Iesui Potmuꞌeria 20

Haga 20

Pauru Toto Masetunia Iꞌewyte Kereku Kape

1Pyno iꞌatupoꞌinik typyꞌi rakaria. Miꞌi hawyi Pauru tikay kay Iesui potmuꞌeria. Putꞌok iꞌatuꞌe hawyi toiꞌatuꞌahiꞌypysat. Waku yne raꞌyn hawyi toiꞌatunapin naꞌyn iꞌatumoesaika hamo. Miꞌi hawyi toto yi Masetunia kape tawa Ewesu pyi. 2Miꞌi hawyi tawa koꞌi sakpo toto wuatꞌi puat Tupana ehay enoi hamo. Miꞌi hawyi toto yi Kereku kape. 3Miꞌi tote toineꞌen myẽꞌym ewaty. Miꞌi hawyi taꞌaipok teran i raꞌyn yi Siria kape maꞌato teke irane yara wato piat turan Pauru tikuap Iuteuria ehay toꞌauka irane hap. Miꞌi hawyi taꞌaipok yi upi tawa Masetunia puo. 4Tuwat Pauru wywo 7 ok miit yi Asia kape wẽtup set Sopaturu uhyt Piru saꞌyru tawa Pereia pywiat. Miꞌi hawyi Aritaku miꞌi hawyi Sikũtu tawa Tesaronika kaipywiaria. Miꞌi hawyi Kaiu tawa Tepe piat. Miꞌi hawyi Timoteu miꞌi hawyi Tikiku iꞌewyte Towimu Asia piaria tuwat. 5Miꞌiria uruekatup tawa Turate tote katupono tuwat urueꞌyianme. 6Mekewat man teneg u hap eꞌat koꞌi tokosap hawyi urutuwat i raꞌyn tawa Wiripu pyi yꞌy upi. 5 eꞌat hawyi putꞌok urutoꞌe tawa Turate wã tote. Itote urutukupteꞌen wẽtup semana.

Pauru Turate Kape Toto

7Mytuꞌu eꞌat piat uruweꞌatunug man pik pik hap eꞌat pe turan Pauru tiꞌatumuꞌe kaꞌap kahato Iesui mohey haria. Toto teran mukiꞌite wẽtup tawa kape haype yt iwẽpohep tã i te. 8Miꞌi hawyi wãtym turan ariãty ipoityꞌi kahato meiẽwat akipy ywaiti rakat pe uruwaꞌatunug hap tote. 9Miꞌi tote toineꞌen wẽtup ok kurum Eutiko e hap het rakat wanetup hat. Miꞌi hawyi Pauru ehay potꞌi pote kurum toket neꞌi raꞌyn. Miꞌi hawyi taꞌat ywaiti pyi apyk piat myẽꞌym akipy hap totepyi yi kape. Miꞌi hawyi ikuꞌuro sese raꞌyn. 10Pauru taꞌapyk hawyi tuwepỹꞌãtutuk hawyi totat raꞌyn kurum aat hat ikuꞌuro rakat topo pe hawyi toꞌe iraniaꞌin itotiaria pe -Waĩ yt eweiwak teiꞌo. Yt ikuꞌuro i rat e. Mio tã toꞌe hawyi kurum aat hat waku i raꞌyn. 11Miꞌi hawyi taꞌam i hawyi toipik pik man hawyi taꞌatuꞌu. Miꞌi hawyi ihay ywop hawyi iwẽpohep ihatꞌok pote raꞌyn. 12Miꞌi hawyi ikuꞌuro rakat toto wy iraniaꞌin wywo taꞌatuꞌyat kape. Ihãite i raꞌyn pote iꞌatuwepiit kahato itotiaria.

Pauru Tawa Miretu Pe Toineꞌen

13Miꞌi hawyi Pauru toto yi upi tomikyꞌesat ewy e maꞌato uruto urutuwat yara wato puo tawa Asu kape itotiat Pauru pag hamo. 14Miꞌi hawyi tawa Asu pe urutoꞌopuẽti i raꞌyn. Miꞌi hawyi Pauru teke yara wato pe hawyi urutuwat yi Mitirene kape. 15Itote pyi urutuwat i raꞌyn. Heꞌihatꞌok pe urutokokaꞌat ywypyiꞌa Kiu e hap rãpe. Miꞌi hawyi meiũran urutuwehik tawa Samui pe. Heꞌihatꞌok pe putꞌok urutoꞌe tawa Miretu tote. 16Miꞌi hawyi Pauru toꞌe uruepe -Waĩ yt eiwehik teiꞌo tawa Ewesu tote e. Yt areineꞌen motꞌi teran i yi Asia tote e. Atikyꞌesat arokosap Ierusarẽi me ienuk man teneg u hap eꞌat pe e uruepe.

17Miꞌi hawyi tawa Miretu pyi toiꞌatukay kay tuwewawi Iesui mohey haria akag koꞌi. Tawa Ewesu piaria toiꞌatukay kay. 18Putꞌok taꞌatuꞌe hawyi Pauru toꞌe -Eweikuap te apo aikotã saꞌawyꞌi ariot eheꞌyi Asia tote turan wuat hap e. Taꞌi eipyꞌasetpe wuatꞌi eꞌat pe areineꞌen meiũpe eiwywo e. 19Eweikuap kahato ti miꞌi pote aikotã uipotpap kahato Aikaꞌiwat mikyꞌesat motpap wiat hap perupꞌi puo uiwak popuo worohoꞌomuꞌe hap e. Miꞌi turan tuut raꞌyn uhãꞌãg hap koꞌi katupono Iuteuria uiꞌauka teran itote e. 20Miꞌi turan yt uiwẽpohep hin i henoi hap koꞌi ete maꞌato ahenoi yne eimoesaika hamuat hap e. Ahenoi yne uimikuap wakuap etiat koꞌi. Wuatꞌi ehamo iꞌewyte wuatꞌi getap we worohoꞌomuꞌe e. 21Taꞌi eweikuap taꞌyn aikotã ahenoi henoi Iuteuria ywania pe Kereku ywania piat hap e. Mio tã are -Eweiꞌatoiat ro yt nakuap i koꞌi are. Eweimohey ro Iesui. Miꞌi ti Eikaꞌiwat nuat are itote e Pauru. 22Mesup ti uipoꞌoro raꞌyn Tupana paꞌãu tawa Ierusarẽi kape e Pauru. Miꞌi pote areto hamuat howawi maꞌato yt atikuap i aikotã aru arokosap itote hap. 23Maꞌato miꞌi tã e hap atikuap Tupana Paꞌãu Wakuat uimuꞌe -Ereto Ierusarẽi kape hap tote ti epyhik hamuat ehoꞌopat hamuat yn topyhuꞌat itote e uhepe wuatꞌi tawa puo e Pauru. 24Maꞌato yt arekenꞌẽ hin i uikuꞌuro hap pupi katupono atunug yne teran kat kat som motpap Aikaꞌiwat Iesui miium uhepiat uipoꞌoro hap koꞌi. Miꞌi ti tutum sehay wakuap aikyꞌe Tupana piat hap uimienoi wuat. Miꞌi pote ti atunug yne teran e Pauru. 25Taꞌi uimimuꞌeria Tupana yn ni waku Aiporekuat no e hap ahenoi kahato ehepe. 26Mio atikuap taꞌyn mesup areto raꞌyn hawyi aru maꞌato yt karãpe i raꞌyn eweiꞌakasa uhowowi e. 27Pywo pe ti koityꞌi eꞌat pe yt kat i miitꞌin suu uipo ete katupono yt karamuo i uiwẽpohep Tupana ehay enoi hap ete. Taꞌi ahenoi henoi yne kahato raꞌyn Tupana woꞌonapin hap ehepuo e. 28Pyno eiweꞌeg wo o. Eweiꞌapykok Tupana hũria Tupana Paꞌãu miium eipo puat koꞌi. Eweiꞌatupoi o Tupana hũria Iesui mikyiꞌat tosuu wuat koꞌi ihay wo Tupana emiitꞌin e. 29Katupono atikuap taꞌyn uhaipe kai ti aru tõꞌẽ tõꞌẽ awahuru koꞌi woꞌoꞌu haria ehewowi e Pauru. Miꞌiria ti aru yt ikyꞌe hin i Tupana hũria e. 30Taꞌi eipyꞌasetpyi wyti aru teꞌeruwemoherep heso rakaria woꞌomaꞌat hanuaria teꞌeruwewawiat ehekyi hamo e. Miꞌi hawyi ti aru tuwat iraniaꞌin eipyꞌasetpyi iꞌatumimaꞌat koꞌi e. 31Miꞌi tupono eiwatetup o. Yt waureꞌeweiꞌe teiꞌo uhepiat eimuꞌe hap ete. Katupono myẽꞌym anu wãtym muo ihatꞌok aat puo worohoꞌomuꞌe worohoꞌonapin uiwak popuo e Pauru tawa Ewesu kaipywiaria pe. 32Uiwyriaꞌin e koitywy areto raꞌyn eipyꞌasetpyi. Maꞌato ti worohoꞌoꞌatoiat eipe Tupana po pe. Tupana ti eikyꞌe hap hum kahato ehepe. Tutum ahepe tehay wakuat aimoesaika hamo aimohãpyk yt nakuap i kaipywiat hamo. Miꞌi pote watoineꞌen hemiitꞌin no iraniaꞌin imimoewaku koꞌi saipepiaria wo mesup e Pauru tawa Ewesu piaria pe. 33Yt karãpe i kue atikyꞌesat ehetineiru ehesokpe paĩ e. 34Pyno pywo eweikuap taꞌyn aikotã uipo wo uipotpap hap e. Miꞌi saꞌup mo kue atikyiꞌat yne uhekareꞌen koꞌi uimiꞌu koꞌi iꞌewyte uhekatuwyria watno atum yne uipotpap kaipyi. 35Atimoherep kahato ehepe uipotpap hap aikotã waku watum yt kat i ereko haria pe aimiereko koꞌi hap e. Taꞌi waku aiwatetup Aikaꞌiwat Iesui ehay kape aikotã saꞌawyꞌi toꞌe hap kape -Aimiium wyti poꞌog aimowepiit aimikyiꞌat koꞌi kai e Iesui e Pauru. 36Mio tã toꞌe hawyi tuwepỹꞌãtutuk Pauru iꞌatuwywo. Miꞌi hawyi ihay Tupana kape. 37Miꞌi hawyi teꞌeruwak yne kahato. Miꞌi hawyi taꞌatuꞌahiꞌypysat hawyi taꞌatuꞌãpysig Pauru. 38Taꞌatumohaty ihay -Yt eweiꞌakasa i raꞌyn aru uhowowi e hap. Miꞌi hawyi ito pote tuwat hupi yara wato kape.

Currently Selected:

Iesui Potmuꞌeria 20: mav

Highlight

Copy

Compare