Iesui Aru E Hap 1
1
Haga Wẽtup 1
Tupana Napin Hap Yne Tupana Motypot Yat Koꞌi Pe
1Uito Eiꞌakag Iesui e. Uiꞌywot Tupana tikyꞌesat kahato atimoherep ehepe yne aikotã yt pya hin i raꞌyn hap e. Miꞌi koꞌi toikyꞌesat uheropat haria ikuap e. Atipoꞌoro uhehay atipy piat uhehay moherep hat wẽ pyi e. Ahenoi yne uheropat hat uipotmuꞌe uimikyꞌe kahato Iuwãu me. 2Etimoherep to mesuwat uhehay yne yne uheropat haria pe areꞌe. Mesuwat sehay yne Tupana e hap uhetiat e. Mesuwat uhehay wakuat yne areꞌe yne eimikuap oktan ehewaure kaꞌa mikuap oktan uiꞌe hap. Iꞌewyte aikotã emuꞌetu eraꞌakasa uimimoherep epiat hap ewy topyhuꞌat areꞌe epe uiwy Iuwãu e. 3Uimohey haria waku ehewaure kaꞌa ewetum kahato mesuwat uhehay wakuat kape e. Waku eweimowẽpapꞌi mowẽpapꞌi kahato mesuwat miwan ehepiat ikuap hawywiat ehepiat inug hamuat hap kape aikotã aikotã Tupana tunug hap ahenoi ehepe eꞌyian mete e. Yt pya hin i Mesuwat uhehay Tupana tipytꞌatnug hamuat eꞌat. Eweimowẽpap mesuwat uhehay pote aru toineꞌen eipoityro kahato hap eimowepiit hap e Iesui ahepe.
4Miꞌi pote uito Iuwãu atiwan naꞌyn Iesui ehay tomikuap oktan hawyi atipoꞌoro Iesui mohey haria pe 7 tawa yi Asia piaria pe. Aikotã Iesui mimoherep ewy mekewat temiit tomipoꞌoro atipy kaipywiat wẽ pywiat ewy atipoꞌoro ehewowi uito Iuwãu. Maꞌato saꞌawyꞌi uimiwan me wepoityro hap tohẽtup Tupana kaipyi 7 tawa piat Tupana motypot yat piaria wat hamo. Mio tã areꞌe epe Tupana -Uito ti emiit Iuwãu maꞌato En ni mekewat wuatꞌi eꞌat piat ieineꞌen hat are. En ni torannia mesuwiat ieineꞌen hat eꞌyian miat ieineꞌen hat are. En ni mesuwat rẽ ieineꞌen hat are. En ni wuatꞌi eꞌat sakpo ieineꞌen hat are. Tupana ahẽtup kahato ewowi ereineꞌen hegyiꞌat kahato Esaꞌyru mohey haria pe hap are. Etum o woꞌokyꞌe hap iꞌatuepe. Etimoꞌẽ Epaꞌãu 7 tawa piaria Esaꞌyru mohey haria kape are ewowi Tupana. 5Tupana Esaꞌyru sese Iesui kaipyi ahẽtup etipoityro emohey haria. Etum no iꞌatuepe i woꞌowese hap are epe. Wuatꞌi Porekuat no En poꞌog poꞌog iraniaꞌin kai are. En ni wuatꞌi eꞌyian mete wuat guꞌuro pywiat ieineꞌen i hat. En ni pywo yn e hat. Iesui En ni urukyꞌe hat sese katupono Esuu wo urupiit pit hap etikoho yne torannia uruminug saꞌag are. Ekuꞌuro hap urukawiatno hap. 6Waku yne hawyi urunug naꞌyn morekuaria wo mesuwat yi tote Eꞌywot eropat hamuat are. En ni urunug miitꞌin epaꞌi wo Eꞌywot mikyꞌesat ewy. Urunug naꞌyn emiit miitꞌin ekyi ewewowiat emotypot haria wo hamo. Wuatꞌi eꞌat piat esaika hap moherep hanuaria urunug naꞌyn are. Etum no Emohey haria pe egyiꞌat hap kaipyi iꞌatumowepiit hap wuatꞌi eꞌat pe aru yt kat saꞌup i hap ahẽtup areꞌe epe Tupana. Pyno waku raꞌyn uhehay. Uito Iuwãu.
7Uiwyriaꞌin Iesui mohey haria meiẽ ewehehaꞌat ro Aikaꞌiwat Iesui tuut raꞌyn teiam ywyhig me. Taꞌi yne yne teꞌeraꞌakasa. Iꞌewyte ipiit suk haria iꞌauka haria teꞌeraꞌakasa kahato howawi. Ewehehaꞌat ro teꞌeruwak kahato wuatꞌi ywania yt imohey i haria teꞌerokenꞌẽ haype kak iꞌatuꞌe. Maꞌato aito imohey haria wahekatup kahato. Waku eriot Mehin waku eriot Mimi watoꞌe. Iꞌewyte aitoria 7 tawa piat Tupana motypot yat piaria pe yi Asia totiaria pe Iesui tuwemoherep wy. 8-Taꞌi uito ti rat Iesui e ahepe tuut hawyi. Ahaꞌawynug yne uito hawyi areineꞌen ni hat uito. Uhepiat inug yne hap eꞌyian me areineꞌen ni e. Uimisaꞌawynug saꞌawynug atimoputꞌok yne. Maꞌato wuatꞌi mesuwarotiat eꞌyian me areineꞌen ne wuatꞌi eꞌat pe e. Uito ti rat Eikaꞌiwat Wuatꞌi Esaika Hap Eiam uito e Iesui ahepe.
9Pyno uito Iesui potpoꞌoro 12 ok takat Iuwãu areineꞌen eheykeꞌet ewy katupono wahoꞌopot aiwoꞌoꞌewy ewy Iesui mohey haria aito pote are. Wẽtup sok yn aito. Iesui yn Aiporekuat aiꞌe pote aiꞌatusatyꞌi satyꞌi kahato iraniaꞌin. Miꞌi pote wẽtup miit yn ewy wahekatup Aikaꞌiwat putꞌok e wuatꞌi Porekuat nuat hap eꞌat. Iesui yn Aipotypot areꞌe hap etiat no uipyhyp mesuwe yi a yꞌy wato pyꞌasetpiat uiꞌapiheg hamo. Woꞌopyhyp hat ewy uinug katupono ahenoi uhehay wo Iesui ti Aiporekuat nuat areꞌe pote. Miꞌi pote uhehay monik hap kyewi uiꞌatoiat mesuwat yi a Patumu e hap tote. 10Miꞌi yi a tote Aikaꞌiwat watnuat eꞌat Mytuꞌu eꞌat pe turan Tupana Paꞌãu topyhuꞌat kahato uhete. Putꞌok e hawyi uipytꞌatnug kahato hawyi uimuꞌetu kahato. Miꞌi hawyi uiꞌok pe kai putꞌok e raꞌyn sehay aikotã hu huꞌe hap ewy atikuap kahato. Ihay pirik kahato atikuap heremo kahato rakat. Hu huꞌe hap ewy maꞌato ihay ewy atikuap. 11-Uito ti yne saꞌawynug hat maꞌato uhepiat inug hap yian mete areineꞌen wuatꞌi eꞌat pe e. Uiminug koꞌi yne ikahuro hap sakpo areineꞌen ne wuatꞌi eꞌat pe e uhepe. Miꞌi hawyi toꞌe i uhepe -Iuwãu e atomoherep aru epe emiꞌakasa koꞌi emuꞌetu wuat ewywuat koꞌi e. Etiwan o uimimoherep emuꞌetu hap koꞌi e. Miꞌi hawyi emiwan o etipoꞌoro uimohey haria pe 7 Tupana motypot yat kape yi Asia tote. Tawa Ewesu piaria weꞌatunug haria kape. Iꞌewyte Tupana motypot yat tawa Simina piaria waꞌatunug haria kape etipoꞌoro uiꞌe hap emiwan. Iꞌewyte Tupana motypot yat tawa Pekamu piaria weꞌatunug haria kape etipoꞌoro emiwan. Iꞌewyte Tupana motypot yat tawa Satu piaria kape etipoꞌoro. Iꞌewyte Tupana motypot yat tawa Tiatira kape etipoꞌoro wy. Iꞌewyte Tupana motypot yat tawa Wiratewia piaria kape etipoꞌoro hawyi Tupana motypot yat Irautiseia piaria kape etipoꞌoro emiwan ipe pewiu tote e Iesui uhepe.
12Mio tã toꞌe hawyi aremorem mekewat ihay rakat Iesui kape araꞌakasa hamo. Aremorem turan hẽtyhot hap atipuẽti. Tuwẽtem wẽtup eiam myi ariãty. 13Miꞌi hawyi mekewat aria ẽty koꞌi pyꞌasetpe toineꞌen Aheykeꞌet toꞌewywuat sokpe iꞌywop takat puo yi kapiat hap. Ipotiꞌa ete toineꞌen iwoꞌokytyt hap ewywuat hekat rakat uru kawiat imehit rakat. 14Iꞌasap ikytsig kahato aikotã nukara kytsig hap amukiusu ap ewy ikytsig hap. Iha aria sapuẽ sapyhot hap ewy aria ẽty ewy. 15Ipy koꞌi ihup hapyhot hap ewy aikotã Asu watopag aria pe hapyke kahato rakat ihup imehit hap ewy. Miꞌi hawyi ihay topyhuꞌat yꞌy esaika hap topyhyp pote hap ewy yꞌy wato puehay ewy woo wooꞌe neꞌi sooꞌe hap. 16Miꞌi hawyi toineꞌen 7 waikiru ipo sese kai. Iwẽ pyi tuwẽtem kyseꞌyp surara wat toꞌowa piat hãihyk kahato rakat. Miꞌi kape arahaꞌat turan yne ipiit hẽtyhot yne atposake turanuat watehaꞌat aat kape hap ewy kape araꞌakasa. 17Araꞌakasa howawi hawyi araꞌat yi tote uhowa yi kape hap ewy ipoityꞌi uhetiat hawyi ipy yatype genꞌẽ pono ikuꞌuro rakat ewy areineꞌen. Miꞌi pote tuweponug uipiit ete topo sese kai haype toꞌe -Uimikyꞌe Iuwãu e yt erekenꞌẽ teiꞌo uipupi e uhepe. Pywo ti rat uito wuatꞌi eꞌyian mete wuat eꞌat piat ieineꞌen hat Uito e iꞌewyte yt kat i raꞌyn topyhuꞌat rẽ mesuwarotiat pykai aru areineꞌen ne Uito e uhepe. 18Iuwãu e erahaꞌat ro uhowowi e. Haꞌawyte areineꞌen eipyꞌasetpe. Miꞌi hawyi uikuꞌuro sese koitywy areineꞌen i raꞌyn wuatꞌi eꞌat piat hamo e. Miꞌi pote uiꞌe hap uhehay upi yn miitꞌin tuwẽtem kuap guꞌuro pyi e. Iꞌewyte uhehay upi yn miitꞌin tuwat taꞌatuꞌapiheg aria wuat eꞌat piat hamuat kape e uhepe. 19Miꞌi hawyi -Iuwãu e emiwan nug uimimoherep tepiat emiꞌakasa aikotã topyhuꞌat irane hamuat iꞌewyte mesup muat toineꞌen hap ewywuat hap etiwan no e iꞌewyte aikotã aikotã irane atunug uimimoherep epe hap ewy e uhepe. 20Muki 7 waikiru uipo sese kawiat atomoherep taꞌyn epe. Katupono atikyꞌesat etikuap yt uwe mikuap i aikotã aru kat kat koꞌi ewywuat tukupteꞌen hap e. Iꞌewyte atimoherep teran epe mekewat emoꞌakasa hap 7 ariãty wẽtup teiam mywiat hẽtyhot rakat nu uru kawiat etiat e. Miꞌi ti atimoherep teran kat som kat som miꞌi ewy hap topyhuꞌat hap mekewat ariãty eiam e. Iꞌewyte kat kawiat uipo sese kawiat 7 waikiru e hap som kat ewy hap e uhepe. Iuwãu e mekewat 7 waikiru uipo sese kawiat tukupteꞌen aikotã uimohey haria akag koꞌi yi Asia totiaria tawa piat Tupana motypot yat apykok haria miꞌi aikotã 7 waikiru ewywuat tukupteꞌen aikope teꞌeruwaꞌatunug hap tote mekewat 7 tawa yi Asia piaria akag koꞌi 7 waikiru uipupiat ewywuat koꞌi are e uhepe. Mekewat ariãty eiam 7 haga rakat miꞌi ti aikotã uimohey haria yi Asia piaria ewy e. Wẽtup haga wẽtup tawa piaria uimohey haria ewy wẽtup haga wẽtup tawa piaria ewy hap ewy teꞌeropyhuꞌat uimohey haria teꞌeruwaꞌatunug haria ti teꞌeropyhuꞌat mekewat 7 rakat ariãty ewy 7 tawa Asia piaria e uhepe ihay hu huꞌe hap ewywuat puo e Iesui uhepe. Uito Iuwãu uimiꞌakasa hap ahenoi.
Currently Selected:
Iesui Aru E Hap 1: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.