Iesui Potmuꞌeria 23

Haga 23

Pauru Woꞌonapin Haria Pyꞌasetpe Iraꞌyn

1Miꞌi hawyi Pauru ihaꞌat kahato woꞌonapin haria kape. Miꞌi hawyi toꞌe iꞌatuepe -Uheꞌywytꞌin e. Nimo pyi te meiũ te areineꞌen Tupana ehamo yt kat i atunug saꞌag uiwemoti hamo e. 2Maꞌato paꞌi koro Anania toꞌe -Eweiwẽpetek to e Pauru yatypiaria pe. 3Miꞌi hawyi Pauru toꞌe paꞌi koro pe -Taꞌi Tupana ti aru eꞌahyk e. En wyti yi pype ikytsig nakat ewy. Meiẽpe ereineꞌen apyk pe uikuap hamo aikotã uito waku sio yt nakuat i hap kuap hamo e. Maꞌato iwan miat ainapin hap kaipyi yn ni watikuap miitꞌin waku sio yt naku i hap koꞌi uhyt e. Mio eweiwẽpetek to ere yt aiwoꞌonapin hap ewy i raꞌyn e Pauru paꞌi koro Anania pe. 4Miꞌi hawyi Pauru yatypiaria teꞌeroꞌe tope -Ehay saꞌag apo Tupana miꞌairo ahepaꞌi koro ete iꞌatuꞌe. 5Miꞌi hawyi Pauru tiwesat -Yt atikuap i wyti paꞌi koro meiũ hap uiwyriaꞌin katupono miwan me -Yt ehay koꞌi koꞌi teiꞌo eiporekuat ete e ti ainapin hawe e Pauru. 6Miꞌi hawyi Pauru tikuap taꞌyn typy sehay mohey haria tukupteꞌen itote hap -Aikuꞌuro hawyi yt kat i aheineꞌen i hap e haria iꞌewyte woꞌonapin haria -Taꞌi aikuꞌuro hawyi aheineꞌen hap sese watipuẽti e haria tukupteꞌen itote. 7Miꞌi pote toꞌe haty wo -Uheꞌykeꞌetꞌin uito ti woꞌonapin hat iꞌewyte uiꞌywot miꞌi te e. Taꞌi atomohey kahato aikuꞌuro hawyi Tupana aimoieineꞌen i hap. Miꞌi atomohey pote yt naku i iꞌatuꞌe uhepe meiũpiaria e. 8Mio tã e hawyi miitꞌin tuwepatꞌok kahato itotiaria tuꞌuka sehay wuat hamo katupono ipatꞌok teꞌeroꞌe -Yt kat i rat aikuꞌuro rakirẽ wuat aheineꞌen i hamuat hap e haria. Iꞌewyte yt uwe i Tupana mipoꞌororia atipy kaipywiaria e haria. Yt kat i rat ipaꞌãu toineꞌen e haria. Maꞌato ipatꞌok imohey kahato yne meimuẽwat mio wat koꞌi. Taꞌatuhenoi yne meimuẽwat koꞌi yn. 9Miꞌi pote iꞌatuehay pirik kahato itotiaria. Miꞌi hawyi iꞌatupoĩꞌam iraniaꞌin wanꞌi wanꞌiꞌe haria teꞌeroꞌe haty wo hamo. Mio tã iꞌatuꞌe -Yt kat e i ti meiũwat ihainia tiꞌaparap uruwanetup turan iꞌatuꞌe. Pyno atipy kaipywiat suut hat apo ihay tope imienoi wuat iꞌatuꞌe sio ipaꞌãu henoi tope yt watikuap i wen maꞌato hãpyk kahato ihay watipuẽti iꞌatuꞌe wanꞌi wanꞌiꞌe haria. 10Miꞌi hawyi toꞌopyꞌahak kahato raꞌyn toꞌope. Miꞌi pote surara akag koro tokenꞌẽ. Taꞌatuhep hep irane sio Pauru taꞌatupytyk taꞌyn. Miꞌi hawyi toiꞌatupoꞌoro tesuraraꞌin Pauru eroꞌok ipyꞌahak takaria yatype pywiat hamo ipag suraraꞌin eiam iheg nakat piat hamo.

11Miꞌi hawyi mekewat ewãtym Aikaꞌiwat toineꞌen Pauru ywytpe yꞌam me. Miꞌi hawyi toꞌe -Yt erekenꞌẽ teiꞌo Pauru katupono woropoꞌoro hamuat tawa wato Huma piaria kape e. Aikotã Ierusarẽi miaria pe ehenoi uhetiat miꞌi hap ewy atikyꞌesat ehenoi tawa Huma piaria pe uhetiat e. Miꞌi tupono eremowepiit yn no e Pauru pe Aikaꞌiwat.

Pauru Huma Kape Toto Teran

12Ihatꞌok turan ipatꞌok Iuteuria teꞌeruwaꞌatunug i raꞌyn Pauru auka hamuat kuap hamo. Miꞌi hawyi teꞌeroꞌe toꞌope -Pywo yt watenuk i iꞌewyte yt yꞌy i wyti watuꞌu iꞌatuꞌe. Watiꞌauka Pauru rakirẽ waku watenuk i raꞌyn iꞌatuꞌe toꞌope Pauru auka teran haria. Pywo wahenoi raꞌyn Tupana pe -Urutunug aru uruꞌe hap ewy iꞌatuꞌe toꞌope taꞌi uruiꞌauka irane Pauru iꞌatuꞌe. Yt uruiꞌauka pote waku uruꞌauka Tupana iꞌatuꞌe Pauru auka neran haria Tupana pe. 13Pauru auka teran haria 40 sakpo teꞌeruwaꞌatunug itote. -Pywo watiꞌauka raꞌyn aru e haria. 14Miꞌi pote miꞌiria tuwat paꞌi kororia kape nagnia kape. Miꞌi hawyi teꞌeroꞌe -Urutunug aru uruꞌe hap sehay pywo sese urutoꞌe urutoꞌope. Yt kat i urutuꞌu hamuat Pauru auka reꞌym ne urutoꞌe urupyꞌa pe iꞌatuꞌe. 15Miꞌi pote koitywy ewehenoi ro surara akag koro pe woꞌonapin haria pe -Uruehay teran Pauru wywo eweiꞌe ro uruepiat ikuap kahato hamo eweiꞌe ro iꞌatuepe. Miꞌi pykai ti aru uruto waku pe raꞌyn urutukupteꞌen muap upi Pauru auka hamo iꞌatuꞌe paꞌi kororia pe. 16Maꞌato Pauru inyt mepyt tikuap yne Pauru auka hamuat hap iꞌatuehay koꞌi. Miꞌi hawyi toto suraraꞌin yat wato kape Pauru piat henoi hamo. 17Miꞌi toikuap hawyi Pauru tikay kay surara akag 100 hemiit rakat tuwewawi. Miꞌi hawyi toꞌe -Mehin etioto ro meiũwat kurum ekaꞌiwat koro kape katupono toĩ sehay imienoi wuat e Pauru surara akag me. 18Miꞌi hawyi totioto kurum surara akag koro kape. Miꞌi hawyi toꞌe -Aimipyhik Pauru uikay kay hawyi uipoꞌoro meiũwat kurum erut ewowiat hamo katupono tohenoi teran epe tomikuap sehay e. 19Miꞌi hawyi ikoro tiꞌykesat ipo ete taꞌatuweran hap kape. Miꞌi hawyi apo e -Kat e hap som ehenoi teran uhepe kurum e. 20Miꞌi hawyi toiwesat -Mukiꞌite ti aru Iuteuria akag koꞌi teꞌeroꞌe epe -Etomoherep Pauru woꞌonapin haria kape uruepiat ihay kuap kahato hamo iꞌatuꞌe ti aru e. Maꞌato ti yt pywo pe i katupono taꞌatuꞌauka teran haype neꞌi e. 21Miꞌi pote o yt eropyhuꞌat teiꞌo iꞌatuehay upi e. Kat pote 40 miit Pauru auka teran haria tukupteꞌen muap tote. Pywo pe -Yt watenuk i yt wateꞌyꞌu i ti aru Pauru auka reꞌym ne e haria ti tukupteꞌen itote e. Pyno ti mio ehay yn Pauru moherep hamuat hap taꞌatuhekatup iꞌauka hamo e kurum ikoro pe. 22Miꞌi hawyi ikoro tiwesat -Kurum waku ereto maꞌato waĩ yt ehenoi teiꞌo. Yt uwe pe teiꞌo ehenoi -Taꞌi ahenoi raꞌyn surara akag me yt ere teiꞌo e ikoro Pauru mimoehapyap we. 23Miꞌi hawyi surara akag koro tikay kay typy ok tesuraraꞌin akag. Miꞌi hawyi toꞌe iꞌatuepe -Atikyꞌesat mesup wãtym hake turan waku pe eweikupteꞌen 200 surara yi totiaria 70 surara aihũ Kawaru totiaria irokirẽ 200 surara moryꞌa wato wywuaria. Miꞌi hawyi waku eweiwat tawa Sesareia kape wãtym muo hap atikyꞌesat e. 24Miꞌi pote waku ewetunug kahu aihũ Kawaru koꞌi Pauru ereto hamo. Atikyꞌesat ewetioto miꞌi miit morekuat Werisi kape tawa Sesareia kape e surara akag koro. 25Miꞌi hawyi mekewat surara akag tipoꞌoro raꞌyn tehay miwan ete.

Morekuat Kautiu Hawyi Irisia Miwan Taꞌatupoꞌoro Raꞌyn

26Mio tã e surara akag -Uito ti surara akag koro uhyt Kautiu Irisia e hap het rakat e. Uito atipoꞌoro miwan ewowi morekuat Werisi. Waku kahato en. Ehãite hap yn atikyꞌesat mehin e tomiwan ete. 27Meiũwat ihainia atipoꞌoro ewowi mehin. Iuteuria tat hawyi taꞌatuꞌauka teran meremo pote e. Miꞌi turan maꞌato ariot uhesuraraꞌin nywo katupono atikuap taꞌyn miꞌi aiꞌywania Humanu hawyi meremo iꞌatupo pyi atipowyro yt atikyꞌesat i iꞌauka hap pote uhyt e. 28Miꞌi hawyi atikuap teran kat pote taꞌatuꞌauka teran miꞌi miit hap. Miꞌi pote atioto Iuteuria woꞌonapin haria kape miꞌi hap kuap hãpyk hamo. 29Kat pote atikuap taꞌyn kat pote taꞌatuꞌauka teran hap. Taꞌi Iuteuria eko ete yn toiꞌaparap. Miꞌi atikuap hawyi yt atikyꞌesat i kat pote yt kat i saꞌag sese tutunug ikytyt hamo iꞌauka hamo e. 30Miꞌi hawyi atipoꞌoro miꞌi miit ewowi iũteꞌen neꞌi e. Miꞌi hawyi ti atikay kay teran iꞌauka teran haria Iuteuria hawyi atiꞌatupoꞌoro hamuat ewowi henoi hamo kat pote taꞌatuꞌauka teran hap enoi hamo e. Toran naꞌyn mehin e Kautiu Irisia e tomiwan me.

Taꞌatuereto Raꞌyn Pauru Ãtipatire Kape

31Wãtym muo suraraꞌin tioto Pauru tawa Ãtipatire kape taꞌatuꞌakag koro mikyꞌesat ewy. 32Heꞌihatꞌok pe teꞌeraꞌaipok i raꞌyn suraraꞌin yi upi hewyry rakaria taꞌatuꞌyat kape maꞌato iraniaꞌin Kawaru totiaria tuwat Pauru upi tawa Sesareia kape. 33Putꞌok taꞌatuꞌe hawyi taꞌatuium popera morekuat Werisi pe. Iꞌewyte taꞌatumoherep Pauru. 34Popera mowẽpap hawyi apo e morekuat -Aiko piat meiũ miit e iꞌatuepe. Mio tã e pote -Yi Sirisia kaipywiat iꞌatuꞌe. Miꞌi toikuap hawyi toꞌe Pauru pe 35-Pyno aru arewanetup ehay kape eꞌauka teran haria putꞌok iꞌatuꞌe turan e Werisi. Miꞌi hawyi toꞌe temiitꞌin me -Waku eweipyhik meiũwat miit morekuat Eroti woꞌonapin hap yat pe e.

Currently Selected:

Iesui Potmuꞌeria 23: mav

Highlight

Copy

Compare