Karasia 2
2
Haga Typy 2
Pauru 4 Anu Turan Toineꞌen Tama Siria Pe Iꞌewyte Sirisia Pe
1Miꞌi hawyi yi Siria yi Sirisia pe areineꞌen motꞌi kahato. 14 iꞌaman mot hap ewy 14 anu hap ewy areineꞌen itote hawyi areto i tawa wato Ierusarẽi kape. Uiwy Panape wywo areto iꞌewyte atioto uiwy uhyt Titu uiwywo. 2Areto turan Tupana toꞌe uhepe -Pauru atikyꞌesat ereto tawa Ierusarẽi kape mesup e uhepe pote areto i e hap ewy. Putꞌok are raꞌyn itote hawyi areto raꞌyn Iesui potmuꞌeria yianmiaria kape hawyi miꞌiria pe ahenoi henoi kat e hap kat e hap ahenoi yne sehay wakuat Iesui etiat Tupana ehay kat e kat e hap koꞌi ahenoi mesuwat yi tote iraniaꞌin me yt uruꞌywania i pe uiꞌe hap atimoherep yne yne uhehay wakuat areꞌe itote. Iesui mohey haria akagnia puo yn maꞌato migꞌi wo pyi ahenoi katupono taꞌatukuap teran sio pywo uhehay sio wẽtup sehay ahenoi iraniaꞌin me sio Iesui etiat. Iꞌatuehay ewywuat ahenoi hap sio yt taꞌatukuap teran itote tawa Ierusarẽi piaria. Katupono uikuap hamo yn ahenoi wakuat sio yt hap moherep hamo. Aikotã ahenoi sehay wakuat yt Iuteuria i piat hap ewywuat e hap ahenoi itote iꞌatuepe. Taꞌatukyꞌesat kahato uimienoi pywo kahato iꞌatumienoi Iesui etiat hap taꞌatukyꞌesat. Ahenoi yne hawyi -Waku kahato ehenoi miitꞌin me Pauru iꞌatuꞌe aikotã miit ihyha rakat teput kuap kahato rakat ewywuat en iꞌatuꞌe uhepe. Uiwyriaꞌin are miꞌi hap ewy atikyꞌesat Aipotypot Iesui toꞌe uhepe aru -Waku rakat ewy ereput Pauru e hap atikyꞌesat kahato. Yt naku i toꞌe uhepe -Yt kan hamo i emienoi miitꞌin me Pauru toꞌe hap yt atikyꞌesat hin i are. 3Mekewat eꞌat pe ahenoi uiꞌe hap iraniaꞌin miat hap eꞌat pe uiwy mehin Titu toineꞌen uiwywo itote Iesui potmuꞌeria 12 ok takaria pyꞌasetpe. Wẽtup ywania Titu toineꞌen mekewat Kereku ywania yt Iuteu ywania i maꞌato. Miꞌi ete yt kat iꞌatuꞌe hin i Iuteuria Iesui mohey haria akag koꞌi -Yt naku i en eꞌahit sokpe toineꞌen ne. Yt uruꞌywania ewy i e hap yt iꞌatuꞌe i. Yt naku i eko yt iꞌatuꞌe i. Waku uruto ewy etunug no iꞌewyte yt iꞌatuꞌe i aiwy Titu pe. Waku kahato atipuẽti itote. 4Maꞌato miꞌi hawyi ahenoi kahu turan putꞌok iꞌatuꞌe itote wẽtup miitꞌin koꞌi Iesui mohey ran haria heso heso rakaria henoi haria. Miꞌi hawyi urupyꞌasetpe tukupteꞌen miꞌiria yt naku i e hap kat hanuaria neꞌi. Yt uruikuap i iꞌõꞌẽ hap miitꞌin sem itote pote. Miꞌi hawyi teꞌerahaꞌat kahato Titu kape urupyꞌasetpiat kape yt Iuteu ywania i hap kape. Miꞌi hawyi -Waĩꞌiꞌatuꞌe taꞌatuwanetup hawe yt iꞌatueko ewywuat i urutunug itote pote. Miꞌi hawyi taꞌatuehay wo taꞌatukyꞌesat kahato urutunug taꞌatueko nug hap ewywuat katupono taꞌatukyꞌesat taꞌatuehay upiat urutukupteꞌen hap wẽtup sehay saꞌag upi -Uruto poꞌog waku Tupana wanetup hawe iraniaꞌin ywania Iesui mohey haria kai katupono Iuteu eko ewywuat urueko e hap upi hap kyewi. 5Maꞌato ti miꞌiria eko waĩꞌe hap upi yt urutuwat teran hin i paĩ -Yt urueko koꞌi nug hap kaipyi hin i aimoewaku hap urutoꞌe itote mekewat miitꞌin koꞌi pe. Iesui mohey hap kaipyi yn aimoewaku hap tuut e Tupana ahepe. Pywuat wakuat sehay Iesui kaipywiat upi yn urutuwat teran urutoꞌe iꞌatuepe. Katupono uruikyꞌesat kahato Aikaꞌiwat Iesui minug upi ahehakyeraꞌat hap yt kat saꞌup i rakat urutoꞌe itote. Tupana miium yn ni aimoewaku urutoꞌe. Taꞌi yt aheko nug hap upi i Iuteu eko nug hap upi aimoewaku Tupana urutoꞌe yn itote. Taꞌi yt urutuwat hin i Peteruꞌin ehay wẽtup upi. Iesui mohey haria akag koꞌi pykai yt pywo pe i iꞌatuehay urutoꞌe eikawiatno urumipowyro koꞌi eipe Karasia ywania wẽtup eko nug hanuaria pote. 6Taꞌi mekewat eꞌat pe iꞌatu kahato miitꞌin akag koꞌi Iesui mohey haria akag koꞌi tawa wato Ierusarẽi miaria uruiꞌatupuẽti itote miitꞌin akag koꞌi ahyt iꞌatumiꞌairoria koꞌi. Miꞌiria aiꞌakag koꞌi iꞌatuꞌe uruepe katupono miꞌiria poꞌog wakuat iraniaꞌin kai iꞌatuꞌe uruepe maꞌato uiwanetup hawe Tupana yt aiꞌairo i aikahu hap upi aimikuap upi miitꞌin mikyꞌe kahato aito e hap upi yt aiꞌairo i maꞌato tuwepyi aiꞌairo tomikyꞌesat ewy. Maꞌato miꞌiria teꞌeruwemowato kahato itote toꞌope teꞌeruwehay upi Peteruꞌin. Miꞌi tote areineꞌen Titu wywo iꞌatupyꞌasetpe wen maꞌato yt kat i urumuꞌe hat itote. Yt kat iꞌatuꞌe hin i uruepe. Miꞌi hawyi -Uruikyꞌesat etiꞌatumuꞌe iraniaꞌin ywania urueko nug hap yt iꞌatuꞌe i uhepe uruepe. -Pyno waku wẽtup sehay ehenoi ro yt Iuteuria i pe yt iꞌatuꞌe hin i uhepe iꞌewyte Titu pe. 7Maꞌato miꞌi tã teꞌeroꞌe tawa Ierusarẽi miaria Iesui mohey haria akag koꞌi toꞌope uruetiat -Pywo waku ti uhyt Pauru topyhuꞌat Tupana miꞌairo yne iraniaꞌin ywania muꞌe hamo meimuẽwat yt Iuteu ywania i muꞌe hamuat waku iꞌatuꞌe toꞌope uhepiat pe. Maꞌato waku uhyt Peteru ti uruꞌywania Iuteuria ywania muꞌe hamuat topyhuꞌat Tupana miꞌairo iꞌatuꞌe toꞌope itote torannia Iesui emiitꞌin akag koꞌi mekewat 12 ok takaria. Maꞌato -Waku etiꞌatumuꞌe iraniaꞌin ywania aheko ewy Pauru yt iꞌatuꞌe hin i uhepe itote yt iꞌatuꞌe i paĩ. 8Taꞌi itotiaria tikuap kahato aikotã Tupana Paꞌãu toineꞌen kahato uhetiat hap iraniaꞌin ywania muꞌe Iesui etiat hap taꞌatukuap maꞌato iꞌewyte taꞌatukuap kahato aikotã Ipaꞌãu toineꞌen kahato Peteru kai uruꞌywania Iuteu ywania muꞌe Iesui etiat hamuat hap taꞌatukuap kahato. Miꞌi pote -Taꞌi aiꞌywania Iesui mohey haria muꞌe kahato hat sese Peteru iꞌatuꞌe maꞌato Pauru iꞌewyte te Tupana Paꞌãu ipotpap kahato ipiit pyi iraniaꞌin ywania muꞌe hamo Iesui mohey haria apykok hamo iꞌatuꞌe Ierusarẽi miaria imohey haria akag koꞌi. 9Itote Ierusarẽi me atikuap myẽꞌym ok miit poꞌog Iesui mohey haria akag koꞌi myẽꞌym Tupana motypot yat apyꞌyha ewy iheg nakaria ewywuat koꞌi miꞌiria. Wẽtup ok mekewat Iesui ywyt sese aiwy mehin Tiaku wẽtup ok Iesui potmuꞌe sese aiwy mehin Peteru wẽtup ok Iesui potmuꞌe sese aiwy mehin Iuwãu. Miꞌiria poꞌog miitꞌin mimotypot koꞌi itote atikuap. Miꞌiria tikuap kahato Tupana Paꞌãu miꞌairoria kahato aiwy Panape iꞌewyte uito hap iraniaꞌin ywania muꞌe hamuat hap yt Iuteuria muꞌe hamuat hap taꞌatukuap. Taꞌatukuap taꞌyn hawyi teꞌeroꞌe mehin Panape pe iꞌewyte uhepe -Koitywy ti pyno uruiꞌatuꞌairo eipe wẽtup eko rakaria muꞌe hamo iꞌatuꞌe. Maꞌato aheko ewywuaria Iuteu ywania kape wemurui ãpy sokpe tek haria kape waku uruto urutuwat iꞌatumuꞌe hamo iꞌatuꞌe uhepe iꞌewyte Panape pe. Miꞌi hawyi teꞌeruweponug iꞌatupo sese koꞌi uiꞌakag note iꞌewyte uhyt Panape akag note miꞌi hawyi mio tã iꞌatuꞌe -Pyno Tupana etiꞌatupoꞌoro ro Panape iꞌewyte Pauru wuatꞌi ywania muꞌe hamo iꞌatuꞌe. Miꞌiria ti iꞌewyte urumiꞌairo koꞌi wuatꞌi ywania muꞌe Esaꞌyru sese etiat hamo iꞌatuꞌe. Miꞌi hawyi waku iꞌatuꞌe uruepe teꞌeruwehum haype Tiaku Peteru Iuwãu. 10Miꞌi hawyi teꞌeroꞌe uruepe -Waku eweiꞌatumuꞌe Iesui ehay ete wuatꞌi ywania iꞌatuꞌe katupono miꞌi nug kuap hap Tupana tum naꞌyn ehepe iꞌatuꞌe uruepe. Waku kahato iꞌatuꞌe. Eweiꞌatumuꞌe turan yt waureꞌeweiꞌe teiꞌo ihakyꞌeꞌi rakaria poi miꞌu wuat hap ete pyi iꞌatuꞌe uruepe. Eweiꞌatupowyro ro meimuẽwuaria hatek takaria iꞌewyte eweiꞌatumuꞌe miꞌiria Iesui etiat turan iꞌatuꞌe uruepe itote tawa Ierusarẽi me. Mio tã iꞌatuꞌe uruepe hawyi -Taꞌi uruwyriaꞌin miꞌi hap ewy yn urutunug teran haꞌawyte pyi mesup te raꞌyn urutoꞌe haty wo urupyꞌa pyi Tiaku Peteru Iuwãu me urutoꞌe ainapin hawyi.
11Wẽtup eꞌat pe maꞌato aiꞌakag Peteru hewyry uruewawi tawa Atiokia kape mekewat wẽtup ywania Iesui mohey haria kapiat taꞌakasa hamo toto. Miꞌi tote mekewat eꞌat pe urutunug ienuk wato kahato hap. Waku kahato itote watenuk wẽtup miit ewy uruto iraniaꞌin ywania Peteru wywo waku yne. Maꞌato urutenuk turan putꞌok e itote uhyt Tiaku mipoꞌororia Iuteu ywania sese tawa Ierusarẽi kaipywiat. Tuwemoherep hawyi aiwy Peteru yt tenuk teran i poꞌog uruwywo yt Iuteuria i ywania koꞌi aito pote. Toikyꞌesat Tiaku mipoꞌoro koꞌi wywo yn tenuk hap toꞌywania wywo yn tenuk teran aikotã Iuteu ywania eko ewy tenuk itote. Taꞌi Iuteu ywania yt teꞌerenuk hin i wẽtup ywania wywo -Tupana yt tikyꞌesat i watenuk yt naku i nug haria wywo iꞌatuꞌe toꞌope taꞌatueko ewy. Miꞌi pote Peteru toto iraniaꞌin totepyi toꞌywania wywuat tenuk hamo. Yt Iesui ewy hin i tutunug itote. Miꞌi tã neꞌi tutunug hawyi meremo uipoĩꞌam iꞌatupyꞌasetpe Peteru ewaĩ hamo. -Taꞌi yt uiwese i raꞌyn eete Peteru are haty wo. Taꞌi yt nakuap no i ewy etunug mesup are itote typyꞌi tok pe. Kat pote etoiat iraniaꞌin ywania Iesui mohey haria wẽtup ywania upi. -Uito poꞌog miꞌiria kai Iuteu uito pote eꞌe hap saꞌag hap wywo are. 12Kat poteĩ pyno yt erenuk teran i raꞌyn yt Iuteuria i wẽtup ywania wywo. Kat pote Tiaku mipoꞌororia wywo eꞌywania Iuteuria wywo yn erenuk meiũpe are. Kat pote erekenꞌẽ kahato Iuteuria ywania eko motypot haria pupi are. Yt naku i miꞌi tã etunug Peteru are. 13Miꞌi tã are pote torannia Iesui mohey haria taꞌatuꞌatunug typy sehay upiat ewy teꞌeruwaꞌatunug itote. Ipatꞌok Peteru wywo ipatꞌok uiwywo. Iꞌewyte aiwy Panape toto Peteru eko ewywuat raꞌyn. Iꞌewyte torannia iraniaꞌin Iuteuria tuwat Peteru enuk hap kape iraniaꞌin ywania enuk hap kaipyi. Yt naku i kahato topyhuꞌat itote. Yt woꞌowese hap ewy hin i taꞌatunug itote. 14Miꞌi pote areꞌe raꞌyn Peteru pe typyꞌi ehamo haty wo -Mehin Peteru kat pote yt ewyry i Iesui piat aimuꞌe hap ewy are. Kat hamoĩ etikyꞌesat Iuteuria eko ewy meiũpe. En ni Iuteu ywania sese maꞌato koitywy erenuk kahato uruwywo yt Iuteu ywania i wywo yt Iuteu ywania eko ewy hin i erenuk meiũpe are. Taꞌi koitywy erenuk kahato urupyꞌasetpe. Erenuk taꞌyn mesup yne ehamo mehin are. En ni Iuteu ywania uito ewy wen Peteru maꞌato eko ti yt Iuteuria eko ewy hin i tuereto ereineꞌen are. Pyno kat poteĩ etikyꞌesat iraniaꞌin meiũpiaria Iuteu eko ewy hap ewy mesup uhyt are Peteru pe. Kat poteĩ iꞌatuꞌewy ereineꞌen saꞌawyꞌi maꞌato mesup te etiꞌatumoꞌakagꞌaia moꞌakagꞌaia kahato iraniaꞌin Iuteuria eko ete are. Iuteuria eko ewy sese yt etiꞌatunug hin i te areꞌe Peteru pe. 15-Taꞌi aito Iuteuria ywania aiꞌywãꞌĩ kaipyi are. Aheko saꞌawyꞌi wuat kaipyi watikuap aiꞌywania ehay -Iraniaꞌin ywania ti yt naku i nug haria iꞌatuꞌe aiꞌywotꞌin aityꞌin ahepe. 16Maꞌato koitywy watikuap taꞌyn wẽtup eko mio tã e -Aheko nug hap kaipyi neꞌi yt tuut i ahehakyeraꞌat hap e hap watikuap. Taꞌi yt Iuteuria i eko nug hap kaipyi hin i toineꞌen ahehakyeraꞌat hap e. Taꞌi Tupana wanetup hawe ahewaku hap yt tuut i aiꞌywania eko nug hap kaipyi neꞌi hap watikuap mesup Iesui e hap ewy. Taꞌi mekewat waĩꞌe hap watunug yne pykai yt ahewaku kuap i e Tupana mesup are. Mesup Uhaꞌyru Iesui mohey hap kaipyi yn ni worohoꞌomohãpyk kuap e Tupana ahepe mesup are. Koitywy ti watomohey raꞌyn Iesui Tupana Mipoꞌoro Aiporekuat nuat aito imohey kahato haria are. Koitywy watikuap taꞌyn yt uwe i tuwehakyeraꞌat kuap teko waku nug hap kaipyi neꞌi hap watikuap Peteru are. Watikuap taꞌyn aikotã Aikaꞌiwat Iesui yn ahehakyeraꞌat kuap hat topyhuꞌat hap watikuap Peteru are. 17Koitywy watikuap wẽtup muap yn toineꞌen Tupana kape. Miꞌi yn toineꞌen Tupana kapiat are. Miꞌi muap ti Aiwy Iesui mohey hap ti are. Uwe uwe yt toto i hupi miꞌi haria ti yt nakuat i nug hanuaria wo Tupana wanetup hawe tukupteꞌen are. Miꞌiria tunug kahato taꞌatueko wakuap pykai hoꞌowasat rakaria wo tukupteꞌen Tupana pe sio Iuteu ywania sio wẽtup ywania are Peteru pe itote. Taꞌi Aikaꞌiwat tuut yt aipatꞌok patꞌok hamo i tuut are maꞌato aikotã hũria tukupteꞌen toꞌopype pype hap ewy ainug hamuat tuut are. Wẽtup ywania yn ainug hamo tuut Iesui uiwy areꞌe Peteru pe itote. 18Iesui mohey hap kaipyi yn ni ahehakyeraꞌat hap toineꞌen uhyt are. Waku kahato watunug yne Tupana piat ainapin saꞌawyꞌi wuat hap koꞌi wen maꞌato miꞌi koꞌi nug hamo yt watuwehakyeraꞌat kuap i mehin are. Maꞌato watomohey aheko ahehakyeraꞌat kuap pote hoꞌowasat rakaria sese wo i raꞌyn watoineꞌen uhyt are. 19Peteru etikuap apo kat pote yt watuwehakyeraꞌat kuap i mekewat Tupana woꞌonapin hap nug yne hap kaipyi. Taꞌi Tupana tikyꞌesat kahato tepiat ainapin hap nug hap yne yne hap toikyꞌesat kahato maꞌato wahãꞌãg pykai watiꞌaparap kahato tuereto yne yne imikyꞌesat nug hap ete yt watiꞌaparap teran hin i pykai. -Waku atunug yne imikyꞌesat watoꞌe wen maꞌato watiꞌaparap aparap imikyꞌesat ewywuat nug hap ete. Miꞌi pote yt watuwehakyeraꞌat kuap i aiwekaipyi yne Tupana mikyꞌesat nug hap upi wahãꞌãg kahato pykai are. Taꞌi watiꞌaparap aparap hawyi hoꞌowasat rakaria wo watukupteꞌen aiwanetup hawe aipyꞌa pe are. Watiꞌaparap kahato tuereto imikyꞌesat nug hap ete areꞌe saꞌawyꞌi itote Iesui potmuꞌe Peteru pe wuatꞌi Iuteu ywania ehamo iꞌatupyꞌasetpe mekewat ienuk hap eꞌat pe turan. Miꞌi pote yt ahehakyeraꞌat kuap i mekewat waĩꞌe hap yt uwe i nug yne kuap pote are. Miꞌi pote uheha yt mekewat waĩꞌe hap kape hin i uhehakyeraꞌat hap kyewi maꞌato Tupana Saꞌyru kape yn uheha are Peteruꞌin me. 20-Uito yt atunug i te emikyꞌesat ewy aiꞌe hamo are. Tupana mikyꞌesat ewy atunug neran kahato wen maꞌato uhesaika hap yt toineꞌen i te uipiit pe inug hamuat watoꞌe hap watikuap are. Miꞌi pote Iesui kape waku watokosap hesaika hap sat hamo are. Yt tuwemikyꞌesat ewy i ikuꞌuro ariaꞌyp posak ete Iesui maꞌato Tupana mikyꞌesat ewy ikuꞌuro ariaꞌyp posak ete watoꞌe are. Miꞌi hap ewy atunug neran wen. Koitywy uipytꞌat teran kahato Iesui Paꞌãu wo. Miꞌi pote koitywy uimikyꞌesat koꞌi hokpap yne raꞌyn. Uikaꞌiwat Iesui mikyꞌesat koꞌi nug hamo yn naꞌyn areineꞌen koitywy are. Mesup ti koitywy Tupana Saꞌyru mohey hatno yn areineꞌen. Koitywy wẽtup ok uikyꞌe hat motypot hamo yn naꞌyn areineꞌen watoꞌe. 21Taꞌi Tupana ti hegyiꞌat kahato ahepe tuwekaipyi aikyꞌe are. Maꞌato watuwekyiꞌat kuap ahehakyeraꞌat hap aheko nug hap saꞌup mo pote yt kat hamo i Iesui ikuꞌuro ariaꞌyp posak ete ahaꞌup mo ahehakyeraꞌat hamo are Peteruꞌin me tawa Atiokia pe ienuk hap eꞌat pe. Yt naku i so watoꞌe neꞌi Tupana pe are. Taꞌi yt naku i Tupana egyiꞌat hap Tupana wese hap pun haria wo watopyhuꞌat are itote yne pe.
Currently Selected:
Karasia 2: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.