1 Iuwãu 3

Haga Myẽꞌym 3

Tupana Emepytꞌin No Watoineꞌen

1Katupono ti iwato kahato Aiꞌywot piat aikyꞌe hap. Toimoherep kahato ti aikyꞌe hap tomepytꞌin wuat raꞌyn ainug hawyi. Taꞌi tegyiꞌat hap toimoherep kahato aikyꞌe hap. Pyno yt taꞌatukuap i Tupana pote iꞌewyte yt taꞌatukuap i aito Tupana mepytꞌin koꞌi hap. 2Uimikyꞌeria koitywy ti aito Tupana mepytꞌin naꞌyn. Taꞌi yt watikuap hin i ti aikotã miat aheineꞌen hamuat hap. Iesui uut hawyi ti aru watikuap aikotã me watoineꞌen hamuat katupono topiit ewy ti ainug hamuat. Miꞌi hawyi ti aru mekewat eꞌat pe wataꞌakasa raꞌyn Iesui sese. Miꞌi hawyi ti aru watopyhuꞌat aikotã iꞌewy raꞌyn are. 3Miꞌi hap watomohey yne eꞌat pe pote ti yt kat i saꞌag aipit pit hap topyhuꞌat. Miꞌi hawyi ti maꞌato poꞌog poꞌog aikoho hap toineꞌen. Miꞌi hawyi ti watoineꞌen aikotã topiit kahu hap ewy ainug. 4Maꞌato uwe uwe yt inug i Tupana piat tonapin hap koꞌi miꞌi hat Tupana piat yt naku i nug hat topyhuꞌat katupono karapeĩ watiꞌaparap Tupana piat ainapin hap motꞌi miꞌi hawyi yt naku i nug haria watoineꞌen Tupana wanetup hawe. 5Katupono Aikaꞌiwat yt karãpe i iꞌaparap Tupana pe. Maꞌato Aikaꞌiwat tuut hamuat yne yt nakuat i hep hamo. Miꞌi hap eweikuap taꞌyn. 6Iꞌewyte uwe uwe toineꞌen Aikaꞌiwat wywo kahato miꞌi hat yt iꞌaparap teran i Aikaꞌiwat pe. Toikyꞌe kahato haype. Maꞌato iraniaꞌin Aikaꞌiwat maꞌat haria miꞌiria kaipyi watikuap Aikaꞌiwat yt kuap i haria hap. Yt karamuat i Aikaꞌiwat mohey hanuaria i raꞌyn.

Uwe Saꞌag Tutunug Ahiag Watno Toineꞌen

7Uhakiꞌytꞌin uhaꞌyruꞌin eiweꞌeg wo o wẽtup sehay pupi. Eiweꞌeg wo o eimaꞌat hap pupi. Waku nug haria waku pe tukupteꞌen Tupana wanetup hawe aikotã Aikaꞌiwat toineꞌen waku pe Tupana wanetup hawe hap ewy. 8Maꞌato uwe uwe inug saꞌag Tupana pe miꞌi hat ahiag watno topyhuꞌat katupono saꞌawyꞌi wuat yt nakuat i nug hat sese ahiag. Miꞌi pote yt nakuat i akit hamo tuwemoherep Tupana Saꞌyru yne ahiag minug saꞌag koꞌi moma hamo tuwemoherep. 9Uwe uwe tuwemoherep Tupana mepyt no miꞌi hat yt toikyꞌesat i Tupana piat iꞌaparap hap katupono Tupana Paꞌãu toineꞌen ipiit pe. Miꞌi pote Toꞌywot atipy piat ewy topyhuꞌat. Yt toikyꞌesat i poꞌog saꞌag nug hap Tupana mepyt pote ti raꞌyn. 10Pyno yt toꞌoꞌewy hin i Tupana mepytꞌin ahiag wat wywo yt toꞌokupitu hin i. Katupono uwe uwe wakuat nug hatno topyhuꞌat iꞌewyte uwe uwe Tupana mepytꞌin kyꞌe hatno topyhuꞌat miꞌi hat ti topyhuꞌat Tupana saꞌyru wo Tupana sakiꞌyt koꞌi wo are.

11Pyno ahenoi i raꞌyn saꞌawyꞌi wuat sehay sese yianmiat Tupana ainapin hap -Eiwoꞌokyꞌe ro e Tupana saꞌawyꞌi. 12Saꞌawyꞌi sese toineꞌen Kaĩ e hap het rakat. Miꞌi yt ikyꞌe hin i toꞌywyt. Toiꞌauka neꞌi. Miꞌi pote yt naku i watoineꞌen Kaĩ minug ewy neꞌi.

13Uiwyriaꞌin tukupteꞌen miitꞌin mesuwarotiaria mekewat Kaĩ ewywuat yt naku i nug haria ahiag wywuaria aiꞌauka teran haria. Karãpe iꞌatupyꞌahak ahete miꞌi pote yt naku i watuwanetup koꞌi koꞌi neꞌi miꞌiria yt iꞌatuwese i ahete hap kape. 14Saꞌawyꞌi watukupteꞌen ikuꞌuro rakaria ewy Tupana wanetup hawe katupono yt watikuap i ihay pote. Katupono yt kat i aikai Tupana aimoieineꞌen pakup i hap. Maꞌato mio watoineꞌen Tupana wywo katupono koitywy aiwoꞌokyꞌe hap toineꞌen. Maꞌato yt kat i aiwoꞌokyꞌe hap aikai pote ikuꞌuro rakaria ewy watoineꞌen Tupana wanetup hawe. 15Maꞌato watoꞌoweukaꞌi neꞌi pote watukupteꞌen woꞌoꞌauka haria ewy watukupteꞌen Tupana wanetup hawe. Maꞌato woꞌopotꞌauka hat aito pote yt kat i Tupana kapiat aheineꞌen hap. 16Kat pote Aikaꞌiwat Iesui ikuꞌuro aikawiatno hamo raꞌyn. Ikuꞌuro hawyi yt kat i aikuꞌuro hap sese topyhuꞌat aikai. Pyno ikuꞌuro ahetiatno hap watikuap hawyi watikuap aikyꞌe hap sese. Koitywy waku watiꞌatupowyro wuatꞌi aiwyriaꞌin Iesui mohey haria aikuꞌuro hap kape. 17Hekat rakaria aito pote waku watimoꞌẽ ihakyꞌeꞌi rakat pe watipuẽti hawyi. Waku ahekat watum iꞌatuepe. Yt naku i watoꞌe aiwepe -Pyno yt naku i atimoꞌẽ uhekareꞌen ihakyꞌeꞌi rakaria pe. Mio tã watoꞌe pote yt kat i Tupana kyꞌe hap aikai. Yt ahegyiꞌat i pote yt naku i watoꞌe iraniaꞌin me -Tupana kyꞌe kahato hat uito yt naku i watoꞌe katupono yt pywo pe i watoꞌe. 18Yt naku i watoꞌokyꞌe ahehay wo yn uimepytꞌin. Waku watimoherep aiwoꞌokyꞌe hap aiwoꞌopowyro hap wywo are.

19Aiwoꞌokyꞌe sese pote miꞌi hap kaipyi watikuap taꞌyn pywo rakaria aito hap. Miꞌi pote karãpe watoineꞌen Tupana ehamo yt watuwemoti hin i Iesui mohey haria kyꞌe haria aito pote. 20Watiꞌaparap Tupana pe hawyi watuwemoti i raꞌyn maꞌato Tupana tikuap aiwanetup hap. Toikuap yt watunug neran i hap. Watuwemoti pykai aikyꞌe te koran. 21Maꞌato poꞌog waku yt kat i hin i aiwemoti hap Tupana ehamo watoineꞌen turan. Watunug yne Tupana mikyꞌesat koꞌi ainapin hap koꞌi miꞌi hawyi Tupana mowepiit haria wo watoineꞌen. 22Miꞌi hawyi kat e hap kat e hap wahẽtup tope hawyi tutum aimiẽtup oktan watunug imikyꞌesat ewy pote. 23Pyno ahenoi ehepe Tupana mikyꞌesat sese. Mio tã e -Eweimohey ro Uhaꞌyru e. Ewetunug Miꞌi Eiporekuat no e. Miꞌi hawyi eiwoꞌokyꞌe ro aikotã Eikaꞌiwat Iesui e hap ewy e Tupana ahepe. 24Uwe uwe Tupana piat tonapin hap inug miꞌiria ti tukupteꞌen kahato Tupana wanetup hawe. Tupana tomoieineꞌen tomohey haria wo tukupteꞌen hap. Iꞌewyte Tupana toineꞌen iꞌatupyꞌa pe. Tupana tum naꞌyn Topaꞌãu ahepe hawyi watikuap kahato watoineꞌen hap sese tepiat hamuat. Miꞌi hawyi watikuap kahato raꞌyn Tupana toineꞌen aipyꞌa pe hap.

Currently Selected:

1 Iuwãu 3: mav

Highlight

Copy

Compare