1 Kuriniu 16
16
Haga 16
Waku Iesui Mohey Haria Powyro Haria Wo Watoineꞌen
1Pyno koitywy ahenoi teran aikotã waku watipowyro Iesui emiitꞌin koꞌi mekewat aimiium teꞌen neꞌi rakat wywo aikotã saꞌawyꞌi ahenoi tawa Karasia piaria pe. Aikotã aikotã waku watimoꞌẽ ahekat hap ete eweikuap hawyi waku ewetunug. 2Pyno o yne torannia mytuꞌu eꞌat pe waku eiwanetup o gaꞌatpo 6 eꞌat eipotpap gosap hap kape aikotã aikotã Tupana eikyꞌe hap tutum hap kape aikotã eipowyro hap kape. Miꞌi hawyi kat koꞌi kat koꞌi Tupana tum ehepe mekewat 6 eꞌat piat hawyi waku miꞌi o eweipatꞌok ehekat hawyi ewetum neꞌen neꞌi Tupana pe aikotã Tupana tum neꞌen neꞌi tegyiꞌat hap ewy. Aikotã aipoitynug kahato hap kaipywiat hap ewy waku watum. Miꞌi hawyi etioto o emiium Tupana motypot yat kape hawyi etoiat emiium itote imotypot hamuat. Torannia eimiium eꞌyparakai tote hawyi waku watipoꞌoro miꞌi Iesui mohey haria satek takaria tawa Ierusarẽi piaria powyro hamo Iuteuria powyro hamo. 3Pyno putꞌok are i raꞌyn itote hawyi eweiꞌairo eipyꞌasetpyi uwe mekewat eimiium ereto hanuat haria. Miꞌi hawyi ti aru atunug iwan eimiereto wuat eipe Iesui mohey haria sese kuap hamuat. Miꞌi hawyi eweipoꞌoro eimiium neꞌen neꞌi mekewat Ierusarẽi kapiatno haria upi mesuwat uimiwan nywo. 4Uipoꞌoro teran eipe pote areto waku wy iraniaꞌin tuwat uhupi eweikyꞌesat pote waku wy yt pote yt. 5Pyno uhewyry teran yi Masetunia puo hawyi putꞌok are ehetawa Kurintiu pe te. 6Pyno iꞌaman mot eꞌat pe putꞌok are pote areineꞌen motꞌi iꞌaman mot pe itote tawa Kurintiu pe eiwywo. Miꞌi hawyi waku uipowyro muap saꞌup ete mekewat uito hap saꞌup ete. 7Taꞌi areineꞌen motꞌi teran ni eiwywo itote.
8Areineꞌen mesuwe tawa Ewesu pe. Karamuo putꞌok e mekewat eꞌat Esituꞌin po pywiat watetup hap eꞌat pe atimotypot teran Tupana mesuwe haype. Waku hawyi areto ehewowi. 9Iꞌatu kahato uipyhyp teran haria mesuwe maꞌato yt uipyhyp kuap i katupono Tupana uipowyro kahato. Miꞌi pote arepotpap kahato ipotpap nug hamuat ete. Waku kahato miꞌi hap uhete.
Waku Kurintiu Piaria Timoteu Powyro Haria Wo Teꞌeropyhuꞌat
10Maꞌato tuut uimepyt Timoteu eiꞌyat kape hawyi -Ereke ro eweiꞌe tope ikyꞌe hap wywo aikotã uikyꞌe hap ewy te katupono uiꞌewy kahato ipotpap Tupana potpap nug hap ete. 11Yt eweimohit teiꞌo eimuꞌe hat Timoteu are. Eweimotypot o miꞌi are. Miꞌi hawyi karãpe toto teran i raꞌyn uhowowi miꞌi hap eꞌat pe o ewetum muap saꞌup tope hap atikyꞌesat. Iꞌewyte karãpe toto teran wẽtup tawa kape tuereto iꞌatumuꞌe hamo turan o ewetum muap saꞌup tope hap atikyꞌesat. Ahekatup Timoteu mesuwe iraniaꞌin wywo.
12Atikyꞌesat kahato aimuꞌe hat uhyt Apauru atipoꞌoro eimuꞌe hamo -Waku ti ereto tawa Kurintiu piaria powyro hamo iraniaꞌin powyro hamo areꞌe wen tope maꞌato -Yt areto i te Katupono yt uipohepap i te mesup e uhepe maꞌato meiũran waku yne hawyi areto tawa Kurintiu piaria powyro hamo e uhepe. Uipotpap putꞌok e hap eꞌat pe waku pe yne mesuwe hawyi areto aru iꞌatuewowi e Apauru uhepe.
13Iesui ekuekatu kape o mehit eweiꞌe poꞌog poꞌog wuatꞌi eꞌat pe. Yt naku i waure wo watoineꞌen aimimohey Iesui kai miitꞌin mimoweukaꞌi watopyhuꞌat hawyi. Maꞌato yt naku i aikohyeput Tupana wanikap pupiat. Waku suraraꞌin hesaika kahato rakaria ewywuat watoineꞌen Tupana potpap nug hap ete. 14Pyno waku yne aiminug koꞌi watunug miitꞌin kyꞌe hap wywo.
15Pyno uiwyriaꞌin waku eweiwat aimuꞌe hat Etewana ehay upi katupono miꞌi ti eiꞌapykok kahato hat mesuwat Iesui mohey hap ete. Miꞌi pote eweiwat ro mehin Etewana ehay upi eweipowyro o miꞌi. Miꞌi ti eiꞌywania kawiat mekewat Kereku ywania sese kawiat aimuꞌe hat Etewana. 16Miꞌi ti nimo pyi kahato Iesui mohey hat topyhuꞌat. Miꞌi turan ti miꞌi yn toineꞌen Iesui mohey hatno. Miꞌi tupono waku watunug mehin Etewana yianme eiꞌapykok hat eꞌakag wo itote katupono miꞌi ewywuaria Iesui emiit no woꞌopotkyꞌe kahato hat miꞌi. Iꞌewyte yne toꞌyat piaria wywo te waku paĩ. Miꞌiria ewywuat waku aiꞌapykok hanuaria. 17Gaꞌatpuat rẽ putꞌok iꞌatuꞌe meiũpe emipoꞌororia aiwy Etewana aiwy Wutunatu iꞌewyte aiwy Akaiku wywo. Miꞌi pote arehum kahato iꞌatuwywo katupono uipowyro kahato haria ti miꞌiria Iesui potpap etiat haria miꞌiria eipe yt uwe i uipowyro haria pykai. Miꞌiria aikotã eipe uipowyro hap ewy te meiũpe ehaipe kai uipowyro. 18Taꞌi miꞌiria ti mohag ewy kahato uimowepiit kahato haria. Maꞌato iꞌewyte yt uipohag yn i maꞌato yne aipohag no tukupteꞌen miꞌiria. Taꞌi aiwehum hap eiam kahato Etewana ywaniaria are. Waku watimotypot miꞌiria iꞌewyte torannia yne miꞌiria ewywuaria waku watimotypot. Iꞌewyte waku miꞌi tã haria ewywuaria eweikat eiꞌapykok hamo.
Yi Asia Piaria Kuekatu Taꞌatupoꞌoro
19Pyno meiũpe Iesui mohey haria yi Asia piaria teꞌeruwehay poꞌoro kahato eikyꞌe hap wywo. Iꞌewyte mehin Akira iꞌewyte mana Pirisa e hap ipoꞌoro teꞌeruwekuekatu sese ehewowi. 20Taꞌi aipoitynug ni Aikaꞌiwat Iesui iꞌatuꞌe katupono koitywy Tupana motypot hap toineꞌen naꞌyn iꞌatuꞌyat pe. Pyno ti uruweꞌatunug hap toineꞌen naꞌyn iꞌatuꞌyat pe. Pyno ti ehekatuwyria meiũpiaria ehewowi teꞌeruwehay poꞌoro torannia Iesui mohey haria. 21Miꞌi hawyi uito Pauru iꞌewyte atipoꞌoro uimiwan eikyꞌe uhepiat hap etiat maꞌato uipo wuat atipehik mesup uhet. Pauru uhet are hap atiwan. Kuekatu atipoꞌoro ehewowi are atiwan naꞌyn uiꞌe hap. 22Tuut irane tuut irane Aipotypot Iesui waku watoꞌe. Eiweꞌeg wo o katupono yt torannia i ikyꞌe haria. 23Pyno ahẽtup Aikaꞌiwat Iesui kape uiwyriaꞌin tawa Kurintiu piaria -Etiꞌatukyꞌe teꞌen neꞌi o egyiꞌat hap kaipyi aat kaꞌap. Etiꞌatupowyro miꞌiria Iesui areꞌe. 24Pyno ti pywo ti worohoꞌokyꞌe kahato eipe torannia eiperia kat pote eipe Iesui emiitꞌin sese raꞌyn eweipyhuꞌat pote worohoꞌokyꞌe. Toran naꞌyn mesuwe uimiwan ehowawiat.
Toran uimiwan mesuwe. Uito ti Iesui mipoꞌoro tepiat sehay moherep hamo.
Currently Selected:
1 Kuriniu 16: mav
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
