1 Tesaronika 1
1
Haga Wẽtup 1
1Uito ti Pauru kuekatu sese atipoꞌoro ehewowi Iesui mohey haria kape tawa Tesaronika piaria kape are. Uiwyriaꞌin Iesui mohey haria mesuwat uimiwan atipoꞌoro ehewowi katupono atikyꞌesat kahato ti Tupana hegyiꞌat kahato ehepiat hap. Iꞌewyte atikyꞌesat kahato Tupana kaipywiat eiwoꞌowese hap. Pyno uito hawyi mehin Sira hawyi Timoteu wywo kuekatu urutoꞌe ehewowi uruwyriaꞌin tawa Tesaronika piaria kape. Mesuwat uruipoꞌoro ehewowi urumiwan Aiꞌywot Tupana Aikaꞌiwat Iesui hũria kape tomohey haria waꞌatunug haria kape. 2Yne eꞌat pe -Waku kahato tawa Tesaronika piaria urutoꞌe Tupana pe. Urutuwehum kahato ewowi Tupana katupono torannia Tesaronika piaria emohey haria kahato tukupteꞌen urutoꞌe Tupana pe. 3Yt ehẽku kaipyi yn i ti tuwẽtem ehepiat Iesui mohey hap maꞌato yne kaipyi tuwemoherep. Miꞌi tupono urutuwehum kahato Aiꞌywot atipy piat kape. Yt waureꞌurutoꞌe hin i ti urukyꞌe ehepiat hap iꞌewyte miitꞌin kyꞌe ehepiat hap ete Aipotypot Iesui mohey hap kaipyi. Iꞌewyte eipotpap hap koꞌi yt uruiwaure hin i.
4Taꞌi uheꞌywytꞌin uheinytꞌin uruikuap kahato ti aikotã Tupana eikyꞌe kahato pote eiꞌairo kahato ti towatno. 5Saꞌawyꞌi ti uruhenoi kahato ehepe sehay wakuat Iesui etiat maꞌato yt uruwat uruẽku kaipyi yn i maꞌato Tupana esaika hap kaipyi iꞌewyte Tupana Paꞌãu kaipyi uruiꞌatumuꞌe eipe. Taꞌi pywuat sese urutoꞌe. Urumimohey mesuwat sehay urutoꞌe uruhenoi ehepe turan. Eweikuap taꞌyn aikotã saꞌawyꞌi urutukupteꞌen eipyꞌasetpiat hap. Taꞌi eikyꞌe uruepiat hap yn ni toineꞌen urukai. 6Saꞌawyꞌi uruminug wakuap kape ti ewehehaꞌat kahato hawyi -Taꞌi uruto ti iꞌewyte urutukupteꞌen teran Pauruꞌin ewy eweiꞌe. Taꞌi Iꞌatukaꞌiwat Iesui mohey haria wo urutukupteꞌen teran eweiꞌe. Iꞌatumienoi ahepiat wyti pywuat kahato rakat eweiꞌe. Mio tã eweiꞌe hawyi ti Tupana Paꞌãu putꞌok e raꞌyn ehetiat hawyi eiwepiit kahato hap taꞌyn topyhuꞌat ehete. Miꞌi hawyi ti maꞌato mekewat hoꞌopot hap eꞌat putꞌok e raꞌyn ehete turan yt hep e kuap i raꞌyn ehepiat imohey hap iꞌewyte eiwepiit hap. 7Miꞌi pote ti yi Masetunia yi Akaia piaria teꞌerahaꞌat kahato ehepiat mohey hap kape. -Pyno waku aito tawa Tesaronika piaria ewy waku watomohey Iesui iꞌatuꞌe teꞌerahaꞌat ehewowi hawyi. 8Miꞌi hap kaipyi ti Aikaꞌiwat mohey hap tuwẽtem naꞌyn eiwẽ pyi. Miꞌi hawyi ti ihay eweihytpok kahato raꞌyn yne tawa Masetunia puo yne yi Akaia puo raꞌyn. Miꞌi hawyi ti yne tawa koꞌi puo raꞌyn imohey hap tuwesytpok. 9Miꞌi hawyi ti karãpe uruhenoi teran naꞌyn iraniaꞌin me Iesui eimohey hap etiat hap miꞌi pote ti -Taꞌi uruikuap taꞌyn iꞌatuꞌe. Miꞌi hawyi ti karãpe uruewyry turan uruewyry hap upi teꞌeroꞌe uruepe iraniaꞌin -Eweikuap apo Tesaronika piaria Iesui mohey hap iꞌatuꞌe uruepe. Koitywy ti iꞌatuwese kahato eimimohey ete. Mo wuat minug tupanaria atoiat haria raꞌyn miꞌiria iꞌatuꞌe uruepe miitꞌin. Miꞌi hawyi ti Wuatꞌi Eꞌat Piat Ieineꞌen hat Tupana sese eropat haria raꞌyn miꞌiria iꞌatuꞌe raꞌyn uruepe uruewyry tipytpe.
10Koitywy taꞌatuhekatup taꞌyn Aikaꞌiwat Iesui Tupana Saꞌyru iꞌewyte Tupana mihep guꞌuro pywiat mohey haria wo raꞌyn tukupteꞌen iꞌatuꞌe ahepe. Taꞌi saꞌawyꞌi wyti ipyꞌahak kahato Tupana aiminug saꞌag ete. Saꞌawyꞌi wyti aiꞌapiheg hap yn topyhuꞌat ahepe yt kat i Tupana wywo aiwoꞌowese nug hanuat pote saꞌawyꞌi. Maꞌato Ahehakyeraꞌat hat putꞌok e aiꞌapiheg hap u hamuat hawyi Tupana aihep taꞌyn aiꞌapiheg hap kaipyi. Miꞌi hawyi iraniaꞌin yt kat iꞌatuꞌe kuap i raꞌyn ahete katupono -Waku eipe e yn naꞌyn ahepe. Miꞌi hap areꞌe ehepe Iesui mohey haria tawa Tesaronika piaria. Maꞌato yt uito yn i katupono torannia mesuwat yi tote waku iꞌatuꞌe ehepe. Yt kat areꞌe kuap i raꞌyn miitꞌin me eimohey kahato hap etiat uruewyry tipytpe katupono taꞌatukuap yne raꞌyn ehepiat imohey waku kahato hap. Miꞌi tupono urutuwehum kahato ehepiat imohey hap ete uruto Pauruꞌin.
Currently Selected:
1 Tesaronika 1: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.