc yu ebꞌ comon ánima, yutol cꞌubꞌabꞌil el tet ebꞌ. Jaꞌ Dios naꞌnen can jaxca tuꞌ, yet cꞌamto chi waꞌxi yul yibꞌankꞌinal tiꞌ, yet watxꞌ, oj apnoj cu tzejejial jaxca stzejejial tuꞌ. 8Cꞌam junoj ebꞌ yaaw yul yibꞌankꞌinal tiꞌ jix otajnen el jun tiꞌ. Yutol kꞌinaloj ta jix yotajne el ebꞌ, ma mi culusnele Naj Kaawil yel xacꞌal miman yeloc apnoj. 9Jaxca chi yal pax yul An Juun Tzꞌibꞌebꞌilcan tuꞌ bꞌey chi yal jaxca tiꞌ:
Ey jun tzetyetal jix waꞌxi yu Dios, yu yakꞌon tet ebꞌ ey scamcꞌulal yin.
Cꞌam junoj mactxequel chi ilon yin jun tzetyetal tuꞌ, cꞌamto mac chi abꞌen pax oj.
Cꞌamto pax junoj mac chi naꞌbꞌalnen el jun tuꞌ, ẍi yul An Juun tuꞌ.#Isaías 64:4.
10Yuxan jix akꞌbꞌalnele Naj Espíritu yu Dios yin yakꞌon kotajne el jun tuꞌ. Yutol jaꞌ Naj Espíritu tuꞌ, chi sey yil masanil tzettaj yetal Naj. Masantaꞌ masanil wan stzetyetal yet Dios cꞌam chi naꞌcha el yu ebꞌ ánima, yotaj pax Naj Espíritu tuꞌ. 11Cꞌam junoj mactxequel yotaj tzet yeoc spixan junojxa mactxequel, yutol asan junjun ánima yotaj tzet yeoc spixan. Queyton tuꞌ Dios, asan Naj Yespíritu otajnen snaꞌbꞌal. 12Jal jon jaon tiꞌ, jaꞌ Naj Espíritu titnaj bꞌey Dios, jaꞌ chabꞌil ku. Manaj jun snaꞌbꞌal yul yibꞌankꞌinal tiꞌ chabꞌil ku. Yuxan, jaꞌ wan tzetyetal chi yakꞌ Dios ey jon yu swatxꞌcꞌulal, chi naꞌcha el ku. 13Jaꞌ wan kꞌane chi kal tiꞌ, man yu oj cu jelanil, yuxan chi naꞌcha el ku. Tol jaꞌ pax Naj Espíritu chi akꞌon naꞌcha el ku. Jaꞌ wan cuybꞌanile tiꞌ, yet Naj Espíritu, yuxan, jaꞌ ebꞌ bꞌey eyoc Naj Espíritu tuꞌ, jaꞌton tet ebꞌ tuꞌ chi skeꞌ cu cuywai. 14Jaꞌ ebꞌ cꞌam oc Yespíritu Dios yin, cꞌam chi yaoc scꞌul ebꞌ yin scuybꞌanil Naj Espíritu, yutol cꞌam yeloc apnoj yul sat ebꞌ. Cꞌam chi skeꞌ comon cꞌal chi naꞌcha el wan cuybꞌanile tuꞌ yu ebꞌ, yutol asan Naj Yespíritu Dios chi akꞌon naꞌcha eloj. 15Jal pax mac eyoc Naj Yespíritu Dios yin, chi naꞌcha el sicꞌon el masanil tzetyetal, ta watxꞌ yul sat Dios ma cꞌamaj. Cꞌam pax mac chi skeꞌ snaꞌon oc yin ebꞌ sattaj Dios. 16Jaxca chi yal yul An Juun Tzꞌibꞌebꞌilcanoj: “¿Mactxequel junoj chi skeꞌ yotajnen eloj tzet chi snaꞌ Naj Kaawil? ¿Mactxequel junoj chi skeꞌ yakꞌon snaꞌbꞌal Naj?” ẍi yul An Juun tuꞌ.#Isaías 40:13. Jal jon jaon tiꞌ, jaꞌ Naj Santo Espíritu chi akꞌon cu naꞌbꞌalnen el snaꞌbꞌal Cristo.
Currently Selected:
1a Corintios 2: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.