Wiripu 4
4
Haga 4
1Mehinꞌin manaꞌin aikuꞌuro hap kape waku watomohey o are. Uimikyꞌeria kahato eipe. Worohoꞌokyꞌe eipe. Uhehatꞌat kahato ekyewi. Uimowepiit haria eipe. Arehum kahato ehewowi. Uheinytꞌin uheꞌywytꞌin yt uimoti te hin i. Atikuap aikotã eweikupteꞌen wẽtup miit ewy Aikaꞌiwat wywo. 2Miꞌi hawyi mana Ewotia mana Sintiki ahẽtup ehewowi eipe Aikaꞌiwat mohey haria pote eweikupteꞌen woꞌokyꞌe haria woꞌowese haria kahato. Waku wẽtup ehay ewy aikotã eikypyꞌyt ewy eweikupteꞌen Iesui mohey haria eipe pote. Aito Iesui mohey haria pote yt naku i watukupteꞌen yt woꞌokyꞌe i haria wo yt naku i are. 3Saꞌawyꞌi eipotpap kahato uiwywo manaꞌin. Saꞌawyꞌi mehin Kementi wywo watuwat iraniaꞌin aipowyro haria wywo sehay wakuat Iesui etiat sytpok hamo. Miꞌiria set yne toineꞌen Tupana miwan atipy piat ete mekewat miwan ete uwe aru toineꞌen wuatꞌi eꞌat pe e hap tote. Pywo pe ti manaꞌin saꞌawyꞌi eipotpap kahato uiwywo. Miꞌi pote atikyꞌesat kahato waureꞌeweiꞌe o eiwuꞌuka hap ete are. Atikyꞌesat kahato eiwoꞌowese hap taꞌyn aikotã saꞌawyꞌi eiwoꞌokyꞌe hap ewy raꞌyn atikyꞌesat uheinytꞌin are. Miꞌi pote ahẽtup eiꞌapykok hanuat pe -Uhyt areꞌe etiꞌatunug no uheinytꞌin woꞌokyꞌe haria wo raꞌyn are. Mehin areꞌe uipowyro en tawa Wiripu piaria napin hamo. Pyno mehin waku ereꞌe mana Ewotia iꞌewyte mana Sintiki pe -Yt eiwuꞌuka poꞌog neiꞌo ehehay wo ereꞌe o iꞌatuepe are eiꞌapykok hat pe manaꞌin.
4Pyno uiwyriaꞌin woꞌomowepiit haria ewywuaria wo o eweikupteꞌen. Wuatꞌi eꞌat pe waku -Tupana urumowepiit hat kahato En waku watoꞌe aat kaꞌap. Tupana urumowepiit hat kahato En waku watoꞌe Tupana pe are. 5Iꞌewyte ti waku yt ipyꞌahak takaria wo i watukupteꞌen e. Waku yne miitꞌin wesat hatno watoineꞌen. Yt eweiwaure teiꞌo Aikaꞌiwat uut hamuat hap eꞌat katupono taꞌaipok irane Aiꞌakag koro are. Miꞌi pote waku wakuaria ewy watukupteꞌen wuatꞌi eꞌat pe. 6Pyno yt eiwanetup koꞌi koꞌi i ran o. Poꞌog waku wahẽtup Tupana kape aipowyro hamuat hap. Waku watoꞌe Tupana pe -Etum o uruepe uruwat yt kat i rakat. Uruikuap kahato raꞌyn egyiꞌat hap Tupana waku uruhẽtup. Miꞌi pote urutuwehum kahato ewowi urupyꞌa pyi Tupana waku watoꞌe Tupana pe. 7Miꞌi tã watunug pote yt kat i hin i aiwanetup koꞌi koꞌi hap atunik kahato. Aiwanetup hawe woꞌowese hap yn topyhuꞌat. Tupana ainug waku pe kahato aiwanetup hawe yt miitꞌin mikuap oktan i tutum ahepe aiperupꞌi kahato hap. Towese hap ewy tutum ahepe. Miꞌi pote toihep ahesoꞌok hap koꞌi. Miꞌi hawyi aiwanetup hap Iesui wanetup hap ewy wẽtup miit ewy kahato raꞌyn ainug. Aipotypot timoma raꞌyn aiwanetup hap aipyꞌa piat yt naku i nug hap iꞌewyte aiwanetup saꞌag hawiat.
Waku Aiwanetup Hawe Tupana Motypot Haria Wo Watoineꞌen
8Kurin poꞌog ahenoi hawyi waku. Uheꞌywytꞌin uheinytꞌin watipyhyp aiwanetup hap yt naku i hap. Miꞌi hawyi wẽtup kape yn aiwanetup hap. Wakuat kape yn watuwanetup aikotã miitꞌin miat wakuat rakat ewy aiwanetup hap aikotã pywuat wanetup hat ewy aikotã miitꞌin mimotypot kahato hap wanetup hap ewy aikotã hãpyk kahato rakat ewy waku watuwanetup. Waku ihainia haryporia weꞌeg nakaria ewy watuwanetup. Waku iwese kahato rakat ewy aiwanetup hap. Miꞌi hawyi -Meimuẽwaria wyti waku kahato rakaria iꞌatuꞌe hap ewy waku aiwanetup hap. Kat e hap kat e hap poꞌog poꞌog waku miꞌi ewywuat waku watuwanetup. Kat e hap kat e hap ete Tupana -Waku e pyno miꞌi hap ete waku watuwanetup aat kaꞌap. 9Iꞌewyte atikyꞌesat kahato ehewyry uhepiat einapin hap nug haria wo. Atikyꞌesat uimipoꞌoro einapin hamuat eweikyꞌe kahato hap. Saꞌawyꞌi ti areineꞌen eitokpe turan wakuat yn atunug ehepuo. Waku ewetunug aikotã uheko eweiꞌakasa hap ewy wakuap nug hap ete. Miꞌi tã ewetunug mote woꞌokyꞌe hap eiwoꞌopiat hap eweipuẽti Tupana mikyꞌesat ewy. Miꞌi hawyi ti aru eiperupꞌi hap topyhuꞌat aikai are.
Waku Kahato Eiperia Tawa Wiripi Piaria Iesui Mohey Haria E Pauru
10Mio ti putꞌok e eimiium uipowyro hamuat hap. Miꞌi hap ti uimowepiit kahato. Miꞌi hawyi uipyꞌa perupꞌi kahato Uikaꞌiwat ete. -Waku kahato En are Iesui pe. Mio tã are emiium uhepiat uimoꞌokpipokꞌi poꞌog poꞌog hap ete katupono uikyꞌe hap moherep kahato hap eimiium. Saꞌawyꞌi ti uipowyro teran kahato eipe wen maꞌato miꞌi rẽ muap yt eweipuẽti i uikyꞌe ehepiat hap moherep hamo. 11Saꞌawyꞌi te ti yt kat i sẽtup uiꞌe hap. Yt ahenoi i iraniaꞌin me yt kat i uiat e hap katupono koitywy atikuap taꞌyn uiwepiit sio uhekat iwato hap etiat sio kurin uiat uiwepiit hap atikuap. 12Atikuap kahato sehakyꞌeꞌi hap etiat iꞌewyte atikuap kahato sekat hap etiat. Saꞌawyꞌi meimuẽwat yt atikuap i yt kurin i maꞌato koitywy atikuap taꞌyn uhesyꞌat pykai uiwepiit iꞌewyte uiꞌok pote uiwepiit. Uhekat kurin hawyi arehum iꞌewyte iwato uhekat pote arehum ne. Koitywy ahepap taꞌyn wehum hap. 13Maꞌato yt uiwekaipyi i tuut uhesaika hap maꞌato Aipotypot Iesui kaipyi atipuẽti. Miꞌi ti kat e hap kat e hap etiat -Uimoesaika hap wuatꞌi etiat kuap hap ete uimowatetup are Tupana pe. Iꞌewyte waku kahato eipe miꞌi e hap ti ereꞌe Tupana pe.
14Maꞌato waku eiminug ewetum uhepe. Taꞌi uhepiat hoꞌopot hap toineꞌen mesuwe. Uimosoꞌopot kahato mesuwe woꞌopyhik hawe. Miꞌi turan eimipoꞌoro putꞌok e uhete. Miꞌi hawyi arehum kahato eimiium uhepiat ete. 15Eheꞌyi Masetunia pe mio iꞌatu kahato Iesui mohey haria tukupteꞌen. Haꞌawyte areto raꞌyn iꞌatuewowi sehay Iesui etiat wakuat moherep hamo wuatꞌi tawa pe kat e hap kat e hap upi. Mio koitywy ahokꞌiwat yne tawa pe Iesui mohey haria teꞌeruwaꞌatunug tuereto maꞌato yt kat i te taꞌatupoꞌoro uhowowi taꞌatumiium koꞌi. Maꞌato eipe Iesui mohey haria tawa Wiripu piaria ewetum kahato raꞌyn uhepe. Eweipatꞌok kahato uhepe ehekat koꞌi. 16Saꞌawyꞌi areto tawa Tesaronika kape. Itote yt uhekat hin i maꞌato miꞌi turan uipowyro hap eweipoꞌoro poꞌoro kahato uhowowi kat uimikyꞌesat koꞌi saꞌawyꞌi eweipoꞌoro. 17Yt ahẽtup hin i eimiium wuat iꞌewyte yt atikyꞌesat i ehekareꞌen uiwanetup hawiat hap pykai eweipoꞌoro. Yt eimiium kape hin i arahaꞌat. Yt ehekat hin i uheha pe. Eikyꞌe hap yn uheha pe uhepiat hap wen maꞌato eimiium uimowepiit kahato katupono miꞌi kaipyi atikuap uikyꞌe ehepiat hap. Miꞌi kaipyi atikuap eipe Tupana kyꞌe kahato haria hap. Miꞌi eimiium koꞌi yne topyhuꞌat atipy pe rakanuat ehegyiꞌat hap toimoherep hamuat itote emipoꞌoro koꞌi. 18Mehin Epawutitu tum yne eimiium eimipoꞌoro koꞌi uhepe. Ikahu kahato uipuẽti eimiium aikotã saꞌawyꞌi nagnia tiwuk mohag hy ikamhig se rakat Tupana motypot hamo. Miꞌi hap ewy atipuẽti eimiium ikamhig se kahato eimiium Tupana mowepiit kahato hap. -Waku kahato e Tupana eimiium me. Koitywy areineꞌen hekat rakat ewy raꞌyn ewetum iwato uhepiat pote. Ewetum iwato pote uipo sakpo ewetum uhepe. 19Tupana tum aru yne yt kat i aikawiat rakat ahepe. Taꞌi Uhetupana tum aru wuatꞌi yt kat i eiwat rakat tekat iwato kahato hap kaipyi. Aikotã tekat iwato kahato atipy pe hap ewy te tutum ehepe. Taꞌi hegyiꞌat kahato aru ahepe katupono Haꞌyru Aipotypot Iesui ikuꞌuro aikawiatno haype. Miꞌi pote toĩ yne aipo pe imiium koꞌi.
20Miꞌi tupono toꞌiro watuwehum Aikaꞌiwat Tupana kape. Toꞌiro watimotypot Miꞌi yn mesuwepyi mukiꞌite eꞌihatꞌok wuatꞌi eꞌat pe waku miꞌi tã paĩ. 21Miꞌi tupono kuekatu atipoꞌoro torannia Tupana eropat haria kape Tupana emiitꞌin kape mekewat Aipotypot Iesui emiitꞌin koꞌi kape iꞌewyte Iesui mohey haria uheꞌywytꞌin uheinytꞌin torannia kape atipoꞌoro kuekatu hap are. 22Morekuat Sesa emiitꞌin suraraꞌin iꞌewyte kuekatu ipoꞌoro ehewowi. Iꞌatu kahato mesuwe Iesui mohey haria. Miꞌiria iꞌewyte kuekatu ipoꞌoro ehewowi.
23Pyno ahẽtup Tupana pe -Etiꞌatukyꞌe kahato emohey haria tawa Wiripu piaria are ahẽtup. Egyiꞌat kahato hap kaipyi etiꞌatupoityro miꞌiria ewaku hap oktan are yn Aipotypot Aikaꞌiwat Iesui pe eikawiatno hamo ahẽtup. Tupana Paꞌãu eiam mo eipiit koꞌi hap yn ahẽtup Tupana pe aat kaꞌap eikawiatno haype. Morekuat Sesa woꞌopyhyp hawe areineꞌen mesup. Uimiwan Iesui etiat atipoꞌoro ehewowi tawa Wiripu piaria Iesui mohey haria pe. Toran naꞌyn uimiwan.
Currently Selected:
Wiripu 4: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.