Nahun 1
1
1Waliyiya falan ni ito ra Niniwa taan xili ma, Nabi Nahun Elekosi kaan fe toon naxan ti alo xiyena, a yi a sɛbɛ.
2Alatala a yamaan namarama xɔxɔlɔnna nin.#1.2 Ala xɔxɔlɔn, bayo e nun a yamaan bata yi layirin xidi alo futun xidima kii naxan yi. Na kui, Ala a yamaan masuxuma alo xɛmɛna a ɲaxanla makantanma kii naxan yi. A mi tinma a xa bira se gbɛtɛ fɔxɔ ra a batu xinla ma, a mɔn mi tinma yama xɔɲɛn xa a raxɔri. Na feen mato Xɔrɔyaan 20.5 kui.
A gbeen ɲɔxɔma nɛn.
Alatalaa xɔlɔn gbo,
a gbeen ɲɔxɔma nɛn.
A yɛngɛfane saranna fima nɛn,
a fitinaxin yi a gbeen ɲɔxɔ a yaxune ma.
3Alatala mi xɔlɔn xulɛn,
a sɛnbɛn gbo!
Alatala mi yulubi kanna yatɛma tinxinden na mumɛ!
Alatala dangu funfun findixi
wuluwulu gbeen nun foye kala tiin nan na.
Kundaan yi findi gbangbanna ra a sanna bun.
4A na falan ti fɔxɔ igen xili ma,
a xara, baane birin yi xɔri.
Basan nun Karemele yamanane sɛxɛne yi gbeeli,
Liban yamanan wudi fugene yi lisi a ra.
5A geyane birin yimaxama nɛn a yɛɛ ra,
yire matexine birin yi xuya ayi.
Bɔxɔn yi xuruxurun a yɛtagi,
e nun dunuɲa nun a yi seene birin.
6Nde nɔɛ tiyɛ a xɔlɔn yɛɛ ra nayi?
Nde kisɛ a xɔlɔn gbalon ma?
A fitinan sigama ayi alo tɛɛna
hali gɛmɛne a e birin ganma.
7Alatala fan.
Luxunden nan a tan na tɔrɔ waxatine yi.
A yengi muxune xɔn
naxanye na e yigiya a yi.
8Koni a yaxune dɔxɔden kalama nɛn
alo fufaan na dangu na xun ma.
A yi a yɛngɛfane kedi han laxira dimini.
9Ɛ feen mundun yitɔnma Alatala xili ma?
A tan nan halagin tima fefe!
Ɲaxankatan firinden mi ɛ lima.
10Amasɔtɔ e luma nɛn ɲali ɲansanne yi,
e xunne kelima nɛn e dɔlɔne ra,
e yi halagi alo sɛxɛ xaren na gan fefe!
11Niniwa kaane,
muxuna nde minixi ɛ tan nan yɛ
naxan fe ɲaxini tɔnma Alatala xili ma,
naxan maxadi ɲaxine tima.
12Alatala ito nan falaxi, a naxa,
“Hali e kamalixi,
e na wuya ki yo ki,
e raxɔrima nɛn, e ɲan.
Yuda kaane,
xa n bata tɔrɔn nagidi ɛ ma iki,
na ligaxi nɛn
alogo ɛ nama fa tɔrɔ sɔnɔn.
13N na ɛ xunbama nɛn konyiyani iki,
n yi yɔlɔnxɔnne yibolon,
e ba ɛ ma.”
14Niniwa kaane,
Alatala ito nan yamarixi ɛ fe yi, a naxa,
“Ɛ bɔnsɔnna muxu yo mi luyɛ.
N na ɛ wudi suxurene
nun ɛ wure suxurene kalama nɛn ɛ kidene yi.
N yi ɛ gaburune yitɔn,
bayo sese mi ɛ ra.”
Currently Selected:
Nahun 1: Kitabuna
Highlight
Share
Copy
Want to have your highlights saved across all your devices? Sign up or sign in
© 2012 Traducteurs Pionniers de la Bible
© 2012 Pioneer Bible Translators
This work is licensed under the Creative Commons Attribution ShareAlike 4.0 license