Iuwãu 15
15
Haga 15
Iesui Haga Koꞌi Etiat Tohenoi
1Miꞌi hawyi ti Iesui tiꞌatumuꞌe topotmuꞌeria -Uito ti mikoi yp ewy Uiꞌywot wyti ikoi hat ewy e. 2Miꞌi hawyi eipe mikoi yp iaga ewy eweikupteꞌen e. Haga yt haat i rakat tohywytip iꞌywytꞌokpy hawyi haga yt naku i rakat toiterek yt imosat i hat miꞌi hawyi iraniaꞌin haga koꞌi haat kahato i raꞌyn e. 3Miꞌi hap ewy kahato einapin uhepiat hap timohãpyk kuap kahato eiwanetup hap imokytsig hamuat e. Miꞌi hawyi ehehãite eweikupteꞌen eipyꞌa pe eiwanetup hawe einapin uhepiat hap hawyi e. 4Haga mitek taꞌyn merep hap ewy igag. Miꞌi hap ewy kahato eipe yt eweikupteꞌen i uiwywo pote e. Eweikupteꞌen no yt pya hin i uikai aikotã haga satꞌe kahato rakat iꞌyp ete hap ewy waku miꞌi tã uimohey eipe e. Haga yt satꞌe i uhete pote yt karãpe i haatꞌe. Miꞌi tupono waku haga koꞌi satꞌe kahato toꞌyp ete rakaria ewywuaria eweipyhuꞌat e. Yt eweikupteꞌen i uhete pote yt karãpe i haat rakatno eweikupteꞌen e. 5Uito iꞌyp ewy eipe haga koꞌi ewy. Miꞌi hawyi uhetiat satꞌe rakaria wo eweikupteꞌen pote Uito iꞌewyte ehetiat satꞌe rakatno areineꞌen. Uhetiat satꞌe haria eweikupteꞌen pote pywo haat rakaria wo eweipyhuꞌat. Maꞌato yt satꞌe uhetiat rakaria wo i pote yt kat i ewetunug yt iꞌyp esaika hap kaipyi i pote. 6Uwe uwe yt satꞌe i uhete pote aikotã haga mipun wo yn waku rakatno toineꞌen. Miꞌi hawyi meremo igag naꞌyn. Miꞌiria ti yt kan hamo i hawyi aria miꞌu wo yn tukupteꞌen. 7Eiwepytyk uhete pote uimienoi ehepiat toineꞌen motꞌi eiwywo hawyi kat kat koꞌi eimiẽtup eimikyꞌesat ewy topyhuꞌat eipo pe raꞌyn e. 8Karãpe hewo hewo haga ete pyi ywa he rakat pote Tupana motypot haria wo imowato haria wo eweikupteꞌen. Iꞌewyte iꞌyp kaipyi ywa iꞌatu rakaria he rakaria tukupteꞌen hawyi uimotypot hap eweimoherep iraniaꞌin me e. 9Aikotã aikotã Uiꞌywot eikyꞌe hap ewy ti Uito worohoꞌokyꞌe e. Yt eweipun neiꞌo uhepiat eikyꞌe hap e. 10Uito atunug yne Uiꞌywot mikyꞌesat ewy miꞌi pote uikyꞌe kahato. Miꞌi hap ewy uimikyꞌesat ewetunug mote worohoꞌokyꞌe kahato Uito wy e. 11Eiwoꞌomowepiit hap yn ni atikyꞌesat uiwyriaꞌin e. Miꞌi pote haꞌawyte pyi te worohoꞌonapin kahato e. Atikyꞌesat kahato eiwoꞌomowepiit hap sese uiat uiwepiit hap atikyꞌesat eipyꞌa pe e. Miꞌi pote worohoꞌonapin haꞌawyte pyi eimowepiit hamuat uhepiat einapin nug hamuat e.
12Uhepiat einapin sese hap ahenoi i ehepe einapin hap koro mio tã areꞌe i -Eiwoꞌokyꞌe ro aikotã Uito worohoꞌokyꞌe hap ewy areꞌe i e. 13Pyno wẽtup ok aiwy ete poityꞌi niatpo hawyi watuwat raꞌyn ipowyro hamo aiwy kyꞌe kahato pote e. Pyno wẽtup ok tuweꞌauka towy ehakyeraꞌat hamo pote toikyꞌe kahato hap toimoherep e. Katupono yt kat i poꞌog miꞌi hap kai wẽtup ok ikuꞌuro towy ehakyeraꞌat hamo hap oktan ikuꞌuro raꞌyn towy ehakyeraꞌat hamo. 14Pywo ti ewetunug uimikyꞌesat ewy pote uiwyriaꞌin sese eweipyhuꞌat uimikyꞌe kahato koꞌi wo eweipyhuꞌat e. 15Motpoꞌororia yt ikuap hin i kat koꞌi kat koꞌi taꞌatukaꞌiwat minug wuat e maꞌato eipe uiwyriaꞌin me uheropat haria eipe yt are i. Maꞌato uiwyriaꞌin sese eipe are katupono ahenoi ehepe torannia Uiꞌywot e uhepiat hap koꞌi. Pyno mio eipe yt uheropat haria i maꞌato uiwyriaꞌin sese eipe katupono eweikuap taꞌyn yne yne Uiꞌywot e hap uimimoherep ehepiat e. 16Taꞌi uiwyriaꞌin eipe ti yt uiꞌairo i maꞌato Eikaꞌiwatno maꞌato Uito worohoꞌoꞌairo eipe uhemiitꞌinno. Miꞌi hawyi worohoꞌopoꞌoro uhehay moherep miitꞌin miat hamo iꞌewyte wakuap sese nug hamo yt ikahuro i rakat motpap nug hamo worohoꞌopoꞌoro uiwyriaꞌin e. Waku eikaipyi tuwemoherep kahato ywa koꞌi ewy wuatꞌi eꞌat piat ieineꞌen hanuaria wo e. Miꞌi tã hap ewy pote kat koꞌi kat koꞌi eweikyꞌesat hawyi ewehẽtup o Uiꞌywot pe hawyi tutum ehepe eimikyꞌesat oktan uhet upiat ewehẽtup pote uhytꞌiꞌin e. 17Miꞌi pote atikyꞌesat kahato eiwoꞌokyꞌe kahato hap e. Eiwoꞌokyꞌe ro eiwoꞌope e. 18Mio wyti aru yt uimohey i haria iꞌatupyꞌahak kahato ehete maꞌato karãpe mesuwarotiaria tukupteꞌen ipyꞌahak ehete rakaria wo uhemiitꞌin eipe pote waku eiwatetup aikotã saꞌawyꞌi te uhete iꞌatupyꞌahak hap kape e. 19Yt uimohey i haria wo eipe pote ten iraniaꞌin eikyꞌe haria wo tukupteꞌen maꞌato uimohey haria eipe pote yt eikyꞌe hin i katupono yt uimohey i haria tok pyi worohoꞌoꞌairo uhemiitꞌinno hawyi yt iꞌatuwat i raꞌyn eipe eweipyhuꞌat e. Miꞌi tupono yt iꞌatuwese i ehete e. 20Aikotã aikotã saꞌawyꞌi te ahenoi ehepe motpoꞌororia neꞌi wyti yt karãpe i poꞌog iwato tukupteꞌen tokaꞌiwat kai are. Yt eweiwaure teiꞌo mio tã uiꞌe hap e. Taꞌi Uito eikaꞌiwat taꞌatusatyꞌi satyꞌi hawyi iꞌewyte eipe uhemiitꞌin aru wy ehatyꞌi hatyꞌi haria wo wy tukupteꞌen. Maꞌato uhepiat taꞌatunapin hap koꞌi taꞌatunug mote iꞌewyte ehepiat taꞌatunapin iꞌatuepiat hap wy taꞌatunug e. 21Maꞌato miꞌiria yt taꞌatukuap i uipoꞌoro hat pote saꞌag taꞌatunug aru ehete uiwyriaꞌin eipe pote uhet moherep haria eipe pote. 22Yt ariot i mesuwarote miitꞌin muꞌe hamo pote yt taꞌatuꞌaparap kuap i haria wo tukupteꞌen. Maꞌato ahenoi raꞌyn hawyi yt kat iꞌatuꞌe kuap i raꞌyn Tupana pe katupono mio iꞌatuminug saꞌag hap koꞌi taꞌatukuap taꞌyn. 23Uwe uwe uhete ipyꞌahak miꞌi haria iꞌewyte ti Uiꞌywot etiat ipyꞌahak takaria e. 24Maꞌato yt ariot i mesuwarote wakuap sese nug miitꞌin ehamuat pote yt taꞌatuꞌaparap i e. Teꞌeraꞌakasa raꞌyn yne uimisepap wakuap sese koꞌi poꞌog iwato torannia kai maꞌato miꞌi pykai iꞌatupyꞌahak uhete iꞌewyte Uiꞌywot ete e. 25Aikotã nimuat -Yt kat pykai i iꞌatupyꞌahak uhete e iwan me. Miꞌi e hap ewy miitꞌin iꞌatupyꞌahak uhete mesup e. 26Pywo wyti aru atipoꞌoro ehewowi Maꞌãu Wakuat Tupana kaipyi pywuat sehay uhetiat moherep hamo. 27Iꞌewyte waku eiperia uhetiat eweimoherep iraniaꞌin me. Katupono haꞌawytepyi eweikupteꞌen uiwywo uimimuꞌe koꞌi wo pote uikuap haria wo eweikupteꞌen. Miꞌi pote waku ewehenoi kahato aru miitꞌin me uhetiat e Iesui topotmuꞌeria pe.
Currently Selected:
Iuwãu 15: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.