Iruka 22
22
Haga 22
Aikotã Iesui Auka Hamuat
Mateu 26.14-16; Maku 14.10-11 Piat Ewy
1Pyno wẽtup eꞌat pe putꞌok e mekewat man teneg u hap eꞌat karãpe Iuteuria teꞌeruwaꞌatunug kahato taꞌatuetawa koro Ierusarẽi kape man teneg u hamo. 2Miꞌi hawyi itote paꞌi kororia iꞌewyte waĩꞌe hap enoi haria tikat kahato aikotã waku migꞌi wo Iesui auka hamo hap taꞌatukat tawa Ierusarẽi me wen maꞌato yt taꞌatupuẽti i katupono Iesui kyꞌe haria sem mupi teꞌerokenꞌẽ kahato itote. 3Miꞌi turan ahiag teke raꞌyn Iesui potmuꞌe Iuta e hap piit pe mekewat Ikarioti saꞌyru piit pe teke mekewat Iesui potmuꞌe wẽtup ok 12 ok takat pe. 4Ahiag teke hawyi Iuta piit pe hawyi toto raꞌyn paꞌi wato kororia kape iꞌewyte suraraꞌin akag koꞌi kape Tupana motypot yat apykok haria kape hawyi ihay kahato miꞌiria wywo aikotã waku Iesui pytyk hamuat kat hamo. 5Tiꞌatumowepiit paꞌi wato koꞌi iꞌewyte surara akag koꞌi imienoi saꞌag wo hawyi taꞌatuhaꞌup nug neran saꞌup iwato Iuta pe Iesui maꞌat hap pe saꞌup mo. 6Haꞌup totat hawyi toto raꞌyn hawyi toikat kahato aikotã karapeĩ waku Iesui moherep hamo iꞌauka teran haria po piat hum hamo iraniaꞌin yt mikuap mo i hap toikat.
Iesui Potmuꞌeria Taꞌatunug Naꞌyn Yne Miitꞌin Mowepiit Hap Eꞌat Mowaku Hamo
Mateu 26.17-19; Maku 14.12-16 Piat Ewy
7Miꞌi hawyi putꞌok e raꞌyn mekewat man teneg u hap eꞌat tawa wato Ierusarẽi me. Miꞌi turan Iesui ywania Iuteuria ywania iꞌauka taꞌatuhũ Kuteiru mepyt iꞌatuminug saꞌag saꞌup mo Tupana mowepiit hamo. 8Mekewat man teneg u hap eꞌat owokai Iesui tipoꞌoro typy ok temiit Peteru Iuwãu tawa Ierusarẽi kape toꞌe henoi hamo hawyi -Eweiwat ro tawa kape ienuk wato hap nug hamo. 9Miꞌi hawyi apo iꞌatuꞌe -Mehin aikope som waku watunug aimiꞌu itote iꞌatuꞌe Iesui pe. 10Miꞌi tupono toiꞌatuwesat -Eweiwat tawa wato Ierusarẽi kape hawyi meremo itote eweipuẽti aru ihainia kamuti piat yꞌy sat hat itote are e. Miꞌi hawyi hewatꞌypmo eweiwat ro hawyi teke raꞌyn wẽtup getap we. 11Miꞌi hawyi waku eweiꞌe ro getap kaꞌiwat pe -Urupoꞌoro hat Iesui tuwehay poꞌoro ewowi uhyt katupono toikuap teran -Aiũwat mekewat akipy wato waku rakat Uito uhemiitꞌin wywo man teneg u hamuat eweiꞌe ro getap kaꞌiwat pe. 12Miꞌi eweiꞌe mekewat getap kaꞌiwat pe hawyi toimoherep aru ehepe wẽtup akipy iwato rakat ywaiti rakat piat are e. Miꞌi pe tukupteꞌen yne aimikyꞌesat mekewat ienuk hap nug hamuat aru are e. --Waku miꞌi akipy koro tote ewetunug eimiꞌu are e. 13Miꞌi hawyi tuwat Peteru Iuwãu Iesui mienoi ewy hawyi taꞌatupuẽti yne raꞌyn Iesui e hap ewy hawyi itote ienuk hap iwato rakat taꞌatunug itote Iesui mikyꞌesat ewy.
Mateu 26.26-35; Maku 14.22-31 Piat Ewy
14Miꞌi hawyi wãtymꞌi turan hawyi Iesui toto wy mekewat akipy ywaiti kape hawyi putꞌok e itote hawyi Iesui taꞌapyk taꞌyn yparakai koro ete temiit 12 ok takaria wywo. 15Miꞌi hawyi toꞌe iꞌatuepe -Waku kahato mesuwe watenuk e. Ahekatup kahato raꞌyn mesuwat ienuk hap u hamuat eiwywo uhepiat hoꞌopot hap owakai e. 16Uiwyriaꞌin e areto irane eikai hawyi yt arenuk i iraꞌyn ienuk hap man teneg u hap mesuwat yi tote i raꞌyn are e. Maꞌato meiũran karãpe Tupana topyhuꞌat Wuatꞌi Miitꞌin Porekuat Koro watnuat hap eꞌat pe hawyi atuꞌu i raꞌyn eiwywo e Iesui. 17Miꞌi tã toꞌe hawyi totat raꞌyn mekewat kuiꞌa piat sapo hy hawyi waku e Tupana pe. Miꞌi hawyi tutum mekewat kuiꞌa torannia temiitꞌin me hawyi toꞌe iꞌatuepe -Waku eweimoꞌẽ ro mesuwat kuiꞌa piat sapo hy eiwoꞌope e. 18-Pywo pe ti Uito areꞌyꞌu meiũ hawyi yt areꞌyꞌu i sapo hy eiwywo i raꞌyn maꞌato mekewat eꞌat karãpe Tupana toineꞌen Wuatꞌi Miitꞌin Porekuat nuat eꞌat putꞌok e hawyi areꞌyꞌu i raꞌyn mesuwat ewywuat sapo hy eiwywo i raꞌyn e temiitꞌin me. 19Miꞌi hawyi man teneg totat hawyi waku e Tupana pe hawyi toipik topo wo hawyi tutum naꞌyn topotmuꞌeria pe hawyi toꞌe -Mesuwat man uimipik uipiit ewy kahato toineꞌen katupono uipiit miitꞌin tipik kahato uiꞌauka turan e. Miꞌi pote uipiit iãꞌãkap kahato meikowat man e. Waku miꞌi tã eweitunug tuereto uiminug mowatetup hamuat 20Teꞌerenuk kahu hawyi sapo hy kuiꞌa piat totat hawyi -Meikowat sapo hy uhuu ewywuat e. Taꞌi uhuu aat hap topyhuꞌat aru mohag wo miitꞌin Tupana wywo woꞌowese hap nug hamuat e.
21Miꞌi hawyi Iesui toꞌe -Maꞌato eiweꞌeg wo o katupono wẽtup ok aipyꞌasetpiat mesuwat yparakai ete apyk piat uimaꞌat hanuat toineꞌen naꞌyn e. Katupono uiꞌauka are saꞌag neꞌi miꞌi miit toineꞌen e. 22Taꞌi Uito ti Wuatꞌi Ywania Ykeꞌet pote uikuꞌuro irane miitꞌin yne kawiatno Tupana mikyꞌesat ewywuat maꞌato yt naku i kahato topyhuꞌat aru uimaꞌat hat ete. 23Mio tã toꞌe hawyi hemiitꞌin apo iꞌatuꞌe toꞌope toꞌope -Uweĩ aiwywo Aikaꞌiwat maꞌat hanuat iꞌatuꞌe.
24Miꞌi hawyi Iesui potmuꞌeria 12 ok takaria tuꞌuka toꞌope yparakai ete toꞌoehay wo -Uito ti poꞌog Iesui potmuꞌe eikai torannia kai iꞌatuꞌe saꞌag toꞌope. 25Miꞌi hawyi Iesui toꞌe temiitꞌin me -Uiwyriaꞌin e ahewanikaptia ywania porekuaria miitꞌin poꞌoro haria wo teꞌeropyhuꞌat. Miꞌi hawyi temiitꞌin taꞌatunug morekuat mipoꞌoro hap ewy raꞌyn e. 26Maꞌato eipe ti yt miꞌiria ewywuat no i eweikupteꞌen e. Uwe toineꞌen poꞌog iraniaꞌin kai waku miꞌi temiitꞌin eropat hatno toineꞌen. Waku uwe morekuatno toineꞌen miꞌi ti eropat hat wo toineꞌen e. 27Mesuwarotiaria aiporekuaria teꞌeruwepyk hawyi taꞌatukay kay taꞌatueropat haria hawyi -Uipoi ro mesuwe meremo iꞌatuꞌe. Miꞌi hawyi heropat haria meremo taꞌatuerut morekuat kape imiꞌu. Maꞌato Uito areineꞌen eipyꞌasetpe eeropat hamuat e. 28Mesuwarote ahoꞌopot kahato miitꞌin mikyryꞌi wo hap upi ahenoi miꞌiria pe turan eipe eweikupteꞌen uiwywo e. 29Saꞌawyꞌi Uiꞌywot Tupana uiminug morekuatno wuatꞌi ywania uimipoꞌoro hanuat e. Koitywy Uiꞌywot ewy atunug eiperia morekuaria wo uiꞌewywuaria e. 30Pywo pe ti areꞌe ehepe aikope aikope areineꞌen morekuatno hap tote wyti aru uimiꞌu nug hap tote uiwywo eweiꞌapyk aru e. Taꞌi morekuaria wo uiwywo eweikupteꞌen e. Taꞌi uiwywo eweiꞌapyk uimiꞌu u hamo uhesapo hy u hamo itote uimotypot sese hap eꞌat e. Iꞌewyte eiꞌapyk hap koꞌi sese iwato rakat tote eweiꞌapyk morekuaria kororia wo 12 ywania Isareu ywania morekuaria wo eweikupteꞌen aru itote uwe waku uwe yt e hamo e Iesui temiitꞌin me.
31Miꞌi hawyi Iesui toꞌe Peteru pe -Simau e mesup wãtym muo ahiag ehãꞌãg kahato e. Taꞌi ahiag tihep teran epiat uimohey hap uhyt e. Aikotã Sereai ape watihuꞌi huꞌi hap ewy tutunug hawyi Sereai ape toihep yne hawyi Sereai sese yn topyhuꞌat panane pe iꞌape wasere upi toto yne hap ewy uimohey hap yn topyhuꞌat eikai aru Peteru e. 32Pyno ahẽtup kahato Uiꞌywot pe emoesaika hamo. Miꞌi hawyi karapeĩ eraꞌaipok uhowowi i raꞌyn aru miꞌi hawyi etiꞌatumoesaika o ewyriaꞌin uimohey haria iꞌatuiãꞌãg hap turan e Iesui Peteru pe. 33Miꞌi hawyi Simau tiwesat Iesui -Uikaꞌiwat pywo ti rat areto ewywo wuatꞌi eꞌat pe ekuꞌuro hap kape miitꞌin epyhik hap kape areto wy e. Taꞌi areto ewywo eꞌauka hap kape Mehin e. 34Miꞌi hawyi Iesui toꞌe Peteru pe -Simau e mesuwat wãtym nuran aru -Yt atikuap i Miꞌi Miit ereꞌe aru uhepiat myẽꞌym mo mekewat waipaka ehay eꞌyian mete e Iesui Peteru pe. 35Miꞌi hawyi Iesui apo e temiitꞌin me -Saꞌawyꞌi worohoꞌopoꞌoro eipe yt kat wywo i Tupana ehay moherep hamo e. -Yt ewetioto teiꞌo muap saꞌup ehupi are saꞌawyꞌi ehepe e. Yt kat I kyseꞌyp ewetioto are. Iꞌewyte wẽtup yn ehesokpe are. Pyno apo are ehepe Kat som yt kat i eweipuẽti mekewat eꞌat pe e. -Yt kat i iꞌatuꞌe. Uruipuẽti yne urumoieineꞌen hamuat iꞌatuꞌe. 36Miꞌi hawyi Iesui toꞌe i temiitꞌin me -Pyno saꞌawyꞌi yt ewetioto teiꞌo muap saꞌup are maꞌato koran wẽtup uiꞌe hap areꞌe ehepe e. Mio tã are toineꞌen eipo pe muap saꞌup pote ewetioto o yne ehupi are. Ehekuriwuꞌa koꞌi howapy ekat wo tukupteꞌen mote ewetioto yne ro ehupi are. Iꞌewyte yt kat I ekyseꞌyp pote wẽtup ehesokpe etiweneru kyseꞌyp kyiꞌat hamo e. 37Pywo pe ti saꞌawyꞌi wuat Tupana ehay moherep haria mio tã iꞌatuꞌe taꞌatumiwan me -Yt nakuaria i po pe wyti aru topyhuꞌat Uipoꞌoro Wuatꞌi Ehakyeraꞌat hat e Tupana saꞌawyꞌi miwan me e Iesui temiitꞌin me. Miꞌi pote koran naꞌyn areineꞌen yt nakuaria i po pe aikotã Tupana toꞌe hap ewy e. Katupono yne Tupana e hap uhetiat ewywuat aru topyhuꞌat e. 38Mio tã toꞌe hawyi ipotmuꞌeria teꞌeroꞌe -Urukaꞌiwat erahaꞌat ko pe urupo pe typy kyseꞌyp toineꞌen iꞌatuꞌe. Miꞌi hawyi Iesui toꞌe -Pyno waku typy kyseꞌyp putꞌok e e.
Mateu 26.36-56; Maku 14.32-50 Piat Ewy
39Miꞌi hawyi aikotã saꞌawyꞌi te wuat ewy Iesui toto i raꞌyn tawa wato Ierusarẽi pyi mekewat yityꞌok Uriweiria ypia koꞌi kape temiitꞌin wywo. 40Putꞌok taꞌatuꞌe yityꞌok tote hawyi Iesui toꞌe temiitꞌin me -Uikyꞌe haria waku mesup wãtym kaꞌap ewehẽtup kahato Tupana pe eimoesaika hamuat ahiag iãꞌãg hap putꞌok ehete turan. 41Miꞌi hawyi Iesui taꞌam naꞌyn poꞌog yityꞌok upi temiitꞌin myi yt pya i aikotã nu watipun hap ewy toto hawyi tuwepỹꞌãtutuk ihay Toꞌywot Atipy piat Tupana wywo. 42-Uiꞌywot etihep kuap mesuwat kuiꞌa uipo piat pote waku are maꞌato atikyꞌesat kahato emikyꞌesat ewy yn nug hamuat e. Etikyꞌesat atuꞌu pote atuꞌu mesup emikyꞌesat ewy e. 43Miꞌi tohenoi hawyi tuwemoherep howawi raꞌyn wẽtup ok atipy kaipywiat suut hat Tupana mipoꞌoro Iesui moesaika hamo. 44Miꞌi hawyi Iesui ihay kahato Tupana wywo. Miꞌi hawyi tuwesatyꞌu kahato itote. Miꞌi hawyi huu tuwẽtem ipiit pyi huu aikotã an hakup ewy hom homꞌe yi tote iꞌakag owa pe pyi. 45Ihay kahato Tupana wywo hawyi ipoĩꞌam naꞌyn hawyi taꞌaipok temiitꞌin kape maꞌato iꞌatuket turan neꞌi toiꞌatupuẽti katupono hatyꞌu hap tuete pote. 46Miꞌi hawyi toꞌe iꞌatuepe -Are paĩ kat poteĩ eweiket neꞌi mesup e. Eipoĩꞌam no hawyi ewehẽtup to Tupana pe e. Yt pote ahiag miꞌakit koꞌi eweikupteꞌen aru e. 47Mio tã e turan suraraꞌin sem putꞌok iꞌatuꞌe miitꞌin typyꞌi kahato rakaria wywo. Miꞌiria muap moherep hat tuut raꞌyn wẽtup ok Iesui potmuꞌe saꞌag Iuta e hap. Miꞌi tokosap Iesui ewowi imoherep suraraꞌin me hamo hawyi iporokaꞌat Iesui iꞌãpysig hamo. 48Miꞌi hawyi Iesui toꞌe -Uimoherep teran suraraꞌin me uiꞌauka hamo pote uiꞌãpysig uikyꞌe hat ewy apo Iuta e. 49Miꞌi hawyi ipotmuꞌeria taꞌatukuap taꞌyn Iesui maꞌat hap hawyi teꞌeroꞌe -Urukaꞌiwat koitywy apo waku urutat uruekyseꞌyp typy hawyi waku apo urutuꞌuka suraraꞌin nywo ehakyeraꞌat hamo iꞌatuꞌe. 50Miꞌi hawyi wẽtup ok Iesui potmuꞌe hat tiꞌahape hep taꞌyn paꞌi koro emiit tekyseꞌyp mo. Ipo sese kai toiꞌahape hep. 51Maꞌato Iesui toꞌe -Waĩ ne mehin yt naku i e hawyi tuweponug naꞌyn paꞌi koro emiit ahape tek hap ete hawyi meremo satꞌe hawyi waku saꞌawyꞌi ewywuat i raꞌyn topyhuꞌat. 52Miꞌi hawyi Iesui toꞌe paꞌi kororia esuraraꞌin akag koꞌi pe nagnia pe -Kat pote uimohan mesuwe wãtym muo seroꞌok takat mohan hap ewy e. Kat pote kyseꞌyp koꞌi wywo ariaꞌyp koꞌi wywo uimohan e iꞌatuepe itote. 53Saꞌawyꞌi wuatꞌi eꞌat pe areineꞌen eiwywo Tupana motypot yat pe eimuꞌe hamo wen maꞌato mekewat eꞌat pe turan yt uhat hin i eipo wo uiꞌauka hamo e. Maꞌato eheꞌat raꞌyn toineꞌen katupono uiꞌauka teran iꞌypyryp we aikotã eiꞌakag ahiag ewy ewetunug mesup uhete e suraraꞌin me.
Mateu 26.57, 58, 69-75; Maku 14.53, 54, 66-72; Iuwãu 18.12-27 Piat Ewy
54Miꞌi hawyi suraraꞌin ipytyk taꞌyn Iesui hawyi taꞌatueroto raꞌyn paꞌi koro koꞌi yat kape. Miꞌi hawyi ipotmuꞌe Peteru toto wy hupi wen maꞌato pya Iesui kai toto. 55Miꞌi hawyi paꞌi koro koꞌi okenꞌypy totiaria aria taꞌatunug hawyi teꞌeraꞌapyk aria ywytpe teꞌeruwemope hamo. Iꞌewyte Peteru taꞌapyk iꞌatupyꞌasetpe iraꞌak pote. 56Miꞌi hawyi wẽtup piꞌã miitꞌin eropat hat tehaꞌat kahato raꞌyn Peteru kape aria kupykiat iwemopẽ turan hawyi toꞌe -Miꞌi ti mekewat Iesui wywo hewyry rakat hap atikuap e. 57Maꞌato Peteru toꞌe -Yt atikuap i uito Miꞌi Miit paĩ e. 58Miꞌi hawyi meiũran wẽtup ok tehaꞌat kahato Peteru ewowi hawyi toꞌe -Are paĩ worokuap kahato en e. En ni wẽtup ok Iesui emiit sese e Peteru pe maꞌato toiwesat -Eso kahato yt atikuap i rat Mekewat Miit e. 59Meiũran wẽtup ok te tehaꞌat Peteru kape hawyi toꞌe -Pywo ti rat miꞌi ti toineꞌen mekewat Iesui paꞌi koꞌi miꞌapytyk hat wywo e katupono Karireia etama kaipywiat mekewat miit ewy e. 60Maꞌato Peteru tiwesat -U paĩ e yt atikuap hin i rat emienoi Iesui etiat e. Mio tã e turan waipaka ihay. 61Miꞌi hawyi Iesui tuwemorem Peteru ewowi hawyi ihaꞌat kahato howawi hawyi Peteru paa e kahato katupono Iesui mienoi hotꞌokꞌe raꞌyn tuwanetup hawyi Iesui e hap saꞌawyꞌi wuat -Mesuwat ewãtym waipaka ehay owakai te myẽꞌym mo -Yt atikuap i Miꞌi Miit ereꞌe aru uhepiat e hap kape Peteru tuwanetup hawyi paa e. 62Iwanetup Iesui ehay kape hawyi Peteru toto meremo itote pyi hawyi tuweran hawyi tuwak kahato raꞌyn. 63Miꞌi hawyi Iesui pytyk haria suraraꞌin tiꞌahyk ahyk kahato raꞌyn hawyi teꞌeruwekyryꞌi kahato taꞌatumikyryꞌi wo Iesui ete. 64Miꞌi hawyi sokpe wo taꞌatuowahik iha koꞌi wywo hawyi -Etikuap yne Tupana ewywuat pote ehenoi ro uruepe eꞌahyk ahyk haria set koꞌi iꞌatuꞌe neꞌi Iesui pe suraraꞌin sem. 65Iꞌewyte taꞌatumoweukaꞌi kahato taꞌatuehay saꞌag wo itote.
Mateu 26.57-68; Maku 14.53-65; Iuwãu 18.19-24 Piat Ewy
66Miꞌi hawyi hunete ihatꞌok hawyi nagnia miwan enoi haria iꞌewyte paꞌi koro koꞌi teꞌeruwaꞌatunug yne hawyi taꞌatuerut Iesui iꞌatuewowi apo iꞌatuꞌe hamo. 67-En keĩ Tupana Mipoꞌoro Wuatꞌi Miitꞌin Ehakyeraꞌat hamuat sio yt iꞌatuꞌe. Miꞌi hawyi toiwesat -Ahenoi ehepe uwe Uito hap pote wyti aru yt uimohey hin i e. 68Apo are ehepe -Uito keĩ Tupana Mipoꞌoro Miitꞌin Ehakyeraꞌat hamuat are ehepe pote yt uiwesat hin i eipe iꞌewyte yt eipohep i uiꞌauka neran hap ete e. 69Miꞌi hawyi Iesui tuwemoherep tehay wo uwe sese toineꞌen hap mio tã e -Uito araꞌapyk aru Tupana Koro po sese kai araꞌapyk aru Wuatꞌi Miitꞌin Ykeꞌet no e. 70Mio tã toꞌe hawyi apo iꞌatuꞌe Iesui pe -Pyno En nyti Tupana Saꞌyru Sese sio yt iꞌatuꞌe. Miꞌi hawyi toiꞌatuwesat -Eiꞌe hap ewy e. 71Miꞌi hawyi morekuaria iꞌatupyꞌahak kahato raꞌyn Iesui ete hawyi teꞌeroꞌe toꞌope -Towẽ piat --Uito Tupana Saꞌyru Sese toꞌe saꞌag neꞌi pote waku watiꞌauka katupono towẽ pyi tehay wo tuwenug naꞌyn Tupana wo raꞌyn iꞌatuꞌe. Iꞌatuꞌe.
Currently Selected:
Iruka 22: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.