Yowɛli 4
4
Siyane makiti fena
1“Amasɔtɔ na lɔxɔne yi, na waxatini,
n na fa Yuda nun Yerusalɛn suxu muxune ra waxatin naxan yi,
2n siyane birin malanma nɛn,
n yi fa e ra Yosafati lanbanni,#4.2 Yosafati bunna nɛɛn fa fala “Alatala nan kitin sama.”
n na e makitima dɛnaxan yi,
lan n ma yamana fe ma, Isirayila.
Amasɔtɔ, e e raxuyaxi ayi nɛn siyane yɛ,
e yi e bɔxɔni taxun e tagi.
3E n ma yamanan muxune yitaxun nɛn e ra,
masɛnsɛnna xɔn,
e yi dii xɛmɛne mati konyine ra
alogo e xa yalundene sara,
e yi dii tɛmɛne mati
alogo e xa manpaan sara,
e yi a min.”
4“Ɛ tan Tire kaane nun Sidɔn kaane
nun Filisitine birin, nanse xɔli ɛ ma n xili ma?
Ɛ gbeen ɲɔxɔn nanse ra n ma?
Koni xa ɛ waxi yɛngɛn nakeli feni n xili ma,
nayi n na ɛ yɛngɛne raxɛtɛma ɛ ma nɛn mafurɛn!
5Ɛ tan naxanye n ma gbetin
nun n ma xɛmaan tongoxi, n ma nafulu faɲine,
ɛ yi e sa ɛ suxurene batudeni.
6Ɛ Yuda nun Yerusalɛn muxune mati nɛn
Girɛki muxune ma, ɛ yi e masiga e bɔxɔn na.”
7“N tan nan sa e bama na yirene yi
ɛ e matixi dɛnaxanye yi.
N yi tɔrɔn naxɛtɛ ɛ ma ɛ naxan ɲɔxɔn saxi e fari.
8N na ɛ dii xɛmɛne nun ɛ dii tɛmɛne matima nɛn
Yuda kaane ma.
E fan yi e mati Sabe kaane ma, siya makuyena.”
Alatala nan falan tixi!
Yɛngɛn nun kitina
9Ɛ ito fala siyane xa, ɛ naxa,
“Ɛ yitɔn yɛngɛn xili yi, ɛ yɛngɛ sone rakeli.
Sofane birin xa keli, e yɛngɛn so.
10Ɛ ɛ ɲinge kenne bɔnbɔ silanfanne ra,#4.10 Silanfanna: Sofane yɛngɛso dɛgɛmana.
ɛ wɔlitɛne rafala tanbane ra.
Sɛnbɛtarene xa a fala, e naxa, ‘Nxu sɛnbɛn gbo.’
11Ɛ mafura, ɛ fa,
ɛ tan siyaan naxanye birin be rabilinni,
ɛ fa ɛ malan be.”
Alatala, i ya malekane ragodo e xili ma.
12Siyane xa keli, e xa godo Yosafati lanbanni.
Amasɔtɔ n dɔxɔma mɛnna nin,
n na Isirayila rabilinna siyane birin makiti.
13Ɛ wɔlitɛn tongo ɛ bogi seene xaba
bayo e bata mɔ.
Ɛ fa manpa bogine yibodon, ɛ e igen ba
bayo manpa ige baden bata rafe,
han a fɛɲɛne yi bɔxɔnɲɛ a ma.
E ɲaxuyaan fan gboxi ayi na kii nin.
14Yama gbeen bata lu kiti saden lanbanni!
Amasɔtɔ Alatalaa lɔxɔn bata maso e ra
kiti saden lanbanni.
15Sogen nun kikeni dimima nɛn,
sarene mi fa dɛgɛma.
16Alatala sɔnxɔma nɛn keli Siyon yi,
a a xui ramini sɛnbɛni, keli Yerusalɛn yi.
Nayi, bɔxɔn nun koren xuruxurunma nɛn,
koni Alatala findixi luxunden nan na a yamaan xa,
e nun yigiyade makantanxina Isirayila kaane xa.
Ala baraka feen naxanye ragidima a yamaan ma
17“Ɛ a kolonma nɛn nayi, a n tan nan Alatala ra,
ɛ Ala, naxan dɔxi Siyon yi, n ma geya sariɲanxina.
Yerusalɛn sariɲanma nɛn,
xɔɲɛne mi fa fuma a ma sɔnɔn!”
18“Na lɔxɔni,
manpa nɛnɛn minima nɛn geyane yi,
yire matexine yi nɔnɔn namini,
igen yi lu Yuda baane birin yi.
Tigin minima nɛn Alatalaa banxini,
a yi kasiya lanbanna ige sa.
19Misiran tan findima nɛn bɔxɔ kalaxin na,
Edɔn yi findi tonbonna ra
e gbalone fe ra e naxanye ligaxi Yuda kaane ra.
E bata sɔntarene faxa Yuda yamanani.
20Koni muxun luma nɛn Yuda nun Yerusalɛn yi habadan,
mayixɛtɛ nun mayixɛtɛ.
21N munma n ma yamaan yulubin naxanye xafari e faxa tixine ma,
n ne mafeluma nɛn.
N tan Alatala, n lu Siyon taani.”
Currently Selected:
Yowɛli 4: Kitabuna
Highlight
Copy
Compare
Share
Want to have your highlights saved across all your devices? Sign up or sign in
© 2012 Traducteurs Pionniers de la Bible
© 2012 Pioneer Bible Translators
This work is licensed under the Creative Commons Attribution ShareAlike 4.0 license