Iesui Potmuꞌeria 1
1
Haga Wẽtup 1
1Uimikyꞌe Teowiru pyno mesuwat waku uimiwan ewowiat mehin Teowiru atipoꞌoro. Uito ti ewy Iruka. Haꞌawyte atipoꞌoro wẽtup uimiwan Iesui etiat ewowi mehin. Haꞌawyte uimiwan me ahenoi epe yne Iesui minug saꞌawyꞌi wuat hap koꞌi ete iꞌewyte imienoi saꞌawyꞌi wuat koꞌi hap ahenoi. Mekewat miwan ahetꞌok Iesui etiat Iruka mienoi are.
Maku 16.15; Iruka 24.51 Piat Ewy
2Saꞌawyꞌi Iesui tiꞌatuꞌairo temiitꞌin sese hawyi toꞌe iꞌatuepe -Uiwyriaꞌin e worohoꞌopoꞌoro eipe uimoherep wuatꞌi ywania piat hamo e. 3Miꞌi hawyi Iesui ikuꞌuro raꞌyn aikawiatno maꞌato ti tokuꞌuro pyi toineꞌen pakup i raꞌyn. Miꞌi hawyi tuwemoherep i raꞌyn temiitꞌin kape. 40 eꞌat kapiat tuwemoherep iꞌatuewowiat tuwẽtem guꞌuro pywiat hawyi. Wẽtup ewaty hap ewy toiꞌatumuꞌe itote hawyi taꞌatumohey sese raꞌyn heineꞌen pakup i hap. Toiꞌatumuꞌe aikotã aru Tupana topyhuꞌat Miitꞌin Porekuat no hap ete. 4Wẽtup ewaty toiꞌatumuꞌe hawyi teꞌeruwaꞌatunug yne Iesui kape. Miꞌi hawyi toꞌe temiitꞌin me -Uiwyriaꞌin apuete meiũran ti aru Uiꞌywot tipoꞌoro Topaꞌãu ehewowi e. 5Aikotã saꞌawyꞌi areꞌe ehepe hap ewy -Tupana ehetꞌok kahato irane Topaꞌãu wo uiwyriaꞌin areꞌe saꞌawyꞌi. Saꞌawyꞌi sese Iuwãu ehetꞌok yꞌy wo maꞌato mesup Tupana toꞌe uhepe -Uhaꞌyru e wẽtup eꞌat pe aru yne esaipepiaria atiꞌatusetꞌok Uipaꞌãu Wakuat no e uhepe. Pyno miꞌi toꞌe hap ewy irane einug eipe Topaꞌãu Wakuat no uiwyriaꞌin e. Miꞌi pote waku ewehekatup o meiũpe tawa Ierusarẽi me Tupana Paꞌãu Wakuat uut hap eꞌat e. Areto irane atipy kape hawyi Uiꞌywot tipoꞌoro meremo ehewowi Uipaꞌãu Wakuat aikotã areꞌe saꞌawyꞌi ehepe hap ewy e. Miꞌi hawyi waku kahato eweikupteꞌen eipiit yne puo Tupana Paꞌãu Wakuat topyhuꞌat hawyi e Iesui temiitꞌin me.
Iesui Taꞌaipok Taꞌyn Atipy Kape
6Wẽtup eꞌat tokosap hawyi apo iꞌatuꞌe Iesui pe -Urukaꞌiwat iꞌatuꞌe koitywy apo etiꞌatuehakyeraꞌat irane raꞌyn aiꞌywania ahewanikaptia po pyi sio yt iꞌatuꞌe. Koitywy apo aiꞌywania pe etum i raꞌyn aheꞌyi sio yt iꞌatuꞌe. 7Miꞌi hawyi toiꞌatuwesat -Uiwyriaꞌin e Tupana yn ni ikuap kat eꞌat pe aru tutum aiꞌywania pe iꞌatueꞌyi Kanaꞌã i raꞌyn hap e. Tupana yn ni ikuap kat eꞌat pe tutum i aiꞌywania po pe hap i raꞌyn e. Miꞌi pote yt eipo pe kuap i e. Taꞌi Aiꞌywot yn ikuap karãpe ahewanikaptia po pywiat aiꞌywania eꞌyi hep hamuat e. Kat eꞌat pe kat ewaty pe hap Tupana yn ni ikuap e. 8Maꞌato pywo tuut irane Tupana Paꞌãu ehewowi eimoesaika hamo e. Totopag Topaꞌãu Wakuat ehepe hawyi ti aru Uimoherep taꞌyn eipe wuatꞌi miitꞌin me e. Saꞌawyꞌi ti aru tawa Ierusarẽi miaria pe Uimoherep ehehay wo e. Miꞌi hawyi ti aru yi Iuteu piaria pe uimoherep hawyi yi Samaria piaria pe Uimoherep e. Miꞌi hawyi yi wato hap oktan wyti aru Uimoherep eipe ehehay wo wuatꞌi ywania puo e Iesui topotmuꞌeria pe ahepe.
Maku 16.19; Iruka 24.50 Piat Ewy
9Mio tã toꞌe rakirẽ Iesui taꞌam naꞌyn yityꞌok pyi. Miꞌi hawyi teꞌerahaꞌat turan teke raꞌyn ywyhig me. Miꞌi hawyi yt heremo i raꞌyn Iesui. 10Miꞌi hawyi teꞌerahaꞌat rẽ turan typy ok atipy kaipywiat putꞌok e iꞌatuete iꞌatuesokpe ikytsig kahato rakaria. 11Miꞌiria teꞌeroꞌe Iesui saipepiaria pe -Kat poteĩ ewehaꞌat atipy kape eipe yi Karireia piaria iꞌatuꞌe katupono toto raꞌyn Iesui atipy kape iꞌatuꞌe maꞌato aikotã toto hap ewy te ti aru taꞌaipok i iꞌatuꞌe ipotpoꞌororia pe ahepe.
12Miꞌi hawyi Ipotpoꞌororia teꞌeraꞌaipok i raꞌyn Uriweiria ypia pyi tawa wato Ierusarẽi kape yityꞌok ãpype kaipyi teꞌeraꞌaipok i. Yt pya pyi i teꞌeraꞌaipok aikotã Iuteu ywania iꞌatuewyry yt pya i Tupana motypot eꞌat turan hap ewy. 13Miꞌi hawyi putꞌok iꞌatuꞌe i raꞌyn ipotpoꞌororia mekewat akipy ywaiti rakat pe. Miꞌi hawyi itote tukupteꞌen i raꞌyn aikope saꞌawyꞌi Iesui wywo tukupteꞌen hap tote. Itote tukupteꞌen ipotpoꞌororia Peteru Iuwãu hawyi Tiaku hawyi Ãtere Wiripi Tume Patorumeu Mateu Tiaku mekewat Auweu saꞌyru Simau mekewat surara Iuta mekewat Tiaku ywyt. Miꞌiria ipotmuꞌeria sese tukupteꞌen aikope saꞌawyꞌi Iesui tenuk akipy ywaiti tote hap tote teꞌeropyhuꞌat 11 ok takaria. 14Miꞌi hawyi iraniaꞌin Iesui mohey haria iꞌewyte haryporiaꞌin koꞌi Iesui ty Maria tukupteꞌen itote. Miꞌi hawyi Iesui ywytꞌin ity mepytꞌin tukupteꞌen itote torannia. Miꞌi hawyi aat kaꞌap iꞌatuehay Tupana kape miꞌiria. Toꞌoꞌewyꞌewy taꞌatuhẽtup Tupana kape wẽtup wanetup hap ewy yn. Itote wẽtup ehay yn iꞌatuwanetup hap Tupana kape.
15Wẽtup eꞌat pe 120 ok takaria Iesui mohey haria tuwehytꞌok ywaiti pe. Miꞌi hap tote Peteru ipoĩꞌam iꞌatupyꞌasetpe tehay iꞌatuewowiat hamo.
Wẽtup Potmuꞌe Hat Taꞌatuꞌairo
Mateu 27.7-8 Piat Ewy
16Mio tã toꞌe iꞌatuepe -Uiwyriaꞌin e saꞌawyꞌi sese ti Tupana Paꞌãu henoi kahato Tosaꞌyru Iesui etiat ahaꞌaseꞌi morekuat Tawi pe -Meiũran aru atipoꞌoro esaipepiat Wuatꞌi Porekuat nuat e. Iꞌewyte Uimipoꞌoro maꞌat hanuat aru toineꞌen wẽtup ok hemiit sese e Tupana saꞌawyꞌi morekuat Tawi pe yian miat Ewy pote Aikaꞌiwat Iesui maꞌat hanuat Iuta etiat tohenoi e Peteru. Miꞌi hap ewy Iuta timaꞌat saꞌag Aiporekuat Iesui aikotã Tupana toꞌe ahaꞌaseꞌi Tawi pe hap ewy raꞌyn e. 17Gaꞌatpo Iuta wywo watoineꞌen 12 ok te. Taꞌi ipotpap kahato miꞌi aiwywo e. 18Haꞌawyte Aikaꞌiwat maꞌat hap saꞌup wywo toikyiꞌat teꞌyi. Miꞌi hawyi Iuta yt iwepiit hin i tominug saꞌag hap ete hawyi tuweꞌauka raꞌyn tuweꞌutꞌyp kytyt pe. Miꞌi hawyi ipiit ipuk kahato. Miꞌi hawyi iꞌoghytꞌat yi itote hap tote iꞌok pokꞌe hawyi imeꞌen wẽtem e. 19Miꞌi hawyi ti Ierusarẽi miaria ikuap taꞌyn Iuta ikuꞌuro hap. Miꞌi hawyi ikuꞌuro hap tote taꞌatusetꞌok -Suu saꞌup muat mikyiꞌat yi iꞌatuꞌe maꞌato iꞌatupusu puo Akeutama iꞌatuꞌe. 20Taꞌi saꞌawyꞌi wuat mienoi morekuat Tawi pypyꞌe hap ewywuat -Eweiꞌatoiat ro iwat heꞌyi e iꞌewyte eweiꞌatoiat iꞌyat e. Waku yt uwe i toineꞌen itote e. Miꞌi hawyi mono waku wẽtup ok po pe raꞌyn iwat motpap topyhuꞌat e Tupana Tawi pe saꞌawyꞌi Iuta piat pe Saumu 109.8 pe e. 21Pyno uiwyriaꞌin waku Iuta potpap wẽtup ok po pe watopag aikotã saꞌawyꞌi Tupana toꞌe Tawi wẽ pywiat hap ewy e Peteru. 22Waku ti watopag wẽtup miit wakuat po pe Iuta mipun motpap e Peteru. Waku watiꞌairo wẽtup ok miit haꞌawytewuat Iesui wywuat hewyry rakat e. Waku watiꞌairo wẽtup ok yne Iesui minug koꞌi kapiat akasa hat iꞌewyte Iuwãu miat Iesui hetꞌok hawyi taꞌam i raꞌyn Toꞌywot kape hap kapiat akasa hat e. Waku watiꞌairo wẽtup ok wakuat yne Iesui tokuꞌuro hawywiat toineꞌen pakup i hap kapiat akasa hat e Peteru Iesui potmuꞌeria pe. 23Miꞌi hawyi taꞌatukat hawyi taꞌatupuẽti typy ok Iesui potmuꞌeria haꞌawyte wuaria ikuap kahato haria ipotmuꞌeria sese wẽtup ok Matia hawyi wẽtup ok Iuse. Typy ok taꞌatupuẽti Iuta saipepiat waku rakat. Iuse set wẽtup Parapa iꞌewyte Iutu iꞌatuꞌe. -Pyno waku watikat uwe Tupana mikyꞌesat ewywuat 12 ok takat sio mehin Matia sio mehin Iuse iꞌatuꞌe. 24Miꞌi hawyi taꞌatuhẽtup -Tupana iꞌatuꞌe ehenoi uruepe aiũ emikyꞌesat ewywuat Iuta saipepiatnuat iꞌatuꞌe. Katupono En yn miitꞌin pya wanetup hap kuap hat. Miꞌi pote En yn etikuap uwe waku rakat sio Matia sio Iuse iꞌatuꞌe. 25Katupono yt uwe i Iuta potpap nug hat mesup iꞌatuꞌe. Toto raꞌyn Iuta teiam aria woꞌomosoꞌopot hap kape iꞌatuꞌe. Pyno waku etiꞌairo wẽtup ok Iuta saipepiatnuat sio Iuse sio Matia iꞌatuꞌe Tupana pe. 26Miꞌi hawyi ti teꞌeruwemahara raꞌyn aikotã Tupana tikyꞌesat typy ok takaria kaipywiat kuap hamo. Miꞌi hawyi iꞌatuwemahara hap henoi raꞌyn Matia e. Miꞌi hawyi -Taꞌi Matia ti Tupana miꞌairo iꞌatuꞌe toꞌope. Miꞌi hawyi taꞌatupag 11 ok takaria kape mehin Matia hawyi 12 ok i raꞌyn topyhuꞌat ipotmuꞌeria sese raꞌyn tukupteꞌen itote. Waku i raꞌyn.
Currently Selected:
Iesui Potmuꞌeria 1: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.