Maku 16
16
Haga 16
Iesui Tuwehymut Raꞌyn
Mateu 28.1-8; Iruka 24.1-12; Iuwãu 20.1-10 Piat Ewy
1Tupana motypot hap eꞌat kosap hawyi mana Maria Matarena mana Sarume hawyi mana Maria Tiaku ty tikyiꞌat mohag hy ikamhig se rakat Iesui piit pen hamo. 2Miꞌi hawyi hunete mytuꞌu eꞌat pe aat wẽtem turan tuwat raꞌyn Iesui syp hap kape. 3Miꞌi turan muap upi teꞌeroꞌe toꞌope -Uwe aru hoꞌoꞌokenhypꞌok ahepe iꞌatuꞌe. Nu wato ipotyi pote Iesui syp hap okenꞌypy iꞌatuꞌe. 4Maꞌato teꞌerahaꞌat turan teꞌokenhypꞌok pe raꞌyn toineꞌen ikaꞌa. 5Miꞌi hawyi tuwehytꞌok nu kaꞌa pe. Miꞌi hawyi mo sese kai apyk pe teꞌeraꞌakasa kurum iwasu ewywuat atipy kaipywiat ieineꞌen hat sokpe kytꞌi iꞌywop takat piat. Miꞌi hawyi iꞌatuperup taꞌyn. 6Miꞌi hawyi toꞌe iꞌatuepe -Yt gyt eweiꞌe teiꞌo e. Atikuap kat pe eweĩꞌẽ. Iesui tawa Nasare piat kape eweĩꞌẽ e. Ariaꞌyp posak etiat miꞌauka kape eweĩꞌẽ meikowo e. Yt uwe i raꞌyn Iesui meiũpe hyp hawe e. Katupono toineꞌen i raꞌyn guꞌuro pyi e. Ewehaꞌat ro aikope ipag hap kape e. 7Miꞌi pote eweiꞌaipok i ro iwyriaꞌin miat henoi hamo iꞌewyte Peteru kape hawyi ewehenoi Iesui ehay iꞌatuepe -Areto ti aru ahetama Karireia kape eheꞌyian me e hap e. Miꞌi tote raꞌyn aru watoꞌopuẽti i aikotã areꞌe saꞌawyꞌi e hap ewy e. Miꞌi e hap ewehenoi ro e atipy piat haryporia pe. 8Miꞌi hawyi haryporiaꞌin ikohyeput kahato Iesui potmuꞌeria 11 ok takaria kape henoi hamo. Yt uwe pe i taꞌatuhenoi muap upi teꞌerokenꞌẽ haype.
Iesui Timoherep Maria Pe
Iuwãu 20.11-18 Piat Ewy
9Miꞌi hawyi mekewat mytuꞌu eꞌat pe Iesui wẽtem guꞌuro pywiat hap eꞌat pe hunete Iesui tuwemoherep Maria Matarena kape tomiahiag sopo 7 ok takat potꞌi kape. 10Miꞌi hawyi Maria taꞌaipok iwyriaꞌin kape henoi hamo. Miꞌiria paa iꞌatuꞌe teꞌeruwak po puo toiꞌatupuẽti. 11Miꞌi hawyi toꞌe iꞌatuepe -Taꞌaipok i raꞌyn ni Iesui guꞌuro pyi Mimiꞌin e. Araꞌakasa i raꞌyn an uito e iꞌatuepe. Maꞌato mio tã e hap iwyriaꞌin yt timohey i.
Iruka 24.13-35 Piat Ewy
12Miꞌi hawyi typy ok hemiit tuwat wẽtup tawa kape. Miꞌi hawyi muap tote Iesui tuwemoherep iꞌatuewowi maꞌato yt taꞌatukuap i saꞌawyꞌi. 13Taꞌatukuap Iesui hawyi teꞌeraꞌaipok iraniaꞌin miat henoi hamo. Maꞌato taꞌatuhenoi hawyi iꞌewyte yt taꞌatumohey hin i.
Mateu 28.16-20; Iruka 24.36-49; Iuwãu 20.19 Piat Ewy
14Miꞌi hawyi 11 ok takaria kape Iesui tuwemoherep iꞌatuenuk turan. Miꞌi hawyi toiꞌatusatyꞌi satyꞌi tehay wo -Kat poteĩ yt eweimohey i uheineꞌen pakup i hap kapiat akasa haria e. Eipyꞌa heg kahato e iꞌatuepe. 15Miꞌi hawyi toꞌe i -Uiwyriaꞌin eweiwat ro yne mesuwat yi totiaria wuatꞌi ywania uhehay wakuat enoi hamo e. 16Uwe uwe uimohey haria wesetꞌok haria ti aru uimiehakyeraꞌat nuaria teꞌeropyhuꞌat e Iesui. Maꞌato yt uimohey i haria ti aru woꞌoꞌapiheg haria tukupteꞌen wuatꞌi eꞌat pe e. 17Miꞌi hawyi uimohey haria tomoherep miitꞌin me wakuap kahato. Miꞌi tã taꞌatunug ahiag koꞌi miitꞌin miat taꞌatusopo uhesaika wo. Musu pakup koꞌi taꞌatusuꞌat. 18Miꞌi hawyi moĩ ok akit hanuaria tukupteꞌen. Moĩ pytyk pykai yt haty i uimohey haria ete e. Iꞌewyte guꞌuro hy u pykai yt haty i iꞌatuete e. Taꞌi iꞌahuu rakaria ete teꞌeruweponug hawyi waku raꞌyn iꞌatuete e.
Iruka 24.50-53 Piat Ewy
19Mio tã e Aikaꞌiwat Iesui hawyi Tupana tioto Iesui atipy kape. Miꞌi hawyi taꞌapyk Tupana po sese kai.
20Miꞌi hawyi hemiitꞌin tuwat raꞌyn Iesui ehay enoi hamo wuatꞌi ywania mesuwat yi totiaria enoi hamuat. Iꞌewyte ti Iꞌatukaꞌiwat Paꞌãu ipotpap kahato iꞌatuwywo tesaika wo wakuap iꞌatumisepap hap nug hamo miitꞌin miat tomohey hamo.
Currently Selected:
Maku 16: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.