Wiremu 1
1
Haga Wẽtup 1
Pauru Hẽtup Tupana Kape Wiremuꞌin Wẽtup Wanetup Hap Ewy Tukupteꞌen
1Waku kahato en Wiremu. Uiwywuat Tupana kapiat ipotpap takat kahato en Wiremu. Meiũ ti areineꞌen morekuat pot pyhik hawe Iesui ehay moherep hap poꞌypyi. Koitywy ti atipoꞌoro uimiwan ewowi Wiremu. Uito ti Pauru iꞌewyte aiwy Timoteu tipoꞌoro tehay ewowi. 2Atikuap kahato ti Iesui mohey haria aikotã teꞌeruwaꞌatunug kahato ti eꞌyat kape. Miꞌiria kape ti iꞌewyte kuekatu uiꞌe hap atipoꞌoro. Iꞌewyte uhekuekatu atipoꞌoro uheinyt Apia pe iꞌewyte aiwy ok Akipu e hap het rakat kape aiꞌewywuat Iesui esurara yt naku i moma hamuat rakat kape. 3Koitywy ahẽtup kahato Aiꞌywot Tupana kape iꞌewyte Aipotypot Iesui kape -Etum neꞌen neꞌi o Wiremuꞌin me egyiꞌat hap iꞌewyte etiꞌatumowepiit miꞌiria are Tupana pe. 4Taꞌi uhehay kahato ti Tupana kape mesuwe epowyro hamuat ahẽtup kahato uiwy Wiremu. Miꞌi atunug neran ne. Arehum kahato Tupana kape eupi are.
5Koitywy ti ehay putꞌok e raꞌyn uhete aikotã ikahu kahato ereineꞌen hap ete aikotã Tupana emiitꞌin kyꞌe kahato hat en Aipotypot Iesui mohey hat sese raꞌyn erepyhuꞌat hap. Miꞌi hap atikuap taꞌyn mesuwe hawyi uimowepiit kahato. 6-Tupana atikyꞌesat kahato Wiremuꞌin wẽtup ehay yn Iesui mohey haria teꞌeropyhuꞌat are Tupana kape. Atikyꞌesat kahato Wiremuꞌin wẽtup piit ewy yn tukupteꞌen hamuat. Tupana urupowyro kahato En poꞌog poꞌog eminug ikahu kahato rakat kuap hamo Esaꞌyru urupotypot Iesui emiwan neꞌen neꞌi iꞌewywuat haria pe urunug Tupana are. 7Uiwy Wiremu en urukyꞌe hap iꞌewyte uikyꞌe hap poꞌog uimowepiit kahato hap topyhuꞌat. Uimowepiit kahato meiũpe arewanetup ewowiat hawyi are. Yt uito yn i maꞌato yne Tupana emiitꞌin mowepiit kahato hat en.
8Pyno ahẽtup teran epe uimikyꞌesat iwatoꞌin nakat Wiremu maꞌato eꞌykeꞌet ewy ahẽtup perupꞌi puo epe Iesui mohey haria aito pote. Yt atiꞌakit teran i uikyꞌe epiat hap uimiẽtup mo. Yt woromopyꞌahak teran i egyiꞌat hap ete. Miꞌi pote etunug o epyꞌa pyi uikyꞌe hap wywo uimiẽtup hap atikyꞌesat. 9Uito ti meiũ Iesui mohey haria apykok hanuaria akag wuat Tupana miꞌairo kahato. Miꞌi pykai yt woropoꞌoro i haty wo maꞌato perupꞌi puo yn ahẽtup epe uimikyꞌesat ekyꞌe popuo Iesui poꞌypywiat uipyhik pyi ahẽtup epe perupꞌi puo. 10Areineꞌen meiũpiat woꞌopyhik hawiat turan ni putꞌok e uhete saꞌawyꞌi wuat emiit emikyiꞌat wuatꞌi miitꞌin eropat reꞌen neꞌi hat Unesimu e hap eꞌatoiat hat putꞌok e uhete. Miꞌi hawyi ti ahenoi tope Aipotypot Iesui etiat miꞌi hawyi ti totomohey raꞌyn Iesui uhehay upi. Mio koitywy topyhuꞌat uhaꞌyru ewy raꞌyn paĩ meiũpe are. Mio Iesui mohey hatno raꞌyn topyhuꞌat. Miꞌi pote iꞌywot ewy areineꞌen katupono uimienoi kaipyi raꞌyn tuwemoherep pakup i. 11Atikuap ti saꞌawyꞌi ti emiit no teꞌen neꞌi yt tuweꞌeg hin i rakat Unesimu toineꞌen maꞌato koitywy wakuat semiit no i raꞌyn topyhuꞌat. Uipowyro kahato hat wo raꞌyn ti mio topyhuꞌat. Ahemiit pakup mo raꞌyn ni toineꞌen. 12Pyno koitywy atiporeraꞌaipok i raꞌyn ewowi maꞌato uiwak popuo atipoꞌoro ewowi katupono atikyꞌe kahato Unesimu. 13Yt atipoꞌoro teran hin i wen maꞌato atikyꞌesat kahato uipo pe topyhuꞌat katupono waku kahato uheropat uipyhik hawiat turan Iesui poꞌypywiat uipyhik turan. En yt uwe i meiũpe pote uheropat emiit Unesimu. 14Maꞌato atikyꞌesat emikyꞌesat yn atunug mehin. Yt kat i uhepiat epoꞌoro haty wo hap mywo ahẽtup. Waku topyhuꞌat uipowyro hatno meiũpe wen maꞌato eꞌe hap yn atikyꞌesat. 15Atikuap aikotã saꞌawyꞌi Unesimu eꞌatoiat rakatno toineꞌen. Yt iweꞌeg hin i turan topopy eꞌyatypepyi maꞌato mesup atiporeraꞌaipok ewowi emiit pakup mo raꞌyn. Unesimu taꞌaipok taꞌyn Tupana piat toto mopakup i hamo uiwanetup hawe are arewanetup. Miꞌi hawyi wuatꞌi eꞌat piat emiit nuat raꞌyn topyhuꞌat Unesimu. 16Saꞌawyꞌi te ti ewat emiit sese toineꞌen maꞌato mio wyti poꞌog naꞌyn emiit no topyhuꞌat saꞌawyꞌi wuat kai. Aikotã eꞌywyt ewy sese raꞌyn topyhuꞌat katupono Aikaꞌiwat mohey hap kaipyi raꞌyn aheywyt no Tupana tunug. Uimikyꞌe kahato miꞌi kurum Unesimu. Meiũran ti aru poꞌog saꞌawyꞌi wuat emiit nuat hap kai topyhuꞌat katupono koitywy eꞌywyt no raꞌyn topyhuꞌat Iesui mohey hap kaipyi raꞌyn. 17Wiremu uikyꞌe apo en. Taꞌi atikuap uikyꞌe hap. Uhekatuwy apo en. Hẽ ere pote waku -Ereke ro ere kurum Unesimu pe are aikotã -Ereke ro ere uhepe hap ewy o ere o miꞌi pe. Pyno etikyꞌe ro aru Unesimu uikyꞌe hap ewy mehin are. 18Toineꞌen emaꞌat hap Unesimu minug mote waure wo ereineꞌen miꞌi hap ete emaꞌat hap kai. Toĩ epiat iweteweru hap pote uito ahaꞌup nug iweteweru hap oktan ahaꞌup nug yne iweteweru hap are. 19Pyno ti uipo wo atunug uimiwan mesuwe uimipoꞌoro ewowiat Unesimu weteweru hap ahaꞌup nug yne uiꞌe hap. Uito ti Pauru uipo wo atiwan mesuwe uhet -Atum Unesimu weteweru hap etiatno Wiremu kape are. Uipo wo atopytyk uimiwan nuat mesuwe Pauru. Yt etiwaure teiꞌo maꞌato uhepiat eweterut iwato hap katupono saꞌawyꞌi uiwẽ kaipyi etikuap mesuwat wuatꞌi eꞌat piat ieineꞌen hap uhehay pyi mehin. Miꞌi tupono iwato kahato eweterut hap te yt kat saꞌup i etum pykai. 20Miꞌi tupono ahẽtup ewowi uipyꞌa pyi etunug no Aikaꞌiwat Iesui motypot hamuat. Uipowyro o mesuwat uimiẽtup ete. Miꞌi etunug mote uimowepiit kahato katupono eheykeꞌet sese areineꞌen uito. Uheꞌywyt en Aikaꞌiwat Iesui mohey hap kaipyi. 21Pyno woromohey kahato en Wiremu. Taꞌi arewanetup turan ti etunug aru mesuwat uimiẽtup ewy uimiwan miat ewy. Arewanetup etunug poꞌog aru uimiẽtup kai uikyꞌe epiat pote.
22Uiwy Wiremu pyno etunug kahu o eꞌokipy uiwat i te uheiam mo itote katupono areto irane ewowi maꞌato mesup yt areto kuap i te. Atikuap taꞌyn aikotã eweikyꞌesat kahato uhewyry ehowawiat hap. Atikuap aikotã eiwehẽtup uhepiat uut hap Tupana kapiat -Etum o Pauru pe muap kahu uruewawiat Tupana eiꞌe hap atikuap. Atikyꞌesat kahato Tupana tum eimiẽtup ewy are.
23Iꞌewyte ti toineꞌen meiũpe mipyhik aiwy Epawai e hap Iesui poꞌypywiat mipyhik. Epawai tuwekuekatu ipoꞌoro ewowi. 24Iꞌewyte ahekatuwy Tupana potpap nug hat Maku tipoꞌoro teran ewowi kuekatu e hap. Mehin Aritaku iꞌewyte ewy uhyt Tema iꞌewyte ewy Iruka iꞌewyte kuekatu ehewowi ipoꞌoro. Miꞌiria meiũpe uipowyro kahato Tupana motpap nug hap ete. 25Mio tã are ahẽtup Aikaꞌiwat Iesui pe -Ereineꞌen no aiwy Wiremuꞌin powyro kahato hamo are. Etum neꞌen neꞌi ro egyiꞌat hap oktan iꞌatuepe are Aipotypot pe. Mesup toran naꞌyn uimiwan ewowiat uiwy Wiremu.
Currently Selected:
Wiremu 1: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.