Korosi 2
2
Haga Typy 2
1Manaꞌin uhytꞌiꞌin tawa Korosi piaria haꞌawytepyi mesup te ahoꞌopot kahato uipyꞌa pe ehetiatno. Uhehay kahato Tupana pe ehetiatno katupono worohoꞌonug neran eipe Aikaꞌiwat emiit no imohey sese haria wo. Maꞌato yt ehepe yn i ahenoi teran maꞌato iꞌewyte iꞌatu kahato yt uiꞌakasa i te haria iꞌewyte tawa Irautiseia piaria kape hap ahẽtup aat kaꞌap Tupana pe. 2-Atikyꞌesat miꞌiria ieineꞌen kahato Esaꞌyru mohey hap upi hap ahẽtup. Etimonik to iꞌatuꞌarotꞌi hap areꞌe Tupana pe. Miꞌi hawyi etunug miꞌiria iwepiit rakaria wo are. Etiꞌatuꞌapoꞌahik miꞌiria woꞌokyꞌe haria wo aikotã urueꞌyni uruiꞌokpoꞌi hap ewy are. Atikyꞌesat miꞌiria hesaika rakaria wo surara ewywuaria ehay moherep haria wo are. Atikyꞌesat pywuat sehay kuap kahato haria wo are. Atikyꞌesat ikuap hotꞌok kahato sehay pywuat hawyi -Pywo ti rat e haria wo tukupteꞌen are. Atikyꞌesat kahato taꞌatukuap kahato mekewat eꞌe hap saꞌawyꞌi wuat yt heremo i rakat Iesui eꞌyian mete wuat are. Mekewat -Atipoꞌoro aru Uhaꞌyru Eiporekuat no eꞌe hap are. 3Aikaꞌiwat Iesui pe toineꞌen yne yne weꞌeg hap koꞌi yne yne mikuap koꞌi are. Watikat pote watipuẽti yne. Wahẽtup tope pote tuwemoherep taꞌyn ahepe yne yne wuatꞌi Tupana mikuap yne. Wahẽtup pote Iesui aimoweꞌeg kuap Tupana mikuap koꞌi ete are.
4Pyno eiweꞌeg wo o eimaꞌat sehay wuat teran haria pupi. Waĩꞌeweiꞌe o iꞌatuehay wuꞌuka hap neꞌi ete are iꞌatuehay yt pywo rakat i. Yt eweiwat reiꞌo iꞌatuehay upi katupono yt pywo i sehay hap nug kuap kahato haria miꞌiria. Iꞌatuweꞌeg kahato heso nug hamo. Iꞌatuehay se kahato tuereto maꞌato eimaꞌat hamo neꞌi. Yt ereto teiꞌo iꞌatuehay upi are. 5Uimowepiit kahato haria eipe. Waku kahato eweikupteꞌen Aipotypot Iesui mohey haria sese raꞌyn ewy. Waku wẽtup surara yꞌam miat hat ewy eweikupteꞌen -Yt atoiat i imohey hap eweiꞌe eiwoꞌope. Eiwanetup hap yt eweiꞌywyk hin i. -Uruto Iesui mohey haria waku eweiꞌe. Miꞌi hap araꞌakasa yne mesuwe uiwanetup hawe. Yt areineꞌen i eipyꞌasetpe wen maꞌato uimuꞌetu wuat ewy atikuap. Uimowepiit kahato haria eipe uiwanetup hawe uipyꞌa pe are.
Pauru Tikyꞌesat Korosi Piaria Tuwemotag Hap Tupana Wywo
6Miꞌi hawyi waku eweiꞌe Iesui pe -Uruikyꞌesat kahato En urukaꞌiwat no hap eweiꞌe. Miꞌi ti waku watoꞌe. Iꞌewyte mesup yne eꞌat pe waku watoꞌe Aikaꞌiwat Iesui pe -Worokuap kahato teran uipyꞌa pe waku watoꞌe. Uruikyꞌesat aiwanetup hap wẽtup ok wanetup hap ewy yn waku watoꞌe. Miꞌi ti iꞌewyte waku watoꞌe aat kaꞌap watomohey hawyi. 7Waku watopyhuꞌat Aikaꞌiwat ewy are. Saꞌawyꞌi uruiꞌatumuꞌe kahato eipe Iesui ete. Miꞌi hawyi eweimohey Iesui hawyi waku. Koitywy maꞌato waku eweimohey poꞌog poꞌog yne eꞌat. Aimikoi hapo kahato rakat ti ihãite raꞌyn tuwesapo nug kahato hawyi. Miꞌi hap ewy karãpe watunug Aimimohey mikyꞌesat ewy aat kaꞌap. Watimohey kahato raꞌyn Iesui hawyi ahehãite hap kahato raꞌyn watikuap. Miꞌi aikotã tuwemotag kahato ariaꞌyp wato ewy hapo yi piit pe hap ewy watoineꞌen. Miꞌi hap ewy waku ahehay watipehik Iesui ehay ete. Miꞌi hawyi -Waku kahato En Iesui aiꞌe hap yn watoꞌe aipyꞌa pe. Arehum ewowi watoꞌe yn ahehãite imohey hap kaipyi.
Tukupteꞌen Eipyꞌasetpe Sehay Saꞌag Enoi Haria
8Aimuꞌe haria iraniaꞌin tuwekaipyi aimuꞌe. Yt Tupana mipoꞌororia i iꞌatu kahato tukupteꞌen. Iraniaꞌin aimuꞌe haria nagnia ehay kaipyi miit wanetup hap kaipyi mekewat maꞌãu saꞌag wanetup hap aimuꞌe saꞌag. Yt imohey i haria porekuat ehay moherep haria iraniaꞌin. Yt Aipotypot upiat aimuꞌe haria hin i woꞌomaꞌat haria wo miꞌiria. Miitꞌin wanetup hap ewy yn aimuꞌe. Eiweꞌeg wo o iꞌatuwoꞌomuꞌe hap pupi katupono aimaꞌat reran haype are. 9Taꞌatukyꞌesat eipe taꞌatuemiit no aikotã waimiri ewy aimuꞌe iraniaꞌin. Tupana tipoꞌoro Tosaꞌyru Aiporekuat no maꞌato Tosaꞌyru piit pe toineꞌen miit sese wo Tupana tuwepuꞌi nug. Iesui ti miit sese toineꞌen aiꞌewywuat. Iꞌewyte Iesui piit pe Tupana yne yne toineꞌen. 10Iꞌatu kahato atipy piaria akag morekuaria koꞌi tukupteꞌen wen Iesui poꞌog poꞌog miꞌiria kai e. Iesui ti poꞌog poꞌog Morekuat no ahiag kai poꞌog hesaika ahiagnia kai poꞌog poꞌog nakat. Miꞌi hawyi aito Iesui mohey haria pote iwywo wẽtup miit ewy yn watoineꞌen. Miꞌi pote tutum ahepe toieineꞌen hap wuatꞌi eꞌat piat ieineꞌen hap mesuwe iꞌewyte atipy pe. Koitywy poꞌog waku aheineꞌen hap saꞌawyꞌi wuat kai. 11Pyno karãpe topyhuꞌat aito Iesui mohey haria watopyhuꞌat wẽtup ywania ewy iwywo. Saꞌawyꞌi aipiit mikyꞌesat saꞌag ewy yn watunug kuap maꞌato mesup Iesui titek taꞌyn hawyi toipugha aimikyꞌesat saꞌag koꞌi aheko saꞌag koꞌi aipotpap saꞌag hap koꞌi. Toitek pun naꞌyn aiwanetup hawiat aikotã saꞌawyꞌi Iuteu ywania tunug taꞌatumepyt tuwemoherep ihainia hawyi taꞌatuemurui sokpe tek pun iꞌatueko ewy. Miꞌi hap ewy Tupana titek aimikyꞌesat saꞌag hawyi toipun naꞌyn pya aikai e. Miꞌi hap ewy Iesui titek kuap aimikyꞌesat saꞌag koꞌi are. 12Iuteu ywania emurui ãpy tek -Uito Iuteu ywania e hamo maꞌato aito Iesui mohey haria ahetꞌok yꞌy wuat hamo watimoherep Iesui mohey hap. Min watoꞌe yꞌy pe turan Iesui syp hap watimoherep ahetꞌok hawe. Aiminug saꞌag koꞌi kaipywiat aihep Tupana piat hap watuwẽtem yꞌy pywiat hawyi. Watimoherep Tupana tihep taꞌyn Iesui guꞌuro pyi hap tesaika hap no watimoherep ahetꞌok hawe. Aiminug saꞌag nug hap pywiat aihep Tupana piat hap watimoherep ahetꞌok hawe. 13Aikotã ikuꞌuro rakat yt ikuap hin i ahehay. Yt toikuap i watoineꞌen itotiat hap ewy watopyhuꞌat saꞌawyꞌi Tupana kapiat ikuꞌuro rakat ewy yt watikuap i ihay yt wataꞌakasa kuap i howawi katupono aiminug saꞌag aipyhyp kahato howawi ikuap hamuat. Iꞌewyte aimikyꞌesat saꞌag kape yn aiwanetup hap. Kat pote saꞌawyꞌi yt kat i Tupana ehay aikai maꞌato koran yt miꞌi tã hin i katupono Tupana tomoweityk yne yne raꞌyn aiminug saꞌag koꞌi. Aimoieineꞌen i guꞌuro pyi hap ewy tutum ahepe. Karãpe watomohey Iesui mekewat eꞌat pe watuwẽtem guꞌuro pyi hap ewy Iesui tuwẽtem hap ewy. Koitywy watoineꞌen Tupana ewowi yt saꞌag ewowi i raꞌyn. Yt ikuꞌuro rakaria ewy i raꞌyn mesup watoineꞌen maꞌato Tupana ewowi aheha ahewaure mesup.
14Saꞌawyꞌi watopyhuꞌat weteweru wato kahato haria ewy. Aikotã aiweteweru hap wato turan aimoꞌarot kahato hap ewy. Miwan me iwato kahato topyhuꞌat hap ewy aiweteweru hap. Yt ikahu hin i ewy aiꞌakit hap topyhuꞌat. Miꞌi hap ewy aiweteweru hap saꞌawyꞌi aikotã yt karãpe i wahaꞌup nug kuap hap ewy. Miꞌi hawyi maꞌato -Atum yne miitꞌin weteweru hap saꞌup mo e Iesui Tupana pe. Miꞌi hawyi taꞌatumoheg Iesui ariaꞌyp posak ete. Toieineꞌen hap tutum aiweteweru hap saꞌup mo. Koitywy Tupana toꞌe ahepe -Yt kat i iraꞌyn ti mekewat miwan miat eweterut hap tuweityk taꞌyn e. Uhaꞌyru tum yne raꞌyn eiweteweru hap saꞌup Uhaꞌyru suu taꞌat yne hawyi ikuꞌuro ariaꞌyp posak ete e Tupana ahepe mesup taꞌyn. 15Saꞌawyꞌi raꞌyn Iesui ikuꞌuro turan toiꞌakit yne raꞌyn ahiag. Tesaika wo toiꞌatuꞌapeman kytyt maꞌãu saꞌag koꞌi. Aipotypot ikuꞌuro ariaꞌyp posak ete hawyi aihep ahiagnia po pyi kahato. Iesui tiꞌakit yne raꞌyn ahiag. Koitywy wuatꞌi mikyryꞌi wo raꞌyn tukupteꞌen ahiagnia -Yt ewesaika i raꞌyn e Tupana wuatꞌi ehamo ahiag koꞌi pe.
Yt Eweiwat Iraniaꞌin Ehay Upi
16Miꞌi pote yt naku i watuwat wẽtup sehay upi katupono -Ewehenuk i urueko yt ewy i hawyi Tupana yt ehehakyeraꞌat hin i iꞌatuꞌe. Yt eiweꞌyꞌu hãpyk i uruꞌewy pote yt naku i te eweikupteꞌen Tupana wanetup hawe iꞌatuꞌe saꞌag. Yt eweimohey teiꞌo iꞌatuehay -Yt eweiwat i uruenuk wato hap Tupana motypot hap kape pote hoꞌowasat rakaria eweipyhuꞌat iꞌatuꞌe. Tupana eꞌat mesup iꞌatuꞌe. Tupana ewaty mesup iꞌatuꞌe. Tupana eꞌanu mesup iꞌatuꞌe. Maꞌato yt eweimotypot i Tupana mesuwat eꞌat pe pote yt Tupana miehakyeraꞌat koꞌi i wo eweipyhuꞌat iꞌatuꞌe. Maꞌato yt eweiwat reiꞌo mekewat wẽtup sehay upi katupono Iesui yn ahehakyeraꞌat kuap paĩ are. 17Saꞌawyꞌi wuaria Iuteu ywania inug kahato taꞌatueko koꞌi ahehakyeraꞌat hap Iesui uut hap moherep hamo Aiporekuat nuat uut hap moherep hamo. Karãpe wataꞌakasa miit putꞌok e turan wataꞌakasa ipaꞌãu kape. Miꞌi hap ewy iꞌatueko koꞌi Iesui uut hap moherep hamuat. Iuteu eko timoherep kahato Iesui uut saꞌawyꞌi pyi te aikotã aipaꞌãu yi totiat timoherep ahut hap ewy are.
18Yt eweiwat reiꞌo iꞌatuehay upi karapeĩ teꞌeroꞌe ehepe -Yt eweikupteꞌen i Tupana miehakyeraꞌat koꞌi katupono yt uruꞌewy i ehewaku hap. Poꞌog uruto eikai katupono atipy piaria ihay uruwywo urumuꞌetu iꞌatuꞌe. Urutaꞌakasa Tupana urumuꞌetu iꞌatuꞌe. Atipy piaria kuap haria uruto uruehay iꞌatuwywo iꞌatuꞌe. Miꞌi pote poꞌog uruto eikai iꞌatuꞌe. Tupana miehakyeraꞌat koꞌi sese uruto. Eipe yt hin i katupono uruto paa e haria sese iꞌatuꞌe. Maꞌato yt pywo pe i mio tã iꞌatuꞌe. Teꞌeruwemotypot hap yn iꞌatuwanetup hawe. Iꞌatuwanetup hap miit wanetup hap ewywuat yn. Maꞌato yt kat i Iesui motypot hap iꞌatupyꞌa piat pykai. 19Maꞌato aito yt iꞌatuꞌewy i. Iesui sat haria kahato aito. Miꞌi Miit yn Aiꞌakag. Aipiit tuwehik kahato aiꞌakag Iesui wanetup hap upi. Ahãtikag iꞌewyte apyꞌyha aipuꞌi hawyi aipe hawyi ahaga koꞌi toꞌosat kahato Aiꞌakag Iesui wywo hawyi aipuꞌi apyꞌyha wẽtup piit yn watopyhuꞌat. Miꞌi hap ewy watoineꞌen Iesui wywo wẽtup piit ewy. Iesui ti Aiꞌakag. Aito ipiit ewy. Aiꞌakag kaipyi aipiit ihãite tuwemotag. Maꞌato miꞌiria -Uruto poꞌog eikai e haria -Uruto ti eiꞌakag e haria miꞌiria. Yt taꞌatukyꞌesat i Iesui taꞌatuꞌakag wo are. Maꞌato aito Iesui mohey haria watukupteꞌen. Taꞌi Iesui piit iaga ewywuaria aito. Miꞌi pote aipiit tuwehik kahato Aiꞌakag Iesui ete. -Urutuwehakyeraꞌat uruto waku nug haria pote iꞌatuꞌe saꞌag maꞌato -Aito Iesui miehakyeraꞌat haria watoꞌe. Tupana esaika hamo yn aimohãpyk kuap watoꞌe. 20Kat pote pyno mesup te eweiwanetup te miꞌiria ewywuaria are. Mesuwarotiaria -Urutuwehakyeraꞌat kuap rat aru e haria. Yt naku i mekewat miꞌu watuꞌu e haria. Yt naku i watemig mekewat iꞌatuꞌe. Yt naku i watopag aiwẽ pe mekewat ipuꞌi e haria. Miꞌi tã watunug mote yt wataꞌam i iꞌatuꞌe saꞌag ahiag ehay upi. 21Teꞌeruwehakyeraꞌat teran miꞌu kaipyi. -Ewetunug yne waĩꞌuruꞌe hap miꞌi pote Tupana ehehakyeraꞌat iꞌatuꞌe. Maꞌato waĩꞌiꞌatuꞌe hap yt Tupana waĩꞌe hap ewy hin i are katupono teꞌeruwekaipyi teꞌeruwehakyeraꞌat teran haype. Yt naku i kahato are. 22Maꞌato watomohey raꞌyn Aipotypot Iesui yn Ahehakyeraꞌat kuap hat watoꞌe katupono ikuꞌuro aikawiatno hawyi aihep mekewat ahiagnia ehay po pyi watoꞌe. Yt watomohey poꞌog i raꞌyn watuwehakyeraꞌat kuap hap watoꞌe. Koitywy watikuap taꞌyn yt miꞌu kaipyi i ahehakyeraꞌat hap watoꞌe. Watikuap taꞌyn aheko miꞌu yt aimohãpyk kuap i Tupana wanetup hawe watoꞌe. 23Maꞌãu saꞌag upiaria teꞌeruwepiitmosatyꞌi kahato hawyi -Uruimotypot Tupana poꞌog eikai iꞌatuꞌe saꞌag ahepe. Urutuwemohit kahato poꞌog eikai urutuwemosyꞌat aat kaꞌap pote poꞌog waku uruto eikai iꞌatuꞌe ahepe. Watehaꞌat miꞌiria kape hawyi aikotã weꞌeg kahato haria ewy tukupteꞌen maꞌato iꞌatuwanetup hawe saꞌag yn iꞌatuwanetup hap taꞌatupiit mikyꞌesat saꞌag nakat ewy yn iꞌatuwanetup hawe. Teꞌeruwepiitmosatyꞌi kahato teꞌeruwemotypot hamo. Maꞌato iꞌatuwanetup hawe taꞌatunug taꞌatupiit mikyꞌesat saꞌag nakat yn. Iꞌatupotꞌewaĩ hap koꞌi yt iꞌatumohãpyk kuap i Tupana wanetup hawe. Teꞌeruwepiitmohatyꞌi teꞌeruwehakyeraꞌat hamo wen maꞌato yt pykai i katupono Iesui yn ahehakyeraꞌat kuap tokuꞌuro hamo paĩ an watoꞌe.
Currently Selected:
Korosi 2: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.