Iuwãu 8
8
Haga 8
1Miꞌi hawyi Iesui toto yityꞌok Uriweiria ypia e hap het rakat kape. 2Itote pyi ihatꞌok hawyi hunete taꞌaipok i raꞌyn Tupana motypot yat wato kape. Miꞌi hawyi itotiaria teꞌeruwaꞌatunug Iesui kape. Miꞌi hawyi taꞌapyk hawyi Iesui tiꞌatumuꞌe i raꞌyn itote. 3Miꞌi hawyi Muisei miwan enoi haria iꞌewyte Tupana mohey haria akag koꞌi tõꞌẽ tõꞌẽ hewowi. Taꞌatuerut wẽtup ok haryporia yt naku i sese rakat taꞌatupuẽti ihainia wywo yt teꞌaito wywo i. Miꞌi hawyi miitꞌin typyꞌi rakaria pyꞌasetpe taꞌatuereke Iesui kape. 4Miꞌi hawyi woꞌomuꞌe haria henoi Iesui pe -Woꞌomuꞌe hat iꞌatuꞌe meiũwat haryporia uruipuẽti wẽtup ok seꞌaito wywo yni pe iꞌatuꞌe. 5Saꞌawyꞌi urunapin hap Muisei toꞌe Teturonamia 22.22 pe -Uwe eweipuẽti wẽtup ok wẽtup ok eꞌaito wywo hawyi o eweiꞌauka miꞌiria nu wo mak mak wo e Muisei iꞌatuꞌe. Miꞌi pote uruikuap teran ekaipyi aikotã ewanetup hawe waku urutunug meiũwat haryporia ete yt weꞌeg i hat ete iꞌatuꞌe. Waku watiꞌauka nu wo sio yt iꞌatuꞌe. 6Mio tã apo iꞌatuꞌe Iesui pe toiꞌaparap mono taꞌatuꞌe. Miꞌi hawyi maꞌato Iesui tuweꞌymyk hawyi yi kyt ete yn topuiꞌiã wo wanꞌi wanꞌiꞌe. 7Miꞌi hawyi poꞌog apo iꞌatuꞌe Iesui pe. Miꞌi hawyi Iesui tuweꞌãpeꞌokꞌam hawyi toiꞌatuwesat raꞌyn -Uwe uwe eipyꞌasetpe yt karãpiat i iꞌaparap hap nug hat pote miꞌi waku saꞌawyꞌi mak mak e nu wo iꞌauka hamo e. 8Miꞌi hawyi tuweꞌymyk i raꞌyn Iesui hawyi tutunug i raꞌyn yi kyt ete iwan topuiꞌiã wo. 9Mio tã e hawyi haryporia erut haria iꞌauka teran haria tuwat i raꞌyn Iesui kaipyi teꞌeruwemoti te kahato iꞌatuminug saꞌag koꞌi yt uwe i mikuap koꞌi pote tuwat. Yian me nagnia saꞌawyꞌi tuwat hawyi watꞌypmo kurum iwasuria raꞌyn tuwat. Tuwat yne hawyi topyhuꞌat Iesui yn naꞌyn mekewat iꞌatumierut haryporia yt iweꞌeg i rakat wywo. 10Miꞌi hawyi Iesui ipoĩꞌam naꞌyn hawyi toꞌe haryporia pe -Aikopeĩ erut haria mana e. Yt wẽtup ok i raꞌyn apo eꞌauka teran hanuat topyhuꞌat e. 11Yt uwe i Mimi e. -Mana Uito iꞌewyte yt woroꞌapiheg i yt woroꞌauka teran i nu wo e. Koitywy waku eraꞌaipok i ro eꞌyat kape maꞌato etoiat raꞌyn eminug saꞌag e.
Iesui Ariãty Sese Toineꞌen
12Miꞌi hawyi Iesui tiꞌatumuꞌe Tupana motypot yat piaria -Uito ti ariãty ewy aikotã ariãty timoherep muap wãtym muo hap ewy Uito atimoherep muap Tupana kapiat. Uwe uwe toto uhupi miꞌi hat wyti hewyry ariãty hot pe. Yt karamuo i iꞌypyryp wuo hewyry are e Iesui. 13Miꞌi pote iraniaꞌin akag koꞌi teꞌeroꞌe Iesui pe -Paĩ ehay kahato ewete eremowato teran -Uito poꞌog ereꞌe pote eso kahato iꞌatuꞌe. 14-Taꞌi uhehay uiwete e Iesui maꞌato pywuat ahenoi uiwetiat katupono atikuap kahato aikope pyi ariot iꞌewyte aikowo areto hamuat hap e. Eipe ti yt eweikuap hin i aikope pyi ariot aikowuat areto hamuat hap e Tupana motypot yat akag koꞌi pe. 15Eipe ti yt naku i eweiꞌe iraniaꞌin me eiwanetup hap kaipyi neꞌi maꞌato Uito yt miꞌi tã i atunug iraniaꞌin me e. 16Maꞌato -Yt naku i miꞌiria areꞌe pote hãpyk kahato uiꞌe hap. Katupono yt uiweran i mio tã areꞌe katupono Uiꞌywot uipoꞌoro hat uiwywo toineꞌen uiꞌe hap mopywo hamo e.
17Iwan me einapin hawe mio tã e -Yt etimohey meremo teiꞌo sehay yt naku i e hap wẽtup ok etiat e maꞌato typy ok toꞌoꞌewy kahato wẽtup ok ete aimuꞌe aiwesat pote pywo yt naku i nug hat topyhuꞌat. 18-Pyno uiwetiat uhehay kahato maꞌato toineꞌen wẽtup ok uiwetiat uimienoi mopywo hanuat e. Uiꞌywot ti uipoꞌoro hat pywo iꞌe hap e hamo. 19-Aikope som pyno eꞌywot iꞌatuꞌe. -Pyno yt uikuap i eipe iꞌewyte yt Uiꞌywot i wyti eweikuap maꞌato uikuap eipe pote iꞌewyte eweikuap taꞌyn Uiꞌywot e. 20Mio tã e Iesui Tupana motypot hap yat piaria pe iꞌatumiium Tupana piat heiam yatypepyi. Maꞌato yt uwe i ipytyk kuap itote katupono yt putꞌok e i te ikuꞌuro hap eꞌat pote.
21Miꞌi hawyi Iesui toꞌe i iꞌatuepe -Areto irane raꞌyn wyti mesuwepyi e. Areto hawyi ti aru uikat kahato eipe wen maꞌato yt uipuẽti i e. Eiminug saꞌag yt hep i te turan ti aru eweipap. Yt eweiwat kuap i wyti aru aikowuat areto hap kape e. 22Mio tã e pote teꞌeroꞌe toꞌope -Kat tuponoĩ -Yt eweiwat kuap i wyti aru aikowuat areto hap kape e Iesui ahepe sio apo tuweꞌauka irane haype iꞌatuꞌe. 23Maꞌato Iesui toꞌe -Eipe ti mesuwat yi totiat miitꞌin wanetup hap ewy yn. Maꞌato Uito ti atipy kaipywiat ariot e. Arewanetup kahato atipy piat wanetup hap ewy e. 24Haꞌawyte areꞌe ehepe -Eiminug saꞌag koꞌi yt hep i te turan ti aru eweipap yt uimohey i pote are e Iesui nagnia pe. 25-Uweĩ pyno en iꞌatuꞌe -Saꞌawyꞌi pyi te raꞌyn ahenoi ehepe uwe Uito hap e. 26Poꞌog ahenoi kuap ehetiat eiminug saꞌag etiat maꞌato yt ahenoi i yne. Katupono uipoꞌoro hat pywuat rakat imienoi hap yn atimoherep miitꞌin me mesuwat mytyyp tote e. 27Karãpe Iesui toꞌe Uipoꞌoro hat yt taꞌatukuap hin i e uwe etiat ihay. Yt taꞌatukuap i ihay Iꞌywot etiat Tupana etiat. 28Miꞌi pote Iesui toꞌe -Maꞌato meiũran eweimopoĩꞌam eheykeꞌet ariaꞌyp posak ete hap eꞌat pe ti aru eweikuap taꞌyn uwe Uito e. Iꞌewyte ti aru eweikuap yt kat i atunug uiwehay pyi maꞌato Uiꞌywot ehay yn uinapin hap ewy ahenoi ehepiat hap e. 29Uipoꞌoro hat wuatꞌi eꞌat pe uiwywo toineꞌen iꞌewyte Uiꞌywot mowepiit hap yn atunug e. Miꞌi pote yt karãpe i uiꞌatoiat uiweran e Iesui. 30Miꞌi hawyi ti itote ipoityꞌi raꞌyn Iesui e hap kaipyi imohey haria wo teꞌeropyhuꞌat.
31Miꞌi hawyi Iesui toꞌe Iuteuria pe tomohey pakupꞌi haria pe -Uiꞌe hap ewetunug no miꞌi pote uipotmuꞌeria sese wo eweikupteꞌen e. 32Pywo ti aru ewetunug uiꞌe hap koꞌi pote ti eweikuap taꞌyn pywuat sese e. Miꞌi hawyi eipyhik hawyi eiwenoꞌẽ kuap haria ewy raꞌyn e. 33Miꞌi pote taꞌatuwesat -Yt kat i hin i ti urupyhik hap Uhyt iꞌatuꞌe. Uruto Aparãu emiariruꞌin. Yt karãpe i miitꞌin eropat haria urutukupteꞌen yt karãpe i woꞌopyhik hawe urutukupteꞌen iꞌatuꞌe. 34Maꞌato Iesui toꞌe iꞌatuepe -Pywo pe ti areꞌe ehepe yt nakuap i nug hap eheko pote yt eiweꞌaputsit kuap i eheko saꞌag yt nakuat i pyi. Miꞌi pote eipyhik piat ewy eweikupteꞌen eipe e. 35Woꞌoeropat haria ti tukupteꞌen wuatꞌi yat puo neꞌi tokaꞌiwaria motypot hamuat maꞌato haꞌyru wyti toineꞌen toꞌywot yat pe yn wuatꞌi eꞌat pe e. 36Tupana Saꞌyru yne ehakyeraꞌat kuap eipyhik hap kaipyi eweimohey pote. Miꞌi pote eweipopy kuap kahato. Eiweꞌaputsit kuap kahato eiminug saꞌag po pyi e. 37Eiperia ti Aparãu emiariruꞌin pykai uiꞌauka teran katupono uhehay yt teke hin i eipyꞌa pe eiwanetup hawe. Miꞌi pote ti uiꞌauka teran eipe e. 38Pyno atunug kahato yne Uiꞌywot mikyꞌesat ewy maꞌato eiperia ewetunug yne eiꞌywot mienoi ewy e. Pywo ti rat ahenoi Uiꞌywot piat uimuꞌe hap yn maꞌato eiperia eiꞌywot mikyꞌesat ewywuat yn ewetunug e Iesui. 39Miꞌi hawyi -Uruto ti Ahaꞌaseꞌi pot Aparãu emiariru emiariru koꞌi sese iꞌatuꞌe. -U paĩ e Iesui mekewat wakuat Aparãu emiariru emiariru koꞌi sese eipe pote ewetunug eheꞌaseꞌi Aparãu minug ewywuat e. Ahaꞌaseꞌi pot Aparãu waku sese nug hat e. 40Maꞌato eipe uiꞌauka teran haria eweikupteꞌen pywuat sehay Tupana kaipyi ahenoi ehepe pykai e. Ahaꞌaseꞌi Aparãu ti yt karãpe i miꞌi tã inug neran e Iesui. 41-Eipe eiꞌywot sese minug ewy ewetunug e. -Uruto ti uruikuap uruꞌywot iꞌatuꞌe. Taꞌi yt iꞌywot wekuap reꞌym rakaria i ti uruto iꞌatuꞌe. Wẽtup yn uruꞌywot. Miꞌi ti uruetupana iꞌatuꞌe. 42-Taꞌi Tupana pywo eiꞌywot pote uikyꞌe haria wo eweipyhuꞌat katupono Tupana Mipoꞌoro Uito e yt uiwewi i arepoꞌoro e Iesui. 43Saꞌawyꞌi -Woropoꞌoro En e Tupana uhepe hawyi ariot ehewowi Tupana yatypepyi ariot e Iesui. Ahenoi ehepe maꞌato yt eweikuap i kahato uimienoi koꞌi katupono yt teke i ehewaure kaꞌa pe e. 44Eiꞌywot sese ti ahiag e miꞌi pote ti ewetunug neran eiꞌywot mikyꞌesat saꞌag oktan e. Haꞌawyte pyi ahiag tiꞌauka teran miitꞌin woꞌopotꞌauka hat miꞌi. Miꞌi pote yt wẽtup i hãpyk takat sehay pywuat iwat iwanetup hap toineꞌen e. Karãpe ahiag heso tuwekaipyi tutunug yt niatpo hin i katupono yne heso rakat kaꞌiwat neꞌi ahiag topyhuꞌat e. 45-Ahenoi ehepe hãpyk takat yn mote yt eweimohey hin i heso rakat mohey haria eipe pote e. 46Uiminug yt nakuat i kue yt wẽtup i eweipuẽti paĩ e. Worohoꞌomuꞌe kahato raꞌyn ti sehay pywuat no maꞌato ti uimienoi yt eweimohey hin i e. 47Tupana saꞌyruꞌin sakiꞌytꞌin taꞌatukuap kahato Tupana e hap e maꞌato eipe ti yt Tupana watnuaria i pote ti yt eweikuap i Tupana ehay e. 48-Saꞌawyꞌi te wuat uruꞌe hap ewy ti en iꞌatuꞌe. En ni wẽtup ywania yi saꞌag Samaria kaipywiat iꞌatuꞌe. En ni ahiag ipiit piat rakat iꞌatuꞌe Iesui pe. 49-Yt kat i ti uikai ahiag katupono atomowato Uiꞌywot pykai yt karãpe i ahiag Uiꞌywot motypot hat toineꞌen e. Eipe ti yt uimowato hin i e. 50Yt atikyꞌesat i uhepiat waku En eiꞌe hap maꞌato toineꞌen wẽtup ok uimotypot hap kyꞌesat hat e. Miꞌi hat ti toineꞌen uwe waku uwe yt e hanuat. Miꞌi ti aru yt nakuaria i eipe e. 51Pywo ti uwe uwe inug uimienoi koꞌi miꞌi hat ti aru yt ikuꞌuro i e Iesui iꞌatuepe. 52Miꞌi hawyi Iuteu ywania akag koꞌi teꞌeroꞌe Iesui pe -Koitywy wyti uruikuap taꞌyn ahiag epiit piat hap katupono aseꞌi Aparãu waku sese pykai ikuꞌuro raꞌyn iꞌewyte saꞌawyꞌi wuat Tupana ehay moherep haria yne yne ikuꞌuro raꞌyn maꞌato ereꞌe -Uwe uwe uimienoi inug miꞌi haria ti aru yt ikuꞌuro sese i ere iꞌatuꞌe. 53Ewat ewaku hap apo poꞌog ahaꞌaseꞌi koro Aparãu ewaku hap kai iꞌatuꞌe. Pywo Aparãu ikuꞌuro raꞌyn iꞌewyte iraniaꞌin Tupana ehay moherep haria iꞌatuꞌe. Saꞌawyꞌi wuaria topap yne maꞌato En -Uwe uimienoi nug haria wyti aru yt ikuꞌuro sese i ere. -En ni poꞌog ahaꞌaseꞌi Aparãu kai ereꞌe teran iꞌatuꞌe. 54Miꞌi hawyi toiꞌatuwesat -Uiwemowato hap yt atunug neran i uiwekaipyi katupono atunug pote meiũran yt kan hamo i uhehay eweipuẽti maꞌato uimowato kahato hat ti aheTupana e. 55Miꞌi hat pe uruetupana eweiꞌe maꞌato yt eweikuap i pykai e. Maꞌato Uito ti kue paĩ atikuap kahato Tupana maꞌato yt atikuap i Tupana uiꞌe pote heso rakatno areineꞌen eiꞌewy kat pote ikuap hat sese Uito imikyꞌesat nug hat sese e. 56Saꞌawyꞌi ti ehaꞌaseꞌi Aparãu taꞌakasa teran kahato uhuut miitꞌin kapiat hap are. Pyno mesup ti Aparãu taꞌakasa raꞌyn uhuut hawyi iwepiit kahato topyhuꞌat raꞌyn e Iesui. 57Aseꞌi Aparãu ti nimo kahato raꞌyn ikuꞌuro maꞌato ewat eieineꞌen hap emotag hap yt 50 anu hin i te heineꞌen hap kai iꞌatuꞌe maꞌato apo Aparãu akasa hamo areineꞌen ereꞌe iꞌatuꞌe. 58-Pywo pe ti Uito ti ahaꞌaseꞌi Aparãu ywãꞌĩ hap eꞌyian mete wuat ieineꞌen hat e Iesui. 59Mio tã e hawyi taꞌatusat nu koꞌi yi totiat mak mak wuat iꞌauka hamo maꞌato Iesui tuwemig miitꞌin sem pyꞌasetpe raꞌyn hawyi toto raꞌyn Tupana motypot yat wato pyi.
Currently Selected:
Iuwãu 8: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.