Hose 9
9
Isirayila yulubine saranna
1Isirayila, i nama sɛwa,
i nama ɲaxan alo siyaan bonne.
Bayo, i to suxure xɔɲɛn batu,
i findi yalunden nan na.
Yalunden kɔntɔnna bata ɲaxun i dɛ
murutu bɔnbɔdene birin yi!
2Koni ne murutu bɔnbɔdene
nun manpa ige badene mi fa yamaan baloma mumɛ!
Minseen dasama e ma nɛn.
3Amasɔtɔ, e mi luxi Alatalaa yamanani,
Efirami bɔnsɔnna xɛtɛma nɛn Misiran yi,
e yi donse haramuxine don Asiriya yi.
4E mi fa minse saraxane rabɔxɔnma Alatala xa.
E saraxane mi a kɛnɛnɲɛ.
E saraxan haramuxi
alo ɲanden buruna.
Naxanye na a don
e e yɛtɛ raharamu.
Bayo e buruna e tan yɛtɛɛn lugoma nɛn,
a mi soma Alatalaa banxini mumɛ!
5Ɛ nanse ligama sali lɔxɔne yi,
Alatala batu lɔxɔne yi?
6Hali e sa mini halagin bun,
Misiran bɔxɔna e suxuma nɛn,
e maluxun Nofi taani.
Tansinne sabatima e yii se faɲine nun gbetin fari,
ɲanle fan sabatima e bubune kui.
7Fe Saran lɔxɔne fama,
fe yɛba lɔxɔne bata yiso.
Isirayila bata sɔnxɔ, e naxa,
“Kɔmɔn nan nabiin na,
Alaa Niin naxan yi
na daxuya falane nan tima.”
Ɛ hakɛne nun ɛ xɔnnantenyaan bata gbo ayi de!
8Kantan muxun nan Efirami bɔnsɔnna ra n ma Ala xili ma.
Nanara, luti ratixine nabina kiraan birin xɔn,
Xɔnnantenyaan nan luxi a xa Alaa banxini.
9E bata so mayifu feene yi,
alo naxan ligaxi Gibeya yi.
Ala xaxili e hakɛne xɔn,
a e yulubine saranma e ra nɛn.
10N to Isirayila to,
a ligaxi alo ɲaxundanne tonbonni.
N to ɛ benbane to,
e ligaxi alo xɔdɛn bogi singena.
Koni e yi siga Baali-Peyori mabinni,
e yi e yɛtɛ taxu na yagi suxuren na,
e raharamu alo e naxan batuma.
11Efirami bɔnsɔnna a binyen ɲanma nɛn
alo xɔliin na tugan.
Dii bari mi na,
fudikanya mi na,
se mi toma.
12E na e diine ragbo,
n na e birin bama nɛn e yii.
Gbalon ne xa,
n na n mɛ e ra.
13N bata Efirami bɔnsɔnna sabatixin to yire faɲini
alo Tire taana.
Koni Efirami a diine soma nɛn faxa tiin yii.
14Alatala, a lan i xa nanse fi e ma?
E ɲaxanle dii kuine kala,
e xiɲɛne yi xara.
15E ɲaxuyaan birin yitaxi nɛn Giligali yi.
N na e raɲaxuxi mɛnna nin
e kɛwali ɲaxine fe ra.
N na e kedima nɛn n ma banxini.
N mi fa e rafanɲɛ mumɛ!
Muxu murutɛxine nan e kuntigine birin na.
16Efirami bɔnsɔnna luxi nɛn
alo sansiin naxan lisixi a ra,
a salenne bata xara,
a mi fa bogima sɔnɔn.
Xa e diine bari,
n na e rafan diine birin faxama nɛn.
17N ma Ala e rabeɲinma nɛn,
amasɔtɔ e mi e tuli matixi a ra.
E findima nɛn sigatine ra siyane tagi.
Currently Selected:
Hose 9: Kitabuna
Highlight
Copy
Compare
Share
Want to have your highlights saved across all your devices? Sign up or sign in
© 2012 Traducteurs Pionniers de la Bible
© 2012 Pioneer Bible Translators
This work is licensed under the Creative Commons Attribution ShareAlike 4.0 license
