2 Peteru 2
2
Haga Typy 2
Toineꞌen Aimohey Hap Pun Haria
1Saꞌawyꞌi tukupteꞌen Tupana ehay enoi haria maꞌato ti yt pywuat sese koꞌi i te. Miꞌi hap ewy te ti mesup tukupteꞌen ne eimuꞌe haria heso rakaria eipyꞌasetpe. Miꞌiria ti imoherep yt pywo piat i sehay eimaꞌat hamuat neꞌi Tupana etiat. Miꞌiria ti -Iesui ti yt Ahehakyeraꞌat hat i e haria. Yt Iesui kaipyi i ti ahehakyeraꞌat hap saꞌup e haria. Aiporekuat pun haria neꞌi mio tã e haria. Pyno mio tã e haria ti Aiporekuat Iesui atoiat haria. Miꞌi haria ti teꞌeruweꞌatuꞌuka aimaꞌat hap kaipyi. 2Miꞌiria ehay aimuꞌe hap topyhuꞌat iꞌatuehay se maꞌato yt pywo piat i. Miꞌi hawyi iraniaꞌin tuwat iꞌatumienoi upi. Taꞌatunug saꞌag kahato taꞌatumuꞌe haria minug ewy. Miꞌi hawyi haryporiaꞌin seharyꞌi wo haryporiaꞌin wywo iꞌewyte ihainiaꞌin seꞌaito wo ihainiaꞌin wywo hap taꞌatunug iwaire waire hap ewy. Yne miꞌi tã saꞌag hap ewy taꞌatunug. Miꞌi hawyi iraniaꞌin wehaꞌat haria mekewat pywuat sese hap ete iꞌatuehay saꞌag neꞌi meimuẽ waria wẽtup sehay upiaria inug saꞌag hap haria kaipywiat. 3Pyno ehekat kyewi yn eimuꞌe haria. Taꞌi ehekat taꞌatukyꞌesat eiꞌatumuꞌe hap eimaꞌat hamuat hap kaipyi. Miꞌiria ti eikyꞌesat taꞌatuemiit no iꞌewyte taꞌatukyꞌesat torannia taꞌatupo puo hap ehekareꞌen eimepytꞌin. Miꞌi tã hap yn taꞌatukyꞌesat. Pyno Tupana toineꞌen ne miꞌiria apiheg hamo. Taꞌi Tupana toineꞌen eimaꞌat hanuaria moma hanuat. Taꞌi Tupana ti yt pya hin i iꞌatukai iꞌatuꞌuka hamo.
4Saꞌawyꞌi sese ti atipy piaria Tupana wywuat hap taꞌatuꞌatoiat kahato raꞌyn. Miꞌi pote ti yt naku i nug haria teꞌeropyhuꞌat miꞌiria. Miꞌi pote ti Tupana tiꞌatuꞌapiheg naꞌyn. Yt toihep hin i iꞌatuꞌapiheg hap kaipyi maꞌato ti aria koro kape toiꞌokhytpugha atipy kaipywiaria are. Iꞌypyryp hap kape toiꞌatupoꞌoro poꞌoro are iꞌatupyhik hap iꞌypyryp takat kape. Miꞌi hawe ti tukupteꞌen taꞌatupyhik hawe iheg me. Meiũran ti aru putꞌok e mekewat uwe waku uwe yt naku i hap moherep hap eꞌat pe hawyi Tupana timoherep taꞌyn iꞌatuminug saꞌag koꞌi wuatꞌi puo. 5Saꞌawyꞌi te tukupteꞌen kahato yt nakuaria mesuwarotiat. Mekewat eꞌat turan Nuꞌe wywuaria toꞌyat piaria 7 ok takaria yn wakuaria Tupana tipuẽti. Miꞌi pote miꞌiria yn toiꞌatuehakyeraꞌat. Maꞌato iraniaꞌin yt Tupana mohey i haria yt naku i nug haria Tupana tiꞌatumoma yne yne yꞌy wato wo iꞌaman 40 eꞌat piat 40 wãtym miat tutunug hawyi. Mekewat ahaꞌaseꞌi Nuꞌe tiꞌatumuꞌe kahato wen -Eweiꞌatoiat ro eiminug saꞌag koꞌi hawyi eweiꞌaipok to Tupana kape e wen maꞌato yt teꞌeruwemorem hin i Tupana kape yt taꞌatuꞌatoiat teran i iꞌatuminug saꞌag hap koꞌi pote. Miꞌi pote ti Tupana tikay kay yꞌy kahato iꞌatuꞌatuꞌuka hamo. Miꞌi hawyi teꞌeropap kahato Tupana yt mikyꞌesat ewy i gupteꞌen haria. Teꞌeruweꞌãpyhyka ãpyhyka miitꞌin. Tupana yt ipohep hin i iꞌatuꞌapiheg hap ete. Miꞌi hawyi ahaꞌaseꞌi Nuꞌeꞌin 8 ok takaria imohey haria yn Tupana tiꞌatuehakyeraꞌat raꞌyn.
6Iꞌewyte ahenoi teran tawa Sutuma tawa Kumura e hap etiat are. Itotiaria ti yt nakuap i nug kahato haria torannia. Saꞌag nug hap kape yn teꞌeruwanetup. Miꞌiria ti Tupana timoma raꞌyn aria wato wo. Toiꞌatuwuk kahato iꞌatuꞌyat koꞌi yne yne iꞌatuetawa koꞌi. Yne yne Tupana tiwuk taꞌyn torannia. Miꞌi hawyi itup yn topyhuꞌat itote. Miꞌi hawyi yt wẽtup ok i topyhuꞌat itote. Toiꞌatuꞌakit yne raꞌyn miꞌiria. Miꞌi tupono koitywy eiminug saꞌag hap kai eiweꞌeg wo o. Yt eweiwaure teiꞌo tawa Sutuma tawa Kumura Tupana piat iꞌapiheg hap koꞌi. Yt nakuaria i minug upiat miꞌi tã hap. Miꞌiria ti Tupana kuap hap pun haria. Miꞌi pote waku iꞌatuꞌapiheg hap aimuꞌe hap aimokenꞌẽ hamuat hap topyhuꞌat are. Miꞌi ete ti aimuꞌe kahato raꞌyn aimokenꞌẽ hap ete are. Miꞌi hawyi watikuap yt naku i nug notiat yt naku i kue paĩ aiꞌe aiwanetup hawiat hamo. 7Maꞌato toineꞌen tawa Sutuma pe wẽtup ok Tupana mohey sese hat wakuat nug neran hat Iro e hap het rakat. Miꞌi ti Aparãu ywyt saꞌyru -Yt naku i yn nug haria mesuwe uhetawa piaria e. Sewaire hap kape yn wanetup haria e. Yt naku i kahato atipuẽti miꞌiria e Iro tawa Sutuma totiat gupteꞌen haria minug saꞌag koꞌi ete. Iro yt tikyꞌesat hin i itotiat seko saꞌag koꞌi. Miꞌi tupono Tupana tiehakyeraꞌat Iro tosakiꞌytꞌin wywo. Miꞌi pote mekewat aria yt tuꞌu hin i iroꞌin mekewat tawa wuk turan katupono yt toikyꞌesat hin i iꞌatuminug saꞌag itotiat hap koꞌi. 8Itotiaria yt taꞌatunug hin i Tupana mikyꞌesat ewy. Iꞌewyte yt miitꞌin mikyꞌe ewy hin i taꞌatunug. Taꞌi iꞌatuminug koꞌi yt miitꞌin eko ewy hin i taꞌatunug. Miꞌi hap koꞌi Iro yt tikyꞌesat i pote Tupana miehakyeraꞌat wo topyhuꞌat. 9Taꞌi Tupana ahehakyeraꞌat kuap kahato ahãꞌãg hap kaipyi inug hap kaipyi imohey haria aito pote. Yne mekewat yt tomikyꞌesat ewywuat i hap koꞌi kaipyi aihep kuap. Iꞌewyte toikuap yt nakuaria i apiheg hap. Pyno ti yt nakuaria i apiheg hamuat Tupana po pe toineꞌen. Taꞌi yt pya hin i mekewat eꞌat Tupana piat -Yt naku i kahato eipe e hamuat hap eꞌat are. 10Tupana timoma yne raꞌyn tawa Sutuma tawa Kumura piaria. Katupono Tupana yt tikyꞌesat hin i iꞌatuwat iꞌatuieineꞌen hap. Wuatꞌi yne taꞌatupuꞌi mikyꞌesat ewy yn taꞌatunug wuatꞌi haryporiaꞌin wywo wuatꞌi ihainiaꞌin wywo. Taꞌatupiit mikyꞌesat hap koꞌi yn taꞌatunug toꞌope toꞌope. -Yt kan hamo i Tupana mikyꞌesat hap koꞌi taꞌatuꞌe haype. Taꞌatumikyꞌesat ewy yn taꞌatunug. Yt taꞌatumotypot hin i Tupana waĩꞌe hap iꞌewyte miitꞌin waĩꞌe hap yt taꞌatumotypot i. Yt teꞌeruwemoti hin i taꞌatuminug saꞌag hap koꞌi ete. -Atunug mote atunug e haria yn. Taꞌi miꞌiria ti toꞌokyryꞌi kahato neꞌi wakuaria ete. Iꞌewyte atipy piaria ete toꞌokyryꞌi. Taꞌi atipy piaria ti sakpoꞌe ikahuria iꞌewyte poꞌog hesaika rakaria. Miꞌi pykai wemuꞌe haria yt pywuat i enoi haria -Uruto poꞌog iraniaꞌin kai iꞌatuꞌe yn iꞌewyte mio tã iꞌatuꞌe atipy piaria pe. 11Taꞌi atipy piaria ikahu rakaria hesaika kahato rakaria. Taꞌi poꞌog hesaika mekewat eimaꞌat haria kai wen maꞌato yt kat i saꞌag iꞌatuꞌe Tupana pe yt pywo piat i henoi haria ete.
Haiwot Rakaria Wo Aimikyryꞌi Haria
12Mekewaria ti aikotã miat haiwot rakaria ewywuaria. Aikotã miat watiꞌauka teran meremo hap ewywuaria miꞌiria. Miꞌi haype toꞌokyryꞌi kahato mekewat wakuap wuatꞌi mikuap wuat ete. Maꞌato ti yt taꞌatukuap i haype. Mekewat seko saꞌag taꞌatuminug wo neꞌi ti teꞌeruweꞌatuꞌuka kahato. 13-Urumikyꞌesat ewy yn urutunug neran iꞌatuꞌe saꞌag. Miꞌi hawyi miitꞌin pyꞌasetpuo ihatꞌok puo yt naku i kahato taꞌatunug iraniaꞌin ehamo. Maꞌato Tupana haꞌup nug irane iꞌatuminug saꞌag hap koꞌi. Yne iꞌatumikyꞌesat ewy taꞌatunug hawyi yt teꞌeruwemoti hin i. Maꞌato eipe ti eiwemoti kahato eweipyhuꞌat mekewaria teꞌerenuk eipyꞌasetpe turan katupono teꞌeruwemoꞌok saꞌag kahato. Taꞌi eimaꞌat kahato ti eimiꞌu wuat teꞌerenuk turan. Iꞌatupiit moꞌok hap mowepiit hap yn taꞌatukyꞌesat. Miꞌiria ti teꞌeruwanetup hap ywyk hanuaria. Taꞌi saꞌag nug hap ete ti toꞌomowepiit kahato raꞌyn. Maꞌato iꞌatusaꞌup iꞌatuminug saꞌag hap ete putꞌok e irane. Taꞌi Tupana tiꞌatusatyꞌi satyꞌi irane yt naku i nug hap koꞌi ete. Taꞌatumosoꞌopot hap ewy taꞌatupuẽti irane. 14Miꞌiria eha pe ti toineꞌen haryporiaꞌin ihainiaꞌin kyꞌesat hap koꞌi yn ti raꞌyn. Miꞌiria ti -Taꞌi yt karamuo hin i ti aru ahero aiminug saꞌag wo e haria. Miꞌi hawyi Tupana mohey haria yt hesaika kahato rakaria maꞌat haria wo teꞌeropyhuꞌat miꞌiria. Taꞌi miitꞌin ekareꞌen koꞌi taꞌatukyꞌesat yne taꞌatuwatno hap. Mio tã hap ewy iꞌatuieineꞌen hap yt naku i kahato. Pywo ti rat miꞌiria Tupana mikuasa wuatnuaria wo teꞌeropyhuꞌat. 15Taꞌi miꞌiria ti muap hãpyk takat atoiat haria wo teꞌeropyhuꞌat. Aikotã gaꞌapy piat hoꞌowasat rakaria ewy tukupteꞌen. Mekewat Tupana ehay moherep saꞌag hat Parãu e hap Posu saꞌyru upiaria miꞌiria. Kat pote Parãu ti haꞌup etiat Tupana ywania maꞌat hat -Pyno haꞌup ewetum uhepe pote kat e kat e hap saꞌag atunug e hat miꞌi. Maꞌato inug saꞌag hat ete Tupana ihay pirik kahato neꞌi. Waĩꞌe kahato neꞌi Tupana mekewat ete. 16Miꞌi hawyi Tupana tinapin yt weꞌeg i hat wẽ pyi mekewat ihũ wẽ pyi waĩꞌe Parãu me. Miꞌi hawyi ihay mekewat ihũ miit ehay ewy -Waĩꞌe etiwaure ro eso hap e. Hesoꞌok takat ewy ereineꞌen e mekewat Iumentu ihay mekewat kat koꞌi kat koꞌi moherep hat pe mekewat Tupana ehay moherep ran hat pe.
17Pyno mekewaria yt pywuat sehay enoi haria i yresa gag ewy miꞌiria. Aiweꞌyꞌutui turan yꞌy hitꞌi yresa kaipyi waku kahato watipuẽti maꞌato wẽtup tuereto igag naꞌyn pote yt kat i yꞌy watipuẽti aiweꞌyꞌutui hap monik hamuat. Mio tã hap ewy yt kat i waku watipuẽti miꞌiria kai. Aikotã ywyhig koꞌi ywytu uato turan hewyry kahato wasere upi hap ewy miꞌiria. Taꞌi miꞌiria eiam ti Tupana tunug naꞌyn iꞌypyryp sese yt wẽtup iꞌypyryp ewywuatꞌi ti iꞌatueiam Tupana minug. Miꞌi hawyi ti aru miꞌiria tukupteꞌen iꞌypyryp we yn naꞌyn wuatꞌi eꞌat pe. 18Miꞌiria iꞌatuehay se wen maꞌato yt kat iꞌatuꞌe pykai i raꞌyn. Taꞌi iꞌatuehay kahato maꞌato kat iꞌatuꞌe kat iꞌatuꞌe yt watikuap i. -Uruto ti iweꞌeg kahato rakaria iꞌatuꞌe. Miꞌi wo ti ahekyi teꞌeruwewawi. Miꞌi hawyi taꞌatupiit koꞌi wywo taꞌatumaꞌat neꞌi iraniaꞌin Iesui mohey pakup haria yt hesaika kahato rakaria i te. Iraniaꞌin teꞌeruwẽtem neran yt naku i nug hawyi maꞌato miꞌiria taꞌatuiãꞌãg kahato iraniaꞌin taꞌatupiit minug saꞌag wo. Mio wyti taꞌatunug aikotã pina puta ewy miitꞌin pytyk teran haype. Miꞌi hawyi saꞌag nug hap kaipyi wẽtem neran haria yt hesaika i pote woꞌopyhik hawiat ewywuaria teꞌeropyhuꞌat. Miꞌi tã me ti taꞌatuhoꞌomaꞌat reran Iesui mohey pakup i haria. 19Miꞌi hawyi -Eweiwat uruupiat pote ti ren eweikupteꞌen eimikyꞌesat ewy e haria. Yt uwe po pe i eweikupteꞌen e haria ti. Miꞌi pote yn ti ren waku kahato rakaria wo eweikupteꞌen e haria. Taꞌi eweiwat uruupiat pote yt uwe i eipoꞌoro hat e haria. Miꞌi tupono poꞌog waku pe eweikupteꞌen iꞌatuꞌe saꞌag. Maꞌato ti iꞌatueso kahato neꞌi katupono miꞌiria yt teꞌeruwenoꞌẽ kuap i mekewat taꞌatuminug saꞌag pyi. Pywo pe ti taꞌatuminug saꞌag koꞌi eropat haria miꞌiria. Iꞌatueko saꞌag ni topyhuꞌat iꞌatuꞌokpe tote iꞌatuꞌakit hamo. -Yt uwe i urukaꞌiwat iꞌatuꞌe pykai iꞌatuminug saꞌag hap koꞌi iꞌatukaꞌiwat sese topyhuꞌat. Pyno ti miꞌiria iheg me tukupteꞌen mekewat seko saꞌag eiam me. Pyno uwe po pe watoineꞌen pote pyno miꞌi ti raꞌyn aikaꞌiwat no toineꞌen. Yt watoiat kuap i aiminug saꞌag pote aiminug saꞌag topyhuꞌat aipotypot no ti raꞌyn are. 20Maꞌato tukupteꞌen yt naku i nug hap atoiat haria Iesui kuap haria maꞌato meiũran teꞌeraꞌaipok i mekewat saꞌawyꞌi wuat seko saꞌag kape raꞌyn mesuwat yi totiaria wemohun hap kape i raꞌyn. Miꞌi hawyi ti aikotã kiã eꞌyni piatnuaria ewy tukupteꞌen. Miꞌi hawyi ti yt teꞌeruwenoꞌẽ kuap i iraꞌyn mekewat taꞌatuminug saꞌag hap saꞌawyꞌi wuat kaipyi. Miꞌi hawyi taꞌatuminug saꞌag hap koꞌi po pe i raꞌyn tukupteꞌen. Miꞌi hawyi poꞌog poꞌog saꞌag saꞌawyꞌi wuat kai teꞌeropyhuꞌat. 21Miꞌi hawyi ti yt naku i kahato raꞌyn tukupteꞌen. Taꞌi poꞌog waku miꞌiria yt karãpe i taꞌatupuẽti muap hãpyk takat wakuap nug hap sio taꞌatukuap hawyi teꞌeraꞌaipok i raꞌyn saꞌawyꞌi wuat yt naku i nug hap kape. Miꞌi hap ewy pote poꞌog naꞌyn saꞌag teꞌeropyhuꞌat saꞌawyꞌi wuat kai. 22Aikotã aware teꞌen hawyi tutuꞌu i hap ewy are. Hãꞌãkap aimikuap awareria etiat hap ewy miꞌiria. Aikotã hamaut tuwei hawyi meiũran taꞌat i raꞌyn ipit pit pe hap ewy tuwei hawyi. Tuwesot sot ihy nem nakat pe hap ewy miꞌiria are. Pyno typuat raꞌyn uimiwan ewowi.
Currently Selected:
2 Peteru 2: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.