1 Peteru 5
5
Haga 5
Waku Tupana Mohey Haria Poi Haria Wo Watoineꞌen
1Pyno uito Peteru iporo rakat areineꞌen. Eiꞌapykok hat areineꞌen. Pyno uhehay teran Iesui mohey haria apykok haria pe. Worohoꞌonapin neran eipe. Uito ti Iesui potmuꞌe sese uito. Araꞌakasa yne Aikaꞌiwat ikuꞌuro hap kape. Araꞌakasa aikotã hoꞌopot hap kape. Iꞌewyte araꞌakasa Iesui wẽtem guꞌuro pywiat hap kape. Araꞌakasa Iesui Tupana motypot hawe hẽtyhot hap pyꞌasetpe araꞌakasa. Miꞌi hap ewy tuut irane. Miꞌi hap kape iꞌewyte araꞌakasa uimuꞌetu wuat ewy are. 2Miꞌi pote worohoꞌonapin eipe uipyꞌa pyi aikotã watopoi aihũria yne eꞌat pe aikotã watiꞌapykok aihũria wãtym muo. Miꞌi hap ewy eweiꞌatupoi Tupana ehay wo Iesui mohey haria Tupana hũria eimiꞌapykok koꞌi are. Eweiꞌatuꞌapykok o Tupana hũria ahiag mupi yt naku i nug hap pupi are. Eweiꞌatoiat ro mekewat eiwanetup hawe -Yt atunug neran i e hap. Miꞌi hawyi eweiꞌatuꞌapykok Iesui mohey haria yne eipyꞌa pyi yne ehepiat kyꞌesat hap wywo. Uiwyriaꞌin karãpe putꞌok e mekewat eiwanetup hawe -Atikyꞌesat uhekat kahato Tupana hũria kaipyi. Iꞌewyte areineꞌen neran hekat rakatno Tupana hũria apykok hap saꞌup kaipyi e hap pupi eiweꞌeg wo kahato o are. Katupono yt naku i watikyꞌesat kahato Iesui mohey haria ekat koꞌi. Pyno waku watuwepotpap iꞌatumuꞌe hap ete poꞌog miitꞌin kyꞌe hap aikai waku. Yt naku i watoket neꞌi. Waku aiwanetup hawe aiperup yn aipotpap turan miitꞌin muꞌe Iesui etiat hap turan are ehepe nagnia pe aiꞌapykok haria pe are. 3Yt naku i watiꞌatupoꞌoro poꞌoro ahehay pirik hap wywo aihũria kat pote aihũria Tupana saꞌyruꞌin sakiꞌytꞌin. Miꞌi pote poꞌog waku watimoherep Tupana hũria pe muap ikahu rakat. Waku watopyhuꞌat Iesui iãꞌãkap koꞌi wo ewywuat no. Miꞌi hawyi waku watoꞌe aimimuꞌeria pe -Ereineꞌen no eweikupteꞌen no aikotã areineꞌen waku hap ewy waku watoꞌe. Waku watuwepotpap poꞌog aihũria kai. Miꞌi hap kaipyi taꞌatukuap aikotã waku taꞌatunug hap koꞌi wakuap koꞌi are. 4Pyno karãpe watiꞌatuꞌapykok aihũria turan waku watuwanetup kahato Aiꞌapykok hat toineꞌen hap kape. Miꞌi kaipyi ahaꞌup sese tuut aru. Mekewat saꞌup waku rakat aimotypot hap sese wuatꞌi eꞌat piat tuut Aiꞌapykok hat Iesui kaipyi aru watoꞌe aiwanetup hawe. Morekuaria mesuwarotiaria teꞌeruwepainug kahato nu imehit rakat wywo teꞌerewepainug kahato taꞌatuꞌakag ete. Hekat kahato rakat ewy teꞌerewepainug morekuaria mesuwarote. Miꞌi hap ewy Tupana tum aru ahepe aipotpap saꞌup. Maꞌato aipainug hap wuatꞌi mimotypot koꞌi watopyhuꞌat aru wuatꞌi eꞌat piat morekuaria ewywuat aipainug hap are.
5Pyno uito Peteru atiꞌatunapin neran mesuwe kurumꞌin. Makuptiaria worohoꞌonapin neran eipe. Uiwyriaꞌin eweimotypot ro nagnia are. Ewetunug no eiꞌapykok haria mikyꞌesat koꞌi. Karãpe eiꞌapykok haria eipoꞌoro hawyi meremo ewetunug iꞌatumikyꞌesat koꞌi. Eweikupteꞌen no miitꞌin mimuꞌe koꞌi wo -Uimuꞌe ro eweiꞌe ro nagnia pe. Eweimotypot ro iraniaꞌin eiwoꞌomotypot eiwoꞌope are ehepe. Eweiꞌatoiat ro mekewat -Uito poꞌog iraniaꞌin kai e hap. Miꞌi hawyi aikotã watopag sokpe pakup hap ewy eweipag wẽtup wanetup hap ikahu rakat eipyꞌa pe mekewat -Atikuap teran uhyt mana e hap mekewat -Uimuꞌe ro e hap mekewat paa eiꞌe hap wywo eiwepainug o aikotã sokpe pakup hap ewy. Katupono -Uito poꞌog iraniaꞌin kai e hat Tupana mimohit no aru topyhuꞌat. Tupana yt tikyꞌesat i -Uito poꞌog iraniaꞌin kai e haria wo watukupteꞌen. Maꞌato paa e haria kape yn tehaꞌat. Miꞌiria pe tutum kahato hegyiꞌat hap kaipyi tekat yne tomimotypot koꞌi pe are. 6Pyno uiwyriaꞌin ipakup takaria waku eweiꞌe Tupana kape -En ni poꞌog poꞌog uikai. Uimuꞌe ro. Aremohit epyꞌasetpe Tupana. Paa are areineꞌen epo pe Tupana. Iꞌewyte areineꞌen neran yt uwe i uimotypot mesuwarote. Atikuap taꞌyn uito kurum te ipakup takat rẽ waku eweiꞌe Tupana pe. Mio tã eweiꞌe pote meiũran Tupana mimotypot no eweipyhuꞌat mesuwat yi tote. Iꞌewyte miitꞌin akag wo miitꞌin apykok hatno eweipyhuꞌat. Kurum hin piꞌã hin Tupana mikyꞌe koꞌi kahato wo eipe are. 7Miꞌi pote waku eweiꞌe Tupana pe -Tupana aikotã miitꞌin timohy yrysakag ipotyi rakat hero iꞌakag ete miꞌi hap ewy etihep uhetiat uhero hap uipyꞌa piat hap. Wẽtup ok po pe wẽtup ok akag note aikotã taꞌatuereto mekewat yrysakag ipotyi rakat ewy. Miꞌi hap ewy atoiat yne uiwanetup hap ipotyi rakat ewywuat kowoꞌi kowoꞌi hap koꞌi. Aikotã aikotã aru atunug uiꞌe hap koꞌi atoiat yne epo pe eꞌakag ete Tupana eweiꞌe. Kat pote uikyꞌe kahato hat En waku eweiꞌe kurum iwasuria makuptiaria are.
8Pyno eiweꞌeg wo o ahiag mupi kurum iwasuria makuptiaria i are. Aikotã suraraꞌin ewy eweikupteꞌen. Eiweꞌeg wo kahato o ahiag mupi kat pote ehewanikap sese toineꞌen ahiag kurum iwasu koꞌi makuptiaria. Pyno eweikupteꞌen aikotã moryꞌa epo pe hap ewy. Kat pote ahiag awyato marakꞌa hap ewy toineꞌen kowoꞌi kowoꞌi hewyry rakat ewy hesyꞌat rakat ewy. Toikat kahato Tupana hũria ipakuptia u hamo are. 9Pyno etiꞌawa ahiag -Waĩꞌeweiꞌe ahiag me. Iesui mohey hat uito eweiꞌe. Karãpe ewehoꞌopot kahato Iesui mohey haria eipe pote yt ewehehaꞌat reiꞌo yi kape kat pote iraniaꞌin mesuwarotiaria pyꞌasetpe kurum iwasuria makuptia eiperia ewy tukupteꞌen hoꞌopot hawe. Taꞌatukuap wy miꞌi pote waku hesaika rakaria ewywuat eweikupteꞌen ahiag sopo hamo are. 10Maꞌato Tupana ti eipowyro kahato hat toineꞌen uiwyriaꞌin ipakup takaria. Tutum neran ehepe yne tesaika hap yt kat saꞌup i. Toikyꞌesat kahato eiperia tomimotypot koꞌi wuatꞌi eꞌat piat hatno. Kat pote Aipotypot Iesui mohey haria eipe pote. Pyno hoꞌopot hap yt motꞌi hamuat i toineꞌen. Mukiꞌite eꞌihatꞌok eꞌihatꞌok hap ewy tokosap taꞌyn. Pyno waku etuꞌu hoꞌopot hap mesup miꞌi hawyi meiũran Tupana mimotag koꞌi wo eweikupteꞌen waku rakaria hãpyk kahato rakaria wo. Yt uwe mimaꞌat koꞌi wo i eweikupteꞌen. Meiũran Tupana ehay wywo ehesaika eweikupteꞌen. Miꞌi hawyi meiũran eiwanetup hap yt kowoꞌi kowoꞌi hin i toineꞌen. Hesaika rakaria wo Tupana mohey haria ewy eweikupteꞌen ewehoꞌopot hap tokosap hawyi ehãꞌãg hap tokosap hawyi are yne pe nagnia pe makuptiaria pe kurum iwasuria pe hirokaria pe yne pe are. 11Uito eiꞌapykok hat Peteru mio tã are yn Tupana pe -Atikyꞌesat kahato emotypot hap mesuwarote are. Atikyꞌesat yne miitꞌin epo pe are. Mesup mukiꞌite wuatꞌi eꞌat pe atikyꞌesat En Miitꞌin Potypot Koro wo are. Pyno waku toran naꞌyn uiꞌe hap uito Peteru. 12Pyno uito Siwanu atunug mesuwat miwan. Peteru wẽ pyi atiwan yne mesuwat sehay. Uhet wyti Siwanu. Uito areineꞌen aikotã eheywyt eikywyt yt eimaꞌat hat hin i ewywuat i areineꞌen. Atipoꞌoro mesuwat Peteru miwan Peteru e hap ehewowi uimiwan miat. Yne miitꞌin tikuap uimiwan aikotã aikotã atunug hap. Taꞌi heremo kahato uimiwan kaipyi uwe uito hap. Yt iwato hin i uimiwan. Pyno pywo kahato aimuꞌe mesuwe Peteru. Uiꞌe hap ewy kahato toꞌe mesuwe. Areꞌe Peteru e hap ewy uito. Taꞌi watopyhuꞌat ahãꞌãg hap turan wahoꞌopot turan miꞌi pote watopyhuꞌat wuatꞌi eꞌat pe Tupana mipoityro koꞌi wo. Tupana aikyꞌe kahato pote waku watopyhuꞌat yꞌam me hap ewy suraraꞌin ewy. Yt karãpe i watoiat aikyꞌe hat hegyiꞌat kahato pote are. 13Pyno Iesui mohey haria mesuwe kuekatu taꞌatupoꞌoro ehewowi are. Saꞌawyꞌi ti Iesui uiꞌairo mesuwe Tosaꞌyru eropat hat wo uiꞌairo are. Aikotã taꞌatuꞌairo eipe hap ewy. Miꞌi pote kuekatu atipoꞌoro ehewowi. Iꞌewyte yne uiwyworia Iesui mohey haria kuekatu ehewowi taꞌatupoꞌoro. Urupo wywo yꞌam me urueko ewy uruipoꞌoro kuekatu ehewowi. Uhaꞌyru iꞌewyte toineꞌen mesuwe. Uhaꞌyru set Maku. Miꞌi iꞌewyte kuekatu toipoꞌoro ehewowi are. 14Uiwyriaꞌin eiwoꞌokyꞌe ro eiwoꞌope. Waku eiwoꞌokyꞌe eiwoꞌope aikotã wẽtup mepytꞌin koꞌi ewy. Pyno ahẽtup Tupana pe -Tupana etunug no miꞌiria Esaꞌyru mohey haria wẽtup miit ewy are. Etunug miꞌiria woꞌokyꞌe kahato haria wo Tupana are kat pote taꞌatumohey Esaꞌyru Iesui pote are. Taꞌatumohey Emipoꞌoro uruporekuat nuat pote are. Pyno toran naꞌyn uiꞌe hap are.
Currently Selected:
1 Peteru 5: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.